2 Bita 2 - Mɨkan wu Fi

Bɨdiʼ bɨ Aŋwaʼnɨ bɨ Ɨchwenu nɨ Ɨnɨŋ Ngɨ́ʼ ɨza ghe

¹ Ntóm Ŋwi ɨchwenu fú a ɨshe a tɨtərɨ ɨbɛn a mbyi, ndəŋndəŋ bɨdiʼ bɨ aŋwaʼnɨ bɨ ɨchwenu ghɨ kɨ fu a ɨshe a tɨtərɨ bɨŋ ə. Bo mɨ yen nɨ mbɔ́m ndiʼ anu a Ŋwi tsa tsɨ tsənkɨnə nkɨ mbe tsɨ ɨchwenu, ɨ kɨ ton awa a Tafaʼ wa a zónɨ́ atú aza, ma lan, bo mɨ yen nɨ ntsənkə za ɨ mɨ vwukɨ yen a nye ɨtumbəm ɨtsa tɨgha bo zhyɛ.

² Bə ghaʼnɨ ghɨ zɔŋnə tsɛʼ mɨndómɨnji mɨ ɨnu ɨtɨshwe ɨnu ɨtsa; mbɨ́ʼ ɨnu tsa bo ghɨnə, bə mɔʼɔ ghɨ tíʼə ghamnɨ ɨnu tsɨ tɔmnɨnɨ mbɨ́ʼ Ndómnji nkənu wa.

³ A mu ɨnu amiɛnɨngám ɨtsa, bɨdiʼ bɨ aŋwaʼnɨ bɨ ɨchwenu biŋ ghɨ ghɨ abi a nye adzaŋ za bo sóŋnɨ́ njalaʼ tsa bo kyaŋtɨnɨ a mbó bɨŋ ə. A nɨ abaŋ zə sa tɨtsɔŋnɨ mbáʼ Ŋwi, zɨ wa nɨ Tabyɛn ɨwa a kyaŋtɨnɨ ɨnye ɨzhi a ntsənkɨ bo ghe!

⁴ Ŋwi a sé ghɨʼtɨ mbó ɨmyi a nye bɨtsen bɨ ndá bɨ Ŋwi ba bɨ ghɨ́nɨ́ mɨbvu, lá wɛrə a máʼ awa a mu ɨmugɨ nɨnkoŋ wa, adiʼ wa bɨ korɨnɨ awa nɨ mɨnkɨ ndɛn a mu ndzumnɨ, ntsǐŋ Njwi Nɨsáʼ ə.

⁵ Ŋwi a sé ghɨʼtɨ mbó ɨmyi a nye mbyi bəmbyi, lá wɛrə a yén nɨ nkyiɛ luŋə nkwə́ŋnə́ a nye mbyi ɨbɛn ba bɨ sé mɨntəm ɨma a nye Ŋwi nɨŋ; ɨbɛn ba wɛrə a lóŋnɨ́ a bé tsɛʼ Nua, zɨ wa a kɨ́nə́ sǒŋ ɨnu tsɨ chinɨnɨ, nkwiʼtɨ ɨbɛn bə mɔʼɔ bi samba ghe.

⁶ Ŋwi a tsə́nkɨ́ ntáʼmbagə tsɨ wi tsa tsɨ bénɨ́ Sodom bo Gomora lá, ntɔn a tsɛrə nɨ ɨmugɨ, ngɨ a tsɛrə a nye alisɨ anu za a ghɨnɨ fú a nye ɨbɛn ba bɨ sé mɨntəm ɨma a nye Ŋwi nɨŋə.

⁷ Wɛrə a fɨ́gɨ́ a Lɔtərə a mu ngɨ́ʼ, zɨ wa a bénɨ́ ŋwɔn wu shiʼnɨ, wa a kɨ́nə́ ndzə́ŋnə́ mbɨ́ʼ ɨtɨshwe ngɨnɨ mɨnu mɨ ɨbɛn bɨtɨlɛn a nyɔngɔŋ ə.

⁸ Lɔtərə a tsí a tɨtərɨ bo, nɨ njwi nɨ njwi a kə́ ndzə́ŋnə́ adzaŋ za a kɨ́nə́ ndzě nkə́ ndzúʼə mbɨ́ʼ ngɨnɨ mɨnu mə tɔmnɨnɨ ɨma ghe.

⁹ Ma lan, Maʼmbyí a zhi adzaŋ za a fɨ́gɨ́nə́ a mu ngɨ́ʼ ɨbɛn ba bɨ zhinɨ a Ŋwi a nye ɨnu tsa tsɨ zhwə́ŋtɨ́nə́ awa, ɨ kɨ nɨŋ ngɨ́ʼ a nye ngaŋ abɨgəntəm, ɨ tsiŋənɨ Njwi Nɨsáʼ,

¹⁰ tɨ́sə́n tɨ́sə́n, ɨbɛn ba bɨ ghɨnɨ ɨnyaʼnɨ ɨnu tsa mbəmnye lɔnə nkə́ ngwágɨ́nɨ́ mɨtən mɨ Ŋwi lá. Bɨdiʼ bɨ aŋwaʼnɨ bɨ ɨchwenu məbiŋ tsi nɨ mɨntəm mə fankɨnɨ nkɨ ntsi nɨ kɨtɛrɨ ngvo, nkeʼ nkə́ ndǐʼ mbɔm zɨ shiʼnɨ a mbó ɨdzúm tsə kaʼnɨ tsə nɨfáŋ tsa tsɨ tsinɨ atɨ́; bo baŋnə ndzɔ́mə́ awa ghe.

