1 Korɨnto 4 - Mɨkan wu Fi

Ntóm Yeso tsə Kristo ghe

¹ Ŋwɔn tsum a tsi nɨ ndɔgɨ bɨgɨnə tsɛʼ tso ngaŋ afaʼ Kristo, tsa bɨ lɛnɨ awa ngə́ á bɨ ndéntɨ́ nkənu Ŋwi za ɨ tsinɨ a nkubə ghe.

² Ka anu zə tsɛrə a tsi ayi ɨwu ntsa ngə́ á ngaŋ afaʼ tso mətsiŋ ɨ faʼə a mbó tafaʼ ɨwa tsɛʼ nɨ nkənu ə.

³ A mbó me, a nɨ mɨnyi mɨ anu ngə́ be nɨ sáʼ aghə kə ngə́ be ma shiʼtɨ ntsi a ngɔʼ abyɛn ŋwɔn mɨsɔŋ a ntsu ə. Ka ma kə́ nkwáŋə́ sáʼə aghə atuəmbəm azə.

⁴ Ka ma zhi aghə anu zə tsɛrə za ma fanɨ a mbó atuəmbəm azə, lá a keʼ diʼ ngə́ ma lanɨ mbe mbuʼ ə. A nɨ Maʼmbyí mbáʼ a sáʼnə́ aghə.

⁵ Ma lan, nɨ keʼ chɛrɨ ɨsáʼ tsɛrə bɔŋ nkfu za ɨ kuʼnɨnɨ ɨ yiŋə. Ɨsáʼ tsi nɨ ɨ zagɨ zhwiʼtɨ ɨ kɔʼ kuʼ nkfu za Maʼmbyí a ghɨnɨ yiŋə. A mɨ lɔgɨ ɨnu ndzumnɨ tsə nkubə ɨ yen nɨ tsɛrə a mu nkaʼ ə, ɨ kɨ kyɛʼ ɨkyaŋtɨ tsə lwɛʼnɨ tsa tsɨ tsinɨ a mu mɨntəm mɨ ɨbɛn ə. Ŋwi a mɨ tiʼ bontɨ a ŋwɔn tsum ɨ mɔ́ʼɔ́ mɔ́ʼɔ́ tsɛʼ adzaŋ za a kuʼnɨnɨ wəmbo ə.

⁶ Ma lɔgɨ alisɨ a nye bɨgɨ Abolo, á nɨ sə́ŋ ɨwu a ɨbɔmbɨma ngə́ nɨ chi yɛʼ anu ɨwu, taŋ ɨ keʼ fəŋ ɨfɨʼ za nɨgham nɨ Ŋwi soŋnɨ ngə́, “A nɨ nkeʼ ŋǔʼ ɨnye mbɨ́ʼ a táʼ ŋwɔn, ngwágɨ́nə́ a wu mɔʼɔ ghe.”

⁷ Ŋwɔn wa a soŋnɨ ngə́ o tsa a ŋwɔn a nɨ ɨwa le? Azúm za o tsinɨ nɨ zɛrə tɨgha bɨ gha ɨ ghanɨ a nɨ ake le? Be a be ngə́ bɨ ghá ɨ ghanɨ, o tiʼə ntɛ́rə́ lá ɨ nə́ tsɛʼ tso ngə́ a se azúm zə ghanɨ be le?

⁸ Nɨ binə ntsi nɨ ɨdzúm ɨtsum tsa nɨ lɔnə le? Nɨ binə mbe ngaŋ nkáb le? Nɨ binə mbe bɨfɔ le buŋ bɨgɨ se bɛrə be le? Ma kɔŋtɨ ngə́ á nɨ be ngótɨ́ bɨfɔ taŋ á bɨgɨnə bɨtsum be bɨfɔ ghe.

⁹ Mbɨ́ʼ ngə́ ma kwaʼtɨ ngə́ Ŋwi a tintɨ awɨgɨ ntóm Yeso ntsagɨ a ntsɨrɨndzum tso ɨbɛn ba bɨ saʼnɨ ɨsáʼ ɨwa nchɛrɨ ngə́ bɨ mɨ zhwitɨ awa; mbɨ́ʼ ngə́ bɨgɨ tiʼ mbəŋ mbe tso ɨbɛn ba bɨ werɨnə awa a mbó mbyi tsum nkwiʼtɨ bɨtsen bɨ ndá bɨ Ŋwi bɨtsum abɔʼnɨ ŋwɔn mɨsɔŋ a ntsu ə.

