2 Korɨnto 7 - Mɨkan wu Fi

¹ Mbáʼ bɨ ghɨnə ɨkaʼ tsen ɨtsum a mbó bɨgɨnə lá, nə bɨbɔŋ bɨson ɨban, á bɨgɨnə sugɨ ɨtumbəm ɨtsɨgɨnə a nye ɨnu ɨtsum tsa tsɨ ghɨnə mbəmnye nɨ azhwi keʼ fɛ́mə́, ngɨə á nɨfɛm kɔʼ ndon a mu mbɔgɨtɨ Ŋwi ə.

Nɨdorɨ nɨ Baolo ghe

² A nɨ ŋaʼ mɨntəm ɨmən a mbó bɨgɨ ə; bɨgɨ se anu a ŋwɔn tsɛrə fə, nkeʼ ghɨ á ŋwɔn tsɛrə a ghɨ ɨbvu wu tsɛrə, nkeʼ a ŋwɔn tsɛrə kɨ ntamtə.

³ Ka ma sóŋə́ aghan ngə́ nɨ fə anu zə tse, mbɨ́ʼ ngə́ ma kwɛnə soŋ ngə́ nɨ tsi a mu mɨntəm ɨmɨgɨ, a nye ndóm wa bɨgɨnə chi keʼ shwɛkɨ a ntsi ntən kə a nkfó ghe.

⁴ Ma len ntəm ɨghan tsɛʼ a nkan a nye bən; ma ŋǔʼ ɨnye ɨzan tsɛʼ a nkan mbɨ́ʼ awən, ntəm ɨghə wɔŋtə aghə. A mu ngɨ́ʼ ɨzɨgɨ tsum, ma dórə́ be tɨsɨŋə.

⁵ Mbáʼ bɨgɨ yénɨ́ nkón a Masedonia lá, bɨgɨ sé zhwitə. Ngɨ́ʼ ɨ tsí ɨdiʼ ɨtsum, ɨbɛn zɔŋnɨnə bo bɨ bə mɔʼɔ, nɨbɔgɨ tsí a mu mɨntəm ɨmɨgɨ ə.

⁶ Lá Ŋwi, zɨ wa a lɛ́tɨ́nɨ́ mɨntəm mɨ ɨbɛn ba bɨ dzə́ŋnɨ́nə́, a lɛ́tɨ́ awɨgɨ ngɨ Tɨ́tósɨ a yen nkwatɨ awɨgɨ ə.

⁷ Bɨgɨ sé dorɨ lá tsɛʼ mbɨ́ʼ ngə́ a yén, a kɨ́ mbé mbɨ́ʼ nkən mbɨ́ʼ adzaŋ za nɨ lɛ́tɨ́nɨ́ ayi ɛ. A sóŋ a mbó bɨgɨ ngə́ nɨ kə́ mbɛ́bə́ a ndzé me, ngə́ nɨ dzə́ŋnɨ́ be tɨ́sə́n, abɔʼnɨ adzaŋ za nɨ bɛ́bɨ́nə́ a ndɨʼtɨ me ghe. Ma lan, nɨdorɨ tiʼə faʼkə a mu ntəm me ghe.

⁸ Be a be ngə́ aŋwaʼnɨ azan za a ghɨ́ nɨ dzəŋnɨ, ma sa a mɨlɨŋnɨ ko (lá ma kó a mɨlɨŋnɨ ə), mbɨ́ʼ ngə́ ma zɛn ngə́ aŋwaʼnɨ za a ghɨ́ nɨ dzəŋnɨ, lá tsɛʼ a nye məkum a nkfu ə.

⁹ Lá tɨtsɔŋnɨ ma tsi nɨ nɨdorɨ ə; ka a be ayi be mbɨ́ʼ ngə́ ma ghɨ́ nɨ dzəŋnɨ, a nɨ mbɨ́ʼ ngə́ adzə́ŋnɨ məza a ghɨ́ nɨ kwebtɨ ntsi ɨzɨŋ ə. Bɨgɨ sé anu a tɨbɔŋ zə tse ghɨ a nye bən mbɨ́ʼ ngə́ Ŋwi a lɔgɨ adzə́ŋnɨ məza ɨ faʼ nɨ zɛrə ghe.

