1 Korɨnto 6 - Mɨkan wu Fi

Ntɔŋtɨ Abyɛn a nye Mɨma ɨgho wa Bɨŋ zɨ Nɨŋnɨ Mɨntəm ɨmɨŋ zɨ a nye Kristo ghe

¹ Bən ba nɨ zɔŋnə a Kristo, be táʼ ŋwɔn nɨ bən a tsi nɨ azɔŋ bo mɨma ɨyi, a tsa lá ɨ nə́ ngɛn a ɨshi abyɛn a bɨtɨbeməŋwi, mbaŋnɨ nyɛʼtɨ ɨbɛn bɨ Ŋwi le?

² Nɨ se zhi ngə́ ɨbɛn bɨ Ŋwi ghɨ sáʼ mbyi le? Be a be mə lan ngə́ nɨ ghɨ sáʼ ɨbɛn bɨ atuəshe, a tiʼə ntsǎ awən a ntɛ́gɨ́nɨ́ ɨbɔ bɨ ɨnu a tɨtərɨ bən lá ngə́ ke le?

³ Nɨ se zhi ngə́ bɨgɨnə ghɨ sáʼ bɨtsen bɨ ndá bɨ Ŋwi le? Ɨbɔ bɨ ɨnu bɨ atuəshe wen a ntɛ́gɨ́nə́ a tɨtərɨ bən tiʼ ndanɨ mbe lá ake le!

⁴ Be ɨbə́ŋ ɨnu tso mətsiŋ tsi a tɨtərɨ bən, nɨ mɨ lɔgɨ a tsɛrə ɨ ghɛn nɨ tsɛrə a mbó ɨbɛn ba ndáŋwi se awa nɨ azúm zə tsɛrə a ntɔ́ŋə́ ngə́ á bɨ tɛgɨnɨ awən le?

⁵ Ma sóŋə́ a məzen lá a nɨ́ŋ adɨrətú a nye bɨŋ ə. Be a kwɛ mbe be ɨ nə́ muŋ, táʼ ŋwɔn wa a tsinɨ nɨ zóŋ a zagɨ ntsi a tɨtərɨ bən a ndáŋwi wa a chinɨ tɛgɨnɨ awən, ɨbɔmbɨma a ndzum Yeso Kristo ghe.

⁶ Lá, táʼ mɨma a tɔ́ŋtə́ abyɛn a nye wu mɔʼɔ, ɨ nyɛ́ʼtə́ ngə́ á ɨbɛn ba ka bɨ nɨŋ awa mɨntəm ɨma a nye Ŋwi á bɨ tɛgɨnɨ abyɛn za!

⁷ Tsɛʼ a ndzúʼə nɨ atú ngə́ nɨ tɔ́ŋtə́ abyɛn a tɨtərɨ bən nɨ bən, a diʼə ngə́ nɨ se ngɨ̌ ɨnu tso ɨbɛn ba bɨ zɔŋnə a Kristo a nye mɨndóm mɨtsum ə. O so wagɨnɨ afənu a nye gho ngə́ ke le? O so nyɛʼtɨ á bɨ dzɨ agho ngə́ ke le?

⁸ Lá nɨ baŋnə fə̌ ɨnu a ɨnye bən nɨ bən, ndzɨə a ŋwɔn nɨ ŋwɔn, nɨ kə́ ngɨə tsɛʼ mə lan a nye ɨbɔmbɨma ɨbən a ndzum Kristo ghe!

⁹ Nɨ se zhi ngə́ ɨbɛn ba bɨ se chinɨ a ɨshi ɨmɨgɨ Ŋwi ghɨ keʼ kon a mu Nɨfɔ nɨ Ŋwi le? A nɨ keʼ ɨtumbəm ɨtsən tamtə; ɨbɛn ba bɨ ghɨnɨ ɨnu ntɔrɨ ɨlɛbɨ, kə ba bɨ ghúʼsɨ́nɨ́ ɨbɔ bɨ abe, kə ɨbɛn ba bɨ chwurɨnə, kə mbáŋnɨ́ tsa tsɨ lɔgɨnə a tsə mɔʼɔ,

¹⁰ kə mɨzɛrə, kə bəmiɛnɨngám, kə ɨbarɨ mɨluʼ, kə ɨbɛn ba bɨ sóŋnɨ́ ɨnu tɨbɔŋ atú bə mɔʼɔ, kə bətóŋ-ndá, wu tse ghɨ keʼ kon a mu Nɨfɔ nɨ Ŋwi ə.

