1 Yoane 3 - Mɨkan wu Fi

Adzaŋ za Ɨbɔ bɨ Ŋwi Tsinɨ nɨ mbe ghe

¹ A nɨ ze adzaŋ za Tarɨ a kɔŋnɨ awɨgɨnə ghe! Akɔŋnɨ azhi a ghaʼ ngɛn nkuʼ a nye ɨfɨʼ za bɨ tɔ́ŋnə́ awɨgɨnə ngə́ ɨbɔ bɨ Ŋwi — ma lan, a nkənu, bɨgɨnə nɨ bɛrə ghe. Atuəshe zen a se awɨgɨnə zhi lá mbɨ́ʼ ngə́ ka a zhi ayi a Ŋwi ə.

² O bɨson ɨban, tɨtsɔŋnɨ bɨgɨnə nɨ ɨbɔ bɨ Ŋwi ə, lá azúm za bɨgɨnə lonɨ be zɛrə, a bvurɨ tɨ lə̌. Lá bɨgɨnə zhi ngə́ a nkfu za Kristo a funɨ a ɨshe, bɨgɨnə mɨ be tso zɨ, mbɨ́ʼ ngə́ bɨgɨnə ghɨ zɛ́n ayi tsɛʼ adzaŋ za a lanɨ mbe.

³ Ŋwɔn tsum ɨ mɔ́ʼɔ́ mɔ́ʼɔ́ wa a tsinɨ nɨ ntsiŋə nɨ ntəm tsum məzen a nye Kristo, a lěn atuəmbəm azhi a lán, tso mbáʼ Kristo a kɨnɨ nkɨ ndán lá.

⁴ Ŋwɔn tsum wa a ghɨnɨ mɨbvu a vwo ɨsáʼ ngə́ zɨə fasɨ a nyɔngɔŋ Ŋwi, mbɨ́ʼ ngə́ ɨbvu lá ɨ fasɨ nyɔngɔŋ ə.

⁵ Nɨ zhi ngə́ Kristo a fú a ɨshe lá taŋ ɨ lɔgɨ mɨbvu ɨ ghɛn nɨ mɛrə, nkɨ nji ngə́ ka ɨbvu tse tsi ayi wə ɨnye.

⁶ Ma lan, ŋwɔn tsum wa a tsínə́ a mbúm bo Kristo, ka a ngěn ayi nɨ mbyi a ngɨ ɨbvu; lá ŋwɔn tsum wa a ghɛnə nɨ mbyi ngɨ̌ ɨbvu a láʼnə mbvurɨ tɨ ze ayi kə nji ayi ɛ.

⁷ Ɨbɔ ɨban, á ŋwɔn tse a keʼ awən tamtə. Ŋwɔn tsum wa a ghɨnɨ anu za a kuʼnɨnɨ a chinɨ, tsɛʼ adzaŋ za Kristo a kɨnɨ nkɨ nchinɨ lá.

⁸ Ŋwɔn tsum wa a ghɛnə nɨ mbyi ngɨ̌ ɨbvu a tsi lá a mbó Dəbɨrɨ, mbɨ́ʼ ngə́ Dəbɨrɨ a ghɨnɨ ɨbvu ndɔgɨnɨ a mbiʼnə ghe. Mɔn Ŋwi a fú a ɨshe lá mbɨ́ʼ anu məziŋ ə, a ntsənkɨ anu za Dəbɨrɨ a ghɨ́nə́.

⁹ Ka ŋwɔn tse wa a nɨ mɔn Ŋwi a ngěn ayi nɨ mbyi a ngɨ ɨbvu, mbɨ́ʼ ngə́ ngótɨ́ mbě Ŋwi ɨ tsi a mu ɨnye zɨ; mbɨ́ʼ ngə́ Ŋwi a nɨ Ta ɨyi, a chi keʼ ngěn nɨ mbyi a ngɨ ɨbvu ə.

¹⁰ Nə nɨ líʼ wa a lanɨ ntsi ɨwu a tɨtərɨ ɨbɔ bɨ Ŋwi abɔʼnɨ ɨbɔ bɨ Dəbɨrɨ ngə́: ŋwɔn tsum wa a se ngɨə anu za a kuʼnɨnɨ kə nkeʼ a bə mɔʼɔ kɔŋ, ka a be ayi mɔn Ŋwi ə.

A nɨ Kɔŋ a Ŋwɔn nɨ Ŋwɔn ə

¹¹ Nkən wa nɨ zúʼnɨ́ ndɔgɨnɨ a mbiʼnə ɨ wɛnə ngə́: á bɨgɨnə kɔŋnɨ a ŋwɔn nɨ ŋwɔn ə.

¹² Bɨgɨnə mɨ keʼ zagɨ mbe tso Kain, wa a tsínɨ́ bo wu Ntɔmnɨnɨ wa. Wɛrə a zhwítɨ́ a mɨma ɨyi Abɛrɨ ə. Kain a zhwítɨ́ ayi lá mbɨ́ʼ ake le? Mbɨ́ʼ ngə́ ɨnu tsa wɛrə zɨmboŋ a ghɨ́nɨ́ tsɨ sé kuʼnɨ, lá ɨnu tsa mɨma ɨyi a ghɨ́nɨ́ tsɨ chínə́.

