2 Korɨnto 11 - Mɨkan wu Fi

Baolo abɔʼnɨ Ntóm Yeso tsɨ Ɨchwenu ə

¹ A nɨ chigɨ mɨntəm nɨ me mbɨ́ʼ anu zen za ma mɨ soŋ mbáʼ a finɨ a mə abərɨ anu lá. Ma buʼ mbó, á nɨ chigɨ mɨntəm ɨmɨŋ ə!

² Ma lɨ́ŋə́ awən; tsɛʼ tso mbáʼ Ŋwi a lɨ́ŋnə́ awən lá. Nɨ tsi lá tso ngo za ma kaʼnɨ ɨ zɔ́ʼ ɨ gha a mbó táʼ ndóm ə, tsɛʼ táʼ ndóm ə; Kristo zɨmboŋ ə.

³ Tso mbáʼ ɨnyo za ɨ támtɨ́nɨ́ a Ifa nɨ ɨchwenu ɨchi tsa tsɨ yígɨ́nɨ́nɨ́ lá, ma bɔ́gə́ ngə́ bɨ chi ghɨ twɛfɨ ɨkwaʼtɨ ɨtsən, á nɨ kyɛntɨ ngwíʼtə́ mbɨ́ʼ a Kristo a nye ndóm wa ɨ kuʼnɨnɨ nkɨ mbe wu nkənu lá.

⁴ Mbɨ́ʼ ngə́ nɨ nɨ ɨbɛn ba mbáʼ be ŋwɔn adaŋ a yen, ɨ sóŋə́ anu mbɨ́ʼ a Yeso wədaŋ abɔʼnɨ azhwi zədaŋ, nɨ bem anu za wɛrə a sóŋnə́ ghe. Kə be ŋwɔn adaŋ a yen ɨ soŋ nkən wu shiʼnɨ wa ɨ lánɨ́ ntsi chwa a nye wa nɨ kwárɨ́nɨ́ a mbó bɨgɨ, nɨ kwarɨ ayi nɨ mbo mɨtsum ə!

⁵ Ma kwaʼtɨ ngə́ ka ma kɨ́gɨ́ aghə a nye ndóm tse ntsa ntóm Yeso ɨtsən tsa nɨ kwaʼtɨnɨ ngə́ tsɨ nɨ tsɨ wi be tɨ́sə́n lá.

⁶ Be ma kwɛ tú a ntsu tsa a ngamə a tɨtərɨ ɨbɛn, ma zhi ɨnu ə. Bɨgɨ ghɨnə a məzen nɨ zhi a nye mɨndóm mɨtsum a mu ɨnu ɨtsum ə.

⁷ Ma sá awən nɨ azúm zə tse bitɨ mbáʼ ma sóŋnɨ́ nkən wu shiʼnɨ wu Ŋwi a mbó bɨŋ ə. Ma shíʼtɨ́ nɨ ɨnye ɨzan a tɨshe taŋ ɨ kɔ́ʼsɨ́ awən atɨ́ ə. Ma fə́ anu zə tsɛrə le?

⁸ A nkfu za ma kɨ́nə́ faʼə a mbó bən lá, ndáŋwi tsə daŋ kə́ ntfúə aghan nɨ nkáb ə. A nye ndóm tse, ma kə́ ndzě nkáb a mbó bo taŋ ɨ kwatɨ awɨŋ ə.

⁹ A nkfu za ma tsínɨ́ bɨgɨnə lá, ma sá awən ghágɨ́ a mbítɨ́ akwatɨ mbáʼ be ma ndǒ nkáb ə. Ɨbɔmbɨma ba bɨ kɨ́nə́ ndǒ a Masedonia ngyíŋə́ lá, bɨ kə́ ngyiŋə nɨ azúm atsum za ma kɨ́nə́ ndǒ ghe. A bé a mbiʼnə ma kaʼ awən ghagɨ, adzaŋ za ma ghɨnɨ kaʼ awən a ndzum kɨ nghagɨ a nye ndóm tse ghe.

¹⁰ A ntsǎ a ndzum nkənu Kristo za ɨ tsinɨ a mu ɨnye me, ma kaʼ ngə́ azúm zə tsɛrə a chi keʼ chiʼtɨ a kɨtɛrɨ wa ma tsinɨ nɨ wɛrə lá a mu Mbuʼ Akaiya tsum ə.

