2 Korɨnto 13 - Mɨkan wu Fi

Ɨkwantɨ Ntsɨrɨndzum abɔʼnɨ Atɔ́ŋtɨ ə

¹ A mɨ be nkfu tsi tárə́ mbáʼ ma mɨ yen ɨ ghantɨ awɨŋ ə. Tso mbáʼ aŋwaʼnɨ a Ŋwi a soŋnɨ ngə́, “Be bɨ kaŋ a ŋwɔn, bətɛmə-ndzě mɨ zagɨ be bɨbá kə bɨtárə́ a nkyɛgɨnɨ anu zə wu ə.”

² Ma lǒ ɨ soŋə a mbó bən ba nɨ búʼnɨ́ mɨbvu a nkfu mbyi abɔʼnɨ bə mɔʼɔ bɨtsum ngə́ nkfu za ma mɨ kwiʼ yen, ma mɨ nɨŋ ngɨ́ʼ a nye ŋwɔn tsum ə. Ma kwɛ́nə sóŋ a nkfu za ma yénɨ́ ngántɨ́ awən a nye nkfu za ɨ zɔ́ŋtɨ́nɨ́ a nye ɨdiʼ tsi bá lá, lá ma mɨ kwiʼ soŋ a mbó bən tɨtsɔŋnɨ wa ma sa bɨgɨnə tsi lá.

³ Nɨ mɨ tsi nɨ alisɨ atsum ngə́ Kristo a tsǎ lá a ndzum me ngámə́ ghe. Kristo a tɨ chísɨ́ awən lá a keʼ ghɔgə. Wɛrə a baŋnə ndǐʼ mɨtən ɨmyi a tɨtərɨ bɨŋ ə.

⁴ A báʼtɨ́ nghɔgɨ ɨ ghɔgɨnɨ a nkfu za bɨ kwémtɨ́nɨ́ ayi atɨ abaŋnɨ-baŋnɨ lá, wɛrə a chyɛ̌, ntsǎ lá a ndzum mɨtən mɨ Ŋwi ə. Mbɨ́ʼ ngə́ bɨgɨnə tsi a mbúm bɨgɨnə bɨ Kristo, bɨgɨnə kɨ nghɔgə; lá mbɨ́ʼ ngə́ bɨgɨnə tsi a mbúm bɨgɨnə bɨ Kristo, bɨgɨnə ghɨ kɨ́ tsi nɨ mɨtən mɨ Ŋwi a mu ntsi mbyi ɨzhi ɛ.

⁵ Nɨ liŋ ɨtumbəm ɨtsən ndzɛn ngə́ nɨ lanɨ mbvurɨ nchwa abeməntəm azən a tɨŋə. A nɨ zhwəŋtɨ ɨtumbəm ɨtsɨŋ ə. Nɨ se zɛn ngə́ Kristo Yeso a tsi a mu ɨnye ɨtsən le? Be a tú ma lá be, a be ngə́ o vwoə.

⁶ Ma zhi ɨ shiʼnɨ ngə́ nɨ mɨ zhi ngə́ ka bɨgɨ vwo awɨgɨ ə.

⁷ Bɨgɨ tsaʼtə a Ŋwi ngə́ á nɨ keʼ anu zə tse fə — ka a be ayi be a ndiʼə ngə́ bɨgɨ faʼ ɨfaʼ ɨwɨgɨ ɨ shiʼnɨ, a nɨ be taŋ á nɨ chi ghɨ ɨnu tsa tsɨ kuʼnɨnɨ, mbáʼ be bɨgɨ kwɛ fi be ɨbɛn ba ka bɨ faʼ awa ɨ shiʼnɨ ə.

⁸ Mbɨ́ʼ ngə́ bɨgɨ chi keʼ ghɨ anu zə tsɛrə a mbvurɨ nkənu, bɨgɨ baŋnə fáʼə be tsɛʼ mbɨ́ʼ a zɛrə ghe.

⁹ Bɨgɨ dórə́ mbáʼ be bɨgɨ ghɔgɨ lá nɨ baŋnɨ ntɨŋə. Bɨgɨ tsaʼtə a Ŋwi ngə́ nɨ ghɨ kɔ́ʼ tɛm ngə́ tsáŋ ə.

¹⁰ Nə nɨ anu za a ghɨnɨ ma ŋwaʼnɨ aŋwaʼnɨ zen mbáʼ ma sa bɨgɨnə tsi lá; a be adzaŋ məwen lá taŋ ma ghɨ ngyen nkwatɨ awən, ma mɨ kaʼ shəgɨ a nye bən a nkfu za ma faʼnə nɨ mɨtən ma Maʼmbyí a ghanɨ a mbó me — mɨtən mɨ ngvwu bən á nɨ kwi, nkeʼ be mə saʼ bən ɨ tsagɨ a ɨshe ə.

¹¹ A ndwɨgɨnə nə ɨbɔmbɨma ɨban, fɨlye ɨfɨŋ ə. A nɨ ntǒkə́ ɨ kɔʼ tɛm ngə́ tsáŋ; á nɨ tɛgɨ ɨtú ɨtsən a nye ɨnu tsa ma buʼnɨ mbó a mbó bən mbɨ́ʼ a tsɛrə; á nɨ mbémnə́ bɨŋ bɨ ŋwɔn nɨ ŋwɔn; á nɨ nchyɛ̌ nɨ mbɔnɨ ə. Ŋwi, zɨ wa a ghánə́ akɔŋnɨ abɔʼnɨ mbɔnɨ a mɨ tsi bɨŋ bo ghe.

¹² A nɨ tɔŋtɨ awən bən nɨ bən ɨ shiʼnɨ ɨ shiʼnɨ a nye ndóm wa ɨ diʼnɨ ngə́ nɨ nɨ ɨbɛn bɨ Ŋwi ə.

¹³ Ɨbɛn bɨ Ŋwi bɨtsum tsaʼtə awɨŋ ə.

¹⁴ A abɔŋəntəm a Maʼmbyí Yeso Kristo abɔʼnɨ akɔŋnɨ a Ŋwi nɨ adzaŋ za nɨ tsinɨ a mbúm bɨŋ bɨ Azhwi zə Fɛmnɨ tsi a mbó bən bɨtsum ə.