2 Korɨnto 6 - Mɨkan wu Fi

¹ Ma lan, mbáʼ bɨgɨ faʼnə abó mɔ́ʼɔ́ bɨgɨ bɨ Ŋwi lá, bɨgɨ bǔʼ mbó a mbó bən ba nɨ kwarɨnə abɔŋəntəm a Ŋwi ngə́ á nɨ keʼ a zɛrə atú adaŋədaŋə kwarə.

² Zuʼnə anu za Ŋwi a soŋnə: “A nyom wa a kúʼnɨ́nɨ́ a ngɨ ɨbɔŋ a nye bən, ma zúʼ nji ɨzɨŋ ə; a nkfu za njwi kúʼnɨ́ a ndoŋ bən, ma kwátɨ́ awɨŋ ə.” Zɛnə a zɨŋə! Tɨtsɔŋnɨ a nɨ nyom nkwarɨ ɨbɔŋ Ŋwi ə; zɛnə a zɨŋə, sɨŋə a nɨ njwi ɨloŋ ə.

³ Ka bɨgɨ ntásə́ awɨgɨ ndómnji ŋwɔn tse, taŋ á ŋwɔn tse a keʼ tsənkɨ ɨfaʼ ɨwɨgɨ ə.

⁴ Lá bɨgɨ fɨʼtɨ ɨtumbəm ɨtsɨgɨ a mbó bən a nye mɨndóm mɨtsum tso ngaŋ afaʼ Ŋwi; a ntsǎ a ndzum achigəntəm zə wi, ɨnu tsɨ tən, anyuʼnɨ, ngɨ́ʼ,

⁵ ndəŋ bɨgɨ nɨ ngwan, ɨ farɨ bɨgɨ atsáŋ, ngvugɨ ndum, njiʼ bɨgɨ nɨ afaʼ, ndye a nɨkyerɨ abɔʼnɨ nchyɛ nɨ nji ɛ.

⁶ Bɨgɨ kə́ ndiʼə ngə́ bɨgɨ nɨ ngaŋ afaʼ Ŋwi a ntsǎ a ndzum mɨntəm mə fɛmnɨ, azhyɛ, achigəntəm, ngɨ ɨbɔŋ, Azhwi zə Fɛmnɨ abɔʼnɨ ngótɨ́ akɔŋnɨ ə.

⁷ Nkən wa bɨgɨ sóŋnə́ nɨ nkən wu nkənu, nkə́ ndɔ́gə́ lá mɨtən mɨ Ŋwi ɨ sóŋə́ a wɛrə ɨwu ə. Mbɨ́ʼ ngə́ anu za bɨgɨ ghɨnə nɨ anu zə chinɨnɨ, ka ŋwɔn tse a tsi ayi nɨ anu a tɨbɔŋ zə tsɛrə a sóŋə́ mbɨ́ʼ ɨfaʼ ɨwɨgɨ ə.

⁸ Bɨ kɔ́ʼsə́ awɨgɨ atɨ́ nkə́ nɨ́ŋə́ adɨrətú a nye bɨgɨ; ndzɔ́mə́ awɨgɨ nkə́ mbóntə́ awɨgɨ ə. Bɨ liŋə awɨgɨ tso ngaŋ ɨchwenu lá bɨgɨ soŋnɨ nkənu;

⁹ tso ɨbɛn ba ka bɨ zhi ayi awa, lá bə tse zhi awɨgɨ; tso ngə́ bɨgɨ kfokɨnə lá bɨgɨ tsi atú ntɨŋ ə. Bɨ báʼtə́ nɨ̌ŋ ngɨ́ʼ a nye bɨgɨ ɨ nɨŋnɨ lá, ka ɨ zhwitɨ ayi awɨgɨ;

¹⁰ bɨ báʼtə́ nɨ́ŋə́ adzə́ŋnɨ a nye bɨgɨ ɨ nɨŋnɨ lá, bɨgɨ dorɨnɨ nkfu tsum; bɨgɨ tsi tso ngə́ bɨgɨ nɨ ɨfúm lá bɨgɨ ghanə afuʼ a mbó ɨbɛn bə ghaʼnɨ a ntsǎ a ndzum nkən wu shiʼnɨ wa bɨgɨ sóŋnə́ a mbó bo; ntsi tso ngə́ bɨgɨ nɨ bɨ mbômbô tɨ azúm lá ntsi nɨ azúm atsum ə.

¹¹ O ɨbɔmbɨma bə Korɨnto! Bɨgɨ soŋ lá tsɛʼ nkənu a mbó bɨŋ ə; bɨgɨ ŋaʼ mɨntəm ɨmɨgɨ a mbó bən tsɛʼ ɨ shiʼnɨ ə.

¹² Bɨgɨ kɔŋ awən tsɛʼ a nkə. Ka bɨgɨ tsi awɨgɨ nɨ nɨbɔgɨ nə tsɛrə a sóŋə́ ngə́ bɨgɨ kɔŋ awɨŋ ə.

¹³ Tɨtsɔŋnɨ ma ghamə a mbó bən tso ngə́ nɨ nɨ ɨbɔ ɨbə: á nɨ diʼ ndəŋndəŋ akɔŋnɨ a mbó bɨgɨ tso mbáʼ bɨgɨ tsinɨ nɨ zɛrə a nye bɨŋ ə.

A nɨ keʼ nɨ Anu zə Tsɛrə Tsi Bɨŋ bɨ Bɨtɨnɨŋ Ntəm a nye Kristo ghe

¹⁴ A nɨ keʼ ngyenə aku a mɔ́ʼɔ́ bɨŋ bɨ bɨtɨnɨŋ ntəm a nye Kristo, mbɨ́ʼ ngə́ a chi keʼ faʼə. Ɨbɔŋ bo ɨbvu chi yenɨnə aku a mɔ́ʼɔ́ le? Nkaʼ bo ndzumnɨ chi tsi táʼ adiʼ lá ɨ nə́ le?

¹⁵ Kristo bo Dəbɨrɨ chi bemnɨ lá ɨ nə́ le? Ŋwɔn wa a nɨŋnɨ ntəm a nye Kristo a tsi lá nɨ ake a ngɨə bo wa ka a nɨŋ ayi ntəm ɨyi a nye Kristo le?

¹⁶ Be nɨshwim nɨ Ŋwi bo bɨ ɨbɔ bɨ abe bemnɨ lá ɨ nə́ le? Ma soŋə a məzen lá mbɨ́ʼ ngə́ bɨgɨnə lá nɨshwim nɨ Ŋwi, zɨ wa a tsinɨ ntɨŋ ə! Ŋwi zɨmboŋ a soŋ ngə́: “Ma mɨ ghɨ njwuʼ ɨzan a tɨtərɨ ɨbɛn ɨban ɨ tiʼ tsi a tɨtərɨ bɛrə; ma mɨ be Ŋwi ɨwa, á bo tiʼ mbe ɨbɛn ɨbə.

¹⁷ Ma lan, Maʼmbyí a soŋ ngə́ nɨ mɨ zagɨ nyɛʼtɨ awa, ɨ tiʼ shwɛʼ ɨtumbəm ɨtsən a nye bo ghe. A nɨ keʼ nɨ anu zə tsɛrə tsi a ngɨə nɨ azúm za a se fɛm; ɨwu, ma mɨ kwarɨ awɨŋ ə.

¹⁸ ma mɨ be Tá ɨwən, á nɨ tiʼ nkɨ mbe ɨbɔ ɨban bə mbáŋnɨ́ bo bə bəngye.”