1 Korɨnto 7 - Mɨkan wu Fi

Ɨbítɨ Mbɨ́ʼ Nɨzɔ́ʼ ə

¹ Tɨtsɔŋnɨ, á ma chwɨgɨ ɨbítɨ tsa nɨ ŋwáʼnɨ́nɨ́ mbitɨ aghan ɨwu lá. A nɨ anu zə shiʼnɨ mbáʼ be ŋwɔn mbáŋnɨ́ a ton ayi a ndzɔ́ʼə ghe.

² Lá, a ngɨə ngə́ á nɨ keʼ a mu akwaʼnɨ a ntɔrɨ ɨlɛbɨ vwo, a mɨ bɔŋ ngə́ á ŋwɔn mbáŋnɨ́ tsum a tsi nɨ ɨyi mangye, á mangye tsum a kɨ ntsi nɨ ɨyi ndóm ə.

³ A ŋwɔn mbáŋnɨ́ a keʼ lɛn a ngwe ɨyi a ɨfɛgɨ, á mangye a keʼ kɨ ndɛn a ndóm ɨyi a ɨfɛgɨ ə.

⁴ Ka mbəmnye mangye ɨ tsi ayi lá a nkfu zɨə, mbəmnye mangye ɨ tsi lá a nkfu ndóm ɨyi ɛ; ndəŋndəŋ, ka mbəmnye ŋwɔn mbáŋnɨ́ tsi ayi lá a nkfu zɨə, mbəmnye ŋwɔn mbáŋnɨ́ ɨ tsi lá a nkfu ngwe ɨyi ɛ.

⁵ A ŋwɔn mbáŋnɨ́ kə mangye a keʼ tuŋ nchintɨ adiʼ bo ngwe ɨyi kə ndóm ɨyi ɛ. Be a tsi nɨ mbe adzaŋ məwen, á be abemnɨ aza zɨ mbɨ́ʼ ntfúŋ ɨtú ɨtsa zɨ a mu atsaʼtɨ a Ŋwi ə. Lá nkfu məziŋ tsa, bo zɨ bə mbiʼnɨ nchintɨ adiʼ wədiʼ, taŋ ɨ lɛʼ akwaʼnɨ za be Satan a kwaʼnɨ awa mbɨ́ʼ ngə́ bo chi keʼ ɨtumbəm ɨtsa chwatə.

⁶ A nɨ be akwaʼtɨ azan a ziŋ ə, ka a be ayi ntɨgə za ma ghanɨ a mbó bɨŋ ə.

⁷ Ma mɨ kɔŋtɨ ngə́ á bən bɨtsum tsi tsɛʼ tso me ghe; lá ŋwɔn tsum a tsi nɨ azhi azúm zə ghanɨ za Ŋwi a ghanɨ a mbó zɨə, wiŋ ŋwɔn nɨ ziŋ azúm zə ghanɨ, yirɨ ŋwɔn nɨ zhirɨ azúm zə ghanɨ ə.

⁸ Ma soŋ a mbó ba bɨ se zɔ́ʼ abɔʼnɨ bɨkfugɨ bɨ bə bəngye ngə́ a mɨ be anu zə shiʼnɨ mbáʼ be nɨ ghɛn nɨ mbyi nchyɛ̌ bən bən tso mbáʼ ma tsínə́ lá.

⁹ Lá be a be ngə́ bo chi keʼ chwatɨ ɨtumbəm ɨtsa, bo zɔ́ʼə — a bɔŋ ngə́ á bo zɔ́ʼ ntsatɨ ngə́ á bo tsi nkfǒ ndzúʼə a mbó nji mangye kə zɨ mbáŋnɨ́ ə.

¹⁰ Ma mɨ gha ntɨgə a mbó ngaŋ nɨzɔ́ʼ, ntɨgə za ka ɨ be ayi ɨzan lá mbe be zɨ Maʼmbyí, ngə́: á mangye a keʼ sam nɨzɔ́ʼ ə;

¹¹ lá be a sám nɨzɔ́ʼ, a tsi nɨ nchyɛ tɨ láʼ mbən ndzɔ́ʼ a ŋwɔn mbáŋnɨ́ wə daŋ kə a bə ngɛn nkwatɨ a ndóm ɨyi ɛ; á ŋwɔn mbáŋnɨ́ a keʼ kɨ nkəntɨ a ngwe ɨyi ɛ.

¹² A mbó bə mɔʼɔ ɨbɛn ma soŋ ngə́ (me mboŋ ə, nkeʼ be Maʼmbyí be): be ŋwɔn mbáŋnɨ́ wa a nɨŋnɨ ntəm ɨyi a nye Kristo a tsi nɨ mangye wa ka a nɨŋ ayi ntəm ɨyi a nye Kristo, lá mangye wa a bem ngə́ bo zɨ mɨ chyɛnə awa zɨ, á ndóm ɨyi a keʼ ayi kəntə.

