2 Korɨnto 2 - Mɨkan wu Fi

¹ Ma lan, ma nɨ́ŋ a mu ntəm me ngə́ ma mɨ kaʼ bə nkwiʼ ngyen ɨ ghɨ á nɨ tsi nɨ adzə́ŋnɨ ə.

² Mbɨ́ʼ ngə́ be ma ghɨ nɨ dzəŋnɨ, a tsi ɨwa ɨwu a ngá nɨdorɨ a mbó me ntsatɨ awən wa ma ghɨnɨ nɨ dzəŋnɨnə lá le?

³ Ma ŋwáʼnɨ́ adzaŋ za ma ŋwáʼnɨ́nɨ́ lá, taŋ ma ghɨ ngyen ɨbɛn ba bɨ benɨ gha nɨdorɨ a mbó me keʼ baŋnɨ nga adzə́ŋnɨ a mbó me ghe. Ka ma mə́ŋnə́ aghan ngə́ be ma tsi nɨ nɨdorɨ, muŋ bən bɨtsum mɨ kɨ tsi nɨ nɨdorɨ ə.

⁴ Ma dzə́ŋnɨ́ nkə́ ndzě ngɨ́ʼ tsɛʼ nkan nɨ nkyi a ɨmɨgɨ me a nkfu za ma ŋwáʼnɨ́nɨ́ aŋwaʼnɨ za a mbó bən lá mbɨ́ʼ ma lo ngɨ nɨ dzəŋnɨ, lá ɨ baŋnɨ ghɨ á nɨ zhi a təkɔʼ bɨ akɔŋnɨ za ma tsinɨ nɨ zɛrə a nye bɨŋ ə.

A Bɨgɨnə Lɨgɨnɨ Ɨbvu Ŋwɔn wa a Fanə

⁵ Lá be ŋwɔn tse a lɔm adzə́ŋnɨ, ka a ghɨ ayi lá a nye me, ka ma soŋ aghan ntsa fəŋ ɨfɨʼə, a ghɨ lá a nye bən bɨtsum ə.

⁶ Ɨnɨŋ ngɨ́ʼ zen za ɨnɔ ɨ nɨŋnɨ wu atú lá, ɨ kuʼnɨ a mbó adzaŋ a ŋwɔn məza ə.

⁷ Ma lan, á nɨ baŋnɨ ndɨgɨnɨ ɨbvu ɨyi, ndɛtɨ ntəm ɨyi, taŋ á asɔbɨnɨ zə wi a keʼ ayi gháʼ, á bəŋ ntəm ɨyi ɛ.

⁸ Ma lan, ma tiʼə nyiʼtə awən ngə́ á nɨ diʼ ngə́ nɨ bvurɨ nkɔŋ ayi ɛ.

⁹ Ma ŋwáʼnɨ́ a mbó bən lá taŋ ɨ tsɔʼ aku ɨ zhi ngə́ nɨ zúʼnə́ anu atsum le.

¹⁰ Ŋwɔn tsum wa nɨ lɨgɨnɨnɨ afənu azhi, ma kɨ ndɨgɨnɨ ayi ɛ. Za ma kwɛnə ndɨgɨnɨ, mbáʼ be ma kwɛ ntsi nɨ ndɨgɨnɨ zə tse, ma ghɨ a məzen lá a ɨshi ɨmɨgɨ Kristo mbɨ́ʼ awɨŋ ə.

¹¹ Bɨgɨnə ghɨə a məzen lá taŋ á Satan a keʼ awɨgɨnə tsa fəŋ ə; mbɨ́ʼ ngə́ bɨgɨnə zhi anu za a tsinɨ a mu ntəm zɨə.

Baolo a Tsi nɨ Nɨwiʼ Mbɨ́ʼ a Truasɨ ə

¹² Mbáʼ ma yénɨ́ a Truasɨ a sóŋ Nkən wu Shiʼnɨ lá, Maʼmbyí a díʼ ndómnji a mbó me ghe;

¹³ mbáʼ ma sá a mɨma ɨghan Tɨ́tósɨ zɛ́n lá, nɨwiʼ tsí a mu ntəm ɨghə. Ma tíʼ ngá fɨlye ɨfa, ngɛn aghan a Masedonia ghe.

Bɨgɨnə Dzɨ Ntso Ntsa a Ndzum Kristo ghe

¹⁴ Lá mɨya a mbó Ŋwi ə! Mbɨ́ʼ ngə́ adzaŋ za bɨgɨnə tsinɨ a mbúm bɨgɨnə bɨ Kristo, Ŋwi a tsagɨnə awɨgɨnə a mu akwa ayanguʼ a Kristo ghe. Ŋwi a tsǎ a ndzum bɨgɨnə ngɨə anu mbɨ́ʼ a Kristo a dzagɨnɨnə nɨ ɨdiʼ ɨtsum tso ŋwíʼtə́ a mɨlwi ɛ.

¹⁵ Mbɨ́ʼ ngə́ bɨgɨnə be lá tso ŋwíʼtə́ mɨlwi wu alyɛn wa Kristo a ghanɨ a mbó Ŋwi mbáʼ a lamnɨnə a tɨtərɨ ba bɨ kwarɨnɨ ɨloŋ abɔʼnɨ ba bɨ ghɛnə a mu ɨmugɨ nɨnkoŋ ə.

¹⁶ A mbó ba bɨ ghɛnə a mu ɨmugɨ nɨnkoŋ wa, a be lá tso ɨfɔgɨ tɨbɔŋ wa ɨ zhwítɨ́nə́ awa; lá a mbó ba bɨ kwarɨnɨ ɨloŋ, a be tso ŋwíʼtə́ wa a yenə nɨ ntsi ntən nɨnkoŋ ə. Ŋwɔn wa a chinɨ faʼ a məziŋ afaʼ a nɨ ɨwa le?

¹⁷ Mbɨ́ʼ ngə́ ka bɨgɨ be awɨgɨ lá tso bə mɔʼɔ bə ghaʼnɨ, ba bɨ lɔgɨnə anu a Ŋwi ntáŋə́ a mɨtan ɨwu; lá mbɨ́ʼ ngə́ Ŋwi a tsagɨ awɨgɨ, bɨgɨ ghǎm nkənu nɨ mɨntəm ɨmɨgɨ mɨtsum wə ɨshi, tso ngaŋ afaʼ Kristo ghe.