1 Korɨnto 15 - Mɨkan wu Fi

Anu mbɨ́ʼ adzaŋ za Kristo a Zhwémnɨ́nə́

¹ Tɨtsɔŋnɨ nə ɨbɔmbɨma ɨban, ma lǒ nkwemtə a mbó bən Nkən wu Shiʼnɨ wa ma sóŋnɨ́ a mbó bən lá. Nɨ kwárɨ́ Nkən məwiŋ ə, abeməntəm azən atsum a tiʼ nkɨ ndzɛʼtɨ ayi lá a nye wɛrə ghe.

² Ma sóŋə́ lá nkən wu shiʼnɨ wa ma sóŋnɨ́ a mbó bən lá. Nkən məwiŋ ghɨ loŋ awən mbáʼ be nɨ tiʼtɨ a wɛrə ɨ shiʼnɨ ə. Be a tú mə lá be muŋ a mɨ diʼ ngə́ nɨ nɨ́ŋ mɨntəm ɨmən a nye nkən məwen lá atú adaŋədaŋə ghe.

³ Mbɨ́ʼ ngə́ ma chwítɨ́ lá nkən wa ma kɨ́nɨ́ nkɨ́ nkwárɨ́; ntiʼ nkɨ nga a wɛrə a mbó bən tso anu za a tsanɨ mbyi ɨnu ɨtsum: ngə́ Kristo a kfó mbɨ́ʼ mɨbvu ɨmɨgɨnə, adzaŋ za aŋwaʼnɨ a Ŋwi a soŋnə;

⁴ ngə́ bɨ twə́ŋ ayi, a ndzum njwi tsi tárə́ wɛrə a zhwemnɨ, adzaŋ za aŋwaʼnɨ a Ŋwi a kɨ́nə́ nkə́ sóŋə́;

⁵ ngə́ wɛrə a fú a ɨshe a ɨshi Bita, ntiʼ nkɨ ndzɔŋtɨ fu a ɨshe a ɨshi ntóm Yeso tsa tsɨ bénɨ́ nɨghúm ntsɔb bá lá.

⁶ Wɛrə a tíʼ ndzɔŋtɨ ɨ fu táʼ nkfu a ɨshe a ɨshi ɨbɛn ba bɨ kɨ́nə́ ndzɔŋə ayi ba bɨ tsánɨ́ nkɨ tsi tə̧̂ ghe. Ɨbɛn benə bə ghaʼnɨ bvurɨ atú ntɨŋ ə, le buŋ bə tse kfokɨnə ghe.

⁷ Wɛrə a tíʼ fú a ɨshe a ɨshi Jemsɨ, ntiʼ nkɨ ndzɔŋtɨ fu a ɨshe a ɨshi ntóm Yeso tsa ɨtsum ə.

⁸ A ndwɨgɨnɨ ɨnu ɨtsum, wɛrə a kɨ́ fú a ɨshe a ɨshi me ghe, lá mbáʼ ma benɨ be tso mɔn wa bɨ jwínɨ́ a nkfu tɨbɔŋ ə.

⁹ Mbɨ́ʼ ngə́ a tɨtərɨ ntóm Yeso ɨtsum ma lá ntsɨrɨndzum ə, ka ma kwɛ nkuʼnɨ aghan ngə́ á bɨ tɔŋ aghan nɨ ntom Yeso mbɨ́ʼ ngə́ ma kə́ ndɨgɨ ndáŋwi za a nɨ zɨ Ŋwi ə.

¹⁰ Lá, a ntsǎ a ndzum abɔŋəntəm a Ŋwi, ma nɨ azúm za ma nɨ zɛrə ghe. Abɔŋəntəm za Ŋwi a ghánɨ́ a mbó me a se adaŋədaŋə tsaə. Ma baŋnɨ ɨ faʼ ntsa ntóm Yeso tsə mɔʼɔ tsa, le buŋ a se me ghɨ, a baŋnɨ ngɨ be abɔŋəntəm a Ŋwi za a tsinɨ bɨgɨ zɨə.

¹¹ Ma lan, kə nkən məwiŋ ló be a mbó me kə a mbó ntóm Yeso tsə mɔʼɔ tsa muŋ, nə nɨ anu za bɨgɨ bo bɨtsum sóŋnə́, nkɨ mbe anu za mbáʼ nɨ nɨŋnɨ mɨntəm ɨmən ɨwu ə.