¹¹ Nɨ kwaʼtə lá a zə nə́ le? Ngə́ ma sa awən kɔŋ le? Ŋwi a zhi ngə́ ma kɔŋ awɨŋ ə!

¹² Ma mɨ ghɛn nɨ mbyi a ngɨ za ma ghɨnə taŋ ɨ nə̌ ndóm a mbó ntóm Yeso tsɨ ɨchwenu taŋ á bo chi keʼ tɛrɨ ɨ sóŋə́ ngə́ bo kə́ fáʼə a nye ndəŋndəŋ ndómnji wa bɨgɨ faʼnə ghe.

¹³ Ka ɨbɛn ba be awa ngótɨ́ ntóm Yeso ghe — bo nɨ ntóm Yeso tsɨ ɨchwenu tsa tsɨ chwɛ́nɨ́ ɨnu mbɨ́ʼ afaʼ aza, ngwəgɨ ɨtsɛʼ ɨtsa a ntámtɨ́ ɨdiʼ ngə́ bo nɨ ngótɨ́ ntóm tsa tsɨ nɨ tsə Kristo ghe.

¹⁴ Ka a be ayi anu zə tsanɨnə, mbɨ́ʼ ngə́ tsɛʼ Satan zɨmboŋ a kə́ ngwəgɨ ɨtsɛʼ taŋ ɨ fi tso ntsendá Ŋwi za ɨ yenə nɨ nkaʼ ə.

¹⁵ Ma lan, a mɨ keʼ anu zə fi be ngə́ ngaŋ afaʼ Satan kə́ ngwəgɨ ɨtsɛʼ taŋ ɨ fi tso ngaŋ afaʼ ɨnu tsɨ chinɨnɨ ə. A ndwɨgɨnə, bo ghɨ tsi lá tsɛʼ nɨ za a kuʼnɨnɨ a nye ngɨnɨ mɨnu ɨma ghe.

Ngɨ́ʼ za Baolo a Zɛ́nɨ́ tso Ntom Yeso ghe

¹⁶ Ma kwɛnə soŋə, ma mɨ kwiʼ kwátə́: á ŋwɔn tse a keʼ kwaʼtɨ ngə́ ma nɨ abərɨ ə. Lá be a kwaʼtɨ adzaŋ məwa, á ŋwɔn məwa a bem ngə́ ma nɨ abərɨ, taŋ á ma chi tɛrɨ mɨnyiə ghe.

¹⁷ Tsɛʼ a nkənu, anu za ma sóŋnə́ tɨtsɔŋnɨ lá, Maʼmbyí a mɨ keʼ kɔŋ ngə́ á ma soŋ a zɛrə ghe; a mu anu a kɨtɛrɨ zen, ma lánə́ ngámə́ lá tso abərɨ ə.

¹⁸ Tso mbáʼ bə ghaʼnɨ tɛrɨnə mbɨ́ʼ ɨdzúm atuəshe lá, ma mɨ kɨ tɛrə.

¹⁹ Bɨŋ mboŋ, nɨ tsi nɨ zóŋ tsɛʼ nkə, ma lan, nɨ chigɨ ntəm a mu nɨdorɨ bɨŋ bɨ ɨbərɨ ə.

²⁰ Nɨ chigɨ ntəm nɨ ŋwɔn tsum ɨ mɔ́ʼɔ́ mɔ́ʼɔ́ wa a ghɨnə awən a nye ɨbuʼ, kə ndzɨ́ə awən, kə mbéntə́ awən, kə ngwágɨ́nə́ awən, kə ndúbə́ awən a ɨshi bɨŋ ə.

²¹ Adɨrətú a tsi a nye me a mbémə́ ngə́ bɨgɨ bé bəkɨəngvurɨ a ngɨ ɨnu mətsa! Be ŋwɔn tsɛrə a chi zhwəŋtɨ a ntɛrə mbɨ́ʼ anu zə tse, ma chi kɨ zhwəŋtɨ a ntɛrə ghe. Ma ghamə lá tso abərɨ ə.

²² Bo lǒ ɨ soŋə ngə́ bo nɨ bə Ɛbal le? Ma kɨ mbe wu mɔʼɔ ghe. Bo lǒ ɨ soŋə ngə́ bo nɨ bə Izrai le? Ma kɨ mbe wu mɔʼɔ ghe. Bo lǒ ɨ soŋə ngə́ ta wa wu kɔ́ʼɔ́nguʼ a nɨ Abraʼm le? Ma kɨ mbe wu mɔʼɔ mɔn ə.

