2 Tesalonaika 2 - Mɨkan wu Fi

Ŋwɔn Abɨgəntəm ə

¹ Tɨtsɔŋnɨ, á ma gham anu mbɨ́ʼ adzaŋ za Yeso Kristo Maʼmbyí ɨwɨgɨnə a lo bə yen abɔʼnɨ adzaŋ za bɨgɨnə ghǒtɨ́nə́ táʼ adiʼ taŋ ɨ bomnkɨ bɨgɨnə bo lá: ma buʼ mbó a mbó bən nə ɨbɔmbɨma ɨban,

² ngə́ á ɨtú ɨtsɨŋ keʼ yaŋnɨ mbvǔrɨ kə á mɨntəm ɨmɨŋ nghágə́ awən mbɨ́ʼ adzaŋ za bɨ sóŋnə́ ngə́ Njwi Maʼmbyí za ɨ yenə ghe. Aghagɨ a tsɛrə bɨ kwaʼtɨ ngə́ bɨgɨ sóŋ a məzen lá a nkfu za bɨgɨ kɨ́nə́ fɨʼtɨ nkən wu tse wa ɨ lónɨ́ a mbó Ŋwi, kə a nkfu za bɨgɨ kɨ́nə́ sóŋə́ anu a Ŋwi, kə ngə́ bɨgɨ ŋwáʼnɨ́ a zɛrə a mu aŋwaʼnɨ zə tsɛrə ghe.

³ A nɨ keʼ nyɛʼtɨ á ŋwɔn tse a tamtɨ awən a nye ndóm tse ghe. Mbɨ́ʼ ngə́, Njwi za mɨ keʼ yen tɨgha Mbənkə ɨ Ton a Ŋwi zɨ ntsɨrɨndzum ɨ lɔgɨ adiʼ, Ŋwɔn Abɨgəntəm a fu a ɨshe, zɨ wa a mɨ ghɛn lwɨgɨnɨ a mu ɨmugɨ nɨnkoŋ wa lá.

⁴ Wɛrə a mɨ kwənkɨ ɨ tɛgɨ atuəmbəm azhi atú azúm atsum za bɨ tɔ́ŋnə́ ngə́ ŋwi nkə́ ngúʼsə́ ghe. Wɛrə mɨ tagɨ ayi ɨ ghɛn kon a mu Nɨshwim nɨ Ŋwi, ɨ shiʼtɨ tsi, ɨ soŋ ngə́ zɨə nɨ Ŋwi ə.

⁵ Nɨ se mbvúrə́ ngwáʼtə́ le? Ma sóŋ a mətsiŋ ɨtsum a mbó bən mbáʼ ma tsínɨ́ bɨgɨnə ghe.

⁶ Lá azúm zə tse a tsi ɨwu za a chwánə́ a məzen a fúə tɨtsɔŋnɨ ə. Nɨ zhi a zɛrə ghe. Ŋwɔn Abɨgəntəm a mɨ tiʼ fu a ɨshe a nye nkfu za ɨ kuʼnɨnɨ ə.

⁷ Abɨgəntəm za a nyáʼnə́ faʼə ndzum ndzum a kwɛnə ntsi afaʼ, lá anu za a mɨ fu, a mɨ keʼ fu tɨgha bɨ fɨgɨ a ŋwɔn wa a kə́nə́ a zɛrə a ndómnji ɛ.

⁸ Bɨ mɨ tiʼ kyɛʼ a Ŋwɔn Abɨgəntəm ə. Lá a nkfu za Maʼmbyí Yeso a yenɨ, wɛrə a mɨ zhwitɨ ayi nɨ azhwi za a funɨ a ntsu zɨ, ɨ kɨ tsənkɨ ayi nɨ nkaʼ wa ɨ dzinkɨnə ɨfúə wə ɨnye adzaŋ za a yenə ghe.

⁹ Ŋwɔn Abɨgəntəm a mɨ yen nɨ ngɨnɨ mɨnu mɨ Satan, ɨ ghɨ mbúŋ ɨnu tsɨ yerɨnɨ-yerɨnɨ tsɨ ɨchwenu abɔʼnɨ tsə tsanɨnɨ tsɨ ɨchwenu,

¹⁰ ɨ kɨ ghɨ mbúŋ ntám ɨtsum wa abɨgəntəm a chinɨ yen nɨ wɛrə a nye bo ba bɨ ghɨnɨ ghɔʼnɨ lá. Bo ghɨ ghɔʼnɨ mbɨ́ʼ ngə́ bo sé kwárɨ́ nkɨ nkɔŋ nkənu taŋ á bɨ loŋ awa ghe.

¹¹ Ma lan, Ŋwi a tsagɨ mɨtən mɨ ɨfənu a mu ɨnye ɨtsa taŋ á mɨ ghɨ á bo nɨŋ mɨntəm ɨma a nye ɨchwenu ə.

¹² Za a ghɨ tsi ɨwu a ndwɨgɨnə a nɨ ngə́ ɨbɛn bɨtsum ba bɨ bvurɨ tɨ nɨŋ mɨntəm ɨma a nye nkənu, lá ndórɨ́kə́ a ngɨ mɨbvu, bɨ ghɨ tsənkɨ awa ghe.

Ŋwi a Tsɔʼ awən lá a Ngá Ɨloŋ a mbó bɨŋ ə

¹³ Ɨbɔmbɨma, bɨgɨ mɨ zagɨ ghanə a mɨya a mbó Ŋwi nkfu tsum a nkfu bən, bən ba Maʼmbyí a kɔŋnɨ lá. Mbɨ́ʼ ngə́ Ŋwi a tsɔ́ʼ awən tso bɨtsa bɨ mbyi ba bɨ lóŋnɨ́ awa ntsa lá a ndzum Azhwi zə Fɛmnɨ nkɨ ntsa a ndzum abeməntəm azən a nye nkənu taŋ ɨ ghɨ awən a nye ɨbɛn ɨbyi bə fɛmnɨ ə.

¹⁴ Ŋwi a tsɔ́ʼ awən a nye məzen ntsa lá a ndzum Nkən wu Shiʼnɨ wa bɨgɨ sóŋnɨ́ a mbó bən; wɛrə a tsɔ́ʼ awən lá ngə́ á nɨ tsi nɨ azɨŋ abagɨ a nɨfáŋ nɨ Maʼmbyí Yeso Kristo ɨwɨgɨnə ghe.

¹⁵ Ma lan nə ɨbɔmbɨma ɨbɨgɨ, á nɨ tɛm ntɨŋə ngə́ twə́ŋ, nkɨ ntiʼtɨ nkənu za bɨgɨ díʼnɨ́ awən nɨ zɛrə a mu anu a Ŋwi za bɨgɨ sóŋnɨ́ a mbó bən abɔʼnɨ aŋwaʼnɨ za bɨgɨ ŋwáʼnɨ́nɨ́ a mbó bən lá.

¹⁶ A Maʼmbyí ɨwɨgɨnə, Yeso Kristo zɨmboŋ bo Ŋwingɔŋ Ta ɨwɨgɨnə, zɨ wa a kɔ́ŋnɨ́ awɨgɨnə nga awɨgɨnə nɨ nkotɨ mbáŋnɨ́ za ka ɨ nkyɛ́ntə́ ayi abɔʼnɨ ntsiŋə nɨ ntəm tsum za ka ɨ nchíʼnə́ ayi a mu abɔŋəntəm azhi,

¹⁷ á bo wɔŋtɨ nkɨ shintɨ awən a ngɨə ɨ kɨ soŋ a za a bɔŋnɨ nkfu tsum ə.