1 Korɨnto 1 - Mɨkan wu Fi

¹ Aŋwaʼnɨ zen a lo a mbó me, Baolo wa a benɨ ntom Yeso zɨ Kristo Yeso za Ŋwi a tsɔ́ʼnɨ́ ndzɔŋə adzaŋ za Ŋwi a kɨ́nə́ ndǒ, nkɨ ndo a mbó mɨma ɨwɨgɨnə Sɔstɛnisɨ,

² Ngěn a mbó bɨŋ ndáŋwi za ɨ tsinɨ a Korɨnto, nkə́ ngěn a mbó ɨbɛn bɨtsum ba bɨ tsɔʼnɨ ngə́ á bɨ be ɨbɛn bɨ Ŋwi bə fɛmnɨ ba bɨ tsinɨ a mbó zɨ mbɨ́ʼ ngə́ bɨ tsi a mbúm bo bɨ Kristo Yeso, nɨ ɨbɛn bɨtsum ba bɨ tsinɨ ɨdiʼ ɨtsum ba bɨ ghúʼsɨ́nə́ a Maʼmbyí Yeso Kristo ɨwɨgɨnə, wa a benɨ Maʼmbyí ɨwa nkɨ mbe ɨwɨgɨ lá.

³ A Ŋwi, zɨ wa a benɨ Ta ɨwɨgɨnə abɔʼnɨ Maʼmbyí Yeso Kristo gha abɔŋəntəm nɨ mbɔnɨ a mbó bɨŋ ə.

Ɨfɔgə wa o Tsínə́ nɨ wɛrə mbɨ́ʼ ngə́ o Nɨŋ Ntəm ɨgho a nye Kristo ghe

⁴ Ma ghǎ a mɨya a mbó Ŋwi nkfu tsum mbɨ́ʼ awən mbɨ́ʼ abɔŋəntəm azhi za a ghanɨ a mbó bən ntsa a ndzum Kristo Yeso ghe.

⁵ Mbɨ́ʼ ngə́ nɨ tsi a mbúm bɨŋ bɨ Kristo, nɨ tsi nɨ ɨdzúm ɨtsum a nɨ́lónɨ́ nkwiʼtɨ mbúŋ mɨgham mɨtsum a nchwítɨ́ nkən ɨyi abɔʼnɨ azhyɛ atsum a njí zɨə.

⁶ Nkən mbɨ́ʼ a Kristo ɨ kunkɨnə a mu ɨnye ɨtsən ntən

⁷ a nye ndóm wa ka nɨ mbóŋə́ awən azúm zə ghanɨ za Azhwi a Ŋwi a ghánə́ adzaŋ za nɨ tsenə ngə́ á bɨ ghɨ́ nkyɛʼ a Maʼmbyí Yeso Kristo ɨwɨgɨnə lá.

⁸ Ŋwi a mɨ kɨ ghɨ á nɨ tɛm ntɨŋə ɨ ghɛn kuʼ a ndwɨgɨnə, taŋ á nɨ ghɨ́ nkeʼ nɨ ɨfənu tse tsi a Njwi wa Maʼmbyí Yeso Kristo a lo bə yen lá.

⁹ Nɨ tsi nɨ nɨŋ mɨntəm ɨmən a nye Ŋwi, zɨ wa a tsɔʼnɨ awən ngə́ á nɨ ndzɨ́nə́ bɨŋ bɨ Mɔn ɨyi Yeso Kristo, Maʼmbyí ɨwɨgɨnə ghe.

Ɨyɛbtɨ a Mu Ndáŋwi ə

¹⁰ Ɨbɔmbɨma ɨban a ndzum Kristo, nɨ ɨkum Maʼmbyí Yeso Kristo ɨwɨgɨnə, ma bǔʼ mbó a mbó bən ngə́ á nɨ tsi ntsu mɔ́ʼɔ́ taŋ á ayɛbtɨ a keʼ a tɨtərɨ bən chyɛ. A nɨ lánɨ́ ntsi a mbúm, nɨ táʼ akwaʼtɨ abɔʼnɨ táʼ anu za nɨ lɔnɨ ngɨə ghe.

¹¹ Mbɨ́ʼ ngə́, ngaŋ ngwəgɨ Klo tsə tsɛrə soŋnə a mbó me tsɛʼ ɨ shiʼnɨ, nə ɨbɔmbɨma ɨban, ngə́ azɔŋ a tsi a tɨtərɨ bɨŋ ə.

