1 Timotyo 5 - Mɨkan wu Fi

Adzaŋ za Bɨgɨnə Chinɨ Lə̌tú nɨ Bɨkfugɨ bɨ bə Bəngye a Mu Ndáŋwi ə

¹ Koʼ a ndvuŋ ŋwɔn mbáŋnɨ́ ghamtɨ, lá gham wəmbo tso ngə́ a lo mbe ta ɨgho ghe. Tiʼtɨ nɨ ntəm wu fɛmnɨ; ngwaʼ ngwasom bə mbáŋnɨ́ tso ɨbɔmbɨma ɨbo,

² bɨləmə bɨ bəngye tso bɨnɨmi ɨbo, ngwaʼ ngwasom bə bəngye tso ɨbɔmbɨma ɨbo ə.

³ Diʼ mbɔm zɨ shiʼnɨ a mbó bɨkfugɨ bɨ bə bəngye ba bɨ tsinɨ tɨ nkwatɨ ə.

⁴ Lá be nkfugɨ mangye a tsi nɨ ɨbɔ kə ɨbɔ bɨ ɨbɔ ɨbyi, ɨbɔ ba tsi nɨ ntsambyi ɨ ghɨnɨ mɨnu ma ɨbɛn ba bɨ zɔŋnə a Kristo tsinɨ nɨ ngɨə a nye ngwəgɨ ɨtsa, a nye ndóm məwen, ɨ byigɨnə a mbó bɨta ɨba abɔʼnɨ bɨta bɨ bɨta ɨba ɨbɔŋ wa bɨ ghɨ́nɨ́ a nye bo, mbɨ́ʼ ngə́ nə nɨ ɨnu tsa tsɨ ghɨnə ɨnye Ŋwi bɔŋənə ghe.

⁵ Nkfugɨ mangye wa a tsinɨ tɨ nkwatɨ, nkə́ nchyɛ̌ zɨzɨ, wɛrə a nɨŋ ntsiŋə nɨ ntəm ɨyi ɨtsum lá a nye Ŋwi ə. A ghěn nɨ mbyi ntsáʼtə́ a Ŋwi nkə́ ndɔ́ntə́ akwatɨ wəmbo nɨ ɨtfúʼ nɨ njwi ɛ.

⁶ Lá nkfugɨ mangye wa a tsagɨnɨ nkfu ɨzhi a ndǒ ɨdzúm mbəmnye, a baʼtɨ ntsi ntən ɨ tsinɨ lá, a kfonə ghe.

⁷ Gha ɨtɨgɨtɨ tsen a mbó bo taŋ á bɨ ghɨ́ nkeʼ ɨfərɨ ɨwa ghaə.

⁸ Lá be ŋwɔn tse a tú lə̌tú a nye ɨbɛn ɨbyi, tɨ́sə́n tɨ́sə́n ngaŋ ngwəgɨ ɨchi, lá be ngə́ a ton ayi abeməntəm azhi a nye Kristo, ntiʼ mbɨ́gɨ́ ntsa a ŋwɔn wa ka a nɨŋ ayi ntəm ɨyi a nye Ŋwi ə.

⁹ A nɨ keʼ kwiʼtɨ a nkfugɨ mangye tse a ɨwaŋ bɨkfugɨ bɨ bəngye tɨkə a kɔʼnə ntsa ɨlom mɨghúm mi ntugə ghe. A nkwiʼtə, á be ngə́ a zɔ́ʼnə tsɛʼ táʼ nkfu,

¹⁰ bɨ kɨ nji ayi ngə́ a ghɨ̌ ɨnu tsɨ shiʼnɨ tso: mangye wa a kúgɨ́nɨ́ ɨbɔ ɨbyi ɨ shiʼnɨ, nkwárə́ bɨghən a ndá zɨ, ngɨ̌ ɨnu a mbó ɨbɛn ba bo bo zɔŋnə a Kristo tsa tsɨ díʼnɨ́ ngə́ a shíʼtɨ́ nɨ ɨnye ɨzhi a ɨshe, nkwatɨ ɨbɛn ba bɨ tsínɨ́ a ngɨ́ʼ nkɨ ntɛgɨ atú azhi a ngɨ ɨbɔŋ ə.

¹¹ Lá koʼ nɨŋ bɨkfugɨ bɨ bəngye bə bɔrɨ a ngɔ́n; mbɨ́ʼ ngə́ be ɨnu mbəmnye ɨtsa ndǒ ngə́ á bo zɔ́ʼ muŋ bo mɨ furɨ ndzum ɨtsa ɨ gha a mbó Kristo,

¹² ma lan, ɨ tiʼ vwo ɨsáʼ ngə́ bo vwo akaʼ za bo kwɛ́nɨ́ ndɛn bo bɨ Kristo ghe.

