Biblia Todo Logo
Bìoball air-loidhne

- Sanasan -

2 Korɨnto 10 - Mɨkan wu Fi


Baolo a Ghɨ́ Ɨtú Ɨbɛn Lán Mbɨ́ʼ Afaʼ azhi ɛ

1 Baolo, me mboŋ, ma bǔʼ mbó a mbó bən ntsa a ndzum Yeso Kristo wa a bɔnɨnɨ nkə́ ngɨ̌ ɨbɔŋ — me wa bɨ soŋnɨ ngə́ ma ghɨ ntsí a tɨtərɨ bən ma bɔgɨnɨ ngamə lá ntsi nɨ ntəm wu faŋnɨ a ngamə a mbó bən mbáʼ ma sa abɔʼnɨ bən tsi lá.

2 Ma bǔʼ mbó a mbó bən ngə́ á nɨ keʼ nyəm aghan ngə́ á ma shə́gə́ a nkfu za ma yenɨ nkwatɨ awɨŋ ə. Mbɨ́ʼ ngə́ ma zhi ɨ shiʼnɨ ngə́ ma chi shəgɨ a nye ɨbɛn ba bɨ soŋnɨ ngə́ bɨgɨ ghɨ̌ ɨnu ndzɔ́ŋə́ lá mbɔm atuəshe ziŋ ə.

3 A nɨ nkənu ngə́ bɨgɨ chyɛ̌ lá atuəshe, lá ka bɨgɨ ntǒ awɨgɨ lá nɨ ɨdzúm ntso tsɨ atuəshe wiŋ ə.

4 Ɨdzúm ntso tsa bɨgɨ tónɨ́ ntso ɨwu se be lá tsə atuəshe wen, tsɨ nɨ ɨdzúm ntso tsə tən tsə Ŋwi tsa bɨgɨ faʼnə nɨ tsɛrə a ntsənkɨ ɨdiʼ tsɨ tɨŋə. Bɨgɨ tsənkɨ mɨgham mə kwənkɨnɨ,

5 nkə́ shíʼsɨ́ ntasɨ tsum za ɨ ŋúʼnɨ́ ɨnye, za ɨ tasɨnə ngə́ á bɨ keʼ a Ŋwi zhyɛ. Bɨgɨ zumtə akwaʼtɨ atsum ngɨə ngə́ á zuʼnɨ a Kristo ghe.

6 A nkfu za azuʼnɨ azən a kɔʼnə ndon, bɨgɨ mɨ kɨ tiʼ kyaŋtɨ ɨnye ɨtsɨgɨ a nɨ́ŋ ngɨ́ʼ a nye ngɨnɨ anu atsum za ka ɨ ndzúʼnə́ ayi ɛ.

7 Nɨ liŋə lá be adzaŋ za nkyerɨ ɨdzúm ɨ tsinə. Ŋwɔn wu tsɛrə a tsi ɨwu wa be a kfuntɨ ndzɔʼ ɨzhi ngə́ zɨə tsi bo Kristo le? A bo kwaʼtɨ ɨtú ɨtsa ɨ shiʼnɨ mbɨ́ʼ ngə́ bɨgɨ kɨ ntsi bɨgɨ bɨ Kristo tsɛʼ tso mbáʼ bo tsinɨ lá.

8 Mbɨ́ʼ ngə́ ka ma ndɨ́rə́ aghə atú, mbáʼ be a kwɛ mbe ngə́ ma tɛrɨnə a nye ndómnji tse tɨ́sə́n mbɨ́ʼ mɨtən ma Maʼmbyí a ghanə a mbó bɨgɨ — mɨtən a mbiʼtɨ bən á nɨ tɛm, nkeʼ mə shiʼsɨ bən be.

9 Ma sǎ ndǒ lá ngə́ á fi tso ma bósə́ awən nɨ ɨŋwaʼnɨ ɨtsə.

10 Ma soŋə a məzen lá mbɨ́ʼ ngə́ bɨ sóŋə́ ngə́, “Ɨŋwaʼnɨ Baolo shə́gɨ́nə́ nkɨ ntən, lá a nkfu za wɛrə a tsinɨ a tɨtərɨ bɨgɨ zɨmboŋ, wɛrə a tsi nɨ nɨbɔgɨ a ngamə a mbó ɨbɛn, mɨgham ɨmyi kɨ mbe mɨgham mə adaŋədaŋə ghe!”