¹³ Be mangye wa a nɨŋnɨ ntəm ɨyi a nye Kristo a tsi nɨ ŋwɔn mbáŋnɨ́ wa ka a nɨŋ ayi ntəm ɨyi a nye Kristo, lá ŋwɔn mbáŋnɨ́ wa a bem ngə́ bo zɨ mɨ chyɛnə awa zɨ, á mangye wa a keʼ a ndóm ɨyi wa nyɛʼtə.

¹⁴ Mbɨ́ʼ ngə́ Ŋwi a ghɨ ndóm wa ka a nɨŋ ayi ntəm ɨyi a nye Kristo lá a fɛm ntsa a ndzum ngwe ɨyi ɛ. Ndəŋndəŋ Ŋwi a kɨ ngɨ mangye wa ka a nɨŋ ayi ntəm ɨyi a nye Kristo lá a fɛm ntsa a ndzum ndóm ɨyi ɛ. A lo tú mə lá be muŋ ɨbɔ ɨba zɨ mɨ be tso ɨbɔ ba bɨ nɨ bɨtɨbeməŋwi; lá nkənu za ɨ tsinɨ ɨwu ɨ nɨ ngə́ bo fɛmə.

¹⁵ Lá be ŋwɔn wa a se nɨŋ ntəm ɨyi a nye Kristo a kɔŋ ɨ nyɛʼtɨ ndóm ɨyi wa kə a ngwe ɨyi wa a nɨŋnɨ ntəm ɨyi a nye Kristo lá, á keʼ ɨsáʼ be. A yén mbé mə lá, ka anu zə tse a nkwíʼə nyəmə ayi a ŋwɔn wa a nɨŋnɨ ntəm ɨyi a nye Kristo lá ngə́ á bvurɨ ntsi a mu nɨzɔ́ʼ məna. Ŋwi a tsɔʼ awən lá ngə́ á nɨ tsi a mu mbɔnɨ ə.

¹⁶ Gho mangye wen wa o nɨŋnɨ ntəm ɨgho a nye Kristo lá, o mɨ tsa lá ɨ nə́ ɨ zhi ɨ shiʼnɨ ngə́ aghagɨ a tsɛrə o ghɨ loŋ a ndóm ɨgho wen le? Kə gho ŋwɔn mbáŋnɨ́ wen wa o nɨŋnɨ ntəm ɨgho a nye Kristo lá, o mɨ tsa lá ɨ nə́ ɨ zhi ɨ shiʼnɨ ngə́ aghagɨ a tsɛrə o ghɨ loŋ a ngwe ɨgho wen le?

Nchyɛ a nye Ndóm wa Ŋwi a Tsɔ́ʼnɨ́ awən ngə́ á nɨ Nchyɛ̌ ghe

¹⁷ A ntsi mbyi ŋwɔn tsum a tɨtərɨ bən ɨ tsi ndzɔŋə azúm zə ghanɨ za Maʼmbyí a ghánɨ́ wəmbo ə. A ntsi mbyi ŋwɔn tsum a tɨtərɨ bən ɨ tsi tsɛʼ adzaŋ za Ŋwi a kɨ́nə́ ntsɔ́ʼə awən ɨ chyɛ. Nə nɨ mbɔm za ma diʼnə a mbó ndáŋwi ɨtsum ə.

¹⁸ Ŋwɔn wu tsɛrə a tsi ɨwu a tɨtərɨ bən wa bɨ kwɛ́nə ntsə́ŋ alagɨ azhi bɔŋ á Ŋwi a ntsɔ́ʼə ayi le? A məwiŋ ŋwɔn a keʼ chiʼtɨ alɨgɨ za bɨ tsə́ŋnɨ́ alagɨ azhi za ɨwu ə. Ŋwɔn wu tsɛrə a tsi ɨwu a tɨtərɨ bən wa bɨ bvúrɨ́ tɨ tsəŋ alagɨ azhi bɔŋ á Ŋwi a ntsɔʼə ayi le? A məwiŋ ŋwɔn a keʼ soŋ ngə́ á bɨ tsəŋ alagɨ azhi ɛ.

¹⁹ Mbɨ́ʼ ngə́ ntsəŋ alagɨ kə nchyɛ tɨ tsəŋ se anu zə tsɛrə a ɨshi ɨmɨgɨ Ŋwi be; anu za a təntɨnɨ a nɨ ndzuʼnɨ ntɨgə Ŋwi ə.

²⁰ A ŋwɔn tsum a tsi tsɛʼ adzaŋ za a tsínɨ́ a nkfu za Ŋwi a tsɔ́ʼnɨ́ ayi ɛ.

