1 Korɨnto 2 - Mɨkan wu Fi

Baolo a Zɛ́ʼtɨ́ ayi a Nye Mɨtən mɨ Azhwi a Ŋwi ə

¹ Ɨbɔmbɨma ɨban, a nkfu za ma yénɨ́ a mbó bən a nchwítɨ́ nkən mbɨ́ʼ a Ŋwi wa ma bénɨ́ atɛmə-ndzě a nye wɛrə lá, ma sá mɨgham mə tən gham kə nkɨ ndiʼ azhyɛ zə wi ə.

² Mbɨ́ʼ ngə́ a nye nkfu za ma tsínɨ́ bɨgɨnə lá, ma nɨ́ŋ a mu ntəm me ngə́ ma mɨ lɨgɨnɨ anu atsum ɨ tiʼə wiʼtɨnə tsɛʼ Yeso Kristo, tɨ́sə́n tɨ́sə́n nɨvwo ɨni atɨ abaŋnɨ-baŋnɨ ə.

³ Ma lan, mbáʼ ma yénɨ́ nkwátɨ́ awən lá, ɨnye ɨzə kə́ mbɔ́rɨ́kə́ nkə́ mbɨ́ŋnə́ nɨ nɨbɔgɨ nə wi,

⁴ anu za ma kɨ́nə́ ndiʼə abɔʼnɨ adzaŋ za ma ghánɨ́ nkən ɨghə sé tsa a ndzum nɨgham nə shiʼnɨ na bɨ kyáŋtɨ́nɨ́ nɨ zóŋ ŋwɔn mɨsɔŋ a ntsu, lá anu za ma kɨ́nə́ sóŋə́ nkə́ ndiʼə a kə́ ndǐʼ mɨtən mɨ Azhwi a Ŋwi ə.

⁵ Adzaŋ məwen, abeməntəm azən a mɨ chi keʼ zɛʼtɨ be a nye zóŋ ŋwɔn mɨsɔŋ a ntsu, a mɨ chi zɛʼtɨ ayi be a nye mɨtən mɨ Ŋwi ə.

Zóŋ Ŋwi ə

⁶ Lá bɨgɨ chwítɨ́ nkən mbɨ́ʼ a zóŋ a mbó ɨbɛn ba bo kwinɨ a mu azhwi ə. Lá ka a be ayi zóŋ atuəshe wen kə zóŋ wa a tsinɨ a mbó ɨdzɔŋ ɨlaʼ tsa tsɨ sáʼnə́ atuəshe — ɨdzɔŋ ɨlaʼ tsa tsɨ byɛ́gɨ́nɨ́ mɨtən ɨma ghe.

⁷ Lá zóŋ wa bɨgɨ chwítɨ́nə́ a nɨ zóŋ Ŋwi wa a tsinɨ a nkubə, zóŋ wa wɛrə a kwɛ́nə ndɛn bɔŋ ɨ káʼ atuəshe a ngá nɨfáŋ ɨnɨgɨnə a mbó bɨgɨnə ghe.

⁸ Wu tse a tɨtərɨ bɨta bɨ ɨlaʼ atuəshe wiŋ sé zúʼ nkɨ njí a zóŋ məwiŋ ə. Bo bá bé zhi muŋ bo sé kwemtɨ a Maʼmbyí, wa a nɨ wu nɨfáŋ atɨ abaŋnɨ-baŋnɨ ə.

⁹ Lá aŋwaʼnɨ a Ŋwi soŋ ngə́: “Za ŋwɔn tse a láʼnɨ́ nkeʼ zɛn kə ndzuʼ, za ŋwɔn tse a láʼnɨ́ nkeʼ kwaʼtɨ ngə́ a chi fu, a nɨ tsɛʼ zɛrə mbáʼ Ŋwi a kyáŋtɨ́nɨ́ a mbó ɨbɛn ba bɨ kɔŋnɨ ayi ɛ.”

¹⁰ Lá Ŋwi a kyɛ́ʼ anu azhi zə nkubə məzen lá a mbó bɨgɨ ntsa a ndzum Azhwi azhi ɛ. Azhwi a kwábɨ́ ɨnu ɨtsum ə, tsɛʼ ɨnu tsa Ŋwi a kyáŋtɨ́nə́ tsa tsɨ shwinɨ, Azhwi a kwábə́ a tsɛrə ghe.

¹¹ A nɨ tsɛʼ azhwi za a tsinɨ a mu ɨbɛn mbáʼ a zhinɨ ɨnu ɨtsum mbɨ́ʼ awa ghe; ndəŋndəŋ a nɨ tsɛʼ Azhwi a Ŋwi mbáʼ a zhinɨ anu atsum mbɨ́ʼ a Ŋwi ə.

¹² Ka bɨ gha ayi lá azhwi atuəshe zen a mbó bɨgɨnə ghe; bɨgɨnə baŋnɨ nkwarɨ be Azhwi za Ŋwi a tsagɨnɨ, taŋ á bɨgɨ chi zhi atsum za Ŋwi a ghanɨ a mbó bɨgɨnə ghe.

¹³ Ma lan, ka bɨgɨ ngámə́ awɨgɨ lá mɨgham ma a diʼnɨ zóŋ ŋwɔn mɨsɔŋ a mbó bɨgɨ, bɨgɨ baŋnə ngámə́ be mɨgham ma a diʼnɨ Azhwi za, adzaŋ za bɨgɨ fɨʼtɨnɨ nkənu zɨ azhwi a mbó ɨbɛn ba bɨ tsinɨ nɨ Azhwi za.

¹⁴ Ŋwɔn tsum wa ka a tsi ayi nɨ Azhwi za, a chi keʼ kwarɨ ɨnu tsa tsɨ lonə a mbó Azhwi a Ŋwi ə. Abə́ŋ a ŋwɔn məza ka ndánə́ ndzúʼə ayi nkə́ njíɛ ayi a tsɛrə ghe; tsɨ nɨ ɨnu ɨlentɨ a mbó bo, mbɨ́ʼ ngə́ o chi zhi ɨlɨŋ ɨwa ɨ tsa tsɛʼ a ndzum azhwi ə.

¹⁵ Ŋwɔn tsum wa a tsinɨ nɨ Azhwi za, a chi zhi ɨlɨŋ anu atsum, lá ŋwɔn tsɛrə a chi keʼ zhi anu za wɛrə a kwaʼtɨnə ghe.

¹⁶ Tso mbáʼ aŋwaʼnɨ a Ŋwi a soŋnɨ ngə́: “Ɨwa a zhi ɨkwaʼtɨ Maʼmbyí le? A chi tɨgɨtɨ ɨwa ɨ tɨgɨtɨ a wɛrə le?” Lá bɨgɨ zhi anu za Kristo a kwaʼtɨnə ghe.