1 Tesalonaika 4 - Mɨkan wu Fi

Ntsi Mbyi za ɨ Ghɨnə Ɨnye Ŋwi Bɔŋənə ghe

¹ A ndwɨgɨnə nə ɨbɔmbɨma, nɨ yɛ́ʼ a mbó bɨgɨ adzaŋ za nɨ tsinɨ nchyɛ taŋ ɨ ghɨnə á ɨnye Ŋwi mbɔ́ŋə́ ghe. Tsɛʼ a nkənu, nə nɨ adzaŋ za nɨ kwɛnə nchyɛ̌ ghe. Tɨtsɔŋnɨ bɨgɨ bǔʼ mbó nkə́ nyíʼtə́ awən nɨ ɨkum Maʼmbyí Yeso ngə́ á nɨ ghɨ a za a tsanɨ a məziŋ ə.

² Mbɨ́ʼ ngə́ nɨ zhi ɨtɨgɨtɨ tsa bɨgɨ ghánɨ́ a mbó bən ntsa a ndzum mɨtən mɨ Maʼmbyí Yeso lá.

³ Ŋwi a lǒ ngə́ á nɨ fɛm nkeʼ kɨ mbyi nyám ntsi nɨ anu zə tse a ngɨə nɨ ɨnu ntɔrɨ ɨlɛbɨ ə.

⁴ Ŋwɔn mbáŋnɨ́ tsum ɨ mɔ́ʼɔ́ mɔ́ʼɔ́ a tɨtərɨ bən a tsi nɨ njiɛ adzaŋ za wɛrə a tsinɨ nɨ nchyɛ bo ngwe ɨyi a nye ndóm wa ɨ fɛmnɨ nkɨ ntsi nɨ nkɔʼsə atɨ́ ə.

⁵ A ŋwɔn tse a keʼ mbɛ́bə́ a nɔŋə nɨ mangye tso mbáʼ Bɨtɨbeməŋwi, bo ba bɨ se a Ŋwi nɨ azúm zə tsɛrə a ntɔ́ŋə́ a bɨ ghɨnə lá.

⁶ A mu anu məzen, á ŋwɔn mbáŋnɨ́ tse a keʼ ghɨ ɨbvu a nye mɨma ɨyi wa bo zɨ zɔŋnə a Kristo kə ɨ sitɨ ayi ɛ. Bɨgɨ kwɛ́nə soŋ a məzen a mbó bən nkɨ nkwantɨ awən tsɛʼ ɨ shiʼnɨ ngə́ Maʼmbyí a mɨ nɨŋ ngɨ́ʼ a nye ŋwɔn wa a ghɨnə a zɛrə ghe.

⁷ Ŋwi a sé tsɔ́ʼ awɨgɨnə lá ngə́ á bɨgɨnə nchyɛ̌ a mu ɨnu ntɔrɨ ɨlɛbɨ, lá nchyɛ̌ be a mu nɨfɛm ə.

⁸ Ma lan, ŋwɔn tsum wa a tonɨ ayi ɨnu tsen tsa bɨ diʼnə lá, ka a ntúŋə́ ayi lá a ŋwɔn mɨsɔŋ a ntsu ə. A túŋə́ lá a Ŋwi, zɨ wa a ghánə́ Azhwi zə Fɛmnɨ azhi a mbó bɨŋ ə.

⁹ Ka bɨgɨ tsi awɨgɨ nɨ ɨŋwaʼnə a mbó bən mbɨ́ʼ nkɔ̌ŋ ɨbɔmbɨma ɨbən ba bɨŋ bo nɨŋnɨ mɨntəm ɨmɨŋ bo a nye Ŋwi ə. Bɨŋ mboŋ, Ŋwi a diʼnə awən nɨ adzaŋ za nɨ tsinɨ nɨ nkɔŋ ŋwɔn nɨ ŋwɔn ə.