¹¹ Nə nɨ adzaŋ za bən bə mɔʼɔ benə. Lá bɨ súgɨ́ awən a mbó ɨbvu, ntiʼ ndɛn awən a mbó Ŋwi, ngɨ Ŋwi a bemtɨ ngə́ nɨ chinɨ a ɨshi ɨmɨgɨ zɨ nɨ ɨkum Maʼmbyí Yeso Kristo abɔʼnɨ Azhwi a Ŋwi ɨwɨgɨnə ghe.

A nɨ Fáʼə nɨ Mbəmnye ɨtsən a nye Ndóm wa Mbáʼ Tsɨ mɨ Gha Nɨfáŋ a mbó Ŋwi ə

¹² Ŋwɔn wu mɔʼɔ a mɨ soŋ ngə́, “Ka azúm zə tsɛrə a nkɨ́ŋə́ ayi aghan a ngɨ anu atsum za ma kɔŋnɨ a ngɨə ghe.” E; lá ka anu atsum za o chinɨ ghɨ a bɔŋ ayi a mbó gho ghe. Ma chi soŋ ngə́ ka azúm zə tsɛrə a nkɨ́ŋə́ ayi aghan a ngɨ anu atsum za ma kɔŋnɨ a ngɨə ghe; lá ma mɨ kaʼ nyɛʼtɨ atuəmbəm azan a nye abuʼ a mbó anu zə tsɛrə ghe.

¹³ Wu mɔʼɔ ŋwɔn a mɨ soŋ ngə́, “Mɨdzɨ tsi lá a mbó mɨto, mɨto kɨ ntsi a mbó mɨdzɨ ə.” E; lá Ŋwi a ghɨ tsənkɨ mɨdzɨ abɔʼnɨ mɨto ə. Ka o tsi agho nɨ ndɔgɨ atuəmbəm azo a nye azúm a ntɔrɨ ɨlɛbɨ ə, a mbaŋnə faʼə nɨ zɛrə a mbó Maʼmbyí ɛ. Ɨdzúm ɨtsum tsa mbəmnye lɔnə, Maʼmbyí a ghǎ a tsɛrə ghe.

¹⁴ Ŋwi a zhwémnɨ́ a Maʼmbyí a mbó nɨvwo, wɛrə a ghɨ kɨ lɔgɨ mɨtən ɨmyi ɨ zhwemnɨ awɨgɨnə nɨ mɛrə ghe.

¹⁵ Nɨ se zhi ngə́ mbəmnye ɨtsɨŋ lá ɨlam ɨnye mbəmnye Kristo le? Njingə be ma lɔgɨ a bagɨ mbəmnye Kristo ngɨ a zɛrə a nye bagɨ mbəmnye mangye akwarə le? Kə́ kə́!

¹⁶ Nɨ se zhi ngə́ ŋwɔn tsum wa a bosɨnɨ mbəmnye ɨzhi abɔʼnɨ zɨ mangye akwarə, mbəmnye ɨtsa zɨ tiʼ mbəŋ mbe táʼ azúm le? Mbɨ́ʼ ngə́ aŋwaʼnɨ a Ŋwi soŋ tsɛʼ asaŋəsaŋ ngə́, “Bo wa bi bɨbá mɨ tiʼ bəŋ be táʼ mbəmnye.”

¹⁷ Lá ŋwɔn tsum wa a bosɨnɨ mbəmnye ɨzhi a nye zɨ Maʼmbyí, wɛrə a bəŋ ntiʼ mbe táʼ azúm bo Kristo a mu azhwi ə.

¹⁸ A nɨ tsɔʼ mɨntəm ɨmən a nye ɨnu ntɔrɨ ɨlɛbɨ ə. Mɨbvu mə daŋ ma ŋwɔn mɨsɔŋ a ntsu a ghɨnə se anu zə tsɛrə a nye mbəmnye ɨzhi a ngɨə ghe; lá ŋwɔn wa a tɔrɨnɨ ɨlɛbɨ ɨchi, ɨbvu wa a ghɨnɨ lá, a ghɨ a wɛrə lá a nye mbəmnye ɨzhi ɛ.

¹⁹ O so zhi ngə́ mbəmnye ɨzo nɨ nɨshwim nɨ Ŋwi na Azhwi zə Fɛmnɨ a tsínə́ wə mu, Azhwi zə Fɛmnɨ za Ŋwi a ghánɨ́ a mbó gho lá le? Ntsi mbyi ɨzo se lá a nkfu gho chyɛ, ntsi mbyi ɨzo tsi lá a nkfu Ŋwi;

²⁰ zɨ wa a zónɨ́ agho nɨ ndvuŋ tse ghe. Ma lan, á nɨ ngɨ̌ ɨnu nɨ mbəmnye ɨtsən a nye ndóm wa tsɨ mɨ gha nɨfáŋ a mbó Ŋwi ə.