Ɨbɛn ba bɨ Zɔŋnə a Ŋwi Ghɨ Zhwemnɨ a mbó Nɨvwo

¹² Tɨtsɔŋnɨ, be a be ngə́ nkən ɨwɨgɨ nɨ ngə́ Kristo a zhwémnɨ́ a mbó nɨvwo, a ghɨ ake bən bə mɔʼɔ soŋənə ngə́ ɨbɛn ba bɨ kfonɨ ghɨ keʼ zhwemnɨ a mbó nɨvwo lá le?

¹³ Be a be ngə́ məza a nɨ nkənu, lá be ngə́ Ŋwi a sé zhwemnɨ a Kristo a mbó nɨvwo;

¹⁴ be a kɨ mbe ngə́ Kristo a sé zhwemnɨ a mbó nɨvwo muŋ ka bɨgɨ tsi awɨgɨ nɨ anu zə tse ɨ númə́ soŋənə, nɨ keʼ kɨ ntsi nɨ anu zə tse a nɨ́ŋ mɨntəm ɨmən ɨwu ə.

¹⁵ Za a chwirɨnɨ nkyi a nɨ ngə́ a mɨ diʼ ngə́ bɨgɨ chwě ɨnu atú Ŋwi ə, mbɨ́ʼ ngə́ bɨgɨ sóŋ ngə́ Ŋwi a zhwémnɨ́ a Kristo a mbó nɨvwo ə. Lá be a be nkənu ngə́ ka bɨkfú nzhwémnə́ awa a mbó nɨvwo, muŋ a be ngə́ Ŋwi a sé Kristo a mbó nɨvwo zhwemnə.

¹⁶ Mbɨ́ʼ ngə́ be a be ngə́ Ŋwi a se bɨkfú a nzhwémnə́ a mbó nɨvwo muŋ wɛrə a bvurɨ tɨ kɨ nzhwemnɨ a Kristo ghe.

¹⁷ Be a be ngə́ Ŋwi a bvurɨ tɨ zhwemnɨ a Kristo muŋ abeməntəm azən a tsa adaŋədaŋə, nɨ kɨ mbvurɨ ntsi a mu mɨbvu ɨmɨŋ ə.

¹⁸ A mɨ kɨ diʼ ngə́ ɨbɛn ba bɨ nɨŋnɨ mɨntəm ɨma a nye Kristo ba bɨ kfonə bɨ byé.

¹⁹ Be a be ngə́ ntsiŋə nɨ ntəm tsum ɨzɨgɨnə a nye Kristo ɨ tsi lá tsɛʼ a nye ntsi mbyi ɨzɨgɨnə atuəshe wen muŋ bɨ tsi nɨ nko mɨlɨŋnɨ a nye bɨgɨnə ɨ tsa a ŋwɔn mɨsɔŋ a ntsu tsum atuəshe wiŋ ə.

²⁰ Lá nkənu za ɨ tsinɨ ɨwu ɨ nɨ ngə́ Ŋwi a zhwémnɨ́ a Kristo a mbó nɨvwo tso mɨntɨ mə bɛʼnɨ ngə́ zɨə ghɨ kɨ zhwémnɨ́ ɨbɛn ba bɨ kfonɨ a mbó nɨvwo ə.

²¹ Mbɨ́ʼ ngə́, tso mbáʼ nɨvwo yénɨ́ atuəshe ntsa a ndzum táʼ ŋwɔn mɨsɔŋ lá, ndəŋndəŋ, nzhwemnə a mbó nɨvwo ɨ yiŋə, ntsǎ lá a ndzum táʼ ŋwɔn mɨsɔŋ a ntsu ə.

²² Mbɨ́ʼ ngə́, tso mbáʼ ŋwɔn mɨsɔŋ a ntsu tsum a kfónə́ mbɨ́ʼ ngə́ bo bɨtsum tsi a mbúm bo bɨ Adam lá, ndəŋndəŋ bɨ ghɨ zhwémnɨ́ a ŋwɔn mɨsɔŋ a ntsu tsum mbɨ́ʼ ngə́ bo bɨtsum tsi a mbúm bo bɨ Kristo ghe.

²³ Lá Ŋwi a ghɨ zhwémnɨ́ a ŋwɔn tsum ɨ mɔ́ʼɔ́ mɔ́ʼɔ́ ɨ zɔŋnə akyaŋtɨ za a kuʼnɨnɨ: Kristo a ntsambyi zaʼnə; ɨ tiʼ zɔŋtɨ nɨ ɨbɛn ba bɨ tsinɨ a mbó Kristo a nkfu za wɛrə a lo bə yiŋə.