²¹ O bé lá abuʼ a nkfu za Ŋwi a tsɔ́ʼnɨ́ agho le? A məzen a keʼ ntəm ɨgho ghagə. Lá be a be ngə́ o chi kyɛtɨ mɨnkɨ mɨ abuʼ məmen a nye gho, ghɛn nɨ mbyi ngɨ mə lá.

²² Mbɨ́ʼ ngə́ abuʼ za Maʼmbyí a tsɔʼnɨ, Maʼmbyí a kyɛtɨnə mɨnkɨ mɨ abuʼ ɨmyi, ntiʼ ndɔgɨ ayi ɛ; ndəŋndəŋ ŋwɔn tsum wa a se abuʼ be, wa Maʼmbyí a tsɔʼnɨ ayi, a tiʼ abuʼ a mbó Maʼmbyí ɛ.

²³ Ŋwi a zón awən nɨ ndvuŋ tse ghe; á nɨ keʼ nyɛʼtɨ ɨtumbəm ɨtsən a nye ɨbuʼ a mbó ŋwɔn mɨsɔŋ a ntsu ə.

²⁴ Ma lan, nə ɨbɔmbɨma ɨban, á nɨ tsi a mbúm bɨŋ bɨ Ŋwi tsɛʼ adzaŋ za nɨ tsínɨ́ a nkfu za Ŋwi a tsɔ́ʼnɨ́ awɨŋ ə.

Ɨbítɨ Mbɨ́ʼ Ɨbɛn ba bɨ se Zɔ́ʼ Abɔʼnɨ Bɨkfugɨ bɨ Bəngye

²⁵ Tɨtsɔŋnɨ, á ma chwɨgɨ abítɨ za nɨ ŋwáʼnɨ́nɨ́ mbitɨ aghan ɨwu mbɨ́ʼ ɨbɛn ba bɨ se zɔ́ʼ lá: ka ma tsi aghan nɨ ntɨgə zɨ tse za ɨ lonɨ a mbó Maʼmbyí ɛ, lá á ma gha azə akwaʼtɨ tso ŋwɔn wa a ntsǎ a ndzum mɨlɨŋnɨ Maʼmbyí, a sǒŋ nkənu ə.

²⁶ Mbɨ́ʼ ngɨ́ʼ za ɨ tsinɨ tɨtsɔŋnɨ lá, ma kwaʼtɨ ngə́ a bɔŋ ngə́ á ŋwɔn tsum a tsi tsɛʼ adzaŋ za wɛrə a tsinə.

²⁷ O tsi nɨ mangye le? Koʼ kɨŋ ayi á nɨzɔ́ʼ ɨnɨŋ zɨ shwɛkə. O so nɨ mangye tsi le? Koʼ a mangye lɔn ndzɔ́ʼə.

²⁸ Lá be a be ngə́ o zɔ́ʼ, ka o ghɨ agho ɨbvu wu tsɛrə ghe. Be a be ngə́ ngo ɨ kɨ ndzɔ́ʼ, ka wɛrə a kɨ ngɨ ayi ɨbvu wu tsɛrə ghe. Lá ma mɨ kɔŋtɨ ngə́ á nɨ baʼtɨ ngɨ́ʼ za ngaŋ nɨzɔ́ʼ zɛ́nɨ́ njwi tsum ə.

²⁹ Ɨbɔmbɨma ɨban, anu za ma sóŋnə́ lá a nɨ ngə́: a bvurɨ tsɛʼ mə baŋtɨ lanə, ɨ kɨ biʼnɨ tɨtsɔŋnɨ ɨ ghěn nɨ mbyi, mbáŋnɨ́ nɨzɔ́ʼ tsi nɨ nchyɛ be tsɛʼ tso ngə́ bo láʼnə mbvurɨ tɨ zɔ́ʼə;

³⁰ ɨbɛn ba bɨ zɔbnɨnə tsi nɨ nchyɛ be tsɛʼ tso ngə́ bo láʼnə mbvurɨ nɨ asɔbɨnɨ tɨ chyɛ; ɨbɛn ba bɨ sántɨ́nɨ́ nɨwe tsi nɨ nchyɛ be tsɛʼ tso ngə́ bo láʼnə mbvurɨ tɨ tsi a mu nɨdorɨ; ɨbɛn ba bɨ zónɨ́ ɨdzúm tsi nɨ nchyɛ be tsɛʼ tso ngə́ ka a tsi ayi bo nɨ ɨdzúm tsa bo zonɨ;

³¹ ɨbɛn ba bɨ faʼnə nɨ ɨdzúm atuəshe wiŋ tsi nɨ nchyɛ be tsɛʼ tso ngə́ ka bo tsi awa nɨ anu zə tse a ngɨə nɨ tsɛrə ghe. Mbɨ́ʼ ngə́ adzaŋ za atuəshe zen a tsi nɨ lá, a tsǎ ɨ tsanə.

