2 Korɨnto 1 - Mɨkan wu Fi

¹ Aŋwaʼnɨ zen a lo a mbó Baolo wa a benɨ ntom Yeso zɨ Kristo Yeso ndzɔ̌ŋ adzaŋ za Ŋwi a lɔnə ghe. Ma ŋwaʼnə a zɛrə lá ntsi bɨgɨ Timotyo mɨma ɨwɨgɨnə ghe. A ghěn a mbó ndáŋwi za ɨ tsinɨ a Korɨnto, abɔʼnɨ ɨbɛn bɨ Ŋwi bɨtsum a mu Mbuʼ Akaiya tsum ə.

² A Ŋwi Ta ɨwɨgɨnə abɔʼnɨ Maʼmbyí Yeso Kristo gha abɔŋəntəm nɨ mbɔnɨ a mbó bɨŋ ə.

Baolo a Ghǎ a Mɨya a mbó Ŋwi ə

³ A bɨgɨnə bontɨ a Ŋwi Ta bɨ Maʼmbyí Yeso Kristo ɨwɨgɨnə, Tarɨ wa a lonɨ nɨ mɨlɨŋnɨ nkɨ mbe Ŋwi wa alɛtɨ atsum a lonə wəmbo,

⁴ mbáʼ a lɛ́tɨ́nə́ awɨgɨ a mu ngɨ́ʼ ɨzɨgɨ tsum, taŋ á bɨgɨ chi kɨ lɛtɨ ɨbɛn ba bɨ tsinɨ a mu ngɨ́ʼ tsum, nɨ alɛtɨ za Ŋwi a lɛ́tɨ́nə́ awɨgɨ ɨwu ə.

⁵ Tsɛʼ tso mbáʼ bɨgɨ zɛ́nɨ́ ngɨ́ʼ tɨ́sə́n adzaŋ za Kristo a zɛ́nɨ́ lá, ndəŋndəŋ ɨ tsa a ndzum Kristo, bɨgɨ kə́ nchyɛ̌ nɨ alɛtɨ a Ŋwi zə wi ə.

⁶ Be a be ngə́ bɨ diʼ ngɨ́ʼ a mbó bɨgɨ, a nɨ taŋ á nɨ tsi nɨ alɛtɨ abɔʼnɨ ɨloŋ ə; be bɨ ndɛ́tə́ awɨgɨ, a nɨ taŋ á nɨ tsi nɨ alɛtɨ mbáʼ nɨ zɛ́nə́ a nkfu za nɨ toŋnɨ ndəŋndəŋ ngɨ́ʼ ngwəgɨ tsɛʼ nɨ nkorɨ ntəm adzaŋ za bɨgɨ kɨ́nə́ ntóŋə́ ngwə́gə́ lá.

⁷ Ntsiŋə ɨzɨgɨ nɨ ntəm ɨwɨgɨ ɨtsum mbɨ́ʼ awən ɨ se chiʼnɨ; mbɨ́ʼ ngə́ bɨgɨ zhi ngə́ adzaŋ za nɨ zɛ́nɨ́ ndəŋndəŋ ngɨ́ʼ tso bɨgɨ lá, nɨ kɨ ntsi nɨ alɛtɨ tso bɨgɨ ə.

⁸ Ɨbɔmbɨma, ka bɨgɨ ndǒ awɨgɨ ngə́ á nɨ tsi a mu tɨzhi mbɨ́ʼ ngɨ́ʼ za bɨgɨ zɛ́nɨ́ a mu Mbuʼ Esha, mbɨ́ʼ ngə́ bɨgɨ tóŋ ngɨ́ʼ ngwəgɨ a nye ndóm wa tsɛʼ ntsi mbyi ɨ shwé a ntɔŋ bɨgɨ ə.

⁹ A tsí a mbó bɨgɨ tso bɨ sáʼnə awɨgɨ ntɛgɨnɨ ngə́ bɨ mɨ zhwitɨ awɨgɨ ə. Məzen a fú lá taŋ á bɨgɨ keʼ tsi tsɛʼ nɨ atú azɨgɨ, lá ɨ zɛʼtɨ awɨgɨ tsɛʼ a nye Ŋwi, zɨ wa a zhwémnɨ́nɨ́ ɨkfú ɨbɛn ə.

¹⁰ Ŋwi, zɨ wa a báʼtɨ́nɨ́ awɨgɨ a mbó abə́ŋ a makyɛn a nɨvwo a tɨbɔŋ məza, a ghɨ kɨ baʼtɨ awɨgɨ ə. Ntsiŋə nɨ ntəm tsum ɨ tsi lá wə ɨnye ngə́ a ghɨ kwiʼ baʼtɨ awɨgɨ ə.

¹¹ A nɨ ngwáʼtə́ awɨgɨ a mu atsaʼtɨ a Ŋwi azɨŋ ə. Ma lan, a ghɨ tíʼ bé ngə́ bɨ chwɨ́gɨ́ ɨtsaʼtɨ Ŋwi ɨtsən mbɨ́ʼ awɨgɨ, á Ŋwi a ghɨ fɔgɨ awɨgɨ; á bə ghaʼnɨ kɨ ntiʼ ntsaʼtɨ a Ŋwi nga a mɨya wəmbo mbɨ́ʼ atú azɨgɨ ə.

