2 Korɨnto 5 - Mɨkan wu Fi

Bɨgɨnə ghi tsí nɨ Mbəmnye tsə Fi a Fɔməbvurə ghe

¹ Bɨgɨnə zhi ngə́ a nkfu za ntaŋ wen wa bɨgɨnə tsínə́ wə mu — mbe lá mbəmnye ɨzɨgɨnə ɨghan atuəshe — bɨ kum, Ŋwi a mɨ tsi nɨ ndá a mbó bɨgɨnə a nchyɛ̌ ɨwu a fɔməbvurə, njwuʼ za a vwunɨ zɨmboŋ, za ɨ ghɨnɨ ghɔŋ nɨnkoŋ ə.

² Tɨtsɔŋnɨ, bɨgɨnə dumə, ndǒ nɨ ntəm ɨwɨgɨnə ɨtsum a nchyɛ́ a mu ndá ɨzɨgɨnə za a fɔməbvurə,

³ taŋ bɨgɨnə tsi a mu ndá za, bɨgɨnə keʼ tsi tso ngə́ bɨgɨnə tsi ntyigɨnə.

⁴ Mbɨ́ʼ ngə́ a nyom wa bɨgɨnə bvurɨnɨ ntsi a mu ntaŋ wen, bɨgɨnə dumə a mu ntsiŋə nɨ nɨwiʼ ə; ka a be ayi be ngə́ bɨgɨ lǒ ngə́ á bɨ lɔgɨ mbəmnye zen ndotɨ nɨ zɛrə, a nɨ ngə́ bɨgɨ lǒ ngə́ á bɨ wəgɨ a zɨ fɔməbvurə za a nye bɨgɨ, taŋ ntsi ntən chi tiʼ myi a za ɨ kfónə́ ghe.

⁵ Zɨ wa a kyaŋtɨnɨ awɨgɨnə a mbó anu məzen a nɨ Ŋwi, zɨ wa a ghanɨ Azhwi zə Fɛmnɨ a mbó bɨgɨnə tso mɨntɨ ma wɛrə a bɛʼnɨ mbɨ́ʼ a za a ghɨnɨ yiŋə.

⁶ Ma lan, bɨgɨnə chyɛ̌ nɨ nkotɨ mbáŋnɨ́ a nɨ́lónɨ́ nkfu tsum ə. Bɨgɨnə zhi ngə́ a nkfu za bɨgɨnə tsinɨ atú ntən a mu mbəmnye ɨtsɨgɨnə, bɨgɨnə tsi abaŋ zə sa a nye Maʼmbyí,

⁷ mbɨ́ʼ ngə́, abeməntəm nɨ anu za a ghɨnə bɨgɨnə tsi atú ntən, keʼ be be za bɨgɨnə zɛ́nə́ ghe.

⁸ Bɨgɨ lon nɨ nkotɨ mbáŋnɨ́, nkɨ nkɔŋ nyɛʼtɨ mbəmnye zɨ atuəshe, ɨ tiʼə tsinə bɨgɨ bɨ Maʼmbyí ɛ.

⁹ Ma lan, kə bɨgɨ tsi a mu mbəmnye zɨ atuəshe zen bɨgɨ bɨ Maʼmbyí kə nkeʼ bɨgɨ bo tsi muŋ, za bɨgɨ lɔnə ntsa atsum a nɨ ngə́ á bɨgɨ ngɨə á ɨnye ɨzhi mbɔ́ŋə́ ghe.

¹⁰ Mbɨ́ʼ ngə́, bɨgɨnə bɨtsum ghɨ zagɨ fú a ɨshe a ɨshi Kristo, á wɛrə a sáʼ awɨgɨnə ghe. Bɨgɨnə bɨtsum ɨ mɔ́ʼɔ́ mɔ́ʼɔ́ ghɨ kwárɨ́ a za bɨgɨnə tsinɨ nɨ nkwarə, ndzɔ̌ŋ anu atsum za bɨgɨnə ghɨnɨ, zə shiʼnɨ kə zə tɨbɔŋ, a mu ntsi mbyi za bɨgɨnə kɨ́nə́ nchyɛ̌ a mu mbəmnye ɨzɨgɨnə ghe.

Ɨson Ɨwɨgɨnə Bɨ Ŋwi Ntsa a Ndzum Kristo ghe

¹¹ Ma lan, mbáʼ bɨgɨ zhinɨ anu za a diʼnɨ a mbɔ́gɨ́tɨ́ Maʼmbyí lá, bɨgɨ zhwə́ŋtə́ a ngamə a mbó ɨbɛn bə mɔʼɔ á bo yen a mbó wɛrə ghe. Ŋwi a zhi awɨgɨnə ngɛn ndwitə, ma kə́ ntsiŋə nɨ ntəm ɨghə ɨtsum ngə́ á nɨ kɨ nji aghə ɨ shiʼnɨ a mu mɨntəm ɨmɨŋ ə.