¹⁰ Tsɛʼ a nkənu, nɨ diʼnə adzaŋ a mbɔm məzen a nye ɨbɔmbɨma a mu Masedonia tsum ə. Ma lan nə ɨbɔmbɨma, bɨgɨ búʼtɨ́ mbó a mbó bən ngə́ á nɨ ghɨ á tsa a məziŋ ə.

¹¹ A nɨ ghɨ á be anu za nɨ lɔnə nɨ mɨntəm ɨmən mɨtsum ngə́ á ntsi mbyi ɨzɨŋ keʼ ɨdiʼ a ngvwúŋə́, ntɛgɨ ɨtú ɨtsən tsɛʼ a nye ɨ ɨtsɨŋ ɨnu, ɨ faʼə bɔŋ ɨ dzɨnə, tsɛʼ adzaŋ za bɨgɨ kwɛ́nɨ́ sóŋ a mbó bən lá.

¹² A nye ndóm məwen, nɨ mɨ ghɨ á ɨbɛn ba bɨ se nɨŋ mɨntəm ɨma a nye Ŋwi tiʼə ndǐʼ mbɔm zɨ shiʼnɨ a mbó bən, á nɨ keʼ nkə́ ntsíŋə́ a ŋwɔn tsɛrə ngə́ a ngǎ azúm za nɨ lɔnə a mbó bɨŋ ə.

Nkfu za Maʼmbyí a lo bə Yiŋə

¹³ Ɨbɔmbɨma ɨbɨgɨ, bɨgɨ lǒ ngə́ á nɨ zhi nkənu za ɨ tsinɨ ɨwu mbɨ́ʼ ɨbɛn ba bɨ kfonə, taŋ á adzə́ŋnɨ a keʼ a mu mɨntəm ɨmən tsi, tso mbáʼ ɨbɛn ba bɨ se nɨ ntsiŋə nɨ ntəm tsum tse tsi a bɨ dzə́ŋnɨ́nə́ lá.

¹⁴ Bɨgɨ nɨŋ mɨntəm ɨmɨgɨ ɨwu ngə́ Yeso a kfó mbə nzhwemnə. Ma lan, bɨgɨ nɨŋ mɨntəm ɨmɨgɨ ɨwu ngə́ Ŋwi a ghɨ bosɨ a Yeso bo bɨ ɨbɛn ba bɨ kfónə́ ɨ nɨŋ mɨntəm ɨma a nye Yeso, ɨ lɔgɨ awa bɨtsum ɨ yen nɨ bo a mbó atuəmbəm azhi ɛ.

¹⁵ Ɨnu tsa bɨgɨ diʼnə awən nɨ tsɛrə tɨtsɔŋnɨ lá ɨnu tsa Maʼmbyí a sóŋnə́: a njwi za Maʼmbyí a lo bə yen, bɨgɨnə ba bɨ tsinɨ atú ntən ghɨ keʼ ghɛn a mbyi ɨbɛn ba bɨ kfonə ghe.

¹⁶ Bɨ ghɨ tɔ́nkɨ́ ntɨgə nɨ nji za ɨ tsinɨ nɨ mɨtən, nji ntsendá Ŋwi zɨ ngwi, nji ntaŋ Ŋwi, á Maʼmbyí zɨmboŋ a tiʼ ndo a fɔməbvurə ɨ shiʼə. Ɨbɛn ba bɨ kfónə́ ɨ nɨŋ mɨntəm ɨma a nye Kristo ghɨ tsa mbyi zhwemnɨ a mbó nɨvwo;

¹⁷ a nkfu məwa bɨ ghɨ tiʼ ghǒtɨ awɨgɨnə wa bɨ tsinɨ atú ntən, bɨgɨnə bo adiʼ za mbaʼ ɨ tsinɨ ɨwu, ɨ kwatɨ a Maʼmbyí a nɨkaŋ, ma lan, bɨgɨnə ghɨ tsinə tsɛʼ nkfu tsum bɨgɨnə bɨ Maʼmbyí ɛ.

¹⁸ Adzaŋ məwen, á nɨ ngwɔ́ŋtə́ a ŋwɔn nɨ ŋwɔn nɨ mɨgham miŋ ə.