²⁴ Ndwitɨ atuəshe mɨ tiʼ yiŋə; Kristo a mɨ ghɔʼ ɨzhwi tsɨ tən ɨtsum tsa tsɨ sáʼnə́ a nɨkaŋ, ɨ tiʼ gha Nɨfɔ na a mbó Ŋwi, zɨ wa a nɨ Tarɨ lá.

²⁵ Mbɨ́ʼ ngə́ Kristo a tsi nɨ ɨ zagɨ saʼnə atsum ɨ kɔʼ kuʼ njwi za Ŋwi a ghɨ gháʼ ngaŋ kɨban ɨtsum, ɨ tsagɨ awa a shwúrɨ́ mɨku Kristo ghe.

²⁶ Ntsɨrɨndzum ngaŋ kɨban za Ŋwi a ghɨ gháʼ a nɨ nɨvwo ə.

²⁷ Mbɨ́ʼ ngə́ aŋwaʼnɨ a Ŋwi a soŋ ngə́, “Ŋwi a tságɨ́ ɨdzúm ɨtsum a shwúrɨ́ mɨku zɨə.” A tsi asaŋəsaŋ ngə́ ɨtú mɨgham mɛnə ngə́, “ɨdzúm ɨtsum” se a Ŋwi zɨmboŋ chintɨ, zɨ wa a tsagɨnɨ ɨdzúm ɨtsum a shwúrɨ́ Kristo lá.

²⁸ Lá, a nkfu za bɨ zumtɨnɨ ɨdzúm ɨtsum ntsagɨ a shwúrɨ́ mɨtən mɨ Kristo, a nkfu məwa, Mɔn wen zɨmboŋ a mɨ tiʼ lɛn atuəmbəm azhi a shwúrɨ́ Ŋwi, zɨ wa a zúmtɨ́nɨ́ ɨdzúm ɨtsum a shwúrɨ́ Kristo, á Ŋwi a tiʼ ntsi atú ɨdzúm ɨtsum, ɨ sáʼə a tsɛrə ghe.

²⁹ Be a tú mə lá be muŋ, ɨbɛn ghɨ nkwarɨ nkyi a nkfu bɨkfú lá, məzen a diʼ lá ngə́ ke le? Be a be ngə́ Ŋwi a se bɨkfú a nzhwémnə́ tsɛʼ a nkənu muŋ ɨbɛn tiʼə nkwárɨ́ nkyi a nkfu bɨkfú lá mbɨ́ʼ ake le?

³⁰ Ma chyɛ̌ a ntsu nɨvwo a nyom tsum lá mbɨ́ʼ ake le?

³¹ Ɨbɔmbɨma ɨban, nɨvwo maʼə aghan ntsagə njwi tsum ə! Kɨtɛrɨ wa ma tsinɨ nɨ wɛrə a nye bən, a mu ntsi mbyi ɨzɨgɨnə a mbúm bɨgɨnə bɨ Kristo Yeso Maʼmbyí ɨwɨgɨnə, a ghɨ wɛrə ma soŋ ntəm ɨghan a nye məziŋ ə.

³² Be a be ngə́ ma tǒ bɨgɨ bɨ “ɨnyam mɨbaʼ ” ɨghan a Ɛfɛso tsɛʼ mbɨ́ʼ ɨnu tsa ŋwɔn mɨsɔŋ a ntsu a táŋnə́, ma sə́ŋ lá ake a mu fɨto məfen le? Lá be a be ngə́ ka Ŋwi a nzhwémnə́ ayi bɨkfú a mbó nɨvwo muŋ, tso mbáʼ nɨgham nə tse soŋnɨ lá, “A bɨgɨnə dzɨ nkɨ no mbɨ́ʼ ngə́ a lo be ɨzo á bɨgɨnə kfokə.”

³³ A bɨ keʼ awən tamtə, lá á nɨ zhi ngə, “Be o nkárə́ bɨŋ bɨ ɨbɛn bɨ tɨbɔŋ muŋ o mɨ yɛʼ mbɔm tɨbɔŋ ə.”

³⁴ A nɨ bə́ mbən a nye ɨkwaʼtɨ ɨtsən tsə shiʼnɨ nkɨ nkyɛntɨ ngɨ̌ mɨbvu ə. Ma soŋ ntəm ɨghan a mbó bən ngə́ bən bə tsɛrə se a Ŋwi zhyɛ. Ma soŋ a məzen tso anu adɨrətú a mbó bɨŋ ə.