¹³ Bo mɨ kə́ yɛʼnɨ ntsənkɨ nkfu za, ɨ kárɨ́sə́ kuŋənɨ mɨndá; za a bɨ́gɨ́nɨ́ ngɛn nɨ mbyi a nɨ ngə́ bo mɨ yɛʼ a mbé ngaŋ fɨnkərɨ, ɨbɛn ba bɨ nɨ́ŋnɨ́ mɨntsu ɨma a nye ɨnu ɨbɛn bədaŋ, ngámə́ mbɨ́ʼ ɨnu tsa bo benɨ keʼ ghamə.

¹⁴ Ma mɨ baŋnɨ kɔŋtɨ ngə́ á bɨkfugɨ bɨ bəngye bə bɔrɨ zɔ́ʼ, njwi ɨbɔ, nkɨ ndə̌tú a nye njwuʼ ɨtsa, taŋ ɨ ghɨ á ngaŋ kɨban ɨtsɨgɨnə keʼ tsi nɨ abárɨ́ a ngam ɨnu tɨbɔŋ mbɨ́ʼ awɨgɨnə ghe.

¹⁵ Mbɨ́ʼ ngə́ bɨkfugɨ bɨ bəngye bə tsɛrə kwɛnə furɨ ndzum ɨtsa ngɛn awa a ndzɔŋ Satan ə.

¹⁶ Lá be mangye wa a zɔŋnə a Kristo a tsi nɨ bɨkfugɨ a ngwəgɨ zɨ, a zagɨ ntsi nɨ ndə̌tú a nye bo, ɨ keʼ abyɛʼ atú ndáŋwi nyəm, taŋ á ndáŋwi chi lə̌tú nɨ bɨkfugɨ ba bɨ tsinɨ tɨ bɨnkwatɨ ə.

¹⁷ Ɨtú ndáŋwi tsa tsɨ faʼnɨ ɨfaʼ wu shiʼnɨ tso bɨntsagɨnɨ, bɨ tsi nɨ ndɔgɨ bo tso ngə́ bo kuʼnɨ a nkwárɨ́ nkáb afaʼ ɨza nkfu tsi bá, tɨ́sə́n tɨ́sə́n bo ba bɨ faʼnɨ ɨ shiʼnɨ a sóŋə́ ɨ kə́ diʼnə anu a Ŋwi ə.

¹⁸ Mbɨ́ʼ ngə́ aŋwaʼnɨ a Ŋwi soŋ ngə́, “Koʼ mɨlwi mɨ mbɔŋ korɨ mbáʼ o faʼnə nɨ zɛrə a nkwi nchwi” nkɨ soŋ ngə́, “Bɨ tsi nɨ ntfu nkáb ngaŋ afaʼ ə.”

¹⁹ Koʼ zhwiʼtɨ ɨsáʼ wa bɨ kaŋnɨ atú a ndáŋwi nɨ wɛrə tɨkə a yiŋ bətɛmə-ndzě bɨbá kə ntsa bɨbá ghe.

²⁰ Ghamtɨ asaŋəsaŋ ɨbɛn ba bɨ ghɨnɨ mɨbvu, taŋ á abvuʼ a ɨbɛn a bɔgə.

²¹ A ɨshi ɨmɨgɨ Ŋwi, a ɨshi ɨmɨgɨ Kristo Yeso nkɨ mbe a ɨshi ɨmɨgɨ bɨtsen bɨ ndá bɨ Ŋwi bə fɛmnɨ, ma kwantə agho ngə́ o zɔŋ ɨtɨgɨtɨ tsenə tə́ ndyǐŋ mɨshi kə mbémtɨ́ ndzum ŋwɔn tse a nye anu atsum za o ghɨnə ghe.

²² O koʼ nkɨənə a nyɔŋ mbó atú ŋwɔn tse ɨ soŋ ngə́ a kuʼnɨnə a faʼə a mbó Maʼmbyí ɛ. Koʼ zɔŋ nkon a ngɨ mɨbvu bɨŋ ŋwɔn tse; len atuəmbəm azo á fɛmə.

²³ Koʼ tsɛʼ nkyi a nǒ, lá no adiʼ a mɨluʼ mə tən á mɨ kwatɨ agho a nghɔʼ mɨdzɨ a mɨto gho mbáʼ o gháʼnə́ ngɔ́ntə́ lá.

²⁴ Mɨbvu mɨ ɨbɛn bə mɔʼɔ nɔŋ tsɛʼ asaŋəsaŋ a ndzé ghe, a ɨshi ɨbɛn bɨtsum ba bɨ nɨŋnɨ mɨntəm ɨma a nye Kristo, bo binə ngvo ɨsáʼ; lá bɨ zě mɨbvu mɨ ɨbɛn bə mɔʼɔ be a nkfu ndzum ə.

²⁵ Ndəŋndəŋ ngɨnɨ mɨnu mə shiʼnɨ bɨ zě asaŋəsaŋ, tsɛʼ ma bɨ se asaŋəsaŋ a ngɨə lá, mɨ chi keʼ lyɛmtə.