Kwebtɨ a nye Akyaŋtɨ a Baolo ghe

¹² Bɨgɨ tɛrə mbɨ́ʼ ngə́ mɨntəm ɨmɨgɨ sóŋə́ a mbó bɨgɨ ngə́ ntsi ɨzɨgɨ atuəshe wen, tɨ́sə́n tɨ́sə́n nchwuʼnɨ ɨzɨgɨnə a tsɨŋnɨ nɨfɛm na Ŋwi a ghánə́ abɔʼnɨ nkənu za Ŋwi a ghánə́, ka a ntsɨŋnə ayi zóŋ ŋwɔn mɨsɔŋ a ntsu ntsɨŋnə a zɛrə ghe, a nɨ be ntsɨŋnə za ɨ lonə a mbó abɔŋəntəm a Ŋwi ə.

¹³ Bɨgɨ ŋwaʼnə lá tsɛʼ anu za be nɨ tɔŋ, ndzuʼ nkɨ njiɛ; ma tsiŋə nɨ ntəm ɨtsum ngə́ nɨ mɨ zuʼ kɨ zhi a nɨ́lónɨ́ —

¹⁴ adzaŋ za nɨ kwɛnə ndzúʼə nkə́ njíɛ akum zə tse lá — a ghɨ́ mbé a njwi za Yeso a lo bə yen, á nɨ ntɛ́rə́ nɨ bɨgɨ á bɨgɨ kə́ ntɛ́rə́ nɨ bɨŋ ə.

¹⁵ Mbɨ́ʼ ngə́ ma zhí a məzen tsɛʼ ɨ shiʼnɨ, ma kə́ ndǒ ɨ fom yen a mbyɛn bən taŋ á bɨ fɔgɨ awən nkfu tsi bá ghe.

¹⁶ Ma kə́ ndǒ ngyiŋə a mbyɛn bən mbáʼ ma tsinɨ a ndóm ngěn a Masedonia, ɨ bə tsa a mbyɛn bən mbáʼ ma bənə, taŋ á nɨ kwatɨ aghan á ma ghɛn a Mbuʼ Yudiya ghe.

¹⁷ Nɨ wiʼtɨ ngə́ ma kɨ chyɛ mə́ŋnə́ mbáʼ ma kɨ chinə ngɨə a məzen lá le? Nɨ wiʼtɨ ngə́ ma ghɨ akyaŋtɨ azan lá tso ŋwɔn mɨsɔŋ a ntsu wa a ghamnɨ mɨgham mɨmbá; ɨ sóŋə́ ngə́ “E” nkə́ sóŋə́ ngə́ “Ngáŋ” táʼ nkfu le?

¹⁸ Tsɛʼ tso mbáʼ Ŋwi a sóŋnə́ tsɛʼ nkənu lá, nɨgham ɨnɨgɨ a mbó bən lónə ndáʼ mbvurɨ tɨ be “E” bo “Ngáŋ ə”.

¹⁹ Mbɨ́ʼ ngə́ Mɔn Ŋwi, Yeso Kristo, zɨ wa Sailasɨ, Timotyo abɔʼnɨ me, sóŋnɨ́ anu azhi a mbó bən lá, a láʼnə mbvurɨ tɨ be “E” kə “Ngáŋ ə”, a mbó Yeso, wɛrə a ghɨə atsum za wɛrə a soŋnɨ ngə́ zɨə mɨ ghɨə.

²⁰ Mbɨ́ʼ ngə́ a nɨ wɛrə wa a nɨ “E” wa a mbó nkaʼ Ŋwi tsum ə. Lá nɨ mbɨ́ʼ a məzen mbáʼ bɨgɨnə tsanə a ndzum Yeso Kristo ɨ sóŋə́ ngə́ “A be lá” taŋ ɨ gha nɨfáŋ a mbó Ŋwi ə.

²¹ A nɨ Ŋwi zɨmboŋ wa a ghɨnə ngə́ á bɨgɨnə tɛm ntən a mu ntsi mbyi ɨzɨgɨnə a mbúm bɨgɨnə bɨ Kristo ghe. A kɨ mbe Ŋwi, zɨ wa a zarɨnɨ awɨgɨ ɨ nɨŋ afaʼ məzen a mu mbó bɨgɨ ə.

²² Ŋwi a nɨŋnə alyigɨ a nye bɨgɨnə a ndiʼə ngə́ bɨgɨnə tiʼ ɨbyi, nkɨ nɨŋ a Azhwi zə Fɛmnɨ a mu mɨntəm ɨmɨgɨnə tso mɨntɨ ma a bɛʼnɨ a ndiʼə ngə́ bɨgɨnə ghɨ kwárɨ́ atsum za zɨə lɛnɨ a mbó bɨgɨnə ghe.

²³ Ŋwi a nɨ atɛmə-ndzě ɨghə — wɛrə a zhi ntəm ɨghə! A nɨ mbɨ́ʼ ngə́ ma kɨ sa ndǒ ɨ nɨŋ ngɨ́ʼ a nye bən; nə nɨ anu za a ghɨ́nɨ́ ma kaʼ a Korɨnto yen lá.

²⁴ Ka bɨgɨ sóŋə́ awən lá nɨ adzaŋ za nɨ tsinɨ nɨ ɨ nɨŋ mɨntəm ɨmən a nye Ŋwi ə; lá bɨgɨnə faʼə abó mɔ́ʼɔ́ taŋ á nɨ chi tsi nɨ nɨdorɨ, ɨ kɨ tɛm ɨ tɨŋənə a mu abeməntəm azɨŋ ə.