1 Korɨnto 16 - Mɨkan wu Fi

Adzaŋ za bɨ Máʼnɨ́ Nkáb a Nkwátɨ́ ba bɨ Nɨ́ŋnɨ́ Mɨntəm ɨma a nye Kristo a Yerosalɛm ə

¹ Tɨtsɔŋnɨ, mbɨ́ʼ ɨnu tsa nɨ ŋwáʼnɨ́nɨ́ mbɨ́ʼ nchwáʼ nkáb a nkwátɨ́ ɨbɛn bɨ Ŋwi a Yerosalɛm nɨ zɛrə lá: nɨ tsi nɨ ɨ zagɨ faʼ tsɛʼ adzaŋ za ma tɨ́gɨ́tɨ́nɨ́ ndáŋwi za ɨ tsinɨ a Galesha ngə́ á bo ghɨ lá.

² A Sɔnde tsum, ŋwɔn nɨ bɨŋ tsum a tsi nɨ ndě ndvuŋ nkáb tse ndzɔ̌ŋ ndvuŋ nkáb wa a fuʼnɨ a mu ngabɨ məza, taŋ ma ghɨ ngyen, bɨ keʼ mbɨ́ŋə́ númə́ nkɨənə a nchwáʼ nkáb ə.

³ Ma ghɨ ngyén, ma mɨ tsagɨ ɨbɛn ba nɨ tsɔʼtɨnɨ nkɨ mbemtɨ nɨ ɨŋwaʼnɨ tsa tsɨ fɨʼtɨnə awa, á bo lɔgɨ azúm zə ghanɨ azən ngɛn nɨ zɛrə a Yerosalɛm ə.

⁴ Be a bɔŋ ngə́ á ma ghɛn, muŋ bo mɨ tsi aku bɨgɨ bo ghe.

Baolo a ghɨ Akyaŋtɨ a Nɨyen azhi ɛ

⁵ Ma mɨ yen ghantɨ awən mbáʼ ma fomnə ngɛn a Masedonia, mbɨ́ʼ ngə́ ma tsi nɨ ntsǎ a Masedonia,

⁶ aghagɨ a tsɛrə ɨ tiʼ tsi bɨgɨnə a nye nkfu ɨfɛgɨ wu tən taŋ á nɨ chi kwatɨ aghan á ma ghɛn nɨ mbyi nɨ nɨghan ɨnan, adiʼ atsum za a ghɨ diʼ ngə́ á ma ghɛn ɨwu ə.

⁷ Ma sa kɔŋ ɨ yen zɛn awən ɨ tɛm tsɛʼ atɨ́ atɨ́; ma tsiŋə nɨ ntəm ɨghə ɨtsum a nchyɛ́ bɨgɨnə a nye abaŋ zə sa mbáʼ be Maʼmbyí a bemtə.

⁸ Lá ma mɨ tsi a Ɛfɛso ɨ ghanə ɨ kɔʼ kuʼ a nkfu nɨdorɨ nɨ Bɛntəkɔsɨ ə.

⁹ Ɨbɛn bə ghaʼnɨ ba bɨ kwənkɨnɨ ɨfaʼ məwiŋ baʼtɨ ntsi ɨ tsinɨ ɨwu lá, təkɔʼ bɨ abárɨ́ tse a lanɨ ntsi ɨ ghanə a faʼ bɨtəkɔʼ bɨ ɨnu ba bɨ kɨnɨ nkɨ ndɨtə.

¹⁰ Be Timotyo a yen a mbó bən, á nɨ zɛn ngə́ a tsi ɨ shiʼnɨ a tɨtərɨ bən, mbɨ́ʼ ngə́ wɛrə a faʼə a mbó Maʼmbyí tsɛʼ adzaŋ za ma faʼnə ghe.

¹¹ A ŋwɔn tse a keʼ ayi wagə. Nɨ tsi nɨ ɨ zagɨ ɨ kwatɨ ayi á ghɛn nɨ mbyi nɨ nɨghan ɨni nɨ mbɔnɨ, taŋ á chi ghɨ bə bən a mbó me; mbɨ́ʼ ngə́ ma tsiŋə ayi ngə́ á yen bo bɨ ɨbɔmbɨma ba.

