2 Korɨnto 8 - Mɨkan wu Fi

Adzaŋ za Ɨbɛn ba bɨ Zɔŋnə a Kristo Tsinɨ nɨ Ngǎ ghe

¹ Ɨbɔmbɨma ɨbɨgɨ, bɨgɨ lǒ ɨ fɨʼtə á nɨ zhi anu za abɔŋəntəm a Ŋwi a ghɨnə a mu ndáŋwi tsa tsɨ tsinɨ a Masedonia lá.

² Bɨ zhwəŋtɨnə awa a nye nji adaŋ ntsa a ndzum ngɨ́ʼ za bo zɛ́nə́ ghe. Bo baʼtɨ mbe be ɨfúm lá, nɨdorɨ ɨna gháʼ be tɨ́sə́n a nye ndóm wa bo ghánə́ tə́ ndə́ŋtə́ ghe.

³ Tsɛʼ a nkənu, bo ghá a gháʼ nkɔʼ nkuʼ ndvuŋ wa bo kɨ chinɨ gha, nkɨ ngháʼ titi ntsa adzaŋ za bo kɨ chinɨ gha. Tsɛʼ nɨ za a fúnɨ́ a mu ntəm bo

⁴ bo búʼ mbó a mbó bɨgɨ ngə́ á be adiʼ aza a ngá akwatɨ a mbó ɨbɛn bɨ Ŋwi a Yerosalɛm ə.

⁵ Məzen a tsá a za bɨgɨ kɨ chinɨ tsiŋə nɨ ntəm tsum ngə́ á bo gha! Bo fóm ngá ɨtumbəm ɨtsa a mbó Maʼmbyí ɛ; ntiʼ ndzɔŋtɨ nkɨ nga ɨtumbəm ɨtsa a mbó bɨgɨ ntsa a ndzum adzaŋ za Ŋwi a kɨ́nə́ ndǒ ghe.

⁶ Ma lan, bɨgɨ búʼ mbó a mbó Tɨ́tósɨ wa a bíʼnɨ́nɨ́ afaʼ məzen, ɨ soŋ wəmbo ngə́ á ghɛn nɨ mbyi nkwatɨ awən á nɨ mɛtɨ afaʼ a ngá tə́ ndə́ŋtə́ məziŋ ə.

⁷ Lá nɨ lon nkɔʼ ndzabtɨ a nye anu atsum: a mu abeməntəm, nɨgham, azhyɛ, a nye mbɛbə za nɨ bɛ́bɨ́nə́ a ngá akwatɨ abɔʼnɨ akɔŋnɨ azən a mbó bɨgɨ ə. Ma lan, bɨgɨ kə́ ntíʼə ndǒ ngə́ á nɨ kɨ ndon nkɔʼ ndzabtɨ a mu afaʼ a ngá tə́ ndə́ŋtə́ məziŋ ə.

⁸ Ka ma soŋə aghə a məzen lá tso ntɨgə zɨ tse ghe. Lá a ndiʼə adzaŋ za ɨbɛn bə mɔʼɔ bɛ́bɨ́nə́ a ngá akwatɨ, ma zhwə́ŋtə́ lá a ntsɔ́ʼnɨ́ aku ɨ zhi ɨfɨʼ za akɔŋnɨ azən a nɨ ngótɨ́ zɛrə ghe.

⁹ Nɨ zhi abɔŋəntəm a Maʼmbyí Yeso Kristo ɨwɨgɨnə ghe; wɛrə a tsí nɨ afuʼ tsɛʼ nkə, lá ngɨ atuəmbəm azhi a nye afúm mbɨ́ʼ atú azən, taŋ ɨ ghɨ awən a nye ngaŋ afuʼ ɨ tsa a ndzum afúm azhi ɛ.

¹⁰ A nye anu məzen, atɨgɨtɨ azə nɨ ngə́ a bɔŋ ngɛn nɨ mbyi á nɨ mɛtɨ tɨtsɔŋnɨ anu za nɨ bíʼnɨ́nɨ́ alom yirɨ ə. Nɨ bé bə ntsambyi, nkeʼ tsɛʼ a ngɨə be, lá nkɨ mbe bə ntsambyi a nkɔŋ ngɨə ghe.

¹¹ Nɨ ghɛn nɨ mbyi nɨ zɛrə, ntiʼ mɛtɨ afaʼ azɨŋ ə! A nɨ mbɛ́bə́ a mɛtɨ zɛrə adzaŋ za nɨ kɨ́nə́ mbɛ́bə́ a nkaʼ zɛrə, ntiʼ faʼnə a zɛrə nɨ za nɨ tsinɨ nɨ zɛrə tɨtsɔŋnɨ ə.

¹² Be nɨ mbɛ́bə́ a ngá muŋ Ŋwi a mɨ kwarɨ azúm zə ghanɨ azən məzen ndzɔŋə a za nɨ tsinɨ nɨ zɛrə a ngá, nkeʼ be be za ka nɨ tsi awən nɨ zɛrə ghe.