¹² Ka bɨgɨ nkwiʼə mbɨŋə fɨʼtə lá ɨbɛn ba bɨgɨ nɨ bɛrə a mbó bɨŋ ə, lá ngɨə be ngə́ á nɨ tsi nɨ anu zə shiʼnɨ a ŋúʼ ɨnye mbɨ́ʼ awɨgɨ, taŋ á nɨ chi ghɨ chwɨ́gɨ́ ɨbɛn ba bɨ tɛrɨnə mbɨ́ʼ nkyerɨ ɨbɛn nkeʼ be be mbɨ́ʼ ɨnu tsa tsɨ fúnə́ a mu mɨntəm ɨma be lá.

¹³ Bɨgɨ lanɨ mbe lá ɨbarə le? Be a be ma lan muŋ a nɨ mbɨ́ʼ atú a Ŋwi ə. Kə bɨgɨ tsi ɨ shiʼnɨ le? Be a be ma lan muŋ a nɨ mbɨ́ʼ atú azɨŋ ə.

¹⁴ Mbɨ́ʼ ngə́ akɔŋnɨ a Kristo a tsɨŋnə awɨgɨ, mbɨ́ʼ ngə́ bɨgɨ zhi ɨ shiʼnɨ ngə́ táʼ ŋwɔn a kfó mbɨ́ʼ atú a ŋwɔn tsum; ntiʼə ndiʼə ngə́ ŋwɔn tsum a kfonə ghe.

¹⁵ A kfó lá mbɨ́ʼ atú a ŋwɔn tsum, taŋ á ba bɨ tsínə́, keʼ mbɨ́ŋə́ nchyɛ̌ be a mbó ɨtumbəm ɨtsa, lá nchyɛ̌ be a mbó zɨ wa a kfónɨ́ a nkfu bo, bɨ bə nzhwemnɨ lá.

¹⁶ Ma lan, ɨ lɔgɨnɨ tɨtsɔŋnɨ ɨ ghěn nɨ mbyi, ka bɨgɨ nkwíʼə sáʼə awɨgɨ a ŋwɔn tse ndzɔ̌ŋ ɨnu tsa mbəmnye lɔnə ghe. Be a kwɛ mbe ngə́ a bé a nkfu tsɛrə bɨgɨ sáʼ a Kristo ndzɔ̌ŋ ɨnu tsa mbəmnye lɔnə, bɨgɨ se adzaŋ məwa a nkwíʼə ngɨə ghe.

¹⁷ Ma lan, be ŋwɔn tse a tsi a mbúm bo Kristo, a tiʼ ŋwɔn wu fi ə, tsə lvuŋ tsanə, tsə fi yiŋə.

¹⁸ Ziŋ atsum a lo a mbó Ŋwi, zɨ wa a ntsǎ a ndzum Kristo a kwébtɨ́nɨ́ awɨgɨnə, bɨgɨnə lo a nye ngaŋ kɨban ɨchi ntiʼ bɨson ɨbyi, nkɨ nga afaʼ a mbó bɨgɨnə a ngɨ ɨbɛn bə mɔʼɔ á bo kɨ mbe bɨson ɨbyi ɛ.

¹⁹ Nkən ɨwɨgɨ nɨ ngə́ Ŋwi a kə́ ngɨ̌ ngwəgɨ ŋwɔn mɨsɔŋ a ntsu tsum a nye bɨson ɨbyi a ntsǎ a ndzum Kristo ghe. Ŋwi a sě nkwǎʼ mɨbvu ɨma ghe, wɛrə a kɨnə nkɨ nga a mbó bɨgɨ nkən wa, wa ɨ fɨʼtɨnə adzaŋ za wɛrə a ghɨnə awa a nye bɨson ɨbyi ɛ.

²⁰ Tiʼ ndzɛn lá, bɨgɨ wen, tiʼə ngamə a nkfu Yeso Kristo tsɛʼ tso ngə́ Ŋwi zɨmboŋ a bǔʼ mbó a mbó bən ntsǎ a ndzum bɨgɨ ə. Bɨgɨ bǔʼ mbó a mbó bən, a nkfu Kristo, ngə́ á Ŋwi a kwebtɨ awən, á nɨ lo a nye ngaŋ kɨban ɨchi, ntiʼ mbe bɨson ɨbyi ɛ!

²¹ Kristo a sé nɨ ɨbvu tse a nye zɨ chyɛ, lá mbɨ́ʼ atú azɨgɨnə Ŋwi a ghɨ́ wɛrə a kɨ ntsi nɨ ɨbvu ɨwɨgɨnə, taŋ a nchyɛ̌ a mbúm bɨgɨnə bɨ wɛrə, bɨgɨnə chi kɨ be adzaŋ za Ŋwi a chinɨnɨ lá.