Mbəmnye za bɨ ghɨ Zhwémnɨ́ a mbó Nɨvwo

³⁵ Lá ŋwɔn tse mɨ bitɨ ngə́, “Ŋwi a zhwémnɨ́ bɨkfú a mbó nɨvwo lá ɨ nə́ le? Bɨ ghɨ nzhwemnɨ awa lá, bo tsi lá nɨ zɨŋə adzaŋ a mbəmnye le?”

³⁶ Adzɨŋtɨ! O ghɨ mbi ngwəgɨ azúm a tɨshe lá, ɨ chi keʼ tom tɨgha ɨ fom nkfoə.

³⁷ Azúm za o binɨ a lá tsɛʼ mbum za zɛrə zɛrə ghe, aghagɨ a tsɛrə mbe lá mbum nchwi kə mbum azúm zɨ mɔʼɔ ghe. Ka ɨ be ayi lá nchwi za ɨ ghɨ nkwi ɨ tsi nɨ ɨzəŋ ɨchi lá.

³⁸ Ŋwi a ghǎ ngwəgɨ azúm za nɨ ntɨ̌nye wa zɨə kɔŋnə. Wɛrə a ghǎ a mbó ngwəgɨ azúm tsum ntɨ̌nye wa a nɨ ɨyi ɛ.

³⁹ Ka ɨnyam ɨnye tsum atuəshe wiŋ be ayi lá táʼ abə́ŋ a ɨnyam ɨnye; ŋwɔn mɨsɔŋ a ntsu tsum a tsi nɨ táʼ abə́ŋ a ɨnyam ɨnye, ɨnyam mɨbaʼ tsi nɨ ɨza, bɨsɨ́ŋ tsi nɨ ɨza, ɨshwú kɨ ntsi nɨ ɨza ghe.

⁴⁰ Ɨdzúm fɔməbvurə tsi ɨwu, ɨdzúm atuəshe kɨ ntsi ɨwu ə; nɨbɔŋ na nɨ tsinɨ a nye ɨdzúm fɔməbvurə nɨ tsi chwa a nye nɨbɔŋ na nɨ tsinɨ a nye ɨdzúm atuəshe ə.

⁴¹ Nɨnyom a tsi nɨ ɨni nɨbɔŋ, saŋ a tsi nɨ ɨni ɛ, nɨbɔŋ nɨ mɨndzɔŋ tsi atú zɨə; tsɛʼ a tɨtərɨ mɨndzɔŋ, nɨbɔŋ tsi ɨwu atú atú ə.

⁴² Nə nɨ adzaŋ za a ghɨnɨ be mbáʼ bɨ ghɨnɨ zhwémnɨ́ bɨkfú a mbó nɨvwo ə. Mbəmnye za bɨ twəŋnɨ lá ɨ lá azúm za a chinɨ bye, lá mbəmnye za Ŋwi a zhwemnɨnɨ be azúm za a chinɨ keʼ bye.

⁴³ Bɨ tɨ twə́ŋə́ lá ɨ bɨ́gɨ́ a ndzé nkɨ mbɔrɨkə; bɨ zhwemnɨ a mbó nɨvwo, ɨ bɔŋ a ndzé nkɨ ntsi nɨ mɨtən ə.

⁴⁴ Bɨ tɨ twə́ŋə́ lá ɨ be mbəmnye za o chinɨ mɔmtə, bɨ zhwemnɨ a mbó nɨvwo, ɨ tiʼ mbəmnye zɨ azhwi ə. Tsɛʼ tso mbáʼ mbəmnye za o chinɨ mɔmtɨ ɨ tsinɨ ɨwu lá, mbəmnye zɨ azhwi ɨ kɨ ntsi ɨwu ə.

⁴⁵ Mbɨ́ʼ ngə́ aŋwaʼnɨ a Ŋwi soŋ ngə́, “Ŋwi a káʼ ntsambyi ŋwɔn wa a bénɨ́ Adam lá tso ŋwɔn wa a tsinɨ nɨ ntsi ntɨŋ ə”; lá ntsɨrɨndzum Adam a nɨ Azhwi za a ghánɨ́ ntsi ntɨŋ ə.