³² Ma lǒ ngə́ á nɨ keʼ ɨnye ɨtsən a mbúʼə ghe. Mbáŋnɨ́ za ka ɨ zɔ́ʼ ayi ɨ tɛgɨ ntəm ɨyi tsɛʼ a nye afaʼ a Maʼmbyí mbɨ́ʼ ngə́ wɛrə a zhwə́ŋtə́ a ngɨə ngə́ á ɨnye Maʼmbyí ɨ bɔŋə;

³³ lá mbáŋnɨ́ za ɨ zɔʼnɨ ɨ tɛgɨ ntəm ɨyi be a nye ɨnu atuəshe wen, mbɨ́ʼ ngə́ wɛrə a lǒ ngɨ ɨnu tsa tsɨ mɨ bɔŋ a ngwe ɨyi ɛ,

³⁴ adzaŋ məwen, wɛrə a sagɨ ɨnye ɨzhi a tɨtərɨ ɨnu tsi bá ghe. Mangye wa a se zɔ́ʼ kə ngo a tɛgɨ ntəm ɨyi a nye afaʼ a Maʼmbyí mbɨ́ʼ ngə́ wɛrə a lǒ ntsɔʼ mbəmnye ɨzhi abɔʼnɨ azhwi azhi ɨ lɛn tsɛʼ a mbó Ŋwi; lá mangye nɨzɔ́ʼ a tɛgɨ ntəm ɨyi a nye ɨnu atuəshe wen, mbɨ́ʼ ngə́ wɛrə a lǒ ngɨ ɨnu tsa tsɨ mɨ bɔŋ a ndóm ɨyi ɛ.

³⁵ Ma soŋ a məzen lá mbɨ́ʼ ngə́ ma lǒ nkwatɨ bɨŋ ə. Ka ma ndǒ aghan a ntsúʼnɨ́ bən ngə́ á nɨ keʼ anu zə tsɛrə ghɨə. Ma baŋnə ndǒ be ngə́ á nɨ ghɨ ɨnu tsa tsɨ kuʼnɨnɨ nkɨ ntɛmnɨ, ɨ kɨ ghɨ á nɨ tɛgɨ mɨntəm ɨmən tsɛʼ a nye afaʼ a Maʼmbyí tə́ njwɛ́rɨ́kə́ ghe.

³⁶ A bɨgɨnə lɔgɨ ngə́ mbáŋnɨ́ ɨ tɛgɨ mɨluʼ atú ngo, á bo zɨ ghɨ ndzɔ́ʼnɨ́: be mbáŋnɨ́ za kwaʼtɨ ngə́ ka zɨə ngɨə ayi ɨnu tsɨ kuʼnɨnɨ a nye ngo za nkə́ nkfǒ ndzúʼə a mbó nji mangye nkɨ nkwaʼtɨ a mu atú azhi ngə́ a bɔŋ ngə́ á zɨə zɔ́ʼ ngo za, á bo zɨ zɔʼnɨ adzaŋ za mbáŋnɨ́ za kwaʼtɨnɨ lá. Ka ɨbvu wu tsɛrə tsi ayi a nye məziŋ ə.

³⁷ Lá be ŋwɔn mbáŋnɨ́ a tɛgɨ ntəm ɨyi mbáʼ bɨ se ayi nyəm, a kə́ nchwátɨ́ ɨnye ɨzhi, mbáʼ wɛrə a kwɛnə ndɛn a mu ntəm zɨ anu za zɨə mɨ ghɨ — ka ɨsáʼ be ayi ɨwu mbáʼ be a tú ngo za zɔ́ʼə.

³⁸ Ma lan, ŋwɔn mbáŋnɨ́ wa a zɔʼnɨ lá, a ghɨ ɨ shiʼnɨ ə, lá ŋwɔn mbáŋnɨ́ wa a se zɔ́ʼ lá, a ghɨ ɨ shiʼnɨ ngɛn nɨ mbyi ɛ.

³⁹ Ka mangye nɨzɔ́ʼ a tsi ayi nɨ ɨ bə zɔ́ʼ a ŋwɔn daŋ mbáʼ be ndóm ɨyi a bvurɨ atú ntɨŋ ə; lá be ndóm ɨyi a kfo, wɛrə a chi bə zɔ́ʼ mbáŋnɨ́ tsum za wɛrə a kɔŋnɨ tsɛʼ mbáʼ be ɨ be ŋwɔn wa a nɨŋnɨ ntəm ɨyi a nye Kristo ghe.

⁴⁰ Lá a mu akwaʼtɨ azan, ma zhi ngə́ ntsi mbyi nkfugɨ mangye ɨ mɨ tsi a mu nɨdorɨ mbáʼ be a tú bə zɔ́ʼə. Ma kwaʼtɨ ngə́ ma kɨ ntsi nɨ Azhwi a Ŋwi ə.