¹³ Ka ma njwə́ŋtə́ aghan lá a ntsɔ́ʼ abyɛʼ a ntɔŋ bə mɔʼɔ ɨ baŋnɨ tɛgɨ abyɛʼ a ntɔŋ bɨŋ ə,

¹⁴ lá ngə́, tɨtsɔŋnɨ wa nɨ tsinɨ nɨ zɛrə a ghaʼtɨ lá, a kuʼnɨ ngə́ á nɨ kwatɨ ɨbɛn ba bɨ boŋnɨ, taŋ bo ghɨ́ nkɨ́ ntsi nɨ zɛrə a ghaʼtɨ a nkfu ndzum bo kɨ nkwatɨ awən mbáʼ nɨ boŋnɨ; adzaŋ məwen, ŋwɔn tsum a tsi ndəŋndəŋ ə.

¹⁵ Tso mbáʼ aŋwaʼnɨ a Ŋwi a soŋnɨ ngə́, “Zɨ wa a fúʼnɨ́ mɨ ghaʼ, a sé nɨ zə ghaʼnɨ tsi, zɨ wa a fúʼnɨ́ a kɨgɨ, a sé nɨ za a kɨgɨnɨ tɨ́sə́n chyɛ.”

Tɨ́tósɨ bo bɨ Ngaŋ Aku ɨchi ɛ

¹⁶ Bɨgɨ gha a mɨya a mbó Ŋwi, zɨ wa a ghɨnɨ Tɨ́tósɨ a bɛbɨnə tso bɨgɨ a nkwátɨ́ bɨŋ ə.

¹⁷ Wɛrə a sé bém anu za bɨgɨ sóŋnɨ́ wəmbo tsɛʼ bemnɨ, atuəmbəm zɨ wɛrə a kə́ mbɛ́bə́ a nkwátɨ́ bən a nye ndóm wa wɛrə a tsɔ́ʼnɨ́ a mu ntəm zɨ ɨ yen kwatɨ awɨŋ ə.

¹⁸ Bɨgɨ mɨ tsagɨ awa mɨma ɨwɨgɨnə wa bɨ zhinɨ ayi tso ŋwɔn wu shiʼnɨ a mu ndáŋwi ɨtsum mbɨ́ʼ adzaŋ za wɛrə a sóŋnɨ́ nkən wu shiʼnɨ lá,

¹⁹ nkeʼ tsɛʼ məza be, ndáŋwi ɨtsum tsɔʼ ayi ngə́ á wɛrə a kwiʼtɨ awɨgɨ, á bɨgɨ bo númə́ nkárə́ faʼə afaʼ akɔŋnɨ məzen, mbɨ́ʼ atú a nɨfáŋ nɨ Maʼmbyí, taŋ ɨ kɨ diʼ ngə́ bɨgɨ lǒ ngǎ akwatɨ ə.

²⁰ Ka bɨgɨ ndǒ awɨgɨ ngə́ á ŋwɔn tsɛrə a gha ɨfərɨ ɨwɨgɨ mbɨ́ʼ adzaŋ za bɨgɨ yɛbtɨnɨ ɨdzúm tsen tsa bɨ ghanɨ tə́ ndə́ŋtə́ lá.

²¹ Mbɨ́ʼ ngə́ bɨgɨ lǒ a za a kuʼnɨnɨ, á keʼ be tsɛʼ a ɨshi Maʼmbyí, lá ɨ kɨ be a ɨshi ŋwɔn mɨsɔŋ a ntsu ə.

²² Ma lan, bɨgɨ tsagə a mɨma ɨwɨgɨ bo bo ghe. Bɨgɨ zhwəŋtɨnə ayi nkfu tsə ghaʼnɨ ndzɛn ngə́ a bɛ́bɨ́ nkfu tsum a nkwátə́ ghe. Tɨtsɔŋnɨ wa a lɛnɨ ntəm ɨyi a nye bən tsɛʼ a nkan lá, a bɛ́bə́ tsɛʼ nkan ngɛn nɨ mbyi a nkwátə́ ghe.

²³ Ɨ bə ghɛn a nye Tɨ́tósɨ, wɛrə nɨ ŋwɔn aku ɨghan, bɨgɨ zɨ kə faʼə a nkwátɨ́ bɨŋ ə. Ɨ bə ghɛn a nye ɨbɔmbɨma bə mɔʼɔ ba, ba bɨ tsinɨ aku bo bo lá, bo be lá ntóm ndáŋwi, nkə́ ngyíŋə́ nɨ nɨfáŋ a mbó Kristo ghe.

²⁴ Ma lan, á nɨ diʼ akɔŋnɨ azən a mbó bo, taŋ á ndáŋwi tsiŋ ɨtsum zhi a zɛrə ɨ shiʼnɨ, nkɨ nji ngə́ ka bɨgɨ ntɛ́rə́ awɨgɨ mbɨ́ʼ awən lá adaŋədaŋə ghe.