¹² Anu za ma sóŋnə́ lá nɨ ngə́: ŋwɔn nɨ ŋwɔn a tɨtərɨ bən a soŋə azhi anu tsɛʼ atú zɨə. Wu tse a sóŋə́ ngə́, “Ma nɨ ŋwɔn Baolo ghe”; wu mɔʼɔ a soŋənə ngə́, “Ma nɨ ŋwɔn Abolo ghe”; wu mɔʼɔ a soŋənə ngə́, “Ma nɨ ŋwɔn Bita”; wu mɔʼɔ a soŋənə ngə́, “Ma nɨ ŋwɔn Kristo ghe”.

¹³ Lá be ngə́ bɨ yɛbtɨnə a Kristo le? Bɨ kwémtɨ́ lá a Baolo atɨ abaŋnɨ-baŋnɨ a nkfu bən le? Bɨ ghá nkyi a mbó bən lá ngə́ á nɨ tiʼ bɨyɛʼ bɨ Baolo le?

¹⁴ Ma gha a mɨya a mbó Ŋwi ngə́ ma sá gha nkyi a mbó ŋwɔn nɨ bən wu tse ntsatɨ a Kɨrɨbusɨ bo Gayosɨ ə.

¹⁵ Ma lan, ŋwɔn tse a chi keʼ soŋ ngə́ nɨ kwárɨ́ nkyi tso bɨyɛʼ ɨbə.

¹⁶ (E, ma kɨ́ ngá nkyi a mbó Stefanasɨ bo ngwəgɨ ɨzhi ɛ; lá ma chi kaʼ bə ngwaʼtɨ ngə́ ma ghá nkyi a mbó ŋwɔn daŋ ə.)

¹⁷ Kristo a sé tsagɨ aghan a ngá nkyi ɛ. Wɛrə a tságɨ́ aghan lá a sóŋ Nkən wu Shiʼnɨ, ɨ kɨ soŋ a wɛrə keʼ tsa be a ndzum nɨgham nɨ zóŋ ŋwɔn mɨsɔŋ a ntsu, taŋ ɨ lə̌tú ngə́ á bɨ keʼ lɔgɨ mɨtən mɨ nɨvwo nɨ Kristo atɨ abaŋnɨ-baŋnɨ ngɛn nɨ mɛrə ghe.

Kristo a nɨ Mɨtən mɨ Ŋwi abɔʼnɨ Zóŋ Ŋwi ə

¹⁸ Mbɨ́ʼ ngə́ nkən mbɨ́ʼ nɨvwo nɨ Yeso atɨ abaŋnɨ-baŋnɨ nɨ anu adaŋədaŋə a mbó ɨbɛn ba bɨ byékɨ́nə́; lá a mbó bɨgɨnə wa bɨ loŋnə awɨgɨnə, ɨ be lá mɨtən mɨ Ŋwi ə.

¹⁹ Aŋwaʼnɨ a Ŋwi a soŋ ngə́: “Ma mɨ tsənkɨ a zóŋ ɨbɛn ba bɨ tsinɨ nɨ zóŋ, ɨ kɨ nyɛʼ ayigɨnɨ a ɨbɛn ba bɨ yɛʼnɨ aŋwaʼnɨ tsɛʼ nkə.”

²⁰ Ma lan, ɨbɛn ba bɨ tsinɨ nɨ zóŋ, kə ba bɨ yɛʼnɨ aŋwaʼnɨ tsɛʼ nkan, kə ba bɨ chinɨ lɨʼkɨ ɨnu tsɛʼ ɨ shiʼnɨ, aza tiʼ mbe lá ake le? Ŋwi a diʼnə ngə́ zóŋ atuəshe wen a nɨ ɨnu dzɨŋtə!

²¹ Mbɨ́ʼ ngə́ Ŋwi a tsá a ndzum zóŋ ɨyi ngɨ ngə́ á tən be tɨ́sə́n a mbó ɨbɛn a nji zɨ ɨ tsa be a ndzum zóŋ ɨwa ghe. Ŋwi a báŋnɨ́ nɨ́ŋ a mu ntəm zɨ ngə́ zɨə mɨ loŋ ɨbɛn ba bɨ nɨŋnɨ mɨntəm ɨma a ɨnye zɨ ntsa be a ndzum nkən wen wa bɨgɨ sóŋnə́, wa bə tse sě nɨ anu zə tse a ntɔ́ŋə́ lá.

