1 Korɨnto 8 - Mɨkan wu Fi

Abítɨ Mbɨ́ʼ Mɨdzɨ ma bɨ Ghanɨ a mbó Mɔn Abe ə

¹ Tɨtsɔŋnɨ, á ma chwɨgɨ abítɨ za nɨ ŋwáʼnɨ́nɨ́ mbitɨ aghan ɨwu mbɨ́ʼ mɨdzɨ ma bɨ ghanɨ a mbó ɨbɔ bɨ abe lá. A nɨ nkənu ngə́, “bɨgɨnə bɨtsum tsi nɨ ayigɨnɨ ə”, adzaŋ za bɨ sóŋnə́ ghe. Azhyɛ məzen a ghɨə ɨbɛn ŋuʼənɨ ɨnye a mu kɨtɛrɨ ə; lá akɔŋnɨ a ghɨə ŋwɔn a kwiənɨ ɨ kwinə.

² Ŋwɔn wa a wíʼtɨ́nə́ ngə́ zɨə tsi nɨ ayigɨnɨ, a bvurɨ tɨ tsi nɨ ayigɨnɨ nkɔʼ nkuʼ adiʼ wa a benɨ tsi nɨ zɛrə ghe.

³ Lá ŋwɔn wa a kɔŋnɨ a Ŋwi, Ŋwi a zhi ayi ɛ.

⁴ Ma lan, mbɨ́ʼ mɨdzɨ ma bɨ ghanɨ a mbó ɨbɔ bɨ abe: bɨgɨnə zhi ngə́ mɔn abe a nɨ azúm za ka a tsi ayi nɨ ntsi ntɨŋ ə; bɨgɨnə zhi ngə́ a tsi tsɛʼ táʼ Ŋwi ə.

⁵ Be a kwɛ mbe ngə́ “bɨŋwi” tsɛʼ a ɨkum tsi ɨwu a fɔməbvurə kə atuəshe, “bɨŋwi” abɔʼnɨ “bɨtafaʼ” məbiŋ baʼtɨ nkɨ nghaʼ ɨ ghaʼnɨ lá,

⁶ a mbó bɨgɨnə a tsi tsɛʼ táʼ Ŋwi, Tarɨ, zɨ wa a káʼnɨ́ ɨdzúm ɨtsum, zɨ wa ntsi mbyi ɨtsigɨnə tsinɨ a nkfu zɨ; a kɨ ntsi tsɛʼ táʼ Maʼmbyí, Yeso Kristo, zɨ wa bɨ káʼnɨ́ ɨdzúm ɨtsum ntsa a ndzum zɨ, bɨgɨnə kə́ nchyɛ̌ atuəshe wen ntsǎ lá a ndzum zɨ lá.

⁷ Lá ka a zhi ayi ŋwɔn tsum nji nkənu məziŋ ə. Ɨbɛn bə tse mənɨnə awa bo bɨ ɨbɔ bɨ abe a nye ndóm wa ɨ kɔʼ kuʼ ɨ sɨŋə, be bo dzɨ mɨdzɨ məmen, bo bvurɨ nkwaʼtɨ ngə́ mɨdzɨ ma a nɨ mə mɔn abe; mɨntəm ma bɔrɨ, a tiʼ mbe tso mɨdzɨ ma ghɨ bo keʼ fɛmə.

⁸ Lá, mɨdzɨ chi keʼ shintɨ ntsi ɨzɨgɨnə bɨgɨnə bɨ Ŋwi ə; bɨgɨnə mɨ keʼ azúm zə tse sam mbáʼ be bɨgɨnə tú mɨdzɨ dzɨ kə ɨ sə́ŋ anu zə tse mbáʼ be bɨgɨnə dzɨə.

⁹ A nɨ lə̌ ɨtú ɨtsən ngə́ á mɨtən men ma nɨ tsinɨ nɨ mɛrə keʼ ghɨ á ɨbɔmbɨma ɨbən ba abeməntəm aza a bɔrɨkɨnɨ vwo a mu ɨbvu ə.

¹⁰ Lɔgɨ ngə́ ŋwɔn wa ntəm ɨyi ghɔgɨnɨ a mu anu məzen a zɛn agho, gho wa o kwaʼtɨnɨ ngə́ o tsi nɨ azhyɛ; o dzɨənɨ mɨdzɨ a mu nɨshwim nɨ mɔn abe; məzen a mɨ keʼ wɔŋtɨ ayi ngə́ á dzɨ mɨdzɨ ma bɨ ghanɨ a mbó ɨbɔ bɨ abe le?

¹¹ Ma lan, ŋwɔn wen wa a ghɔgɨnɨ lá, mɨma ɨgho wa Kristo a kfónɨ́ mbɨ́ʼ ayi, a ghɨ tuʼ ɨ tsó mbɨ́ʼ azhyɛ azo!

¹² A nye ndóm məwen, o ghɨ ɨbvu a nye Kristo mbáʼ o ghɨnɨ ɨbvu a nye ɨbɔmbɨma ɨbo a ndzum Kristo, ndɛ́mə́ mɨntəm ɨma ma mɨ ghɔgɨnɨ lá.

¹³ Lá be ngə́, be mɨdzɨ ma bɨ ghanɨ a mbó mɔn abe ghɨ ngə́ á mɨma ɨghan a ndzum Kristo a ghɨ ɨbvu, ma láʼ kaʼ ɨnyam kfurɨ taŋ ɨ kaʼ ghɨ á mɨma ɨghan a ndzum Kristo a ghɨ ɨbvu ə.