1 Korɨnto 9 - Mɨkan wu Fi

Adiʼ a Ntom Yeso ghe

¹ Ma sa ŋwɔn nɨ atú azan be le? Ma sa ntom Yeso be le? Ma bvurɨ tɨ zɛn a Yeso Maʼmbyí ɨwɨgɨnə nɨ ɨmə ɨmɨgɨ le? Nɨ se lá alisɨ afaʼ azan a mbó Maʼmbyí be le?

² Be a be ngə́ bə mɔʼɔ se aghan tso ntom Yeso lɔgɨ, tsɛʼ a nkənu ma zhi ngə́ nɨ lɔgɨ aghan tso ntom ɨzhi ɛ! Mbɨ́ʼ ntsi mbyi ɨzən a mbúm bɨŋ bɨ Maʼmbyí nɨ nɨ alisɨ ngə́ ma nɨ ntom Yeso ghe.

³ Ɨbɛn tɨ bítə́ ngə́ ma tsa lá ɨnə́ mbe ntom Yeso le, ma chwɨgɨ awa ngə́:

⁴ A se adiʼ azan be ngə́ á bɨ gha mɨdzɨ abɔʼnɨ mɨluʼ a mbó me mbɨ́ʼ afaʼ azan le?

⁵ A se adiʼ azan be ngə́ á ma kɨ ntsi nɨ mangye ɨ númə́ karɨnə nɨ wɛrə adzaŋ za ma faʼnɨ afaʼ azan tso mbáʼ ntóm Yeso tsə mɔʼɔ nkwiʼtɨ ɨbɔmbɨma bɨ Maʼmbyí abɔʼnɨ Bita a bɨ ghɨnə lá le?

⁶ Kə a lá tsɛʼ bɨgɨ Banabasɨ ba bɨ tsinɨ nɨ ɨfaʼə bɔŋ ɨ dzɨ le?

⁷ Nɨ láʼnə ndzuʼ ngə́ gwe a faʼə, lá ɨ fɨ́gɨ́ nkáb be aban zɨ ntfúə atuəmbəm azhi ɨwu le? A nɨ ɨwa ndyiʼ mɨshwom wa a se ndzɨ̌ mɨntam mɨ atɨ ma mɨ lonɨ a nye ako atɨ a mɨntam mɨ atɨ za a binɨ le? A nɨ ɨwa ntsiŋ mɨnyam wa a sě nǒ a mɨlɨgɨ wa a lonɨ a nye mbyindzɨ tsa a lɛnɨ le?

⁸ Ka ma tsi aghan nɨ ndɔgɨ ɨlisɨ ɨtsə ɨtsum tsɛʼ a nye ɨnu tsa tsɨ fúnɨ́ njwi tsum ə: Nyɔngɔŋ Mǒse a kɨ mbyɛntɨ tsɛʼ mɨku məmiŋ ə.

⁹ A tsi a mu Nyɔngɔŋ Mǒse ngə́, “Koʼ kubɨnɨ ntsu mbɔŋ a nkfu za o faʼnə nɨ zɛrə a nkwi nchwi ɛ.” Nɨ wiʼtɨ ngə́ Ŋwi a ghamə lá mbɨ́ʼ mbɔŋ le?

¹⁰ A sé ngámə́ lá mbɨ́ʼ awɨgɨnə le? Tsɛʼ a nkənu, bɨ ŋwáʼnɨ́ a məzen lá a mbó bɨgɨnə ghe. Mbɨ́ʼ ngə́ ŋwɔn wa a líʼnɨ́ ɨshwom abɔʼnɨ wa a fuʼnə tsi nɨ ɨ faʼə lá nɨ ntsiŋə nɨ ntəm tsum ngə́ bɨ ghɨ yɛbtɨ ɨ gha ɨma mɨdzɨ ə.

¹¹ Ngwəgɨ za bɨgɨ binɨ a tɨtərɨ bən ɨ lo be a mbó Azhwi ə. A ghaʼ tɨ́sə́n ngə́ be nɨ gha awɨgɨ nɨ ɨdzúm ɨtú mbó ɨtsən le?

