1 Timotyo 4 - Mɨkan wu Fi

Akwantɨ mbɨ́ʼ Bɨdiʼ bɨ Aŋwaʼnɨ bɨ Ɨchwenu ə

¹ Azhwi a soŋ a lán ngə́ ɨbɛn bə mɔʼɔ ghɨ nyɛʼ abeməntəm aza a nkfu ndzum ə; bo ghɨ zúʼnɨ́ ɨzhwi tsa tsɨ chwɛ́nɨ́ ɨnu ɨ kɨ zɔŋ ɨnu tsa bɨdzɨŋ diʼnə ghe.

² Ɨdzaŋ ɨnu mətsen tsa bɨ diʼnə lá, a dzagɨ ngaŋ ɨchwenu tsa tsɨ lonɨ nɨ ntám, bo ba mɨntəm ɨma kfokɨnɨ tso ngə́ bɨ tɔn a mɛrə nɨ atɨŋə zə lomnɨ lá.

³ Ɨbə́ŋ ɨbɛn mətsiŋ diʼə ngə́ a nɨ afənu a ndzɔ́ʼə́ abɔʼnɨ ɨ kɨ dzɨ ɨbə́ŋ mɨdzɨ tsɨ tse ghe. Lá Ŋwi a káʼ ɨbə́ŋ mɨdzɨ mətsen lá ngə́ á ɨbɛn ba bɨ nɨŋnɨ mɨntəm ɨma a nye zɨ, nkɨ nji nkənu, dzɨ mbáʼ bo mɛtɨnə atsaʼtɨ a Ŋwi zə ngǎ mɨya ghe.

⁴ Ɨdzúm ɨtsum tsa Ŋwi a káʼnɨ́ tsɨ bɔŋə; ka azúm zə tsɛrə a tsi ayi á bɨ nyáŋ, lá azúm atsum a tsi á bɨ kwarɨ nɨ atsaʼtɨ a Ŋwi zə ngǎ mɨya,

⁵ mbɨ́ʼ ngə́ nɨgham nɨ Ŋwi abɔʼnɨ atsaʼtɨ a Ŋwi ghɨə ngə́ á Ŋwi a bem a tsɛrə ghe.

Ngaŋ Afaʼ zɨ Kristo Yeso zɨ Shiʼnɨ ə

⁶ Be o gha ntɨgə tsen a mbó ɨbɛn ba bɨ nɨŋnɨ mɨntəm ɨma a nye Ŋwi, o mɨ be ngaŋ afaʼ Kristo Yeso zɨ shiʼnɨ, adzaŋ za o dzɨ́gɨ́nə́ azhwi azo nɨ mɨgham ma mɨ ghɨnə abeməntəm a tən abɔʼnɨ ɨnu nkənu tsa bɨ diʼnə agho ɨwu, o kə́ ndzɔŋə a tsɛrə lá.

⁷ Lá baʼtɨ njalaʼ tsɨ kɔ́ʼɔ́nguʼ tsa tsɨ se Ŋwi a mbɔ́gɨ́tə́, tsa tsɨ sě ngámə́ anu zə tse mbɨ́ʼ a Ŋwi, nkeʼ kɨ mbɔŋ a sáʼə lá. Mərɨsɨ atuəmbəm azo a nchyɛ́ nɨ ntsi mbyi za ɨ ghúʼsɨ́nə́ a Ŋwi ə.

⁸ Ɨ shintɨ ɨkwɛn ɨnye ɨ tsi nɨ ɨlɨŋ tse ghe, lá ɨ mərɨsɨ atuəmbəm azo a mu azhwi tsi nɨ ɨlɨŋ bɨbagɨ bɨtsum, mbɨ́ʼ ngə́ ɨ kaʼə ntsi ntən tɨtsɔŋnɨ abɔʼnɨ nkfu za ɨ ghɨnɨ yiŋə.

⁹ Zen a nɨ anu za bɨ sóŋnə́ a be nkənu, anu za bɨ tsinɨ nɨ mbemə ɨ kɨ nɨŋ ntəm ɨwu tə́ njwɛ́rɨ́kə́ ghe.

¹⁰ Bɨgɨnə nyuʼnə nkə́ fáʼə nɨ ɨtən, mbɨ́ʼ ngə́ bɨgɨnə nɨŋ ntsiŋə ɨzɨgɨnə nɨ ntəm ɨtsum a nye Ŋwi, zɨ wa a tsinɨ ntən, mbe Ndoŋ ŋwɔn tsum, tɨ́sə́n tɨ́sə́n, ɨbɛn ba bɨ nɨŋnɨ mɨntəm ɨma a nye Ŋwi ə.

¹¹ Tɨgɨtɨ nkɨ ndiʼ ɨnu tsen a mbó bo ghe.

¹² Koʼ nyɛʼtɨ á ŋwɔn tse a wagɨnɨ agho mbɨ́ʼ ngə́ o nɨ nkaŋ ŋwɔn, lá be alisɨ a mbó ɨbɛn ba bɨ nɨŋnɨ mɨntəm ɨma a nye Ŋwi a mu nɨgham ɨno, ngɨnɨ mɨnu ɨmo, akɔŋnɨ azo, abeməntəm azo abɔʼnɨ nɨfɛm ɨno ə.

¹³ Ɨ kɔʼ kuʼ nkfu za ma mɨ yen, nɨŋ nkfu ɨzo abɔʼnɨ adaʼ azo a ntɔ́ŋ nɨgham nɨ Ŋwi asaŋəsaŋ, a sóŋ anu a Ŋwi abɔʼnɨ ndiʼ anu a Ŋwi ə.

¹⁴ Koʼ wagɨnɨ azúm zə ghanɨ zə azhwi za a tsinɨ a mu ɨnye gho, za mbáʼ bɨ ghánɨ́ a mbó gho a nkfu za ntóm Ŋwi ghámnɨ́, ɨtú ndaŋwi kɨ nyɔŋ mbó ɨma atú gho lá.

¹⁵ A ngɨ̌ ɨnu mətsen nkɨ ntɛgɨ atú azo a nye tsɛrə, taŋ á ŋwɔn tsum a chi ze adzaŋ za o kwínə́ ghe.

¹⁶ Lə̌tú azo nkɨ ndə̌tú nɨ anu za o diʼnə ghe. A ngěn nɨ mbyi a ngɨ ɨnu tsen, mbɨ́ʼ ngə́ be o ngɨə mə lan, muŋ o mɨ loŋ atuəmbəm azo abɔʼnɨ ɨbɛn ba bɨ zúʼnə́ anu za o sóŋnə́ ghe.