²³ Bo nɨ ngaŋ afaʼ Kristo le? Be ma soŋ adzaŋ məwa, ma nɨ ŋwɔn afaʼ wa a tsanɨ awa bɨtsum ə. Ma ghamə lá tso abarə ghe. Ma faʼnə ntsa, ma konə atsáŋ nkfu tsə ghaʼnɨ ntsa, bɨ ləŋnə aghan nɨ ngwan nkfu tsə ghaʼnɨ ntsa, ma kɨnə nkɨ ntsi a ntsu nɨvwo nkfu tsə ghaʼnɨ ntsa.

²⁴ Bə Yuda ləŋnə aghan nkfu tsi tə̧̂ nɨ ngwan nkfu tsa mɨghúm mɨntárə́ nɨ ntsɔb nɨbvuʼə ghe;

²⁵ bə Roma lə́ŋ aghan nɨ ngwan nkfu tsi tárə́ ghe. Bɨ túmtɨ́ aghan nɨ mɨngɔʼ táʼ nkfu ə. Ɨbáŋ nkyi bə́nkɨ́nə nɨ me nkfu tsi tárə́ ghe. Nkfu za zɨ mɔʼɔ ma tsí a mu nkyi atú táʼ ɨtfúʼ nɨ táʼ njwi ɛ.

²⁶ A mu nɨyen ɨnan, nkfu tsɨ ghaʼnɨ, ma bé kóŋ a mu nkyi wa ɨ lonɨ ndzɔʼsɨ ɨdiʼ, mɨzɛrə bé zhwítɨ́ aghan, alaʼ azɨgɨ bə Yuda bé zhwítɨ́ aghan, ba a se bə Yuda be bé zhwítɨ́ aghan, ma bé kfó a mu ntáʼmbagə zɨ ngwi, ma tíʼə nkárə́ a nkfǒ a mu mɨkɨghonɨ, ma tíʼə nkárə́ a nkfǒ a mu sagɨrə wu ngwi, nkə́ ntíʼə nkárə́ a nkfǒ a mbó bɨtabɨnká bə mɨnaŋ ə.

²⁷ Ma nyúʼnɨ́ ɨfaʼ afaʼ zə tən; ndye tɨ lye atú njwi tsɨ ghaʼnɨ; ma kɨ chyɛ nchyɛ̌ tə́ ndzɨ́ə, tə́ nǒ nkyi; mboŋ adiʼ zə nyɔŋnɨ atú azan ɨwu nkɨ mboŋ ɨtsɛʼ ə.

²⁸ Ma chi kaʼ anu atsum soŋə; nɨwiʼ mbɨ́ʼ ndáŋwi tsiŋ ɨtsum nɨ ghágə́ aghan nɨ njwi nɨ njwi ɛ.

²⁹ Be ŋwɔn tsɛrə a ghɔgɨ, ma kɨ nghɔgə; be bɨ ghɨ ŋwɔn tsɛrə a ghɨ ɨbvu, adzə́ŋnɨ a lon a mu ntəm me ghe.

³⁰ Be a be ngə́ ma mɨ zagɨ tɛrɨ, ma mɨ tɛrɨ lá nɨ ɨnu tsa tsɨ diʼnə ngə́ ma ghɔgə.

³¹ Ŋwi Ta bɨ Maʼmbyí Yeso a zhi ngə́ ka ma nchwě aghə ɨnu ə. A bɨgɨnə bontɨ ɨkum ɨyi nɨnkoŋ ə.

³² A nkfu za ma tsínɨ́ a Damaskusɨ, gobɨna wa a tsínɨ́ a shwúrɨ́ Ɨfɔ Arɛtasɨ a tságɨ́ bɨgwe bɨ lyɛmnɨ ntsu nká ntáʼmbagə wu wi Damaskusɨ taŋ ɨ ko aghə.

³³ Lá bɨ nɨ́ŋ aghan a mu nkye, ntsagɨ a nye abuʼ a nye nká wa, ɨ shiʼsɨ a ɨshe, ma tiʼ nkɨə, a keʼ aghan koə.