¹² Tɨtsɔŋnɨ, mbɨ́ʼ a mɨma ɨwɨgɨnə Abolo, ma nɨ̌ŋ ntəm ɨyi nkfu tsɨ ghaʼtɨnɨ ngə́ á wɛrə abɔʼnɨ ɨbɔmbɨma bə mɔʼɔ ba yen ngantɨ awɨŋ ə, lá a bvurɨ a mu ntəm zɨ tɨ wiʼtɨ mbem ngə́ bo mɨ yen tɨtsɔŋnɨ ə. Bo ghɨ ntsí nɨ abárɨ́ muŋ bo mɨ yiŋə.

Mɨgham mɨ Ntsɨrɨndzum ə

¹³ A nɨ ŋaʼ ɨmɨgɨ ɨmən nɨ ɨtoŋnɨ ɨtsən, ntɛm ntəntɨ a mu abeməntəm, nkántɨ́ mbáŋnɨ́, nkeʼ nkə́ nchíʼnə́ ghe.

¹⁴ Faʼnə ɨfaʼ ɨwən ɨtsum a mu akɔŋnɨ ə.

¹⁵ Be nɨ zhi anu mbɨ́ʼ a Stefanasɨ bo ngwəgɨ ɨzhi le; bo nɨ bɨtsabɨmbyi a mbəŋ mɨntəm ɨma ɨ nɨŋ a nye Kristo a mu Mbuʼ Akaiya ghe. Bo tɛgɨ mɨntəm ɨma a faʼə a mbó ɨbɛn bɨ Ŋwi ə. Ma buʼ mbó a mbó bɨŋ ə, a ɨbɔmbɨma ɨban,

¹⁶ ngə́ á nɨ ndzúʼnɨ́ ɨbə́ŋ ɨbɛn tso mətsen, nkə́ ndzúʼnə́ a ŋwɔn tsum wa a faʼnə tso bo ghe.

¹⁷ Ma dorɨtɨ ngə́ Stefanasɨ, Fɔtunatusɨ abɔʼnɨ Akayakusɨ yenə ghe; bo yen ndɔgɨ adiʼ azɨŋ ə,

¹⁸ ngɨə ɨnye ɨzə saŋnɨnə tsɛʼ adzaŋ za bo kɨ chínə́ ngɨə ɨnye ɨzɨŋ saŋnɨnə lá. A bɔŋ ngə́ á bɨgɨnə njwíʼtə́ a mbó ɨbə́ŋ ɨbɛn tso mətsiŋ ə.

¹⁹ Ndáŋwi tsa tsɨ tsinɨ a mu Mbuʼ Esha tɔ́ŋtə́ awɨŋ ə; Akwila bo Brɨsɨla tɔ́ŋtə́ awən, ndáŋwi za ɨ bomnkɨnə a ndá bɛrə tsaʼtə awən tsɛʼ nɨ mɨntəm ɨma mɨtsum tso ɨbɛn ba bɨ zɔŋnə a Kristo ghe.

²⁰ Ɨbɛn bɨtsum ba bɨ nɨŋnɨ mɨntəm ɨma a nye Kristo ɨghan, bɨ tsaʼtə awɨŋ ə. A nɨ tɔŋtɨ awən bən nɨ bən ɨ shiʼnɨ ɨ shiʼnɨ a nye ndóm wa ɨ diʼnɨ ngə́ nɨ nɨ ɨbɛn bɨ Ŋwi ə.

²¹ A nɨ me, Baolo wa ma ŋwaʼnɨnɨ atsaʼtɨ zen, nɨ azə abó a mbó bɨŋ ə.

²² Ŋwɔn tsum wa a se a Maʼmbyí kɔŋ — á bɨ lɔʼ ayi ɛ! Maʼmbyí ɨwɨgɨ, yiŋə!

²³ A abɔŋəntəm a Maʼmbyí Yeso a tsi a mbó bɨŋ ə.

²⁴ Ma kɔŋ awən bɨtsum a ndzum Kristo Yeso ghe. A be lá.