¹⁰ Mbɨ́ʼ ngə́ adzə́ŋnɨ za Ŋwi a faʼnə nɨ zɛrə a ghɨə ŋwɔn a kwebtɨnɨ ntəm ɨyi nkə́ ntíʼə ngyíŋə́ nɨ ɨloŋ ə — ka nkǒmɨlɨŋnɨ tsi ayi a nye məza! Adzə́ŋnɨ za a ghɨnɨ ŋwɔn mɨsɔŋ a ntsu, a yiŋə nɨ nɨvwo ə.

¹¹ Nɨ ze anu za Ŋwi a ghɨ́nɨ́ nɨ adzə́ŋnɨ azən məziŋ ə: a ghɨ́ nɨ faʼnə nɨ mɨku bo bɨ mbó, mbɛ́bə́ a ndiʼə ngə́ nɨ nɨ bɨmbuʼ ə! Nɨ ze adzaŋ alwɛntɔŋ zə wu, nɨbɔgɨ, adzaŋ za nɨ zúʼnə́ a mu ɨnye ɨtsən, ɨ faʼə nɨ mɨku bo bɨ mbó, adzaŋ a mbɛ́bə́ a nɨ́ŋ ngɨ́ʼ a nye ŋwɔn wa a fanɨ anu ə! A mu anu məza atsum nɨ diʼ ngə́ ka afənu azən a be ayi ɨwu ə.

¹² Ma lan, ma báʼtɨ́ ŋwaʼnɨ a mbó bɨŋ ɨ ŋwaʼnɨnɨ lá, a sé bé mbɨ́ʼ a ŋwɔn wa a fánɨ́ anu za, nkeʼ kɨ mbe be mbɨ́ʼ a ŋwɔn wa bɨ fánɨ́ wə ɨnye. Ma báŋnɨ́ ŋwaʼnɨ be a ngɨə asaŋəsaŋ, a ɨshi ɨmɨgɨ Ŋwi, adzaŋ za mbɛbɨ ɨzən a faʼə a mbó bɨgɨ ɨ benə.

¹³ Məzen a lɛ́tɨ́ mɨntəm ɨmɨgɨ ə. Nkwiʼtɨ a ndɛtɨ mɨntəm ɨmɨgɨ, bɨgɨ dórɨ́ ngɛn nɨ mbyi mbɨ́ʼ ngə́ Tɨ́tósɨ a kə́ ndórə́ mbɨ́ʼ adzaŋ za bən bɨtsum lɛ́tɨ́nɨ́ ntəm ɨyi ɛ!

¹⁴ Be a be ngə́ ma tɛ́rɨ́ mbɨ́ʼ awən a mbó Tɨ́tósɨ, nɨ sé adɨrətú a nye me nɨŋə. Lá tsɛʼ tso mbáʼ anu atsum za bɨgɨ sóŋnɨ́ a mbó bən a bénɨ́ nkənu lá, ndəŋndəŋ, kɨtɛrɨ ɨwɨgɨ mbɨ́ʼ awən a ɨshi Tɨ́tósɨ a kɨ ndiʼ ngə́ a nɨ nkənu ə.

¹⁵ Ma lan, akɔŋnɨ azhi mbɨ́ʼ awən a kwi ɨ kwinɨ, mbáʼ a wáʼtɨ́nə́ adzaŋ za nɨ kɨ́nə́ mbɛ́bə́ a ngɨ ɨnu tsa a kɨ́nə́ ndǒ ngə́ á nɨ ghɨ, adzaŋ za nɨ kwárɨ́nɨ́ ayi nɨ nɨbɔgɨ abɔʼnɨ mbɨŋnə a ɨshi ɨmɨgɨ Ŋwi lá.

¹⁶ Nɨdorɨ tsi a ntəm me be tɨ́sə́n, mbɨ́ʼ ngə́ ma chi zɛʼtɨ ɨnye ɨzə tsum a nye bɨŋ ə.