1 Korɨnto 3 - Mɨkan wu FiNgaŋ Afaʼ Ŋwi ə 1 Tsɛʼ a nkənu nə ɨbɔmbɨma ɨban, ma kɨ chi keʼ gham a mbó bən tso ɨbɛn ba bɨ tsinɨ nɨ Azhwi za; ma kɨ tsi nɨ ngamə a mbó bən tso ɨbɛn ba bɨ tsinɨ be atuəshe wen, ɨkwaʼtɨ ɨtsa a nye Kristo tsi tso tsə ɨbɔ bə bɔrɨ ə. 2 Ma ghá nɨbə́n ngə́ á nɨ no, nkeʼ be be mɨdzɨ mə chwaʼtɨnɨ ngə́ á nɨ chwaʼtɨ, mbɨ́ʼ ngə́ nɨ bvúrɨ́ tɨ kuʼnɨ a nchwáʼtɨ́ mɨdzɨ ə. Ɨ kɔʼ kuʼ be tɨtsɔŋnɨ, nɨ chi keʼ kɨ mbvurɨ nchwaʼtɨ a mɛrə ghe. 3 Mbɨ́ʼ ngə́ ɨkwaʼtɨ ɨtsɨŋ tsi lá tso tsɨ ɨbɛn bɨ atuəshe wiŋ ə. Aghɨʼnɨ abɔʼnɨ azɔŋ a tɨ bvurɨ kɔʼ a tɨtərɨ bən lá, məzen a keʼ diʼ lá ngə́ nɨ nɨ ɨbɛn bɨ atuəshe wen, nkə́ ngɨ̌ ɨnu ɨtsən ndzɔ̌ŋ mbɔm ɨbɛn bɨ atuəshe wen le? 4 Be táʼ ŋwɔn a tɨtərɨ bən a soŋ ngə́, “Ma nɨ ŋwɔn Baolo”, wu mɔʼɔ a soŋ ngə́, “Ma nɨ ŋwɔn Abolo” — nɨ se ngɨə lá mɨnu mɨ ɨbɛn bɨ atuəshe le? 5 Abolo a nɨ ɨwa? Baolo a kɨ mbe ɨwa? Bɨgɨ lá tsɛʼ ngaŋ afaʼ Ŋwi tsa tsɨ tsɨ́ŋnɨ́nɨ́ awən nɨ nɨŋ mɨntəm ɨmən a nye Kristo Yeso ghe. Ŋwɔn nɨ bɨgɨ tsum a faʼə tsɛʼ afaʼ za Maʼmbyí a ghánɨ́ a faʼə ghe. 6 Ma bí mbum azúm a tɨshe, Abolo a tsúbɨ́ a zɛrə nɨ nkyi ɛ, lá a ghɨ́ Ŋwi ngə́ á mbum azúm za ɨ tom a tɨshe. 7 Ka anu zə wu a lanɨ ntsi ayi lá a nye ŋwɔn wa a binɨ kə ntsubə. A tsi be a mbó Ŋwi mbɨ́ʼ ngə́ a ghɨə wɛrə mbum azúm za kwinə ghe. 8 Ka líʼ a tsi ayi a tɨtərɨ ŋwɔn wa a binɨ nɨ wa a tsubɨnə; Ŋwi a mɨ kyaŋ a ŋwɔn tsum ɨ zɔŋ afaʼ za ŋwɔn wu wu a faʼnə. 9 Mbɨ́ʼ ngə́ bɨgɨ bɨtsum nɨ ngaŋ afaʼ tsa tsɨ faʼnə a mbúm a mbó Ŋwi, nɨ be ɨshwom Ŋwi ə. Nɨ kɨ mbe ndá za Ŋwi a korɨnə. 