¹² Be a be ngə́ a nɨ adiʼ a bədaŋ a nkwárɨ́ ɨdzúm mətsen a mbó bən, a se kɨ mbe adiʼ azɨgɨ a nkwárə́ a mbó bən á tsɨ ghaʼtɨ ngɛn nɨ mbyi le? Lá ka bɨgɨ bitɨnə awɨgɨ azúm zə tse a mbó bən mbáʼ a nɨ adiʼ azɨgɨ a mbítə́ ghe. Bɨgɨ baŋnɨ nchigɨ ntəm a nye ɨnu ɨtsum taŋ ɨ keʼ vwu a kwasɨ ɨ kɨ́ŋ Nkən wu Shiʼnɨ mbɨ́ʼ a Kristo ghe.

¹³ Nɨ se zhi ngə́ mɨdzɨ mɨ ɨbɛn ba bɨ faʼnə a mu Ndáŋwi zɨ Ngwi lǒ lá a mu Ndáŋwi zɨ Ngwi, tso mbáʼ ŋwɔn wa a túmnə́ atú a mɨkuʼ a chyɛ̌ nɨ azhi alam a ɨnyam a mɨtsuʼnɨ mɨ atú ma le?

¹⁴ Ndəŋndəŋ, Maʼmbyí a tɨgɨ ngə́ ŋwɔn wa a sóŋnɨ́ Nkən wu Shiʼnɨ a tsi nɨ ndzɨə lá a mu afaʼ azhi ɛ.

¹⁵ A nɨ adiʼ azan a mbítə́ ghe, lá ma bvurɨ tɨ bitə. Ka ma kə́ ŋwáʼnə́ aghan a məzen lá taŋ á nɨ gha ɨdzúm mətsen a mbó me ghe. Mbɔŋ ma kfo; ma mɨ kaʼ nyɛʼtɨ a ŋwɔn tsɛrə á kwarɨ azúm za a ghɨnə ngə́ á ma ntɛ́rə́ ghe!

¹⁶ Ka ma tsi aghan nɨ ntɛrə tsɛʼ mbɨ́ʼ ngə́ ma sǒŋ Nkən wu Shiʼnɨ ə. Ma kwɛ̌ nkə́ fáʼə ndzɔ́ŋə́ be ntɨgə tsa bɨ ghánə́ a mbó me ghe. A mɨ be tsɛʼ tə́sɔʼ anu a mbó me mbáʼ be ma tú Nkən wu Shiʼnɨ məwen soŋə!

¹⁷ A lo be tú be ngə́ ma faʼə lá afaʼ za ma tsɔʼnɨ muŋ ma lǒ ngə́ á bɨ tfu aghə; lá ma faʼə be mbɨ́ʼ ngə́ a nɨ afaʼ za ma tsinɨ nɨ ɨ faʼə, mbɨ́ʼ ngə́ ɨfaʼ məwen a mbó me lá a gha Ŋwi ə.

¹⁸ Mɨtsɔʼnɨ mɨ afaʼ ɨmə tiʼ mbe lá ake le? A nɨ mɛrə miŋ ə: ngə́ a nɨ abɔŋətú azan a sóŋ Nkən wu Shiʼnɨ, nkaʼ nkə́ mbítə́ ngə́ á bɨ tfu aghan, nkaʼ mbítɨ́ ɨdzúm ɨtsum tsa ma tsinɨ nɨ nchyɛ nɨ tsɛrə tso ntom Yeso ghe.

¹⁹ Ma nɨ ŋwɔn nɨ atú azə, nkaʼ abuʼ a ŋwɔn wu tsɛrə be; lá ma ghɨ atuəmbəm azan a nye abuʼ a ŋwɔn tsum taŋ ɨ yen nɨ ɨbɛn a mbó Ŋwi á bɨ ghaʼ nkuʼ ndvuŋ ɨtsum wa ma chinɨ bənkə.