¹¹ Tsɛʼ bɨtsen bɨ ndá bɨ Ŋwi, bo ba bo tsinɨ nɨ adaʼ abɔʼnɨ mɨtən ngɛn nɨ mbyi ntsa bɨdiʼ bɨ aŋwaʼnɨ bɨ ɨchwenu ben, ka bo nkaŋə awa bɨdiʼ bɨ aŋwaʼnɨ bɨ ɨchwenu ben a ɨshi Maʼmbyí nɨ ndzɔm ə.

¹² Lá ɨbɛn məbiŋ ghɨ mɨnu tə́ nkwáʼtə́ tso ɨnyam mɨbaʼ tsa tsɨ tsinɨ tsɛʼ ngə́ á bɨ ko njwitɨ; bo chwúʼtə́ anu atsum za bo se zuʼ nkɨ nji tsɛʼ nɨ ndzɔm ə. Bɨ ghɨ zhwítɨ́ awa ndəŋndəŋ tso mbáʼ bɨ zhwítɨ́nɨ́ ɨnyam mɨbaʼ,

¹³ bɨ ghɨ tfu awa nɨ ndzě ngɨ́ʼ mbɨ́ʼ ndzě ngɨ́ʼ za bo yénɨ́ nɨ zɛrə ghe. Anu za a bɔŋnə awa a nɨ ngɨ anu atsum a ntɨŋə azhwɨgɨnɨ za a zhwúrɨ́sɨ́nɨ́ ɨnu tsa ɨnyam ɨnye lɔnə lá; bo nɨ adɨrətú nkɨ mbyɛgɨ ndiʼ mbɔm zɨ shiʼnɨ za ɨ lonə a mbó ɨbɛn mbáʼ be bo tsi atú atɛkɨ a ndzɨ́ə bɨŋ bo, le buŋ bo kə́ ndórə́ awa a nye mɨndóm mɨ ntám ɨma ghe!

¹⁴ O chi zɛn achwurɨ a ɨmɨgɨ bo; o chi koʼ zhwurɨsɨ awa a nye ngɨ mɨbvu ɨza ghe. Bo tsagɨnɨ ɨbɛn ba mɨntəm ɨma bɔrɨkɨnɨ a mu ndab ə. Bɨ mərɨsɨ mɨntəm ɨma ngə́ á mɨ be mə amiɛnɨngám ə. Ŋwi a lɔʼ awa ghe!

¹⁵ Bo nyɛʼtɨnɨ ndómnji wu chinɨnɨ ntiʼ nkɨ fə ndómnji ɨwa; bo zɔŋnɨ ndómnji wa Balam mɔn Beyo wu mbáŋnɨ́ a zɔ́ŋnɨ́, mbe nchyɛ nɨ nkáb a mu ngɨ afənu,

¹⁶ bɨ ghamtɨ ayi mbɨ́ʼ ɨbvu ɨyi lá. Jakasɨ ɨyi a ghám wəmbo nɨ nji ŋwɔn mɨsɔŋ a ntsu ntiʼ ntsuʼnɨ ntom Ŋwi məzen a ngɨ anu abarə ghe.

¹⁷ Ɨbɛn məbiŋ tsi lá tso bɨnáŋə́bə́rə ba bɨ zomnkɨnə, tso mbaʼ za kɨfɛrə wu ntən a tíŋnə́ ngěn nɨ zɛrə; Ŋwi a lɛnə adiʼ a mbó bo a mu ndzumnɨ za ɨ fɨ́ŋnə́ ntsa mbó ə.

¹⁸ Bo ghamə nɨ nji tsɨ tən mɨgham mɨ ŋǔʼ ɨnye mə dzɨŋtɨ, nkə́ ndɔ́gɨ́ ɨnu ntɔrɨ ɨlɛbɨ tsa mbəmnye ɨ kɔŋnɨ a mbentɨ ɨ ko ɨbɛn ba bɨ bvurɨnɨ mbiʼnɨ a fu bo a tɨtərɨ ɨbɛn ba bɨ tsínə́ awa a mu afənu ə.

¹⁹ Bo kaʼə awa nɨ ɨfɨgɨ bo a mu ɨfaʼ abuʼ mbáʼ bo mboŋ benɨ ɨbuʼ a mbó ngɨnɨ mɨnu ma mɨ tsənkɨnə — mbɨ́ʼ ngə́ ŋwɔn mɨsɔŋ a ntsu a nɨ abuʼ a mbó anu atsum za a kɔʼnɨ ɨ shiʼtɨ ntsi atú zɨə.

²⁰ Be a be ngə́ ɨbɛn funə awa a mu adaʼ a twɛfɨ atuəshe ntsa a ndzum nji Maʼmbyí bo Ndoŋ ɨwɨgɨnə Yeso Kristo, adaʼ a twɛfɨ atuəshe məzen a bə nkwiʼ nko awa nkɔʼ shiʼtɨ ntsi atú bo, ɨbɛn məba bɨ́gɨ́ ntsa adzaŋ za bo bénɨ́ a mbiʼnə ghe.

²¹ A kwɛ́ mbe bɔŋ be tɨ́sə́n a mbó bo, mbáʼ be a be ngə́ bo láʼnə mbvurɨ tɨ zhi ndómnji wu chinɨnɨ məwen ntsa a nji wɛrə ɨ bə bənkɨ mɨntəm ɨma ɨ fɨgɨ a mu ntɨgə zɨ fɛmnɨ za bɨ ghánɨ́ a mbó bo ghe.

²² Anu za a fúnɨ́ a nye bo a diʼ ngə́ mɨgham mə nanɨ men soŋ nkənu ngə́: “Ngvo bən ngɛn a nye afɨ́kɨ́ azhi ɛ” nkɨ mbe ngə́ “Kə bɨ sugɨ akfunyam be ɨ nə́ muŋ a chi keʼ lɨgɨnɨ ɨ bə ghɛn a mu atətsáʼnɨ́ ə.”