¹³ Ma lan nə ɨbɔmbɨma ɨban, á keʼ awən kɨʼnɨ, mbáʼ be ɨbɛn bɨ atuəshe ban awɨŋ ə.

¹⁴ Bɨgɨnə zhi ngə́ bɨgɨnə funə a mu nɨvwo ntiʼ ntsa a bagɨ ntsi ntɨŋ ə; bɨgɨnə zhi a zɛrə mbɨ́ʼ ngə́ bɨgɨnə kɔŋ ɨbɔmbɨma ɨbɨgɨnə ghe. Ŋwɔn tsum wa ka a nkɔ́ŋə́ ayi, a bvurɨ ntsi a shwúrɨ́ mɨtən mɨ nɨvwo ə.

¹⁵ Ŋwɔn tsum wa a banə a bə mɔʼɔ a nɨ ɨsɔbɨ mɨto, o kɨ nji ngə́ ka ɨsɔbɨ mɨto a tsi ayi nɨ ntsi ntən nɨnkoŋ a mu ɨnye ɨzhi ɛ.

¹⁶ Nə nɨ adzaŋ za bɨgɨnə zhínə́ azúm za akɔŋnɨ a nɨ zɛrə ghe; Kristo a ghá ntsi mbyi ɨzhi lá mbɨ́ʼ awɨgɨnə ghe. Bɨgɨnə kɨ ntiʼ ntsi nɨ nga ntsi mbyi ɨtsɨgɨnə mbɨ́ʼ ɨbɔmbɨma ɨbɨgɨnə ba bɨ zɔŋnə a Kristo ghe!

¹⁷ Be ŋwɔn afuʼ zə wi a ze a mɨma ɨyi a ndǒ azúm zə tsɛrə, lá a ton ayi a nkwátɨ́ mɨma ɨyi wa, wɛrə a chi keʼ kaŋ ngə́ zɨə kɔŋ a Ŋwi ə.

¹⁸ Ɨbɔ ɨban, akɔŋnɨ azɨgɨnə a se tsi nɨ mbe lá tsɛʼ mɨgham mɛrə mɛrə ghe; a tsi nɨ mbe ngótɨ́ akɔŋnɨ, mbáʼ a diʼnə atuəmbəm azhi a nye ngɨnɨ mɨnu ə.

Nkotɨ Mbáŋnɨ́ a Ɨshi Ɨmɨgɨ Ŋwi ə

¹⁹ Nə tiʼ mbe adzaŋ za bɨgɨnə mɨ zhi ngə́ bɨgɨnə tsi a mbó Ŋwi, zɨ wa wɛrə nɨ nkənu lá; nə nɨ adzaŋ za bɨgɨnə ghɨ ghɛn a ɨshi Ŋwi tɨ nɨbɔgɨ ə.

²⁰ Be mɨntəm ɨmɨgɨnə soŋ ngə́ bɨgɨnə vwo ɨsáʼ, bɨgɨnə zhi ngə́ Ŋwi a ghaʼ ntsa mɨntəm ɨmɨgɨnə, nkɨ nji ɨnu ɨtsum ə.

²¹ Ma lan nə bɨson ɨban, be mɨntəm ɨmɨgɨnə tú soŋ ngə́ bɨgɨnə vwo ɨsáʼ, muŋ bɨgɨnə tsi nɨ nchyɛ nɨ nkotɨ mbáŋnɨ́ a ɨshi ɨmɨgɨ Ŋwi ə.

²² Bɨgɨnə kwárə́ wəmbo azúm atsum za bɨgɨnə bitɨnɨ, mbɨ́ʼ ngə́ bɨgɨnə zúʼnɨ́ ntɨgə ɨchi nkə́ ngɨə a za a ghɨnə ɨnye ɨzhi bɔŋənə ghe.

²³ Ntɨgə za wɛrə a ghanɨ ɨ nɨ ngə́ á bɨgɨnə nɨŋ mɨntəm ɨmɨgɨnə a nye Mɔn ɨyi Yeso Kristo nkɨ nkɔŋ a ŋwɔn nɨ ŋwɔn, tsɛʼ adzaŋ za Kristo a tɨ́gɨ́nɨ́ a mbó bɨgɨnə lá.

²⁴ Ɨbɛn ba bɨ zúʼnɨ́nɨ́ ntɨgə Ŋwi chyɛ̌ a mbúm bo bɨ Ŋwi, Ŋwi a kə́ nchyɛ̌ a mbúm bo bo ghe. Mbɨ́ʼ Azhwi za Ŋwi a ghanə a mbó bɨgɨnə, bɨgɨnə zhi ngə́ Ŋwi a chyɛ̌ a mbúm bɨgɨnə ghe.