10 Ndzɔ̌ŋ abɔŋəntəm za Ŋwi a ghánɨ́ a mbó me, ma fáʼ tso mbɔm ndá wa abó azhi a təntɨnə a mu afaʼ, mbɔm atsé ndá ə. Ŋwɔn adaŋ a tiʼə ngvǔ ndá wu atú ə. Lá, ŋwɔn tsum tsum a tsi nɨ ndə̌tú a nye adzaŋ za zɨə vwunə ghe. 11 Bɨ chi keʼ bɔm atsé ndá zə daŋ mbɨ́ʼ ngə́ Ŋwi a kwɛnə nga a Yeso Kristo tso atsé ndá za a nunɨ zɨzɨ ə. 12 Bə tsɛrə mɨ vwu ndá atú atsé za nɨ ŋwaʼŋwaʼ, kə tsə́ŋtsə́ŋ kə nɨ ngɔʼ tsə ŋwenɨnɨ kə nɨ ɨtɨ, kə nɨ ngyɛn kə nɨ nkɨnkaʼ ə — 13 bɨ ghɨ zɛ́n adzaŋ afaʼ za o faʼnɨ; mbɨ́ʼ ngə́ Njwi Nɨsáʼ ghɨ kyɛʼ a zɛrə ghe. A Njwi məwa ɨmugɨ ghɨ kyɛʼ afaʼ a ŋwɔn tsum; ɨmugɨ wa ghɨ zhwiʼtɨ a zɛrə a njí ngótɨ́ mbě ɨzhi ɛ. 14 Be ɨmugɨ tú tɔn ndá za o vwúnɨ́ atú atsé ndá za muŋ bɨ mɨ kyaŋ agho ə. 15 Be ɨmugɨ wa ɨ tɔn afaʼ a ŋwɔn tsɛrə, muŋ a mɨ byɛgɨ a zɛrə ghe; lá bɨ mɨ loŋ a zɨmboŋ, á be tsɛʼ tso a tósɨ́ ntsa lá a mu ɨmugɨ wa. 16 Tsɛʼ a nkənu, nɨ zhi ngə́ nɨ lá nɨshwim nɨ Ŋwi, Azhwi a Ŋwi a chyɛnə lá a mu ɨnye ɨtsɨŋ ə! 17 Ma lan, be ŋwɔn tse a tsənkɨ nɨshwim nɨ Ŋwi, muŋ Ŋwi a mɨ kɨ tsənkɨ ayi ɛ. Mbɨ́ʼ ngə́ nɨshwim nɨ Ŋwi nɨ adiʼ zə fɛmnɨ, bɨŋ mboŋ nɨ be nɨshwim nɨ Ŋwi məna. 18 A ŋwɔn tse a keʼ atuəmbəm azhi tamtə. Be ŋwɔn tse a tɨtərɨ bən a kwaʼtɨ ngə́ zɨə tsi nɨ zóŋ ndzɔŋə a za atuəshe a kwaʼtɨnɨ ngə́ a nɨ zóŋ, á baŋnɨ mbəŋ atuəmbəm azhi a nye abərɨ taŋ ɨ tsi nɨ ngótɨ́ zóŋ ə. 19 Mbɨ́ʼ ngə́ za atuəshe a lɔgɨnɨ tso zóŋ a nɨ ɨnu adzɨŋtɨ a ɨshi ɨmɨgɨ Ŋwi ə. Tso mbáʼ aŋwaʼnɨ a Ŋwi soŋnɨ ngə́, “Ŋwi a lɔgə ayigɨnɨ a ɨbɛn ba bɨ tsinɨ nɨ zóŋ a nye ndab za wɛrə a bentɨnə nkǒ awa ɨwu ə,” 20 adiʼ zə mɔʼɔ a mu aŋwaʼnɨ a Ŋwi a kɨ mbə soŋ ngə́, “Maʼmbyí a zhi ngə́ ɨkwaʼtɨ ɨbɛn ba bɨ tsinɨ nɨ zóŋ a nɨ ɨnu adaŋədaŋə ghe.’’ 21 Ma lan, á ŋwɔn tse a keʼ ntɛ́rə́ mbɨ́ʼ anu za be ŋwɔn mɨsɔŋ a ntsu a ghɨə. Tsɛʼ a nkənu, ɨdzúm ɨtsum tsi a mbó bɨŋ ə: 22 Baolo, Abolo abɔʼnɨ Bita; mbyi zen, ntsi ntən abɔʼnɨ nɨvwo, za a tsinɨ tɨtsɔŋnɨ abɔʼnɨ za a lo bə yen — tsiŋ ɨtsum tsi a mbó bɨŋ ə; 23 bən bɨtsum nɨ ɨbɛn bɨ Kristo; Kristo a kɨ mbe ŋwɔn Ŋwi ə.” |
© 2023, CABTAL