²² Mbɨ́ʼ ngə́ bə Yuda lǒ ndzě ɨnu tsɨ yerɨnɨ-yerɨnɨ; bə Grikɨ lǒnə a zóŋ ə.

²³ Azɨgɨ a nɨ ngə́ á bɨgɨ soŋ nkən mbɨ́ʼ a Kristo wa bɨ kwémtɨ́nɨ́ atɨ abaŋnɨ-baŋnɨ; nkən wa ɨ nyúʼsɨ́nɨ́ mɨlwi bə Yuda, nkeʼ anu zə tse kɨ mbe a mbó ba a se bə Yuda be,

²⁴ lá a mbó ba Ŋwi a tsɔʼnɨ awa, bə Yuda nkwiʼtɨ a ba a se bə Yuda be, nkən wiŋ tsi lá mbɨ́ʼ a Kristo, zɨ wa a benɨ mɨtən mɨ Ŋwi abɔʼnɨ zóŋ Ŋwi lá.

²⁵ Mbɨ́ʼ ngə́ ɨnu tsa tsɨ finɨ ɨnu lentɨ Ŋwi tsɨ tsi nɨ zóŋ ntsa a zóŋ ŋwɔn mɨsɔŋ a ntsu, ɨnu tsa tsɨ finɨ ɨnu tsɨ bɔrɨkɨnɨ tsɨ Ŋwi tsi nɨ adaʼ ntsa adaʼ a ŋwɔn mɨsɔŋ a ntsu ə.

²⁶ Nɨ waʼtɨ azúm za nɨ bénɨ́ zɛrə a nkfu za Ŋwi a tsɔ́ʼnɨ́ awɨŋ ə, a ɨbɔmbɨma ɨban. A nye akwaʼtɨ a ŋwɔn mɨsɔŋ a ntsu, bən a nɨ́sháŋnɨ́, nɨ tsí nɨ zóŋ kə nɨ adaʼ kə nkɨ mbe ɨbɛn bə wi ə.

²⁷ Lá nɨ azhinɨ, Ŋwi a tsɔ́ʼ ɨnu tsa atuəshe kwaʼtɨnɨ ngə́ tsɨ nɨ ɨnu ɨlentɨ taŋ ɨ nɨŋ adɨrətú a nye ba bɨ tsinɨ nɨ zóŋ ə. Wɛrə a kɨ́ ntsɔ́ʼ ɨnu tsa atuəshe kwaʼtɨnɨ ngə́ tsɨ nɨ ɨnu tsɨ bɔrɨkɨnɨ taŋ ɨ nɨŋ adɨrətú a nye ngaŋ adaʼ ə.

²⁸ Wɛrə a tsɔ́ʼ a za atuəshe a wágɨ́nɨ́nə́ nkə́ nyɛ́ʼnə́, ngwíʼtə́ ngə́ a nɨ zə adaŋədaŋə taŋ ɨ tsənkɨ a za atuəshe a wiʼtɨnɨ ngə́ a nɨ zə wi ə.

²⁹ A tiʼə ndiʼə ngə́ ka ŋwɔn tse a chi kfuntɨ ayi ndzɔʼ ɨzhi a ɨshi Ŋwi ə.

³⁰ Lá Ŋwi a chintɨ awən a mbúm bɨŋ bɨ Kristo Yeso, ntiʼ ngɨ a Yeso a nye zóŋ ɨwɨgɨnə ghe. Bɨgɨnə tiʼ nchinɨ ntsa a ndzum wɛrə; ntiʼ ɨbɛn bɨ Ŋwi bə fɛmnɨ ba mɨnkɨ mɨ abuʼ se awa bə nkorə.

³¹ Ma lan, ndzɔ̌ŋ adzaŋ za aŋwaʼnɨ a Ŋwi soŋnɨ ngə́, “Ŋwɔn tsum wa a lɔnɨ nkfuntɨ ndzɔʼ ɨzhi, á nkfúntə́ be mbɨ́ʼ anu za Maʼmbyí a ghɨnə.”