2 Tesalonaika 3 - Mɨkan wu Fi

A Ntsaʼtɨnə a Ŋwi Mbɨ́ʼ Awɨgɨ ə

¹ A ndwɨgɨnə nə ɨbɔmbɨma ɨbɨgɨ, á nɨ ntsáʼtə́ a Ŋwi mbɨ́ʼ awɨgɨ, ngə́ á nkən Maʼmbyí ngěn nɨ mbyi, ngwáŋnə́ ndzagɨnə, á bɨ kɨ nkwarɨ a wɛrə nɨ nkɔʼsə atɨ́, tsɛʼ adzaŋ za a bénɨ́ a tɨtərɨ bən lá.

² A nɨ kə́ ntsáʼtə́ a Ŋwi ngə́ á Ŋwi a kwarɨ awɨgɨ a mbó ɨbɛn bɨ abɨgəntəm abɔʼnɨ ɨbɛn bə tɔmnɨnɨ; mbɨ́ʼ ngə́ ka a be ayi ŋwɔn tsum wa a tsinɨ nɨ abeməntəm a nye Kristo ghe.

³ Lá Maʼmbyí a soŋ a mɔ́ʼɔ́ lá a nu mɔ́ʼɔ́ ghe. Wɛrə a mɨ shintɨ mɨntəm ɨmən, ɨ kɨ baʼtɨ awən a mbó Wu Ntɔmnɨnɨ wa.

⁴ Maʼmbyí a ghɨə bɨgɨ zɛʼtɨnə a nye bən, nkɨ nji ɨ shiʼnɨ ngə́ nɨ ghɨə, ɨ ghɨ kə́ ghěn nɨ mbyi a ngɨ tsa bɨgɨ soŋnɨ a mbó bɨŋ ə.

⁵ A Maʼmbyí a tsagɨnɨ awən a ndzúʼə ɨ kɨ zhi ɨ ghɛn nɨ mbyi nɨ akɔŋnɨ a Ŋwi abɔʼnɨ achigəntəm, tso mbáʼ Kristo a kɨ́nɨ́ nkɨ́ nchigɨ lá.

Ŋwɔn Tsum a Tsi nɨ ɨ Zagɨ Faʼnə ghe

⁶ Ɨbɔmbɨma ɨbɨgɨ, bɨgɨ tɨ́gɨ́tə́ awən nɨ ɨkum Maʼmbyí Yeso Kristo ɨwɨgɨnə ngə́ á nɨ keʼ tsi nɨ anu a ngɨə bɨŋ bɨ mɨma tsum wa a tsinɨ a mu ntsi mbyi anarɨ, wa a se nkə́ ndzɔ̌ŋ ntɨgə tsa bɨgɨ ghánɨ́ a mbó bo lá.

⁷ Bɨŋ mboŋ nɨ zhi ɨ shiʼnɨ ngə́ nɨ tsi nɨ ngɨə tsɛʼ ɨnu tsa bɨgɨ ghɨ́nə́. Bɨgɨ sé nárə́ mbáʼ bɨgɨnə tsínə́.

⁸ Bɨgɨ sé kwárɨ́ mɨdzɨ mɨ ŋwɔn tsɛrə tɨ tfu nkáb ɨzhi ɛ. Bɨgɨ kə́ mbaŋnə fáʼə nkə́ nyúʼnə́; bɨgɨ kə́ faʼə nəzhwɨgɨnɨ bo nɨ ɨtfúʼ taŋ ɨ keʼ abyɛʼ a mbó ŋwɔn nɨ bən wu tse be ə.

⁹ Bɨgɨ ghɨ́ a məzen, nkeʼ be be mbɨ́ʼ ngə́ a sé adiʼ azɨgɨ be a mbítɨ́ mɨdzɨ ɨmɨgɨ; bɨgɨ ghɨ́ a zɛrə taŋ ɨ be alisɨ, á nɨ ndzɔ́ŋə́ ghe.

¹⁰ Mbáʼ bɨgɨ tsínɨ́ bɨgɨnə, bɨgɨ kə́ sóŋə́ a mbó bən nɨ nkfu nɨ nkfu ngə́, “Ŋwɔn tsum wa a tonɨ ayi ɨ faʼə, á bɨ keʼ nyɛʼtɨ ngə́ á dzɨə.”

¹¹ Bɨgɨ sóŋə́ a zen lá mbɨ́ʼ ngə́ bɨgɨ zuʼ ngə́ ɨbɛn bə tsɛrə tsi ɨwu a tɨtərɨ bən ba bo tsinɨ a mu ntsi mbyi anarɨ, nkeʼ anu zə tsɛrə a ngɨə ntsa nkuŋə a mu ɨnu ɨbɛn bədaŋ ə.

¹² Nɨ ɨkum Maʼmbyí Yeso Kristo, bɨgɨ sóŋə́ a mbó ɨbɛn məben nkə́ nkwántə́ awa ngə́ á bo tsi a mu ntsi mbyi za ɨ tsinɨ nɨ akyaŋtɨ nkə́ fáʼə taŋ ɨ chi ze aza azúm zə dzɨnə.

¹³ Lá bən, nə ɨbɔmbɨma, á nɨ zagɨ keʼ nkə̌ a ngɨ ɨbɔŋ ə.

¹⁴ A chi be ngə́ ŋwɔn tse ɨ gha a mɨ keʼ nkən wen wa bɨgɨ tsagɨnɨ a mbó bən a mu aŋwaʼnɨ zen lá zuʼnə. A be ma lan, á nɨ ze ayi ɨ shiʼnɨ, nkeʼ tsi nɨ anu zə tsɛrə a ngɨə bɨŋ bo, taŋ á atú azhi a dɨrə.

¹⁵ Lá á nɨ keʼ ayi tiʼtɨ tso ŋwɔn kɨban; nɨ baŋnɨ nkwantɨ ayi tso mɨma wa bɨŋ bo nɨŋnɨ mɨntəm ɨmɨŋ bo a nye Kristo ghe.

Atɔ́ŋtɨ a Ndwɨgɨnə ghe

¹⁶ A Maʼmbyí zɨmboŋ, zɨ wa a ghánɨ́ mbɔnɨ, a gha mbɔnɨ a mbó bən nkfu tsum, a nye mɨndóm mɨtsum ə. A Maʼmbyí a tsi a mbó bən bɨtsum ə.

¹⁷ Ma ŋwaʼnɨ a zen tsɛʼ me mboŋ nɨ abó azan ngə́: Baolo a tɔ́ŋtə́ awɨŋ ə. Nə nɨ ndóm wa ma nyɔʼnə abó azan a nye ɨŋwaʼnɨ ɨtsə ɨtsum ə; nə nɨ ndóm wa ma ŋwaʼnɨnə nkfu tsum ə.

¹⁸ A abɔŋəntəm a Maʼmbyí Yeso Kristo ɨwɨgɨnə a tsi a mbó bən bɨtsum ə.