1 Timotyo 1 - Mɨkan wu Fi

¹ Aŋwaʼnɨ zen a lo a mbó me Baolo ghe. Ma nɨ ntom Yeso zɨ Kristo Yeso za a tsagɨnɨ Ŋwi ndoŋ ɨwɨgɨnə bo Kristo Yeso, zɨ wa ntsiŋə nɨ ntəm ɨwɨgɨnə ɨtsum tsinɨ wə ɨnye ə.

² A ghěn a mbó gho Timotyo, nkasɨ mɔn ɨghan wu mbáŋnɨ́ a mu abeməntəm ə: A Ŋwi, zɨ wa nɨ Tarɨ bo Kristo Yeso Maʼmbyí ɨwɨgɨnə gha agho nɨ abɔŋəntəm, akômɨlɨŋnɨ abɔʼnɨ mbɔnɨ ə.

Ɨkwantɨ Mbɨ́ʼ Bɨdiʼ bɨ Aŋwaʼnɨ bɨ Ɨchwenu ə

³ Ma lǒ ngə́ o tsi a Ɛfɛso, tso mbáʼ ma nyíʼtɨ́nɨ́ agho a nkfu za ma tsínɨ́ a ndóm ngěn a Masedonia lá. Ɨbɛn bə tse ba bɨ tsinɨ ɨwu, bɨ dǐʼ ɨnu mbɨ́ʼ a Kristo tsa ka tsɨ kuʼnɨ ayi ɛ. O tsi nɨ ɨ zagɨ soŋ ngə́ á bo kyɛntə.

⁴ Soŋ a mbó bo ngə́ á bo kyɛntɨ a sáʼ njalaʼ tsɨ kɔ́ʼɔ́nguʼ tsa, nɨ ɨ kɨ ghamnə mbɨ́ʼ ndvuŋ bə kɔ́ʼɔ́nguʼ wa ɨ se ndwitə lá. Mətsiŋ yiŋə tsɛʼ nɨ akwənkɨ; ka tsɨ fáʼə awa a ndé akyaŋtɨ a Ŋwi, mbáʼ bɨ tsanə a ndzum abeməntəm njiɛ lá.

⁵ Anu za ntɨgə ziŋ tsinɨ nɨ faʼə a nɨ ngə́ ɨ tsi nɨ ngɨə á ɨnu tsenə ɨ chyɛ; akɔŋnɨ za a fúnə́ a mu ntəm wu fɛmnɨ, ntəm wa ɨ lánɨ́ abɔʼnɨ ngótɨ́ abeməntəm ə.

⁶ Ɨbɛn bə tse bəŋnə mɨntəm ɨma a nye mətsen, ntíʼə ntsə̌ŋ nkfu ɨza a ngǎm mɨgham mɨ adaŋədaŋə ghe.

⁷ Bo lǒ mbe bɨdiʼ bɨ nyɔngɔŋ Ŋwi, lá nkeʼ ndzúʼə nkə́ njíɛ awa mɨgham ɨma, nkeʼ nkə́ ndzúʼə nkə́ njíɛ awa ɨnu tsa bo ghamnə mbɨ́ʼ a tsɛrə nɨ mɨntəm mə fankɨnɨ lá.

⁸ Bɨgɨnə zhi ngə́ Nyɔngɔŋ a bɔŋ lá mbáʼ be bɨ fáʼə nɨ wɛrə adzaŋ za bɨ tsinɨ nɨ ɨ faʼə nɨ wɛrə ghe.

⁹ A nɨ nkənu ngə́, bɨ tsi nɨ ɨ zagɨ waʼtɨ ngə́ ka bɨ ngɨə ayi a nyɔngɔŋ lá a mbó ɨbɛn ba bɨ ghɨnɨ ɨnu tsɨ kuʼnɨnɨ ə. Bɨ ghɨə be a mbó bɨfasɨ bɨ nyɔngɔŋ abɔʼnɨ bɨtɨzuʼnɨ a nyɔngɔŋ, a mbó bɨtɨghuʼsɨ a Ŋwi abɔʼnɨ ngaŋ ngɨ mɨbvu, nkwiʼtɨ ɨbɛn ba bo se anu a Ŋwi zhi kə ngǎm ɨnu tɨbɔŋ mbɨ́ʼ a Ŋwi ə. Bɨ kə́ ngɨə a wɛrə be a mbó ɨbɛn ba bo zhwítɨ́nə́ bɨta ɨba kə bɨnɨmi ɨba nɨ ɨbɛn ba bɨ zhwítɨ́nə́ ɨbɛn,

¹⁰ ndzɔŋ nkwiʼtɨ ngaŋ ngɨ ɨnu ntɔrɨ ɨlɛbɨ, mbáŋnɨ́ tsa tsɨ nɔŋnə bo tsɨ mɔʼɔ, ɨbɛn ba bɨ zenɨ ɨbɛn, ngaŋ ɨchwenu abɔʼnɨ bətɛmə-ndzě bɨ ɨchwenu kə ɨbɛn ba bɨ ghɨnɨ ɨnu tsə daŋ a fasɨ mbɔm ndzɔŋ anu a Ŋwi zɨ shiʼnɨ lá.