11 A ɨbɛn məba zuʼ nkɨ nji ngə́ anu za bɨgɨ sóŋnə́ a mu aŋwaʼnɨ mbáʼ be bɨgɨ tú a mbyɛn bən ɨ tsi, a nɨ zɛrə za bɨgɨ ghɨnə a ɨshi bɨŋ ə.

12 Ka bɨgɨ njwə́ŋtə́ awɨgɨ lá a fɨʼnɨ ɨtumbəm ɨtsɨgɨ bɨgɨ bɨ ɨbɛn ba bɨ kwaʼtɨnə nɨ ɨtumbəm ɨtsa ngə́ bo tsi atɨ́ ə. Bo dzɨŋtɨ be tɨsɨŋə! Bo ghɨ̌ ɨfɨʼ ɨza bo mboŋ nkə́ fɨ́ʼə awa ɨwu tsɛʼ bo mboŋ, nkə́ sáʼ ɨtumbəm ɨtsa nɨ ɨfɨʼ tsa a ghɨnɨ bo mboŋ ə!

13 A mbó bɨgɨ, kɨtɛrɨ ɨwɨgɨ a mɨ keʼ ghɛn ɨfəŋ ɨfɨʼ ə; a mɨ ghɔŋ a mu ɨfaʼ wa Ŋwi a nɨŋnɨ a mu mbó bɨgɨ, ɨfaʼ wa bɨgɨ faʼnə a tɨtərɨ bən ɨ tsi wə mu ə.

14 Ka bɨgɨ ntsǎ ɨfəŋə awɨgɨ ɨfɨʼ ɨzɨgɨ, tso ngə́ bɨgɨ sé yen a mbó bɨŋ ə; bɨgɨ bé bɨtsabɨmbyi ba bɨ yénɨ́ nɨ nkən wu shiʼnɨ mbɨ́ʼ a Kristo a mbó bɨŋ ə.

15 Ma lan, ka bɨgɨ ntɛ́rə́ awɨgɨ mbɨ́ʼ ɨfaʼ wa ɨbɛn bə daŋ faʼnɨ ntsa fəŋ ɨfɨʼ za Ŋwi a nɨ́ŋnɨ́ a mu mbó bɨgɨ ə. Bɨgɨ baŋnə ntsiŋə nɨ ntəm tsum ngə́ abeməntəm azən a chi kwi, taŋ á bɨgɨ chi faʼ a tɨtərɨ bən ɨ ghɛn nɨ mbyi ɨ tsa adzaŋ za bɨgɨ fáʼnɨ́ a mbyi, ɨ keʼ fəŋ ɨfɨʼ za Ŋwi a ghanɨ a mbó bɨgɨ ə.

16 Ma lan, bɨgɨ chi tiʼ fəŋ awən ɨ ghɛn nɨ ɨlaʼ tsɨ fi ɨ soŋ Nkən wu Shiʼnɨ wa ɨwu, ɨ keʼ kɨ ntɛrɨ mbɨ́ʼ ɨfaʼ wa bə daŋ kwɛnə faʼə.

17 Tso mbáʼ aŋwaʼnɨ a Ŋwi a soŋnɨ ngə́, “Be ŋwɔn tse a tsi nɨ ntɛrə, a tsi nɨ ntɛrə be nɨ za Maʼmbyí a ghɨnə a mbo zɨə.”

18 Ɨbɛn ba Maʼmbyí a wíʼtɨ́nɨ́ ɨ shiʼnɨ mbɨ́ʼ awa, a nɨ bo ba wɛrə a bémtɨ́nə́, nkeʼ be ɨbɛn ba bɨ kwaʼtɨnɨ ɨ shiʼnɨ mbɨ́ʼ ɨtumbəm ɨtsa be ə.

© 2023, CABTAL

Lean sinn:



Sanasan