¹⁰ Bɨgɨ nɨ ɨbərɨ mbɨ́ʼ atú a Kristo; lá nɨ be ɨbɛn bɨ zóŋ mbɨ́ʼ ngə́ bɨŋ bɨ Kristo tsi a mbúm ə! Bɨgɨ bɔrɨkə lá nɨ tɨŋə! Bɨ wágɨ́nə́ awɨgɨ lá nkɔ́ʼsə́ awən atɨ́ ə!

¹¹ Ɨ kɔʼ kuʼ tɨtsɔŋnɨ, bɨgɨ chyɛ̌ nɨ nji nkə́ mbóŋə́ azúm zə nonɨ, bɨgɨ wə́gɨ́ ɨkfurɨ ɨtsɛʼ, bɨ shwómə́ awɨgɨ, bɨgɨ keʼ nɨ adiʼ zə tsinɨ chyɛ,

¹² bɨgɨ faʼə tɨ́sə́n nɨ mbó ɨmɨgɨ ə. Bɨ lɔʼ awɨgɨ lá bɨgɨ baŋnɨ nga ɨfɔgə, bɨ dɨgɨ awɨgɨ lá bɨgɨ chigɨ ntəm;

¹³ bɨ soŋ mɨnu a nye bɨgɨ lá bɨgɨ baŋnɨ ngam mɨgham mə shiʼnɨ a mbó bo ghe. Bɨgɨ tiʼ ntsi lá tsɛʼ tso ntsaʼ atuəshe, tso ɨsɨŋ atuəshe zen ɨ kɔʼ kuʼ ntsu sɨŋə ghe!

¹⁴ Ka ma ŋwaʼnə aghə a zen lá a ngɨə á nɨ tsi nɨ adɨrətú, ma lǒ be ntɨgɨtɨ bən tso ɨbɔ ɨban ba ma kɔŋnə.

¹⁵ Mbɨ́ʼ ngə́ be nɨ kwɛ ntsi nɨ ɨbɛn a ɨnɔ ɨnɔ ba bɨ tɨ́gɨ́tɨ́nə́ awən a mu ntsi mbyi ɨzən a ndzɔŋ Kristo, nɨ tsi tsɛʼ nɨ táʼ tarɨ ə. Mbɨ́ʼ ngə́ a mu ntsi mbyi ɨzən a mbúm bɨŋ bɨ Kristo Yeso, ma nɨ ta ɨwən mbɨ́ʼ ngə́ ma yén nɨ Nkən wu Shiʼnɨ a mbó bɨŋ ə.

¹⁶ Ma nyíʼtə́ awən ngə́ á nɨ nyíʼsə́ aghə.

¹⁷ Ma lan, ma tságɨ́ a Timotyo a mbó bən, zɨ wa a nɨ mbɔŋ mɔn ɨghan wa a faʼnə nɨ táʼ ntəm a nye ntsi mbyi ɨzhi a mbúm bo Maʼmbyí ɛ. A mɨ waʼtɨ awən mbɨ́ʼ ngɨnɨ mɨnu ɨman a mbúm bɨgɨ Kristo Yeso nkɨ mbe tsɛrə tsa ma diʼnə a ndáŋwi tsum ɨdiʼ ɨtsum tsa ma ghɛnə ɨwu ə.

¹⁸ Bən bə tse tiʼ nkɔʼsɨ abə́ŋ atságɨ́ zə tsɛrə tsɛʼ tso ngə́ ma mɨ kaʼ bə ngyen ngantɨ awɨŋ ə.

¹⁹ Be Maʼmbyí a bemtɨ muŋ abaŋ a mɨ keʼ bə sagɨ za ma mɨ yen ghantɨ awɨŋ ə. Ma mɨ tiʼ tsɔʼnɨ aku a njí mɨtən ma ngaŋ atságɨ́ mətsiŋ tsinɨ nɨ mɛrə, nkeʼ be tsɛʼ ɨnu tsa bo ghamnə ghe.

²⁰ Mbɨ́ʼ ngə́ anu a nɨfɔ nɨ Ŋwi ka a be ayi afaʼ a ntsu, a nɨ afaʼ a mɨtən ə.

²¹ A mbó bən a bɔŋ zɨŋə? Ma yen nɨ ngwan kə nɨ akɔŋnɨ abɔʼnɨ mbɔnɨ a mu azhwi le?