¹¹ Ndiʼə məza tsi a mu nkən wu shiʼnɨ wa mbáʼ bɨ nɨ́ŋnɨ́ a mu mbó me ngə́ á ma ghɛn nchwitɨ, Nkən wu Shiʼnɨ wa ɨ lonɨ a mbó Ŋwi nɨfáŋ bo ɨfɔgə lá.

Baolo a Gha a Mɨya Mbɨ́ʼ a Mɨlɨŋnɨ Ŋwi ə

¹² Ma ghǎ a mɨya a mbó Kristo Yeso Maʼmbyí ɨwɨgɨnə, zɨ wa a ghanɨ adaʼ a mbó me a faʼ ɨfaʼ ɨghə. Ma ghǎ a mɨya a mbó zɨ adzaŋ za wɛrə a lɔgɨnɨ aghan tso ŋwɔn wa a faʼnə tsɛʼ nɨ táʼ ntəm, nkɨ ndzɔŋ ntsɔʼ aghan ngə́ á ma be ngaŋ afaʼ ɨzhi,

¹³ le buŋ, a mbyi ma ghám ɨnu tsɨ tɔmnɨnɨ mbɨ́ʼ ayi, ndɨgɨ ayi nkɨ ndzɔm ayi ɛ. Lá Ŋwi a kó a mɨlɨŋnɨ ɨghan mbɨ́ʼ ngə́ ma bvúrɨ́ tɨ tsi nɨ abeməntəm, ma lan, ma sá zhi anu za ma kɨ́nə́ ngɨ̌ nkfu məwa.

¹⁴ Maʼmbyí ɨwɨgɨnə a ghá abɔŋəntəm azhi za a kɨ́nə́ nkwə́ŋnə́ a mbó me, nkɨ nga abeməntəm abɔʼnɨ akɔŋnɨ, ɨnu tsa bɨgɨnə tsínə́ nɨ tsɛrə a nkfu za bɨgɨnə tsinɨ a mbúm bɨgɨnə bɨ Kristo Yeso lá.

¹⁵ Zen a nɨ anu za bɨ sóŋnə́ a be nkənu, anu za bɨ tsinɨ nɨ mbemə ɨ kɨ nɨŋ ntəm ɨwu tə́ njwɛrɨkə ngə́: Kristo Yeso a yén a mu mbyi a ndoŋ ngaŋ ngɨ mɨbvu ə. Ma bɨ́gɨ́ ntsa awa bɨtsum,

¹⁶ lá Ŋwi a kó a mɨlɨŋnɨ a nye me, taŋ á Kristo Yeso a chi diʼ nchigə ɨzhi a nɨ́lónɨ́ a nye adzaŋ za wɛrə a tíʼtɨ́nə́ aghan, me wa ma nɨ ngaŋ ngɨ mɨbvu wa a bɨ́gɨ́nɨ́ ntsa bɨtsum ə. Məzen a tsi lá tso alisɨ a mbó bo ba bo ghɨnɨ nɨŋ mɨntəm ɨma a nye zɨ a nkfu ndzum, taŋ ɨ kwarɨ ntsi ntən nɨnkoŋ ə.

¹⁷ A nkɔʼsə atɨ́ abɔʼnɨ nɨfáŋ tsi a mbó Ɨfɔ, zɨ wa a tsinɨ nɨnkoŋ, zɨ wa a láʼ keʼ kfo, bɨ keʼ kə́ ndzě, Ŋwi wa a nunɨ zɨzɨ lá! A be lá.

¹⁸ Timotyo, mɔn ɨghan, ma nɨŋ ntɨgə zen a mu mbó gho, ndzɔ́ŋə́ a ndzum mɨgham mɨ Ŋwi ma bɨ ghámnɨ́ a mbyi mbɨ́ʼ agho ə. Lɔgɨ mɨgham men tso ɨdzúm ntso ɨtso, taŋ ɨ tokɨ ɨ shiʼnɨ,

¹⁹ nkɨ nde abeməntəm azo abɔʼnɨ ntəm ɨgho wa ɨ lánɨ́ ə. Ɨbɛn bə tse se zhwiʼtɨ anu za mɨntəm ɨma sóŋnə́, adzaŋ məwen ntum abvu a nye abeməntəm aza ghe.

²⁰ A tɨtərɨ bo Ayimɛnosɨ abɔʼnɨ Alɛgɨsanda bɨ tsi ɨwu mbáʼ ma nɨŋnə ngɨ́ʼ a nye bo a nɨ́ŋ bo a mu mbó Satan; məzen a mɨ diʼ awa ngə́ á bo kyɛntɨ a ngam ɨnu tɨbɔŋ mbɨ́ʼ a Ŋwi ə.