²⁰ Ma tɨ faʼə bɨgɨ bɨ bə Yuda lá, ma ghɨnɨ mɨnu tso ŋwɔn bə Yuda taŋ ɨ bəŋ mɨntəm ɨma ghe; a nkfu za ma tsinɨ bɨgɨ bɨ ɨbɛn ba bɨ zɔŋnə a Nyɔngɔŋ Mǒse, ma ghɨ̌ mɨnu tso bo, le buŋ ka ma be aghan ŋwɔn wa a zɔŋnə a Nyɔngɔŋ Mǒse ghe. Ma ghɨə a məzen lá taŋ ɨ chi bəŋ mɨntəm ɨma, á bo tiʼ ntsi a bagɨ Kristo ghe.

²¹ Ndəŋndəŋ, a nkfu za ma tsinɨ bɨgɨ bɨ ba a se bə Yuda be, ma ghɨ̌ mɨnu tso bo; nkaʼ ndzɔ́ŋə́ a Nyɔngɔŋ bə Yuda, tsɛʼ taŋ ɨ bəŋ mɨntəm mɨ ba a se bə Yuda be, á bo tiʼ ntsi a bagɨ Kristo ghe. Ka məzen a diʼ ayi ngə́ ma sa nyɔngɔŋ Ŋwi a ndzúʼnə́ ghe; ma lanɨ mbe lá ŋwɔn wa a zɔŋnə a nyɔngɔŋ Kristo ghe.

²² A nkfu za ma tsinɨ a tɨtərɨ ɨbɛn ba abeməntəm aza a ghɔgɨnɨ, ma kə́ nghɔ́gə́ tso táʼ ŋwɔn nɨ bo, tsɛʼ taŋ ɨ bəŋ mɨntəm, á bo tiʼ ntsi a bagɨ Kristo ghe. Ma lan, ma bəŋə aghan a nye adzaŋ atsum a mbó ɨbɛn bɨtsum tsɛʼ taŋ ɨ loŋ a bə tse a nye mɨndóm mɨtsum ma ma chinɨ faʼ nɨ mɛrə ghe.

²³ Ma ghɨə a mətsiŋ ɨnu ɨtsum lá tsɛʼ taŋ ɨ soŋ Nkən wu Shiʼnɨ taŋ ɨ ghɨ kɨ́ tsi nɨ ɨfɔgə wa ɨ tsinɨ ɨwu ə.

²⁴ Tsɛʼ a nkənu nɨ zhi ngə́ a nye amaŋnɨ a nɨkɨə, ɨbɛn bə ghaʼnɨ kɨə, lá a dzɨə tsɛʼ táʼ ŋwɔn a tɨtərɨ bo ghe. A nɨ nkɨə a nye ndóm wa nɨ mɨ dzɨ mɨkyaŋnɨ ɨmyi ɛ.

²⁵ Ŋwɔn nɨkɨə tsum a tɛ́gɨ́ atú azhi tsɛʼ ɨ shiʼnɨ a nye mɨndóm mɨtsum tsɛʼ taŋ ɨ kwarɨ mɨkyaŋnɨ ma mɨ mɨ keʼ ghɔŋ nɨnkoŋ ə; lá bɨgɨnə ghɨə mə lan lá a nkwárɨ́ mɨkyaŋnɨ ma mɨ mɨ ghɔŋ nɨnkoŋ ə.

²⁶ Nə nɨ anu za a ghɨnɨ ma kɨənə ngěn tsɛʼ adiʼ wa bɨ mɛtɨnə taŋ ɨ dzɨə; nə nɨ anu za a ghɨnɨ ma kaʼ be tso ŋwɔn wa a tónɨ́ fɨto nkátɨ́ ɨlvúʼ ɨchi ntúmə́ tsɛʼ adaŋədaŋə lá.

²⁷ Ma ghɨə ɨnye ɨzə kórɨ́kɨnə nɨ ɨlvúʼ, ma chwatɨnə a zɛrə a nye mɨndóm mɨtsum taŋ ɨ ghɨ kaʼ soŋ Nkən wu Shiʼnɨ a mbó bədaŋ á bɨ loŋ awa, nkeʼ aghan baŋnɨ ndoŋə.