⁴⁶ Ka a be ayi mbəmnye zɨ azhwi za ɨ tsanɨ mbyi ɛ, a nɨ be za o chinɨ mɔmtɨ lá mbáʼ ɨ tsanɨ mbyi, zɨ azhwi tiʼ ndzɔŋə.

⁴⁷ Ntsambyi Adam bɨ káʼ ayi lá nɨ ɨshe, wɛrə a ló lá a mbó ɨshe; ndzɔŋ ndzum Adam a ló lá a fɔməbvurə, mbe lá Kristo ghe.

⁴⁸ Ɨbɛn ba bɨ tsinɨ atuəshe tsi lá tsɛʼ tso zɨ wa bɨ káʼnɨ́ nɨ ɨshe lá; ɨbɛn ba bɨ tsinɨ a fɔməbvurə tsi lá tsɛʼ tso zɨ wa a lónɨ́ a fɔməbvurə lá.

⁴⁹ Tsɛʼ tso mbáʼ bɨgɨnə finɨ a ŋwɔn wa bɨ káʼnɨ́ nɨ ɨshe lá, bɨgɨnə ghɨ kɨ fí a Ŋwɔn wa a lónɨ́ a fɔməbvurə lá.

⁵⁰ Ɨbɔmbɨma ɨban, anu za ma sóŋnə́ lá a nɨ ngə́ za bɨ nyɛ́tɨ́nɨ́ nɨ ɨnyam ɨnye abɔʼnɨ alɛm a chi keʼ tsi nɨ anu a ngɨə nɨ Nɨfɔ nɨ Ŋwi ə, za a kfónə́ lá, a chi keʼ tsi nɨ za ka a nkfǒ ayi ɛ.

⁵¹ Zhwiʼtɨnə! A ma soŋ nkənu zen za ɨ tsinɨ a nkubə lá. Bɨgɨnə bɨtsum láʼ keʼ kfo, lá bɨ ghɨ bənkɨ awɨgɨnə bɨtsum,

⁵² a nkfu za bɨ tɔŋnɨ ndwɨgɨnɨ ndzum ntaŋ ə. Məzen a ghɨ vwukɨ be tso mbáʼ nɨdɨgɨ zhwibtɨnə lá. Mbɨ́ʼ ngə́ a nkfu za bɨ tɔŋnɨ ntaŋ məzen, bɨ mɨ zhwemnɨ bɨkfú á bo láʼ keʼ bə nkfoə. Bɨ ghɨ bənkɨ awɨgɨnə bɨtsum ə.

⁵³ Mbɨ́ʼ ngə́ za a kfónə́ bɨ tsi nɨ mbənkə á tiʼ za ka a nkfǒ ayi ɛ; mbɨ́ʼ ngə́ za a kfónə́ a tsi nɨ ngwəgɨ mbəmnye za ka ɨ nkfǒ ayi ɛ.

⁵⁴ Ma lan, məzen a ghɨ ndɔ́gɨ́ adiʼ, bɨ kɨ́ mbə́nkɨ́ a za a chinɨ kfo a nye za a chinɨ keʼ kfo, a mɨ tiʼ kɔʼ bomnkɨ bo za aŋwaʼnɨ a Ŋwi kwɛ́nə soŋ ngə́: “Ayanguʼ a tsənkɨ nɨvwo ə!”

⁵⁵ “Nɨvwo, ayanguʼ azo a tiʼ mé le? Nɨvwo, ɨshwe ɨzo ɨ mé le?”

⁵⁶ Nɨvwo kwarə ɨshwe ɨzhi lá a mbó ɨbvu ə, ɨbvu lɔgɨnɨ ɨzhi a mbó nyɔngɔŋ Mǒse ghe.

⁵⁷ Lá, mɨya a mbó Ŋwi, zɨ wa a ghánɨ́ ayanguʼ a mbó bɨgɨnə ntsǎ a ndzum Maʼmbyí Yeso Kristo ɨwɨgɨnə ghe!

⁵⁸ Ma lan nə ɨbɔmbɨma ɨban, nɨ tɛm á mɨku ɨmɨŋ təntɨ, á nɨ keʼ nchíʼnə́ ghe. A faʼnə ɨfaʼ ɨwən a mbó Maʼmbyí nkfu tsum, mbáʼ nɨ zhinɨ ngə́ ka anu zə tse za nɨ ghɨnə, a mu ɨfaʼ ɨwən a mbó Maʼmbyí a chi tsa ayi adaŋədaŋə lá.