1 Yoane 1 - Mɨkan wu Fi

Nɨgham na nɨ Ghánɨ́ Ntsi Ntɨŋ ə

¹ Bɨgɨ ŋwaʼnɨ a mbó bən lá mbɨ́ʼ Nɨgham na nɨ ghánɨ́ ntsi ntən, mbáʼ nɨ tsínɨ́ nchwuʼnɨ a mbiʼnə ghe. Bɨgɨ zuʼnə a nɛrə, nkɨ ndzɛn a nɛrə nɨ ɨmɨgɨ ɨmɨgɨ; bɨgɨ zɛnə nkɨ mɔmtɨ a nɛrə nɨ mbó ɨmɨgɨ ə.

² A nkfu za ntsi mbyi məzen ɨ fúnɨ́ a ɨshe, bɨgɨ zɛ́n a zɛrə; ma lan bɨgɨ ghamə mbɨ́ʼ a zɛrə, nkə́ ngámə́ a mbó bən mbɨ́ʼ ntsi ntən nɨnkoŋ za ɨ tsínɨ́ bo Tarɨ, bɨ tiʼ ngɨ bɨgɨ zhi lá.

³ Za bɨgɨ zɛnə nkɨ ndzuʼ, bɨgɨ kə́ nchwítə́ a mbó bən, taŋ á nɨ chi bumnɨ bɨgɨnə a mu ndzɨnə za bɨgɨ tsinɨ nɨ zɛrə bɨgɨ bɨ Tarɨ bo Mɔn ɨyi Yeso Kristo lá.

⁴ Bɨgɨ ŋwaʼnə a zen a mbó bən lá taŋ á nɨdorɨ ɨnɨgɨ tiʼ ntsi a nɨ́lónɨ́ ə.

Ŋwi a nɨ Nkaʼ ə

⁵ Nkən wa bɨgɨ zuʼnə a mbó Mɔn ɨyi nkə́ nchwítə́ ɨ nɨ ngə́: Ŋwi a nɨ nkaʼ, ndzumnɨ keʼ wə ɨnye tsi, kə́ tsɛʼ mɨnyiə ghe.

⁶ Be a be ngə́ bɨgɨ tiʼ soŋ ngə́ bɨgɨ dzɨ́nə́ bɨgɨ bɨ wɛrə, lá, tsɛʼ a nyom məwa ntsi a mu ndzumnɨ, bɨgɨ chwě lá ɨnu a nye mɨgham ɨmɨgɨ abɔʼnɨ ngɨnɨ mɨnu ɨmɨgɨ ə.

⁷ Lá be bɨgɨnə nchyɛ̌ a mu nkaʼ — tsɛʼ tso mbáʼ wɛrə a tsinɨ a mu nkaʼ lá — lá be ngə́ bɨgɨnə ndzɨ́nə́ bɨgɨnə bɨ ŋwɔn nɨ ŋwɔn, alɛm a Mɔn ɨyi Yeso, a sugɨnə ɨfənu ɨtsɨgɨnə ɨtsum a tɨtərɨ bɨgɨnə ghe.

⁸ Be bɨgɨnə soŋ ngə́ bɨgɨnə se nɨ ɨbvu tsi a mu ɨnye ɨtsɨgɨnə, bɨgɨnə tamtɨnə ɨtumbəm ɨtsɨgɨnə, nkənu keʼ a tɨtərɨ bɨgɨnə chyɛ.

⁹ Lá be bɨgɨnə twiʼtɨ mɨbvu ɨmɨgɨnə a mbó Ŋwi, wɛrə a mɨ len akaʼ azhi, ɨ kɨ ghɨ a za a kuʼnɨnɨ: wɛrə a mɨ lɨgɨnɨ mɨbvu ɨmɨgɨnə ɨ kɨ sugɨ ɨfənu ɨtsɨgɨnə ɨtsum a tɨtərɨ bɨgɨnə ghe.

¹⁰ Be bɨgɨnə soŋ ngə́ bɨgɨnə bvurɨ ɨbvu tɨ ghɨ, bɨgɨnə ghɨ a Ŋwi a nye ŋwɔn ɨchwenu, nɨgham ɨni keʼ a mu ɨnye ɨtsɨgɨnə chyɛ.