1 Bita 1 - Mɨkan wu Fi

¹ Aŋwaʼnɨ zen a lo a mbó me Bita, mbe ntom Yeso zɨ Yeso Kristo ghe. A ghěn a mbó ɨbɛn bɨ Ŋwi ba wɛrə a tsɔʼnɨ, ba bɨ tumnɨ nɨ fɨnyaʼ bo tiʼə nchyɛ̌ a mu mbuʼ Bontusɨ, Galesha, Kabadosha, Esha abɔʼnɨ Bitinia ghe.

² Bɨ tsɔ́ʼ awən ndzɔ̌ŋ adzaŋ za Ŋwi, zɨ wa nɨ Tarɨ, a kɨ́nə́ ndǒ, nkɨ ngɨ awən a nye ɨbɛn bə fɛmnɨ ntsa a ndzum Azhwi azhi, ngə́ á nɨ ndzúʼnə́ a Yeso Kristo, á alɛm azhi za bɨ chwírɨ́nɨ́ atɨ abaŋnɨ-baŋnɨ a tiʼ sugɨ awɨŋ ə. A abɔŋəntəm abɔʼnɨ mbɔnɨ tsi a mbó bən a nɨ́lónɨ́ ə.

Ntsiŋə nɨ Ntəm Tsum za ɨ Tsinɨ Ntɨŋ ə

³ A bɨgɨnə gha a mɨya a mbó Ŋwi, zɨ wa nɨ Ta bɨ Maʼmbyí ɨwɨgɨnə Yeso Kristo lá! Mbɨ́ʼ a mɨlɨŋnɨ ɨyi wu ngwi wɛrə a ghá ntsi ntən zɨ fi a mbó bɨgɨnə a ntsǎ a ndzum adzaŋ za wɛrə a zhwémnɨ́nɨ́ a Yeso Kristo a mbó nɨvwo lá. Məzen a lwɨgɨ awɨgɨnə nɨ ntsiŋə nɨ ntəm tsum za ɨ tsinɨ atú ntən,

⁴ ma lan, bɨgɨnə ghɨ tsí nɨ afuʼ zə wi za Ŋwi a lɛnə a mbó ɨbɛn ɨbyi lá. Wɛrə a len afuʼ zə wi məzen lá a mbó bən a fɔməbvurə, afuʼ za a chinɨ keʼ bye, kə á bɨ tsənkɨ a zɛrə, kə ɨ shwetɨ lá.

⁵ A tsi lá a mbó bən ba a ntsǎ a ndzum abeməntəm, mɨtən mɨ Ŋwi kɨnkə awən ɨ kɔʼ kuʼ njwi za nɨ ghɨnɨ tsi nɨ ɨloŋ, ɨloŋ wa ɨ tsenə ngə́ á bɨ ghɨ nkyɛʼ a nye ntsɨrɨndzum nkfu lá.

⁶ Tɨtsɔŋnɨ, nɨ baʼtɨ ntsi nɨ adzə́ŋnɨ ɨ tsinɨ a nye məkum a nkfu mbɨ́ʼ mbúŋ ɨzhwəŋtɨ ɨtsum tsa bɨ zhwə́ŋtɨ́nə́ awən nɨ tsɛrə lá, nɨ tsi nɨ ndorə mbɨ́ʼ a məziŋ ə.

⁷ Njwəŋtə məzen tsi lá a ndiʼə ngə́ abeməntəm azən a nɨ ngótɨ́ zɛrə ghe. Tsɛʼ ŋwaʼŋwaʼ mbáʼ a nɨ azúm za bɨ chinɨ tsənkɨ, bɨ zhwə́ŋtə́ a wɛrə nɨ ɨmugɨ; ma lan, abeməntəm azən mbáʼ a nɨ azúm za a bɔŋnɨ ntsa a ŋwaʼŋwaʼ, bɨ tsi nɨ ɨ kɨ zagɨ zhwəŋtɨ a zɛrə, taŋ á chi diʼ ngə́ a nɨ ngótɨ́ abeməntəm ə. Nɨ ghɨ tíʼ kwarɨ mbontə, nɨfáŋ abɔʼnɨ nkɔʼsə atɨ́ a Njwi wa bɨ ghɨnɨ kyɛʼ a Yeso Kristo ghe.

⁸ Nɨ kɔŋ ayi ɛ, lebuŋ nɨ bvurɨ tɨ zɛn ayi ɛ. Nɨ nɨŋ mɨntəm ɨmən wə ɨnye, lebuŋ nɨ se ayi tɨtsɔŋnɨ a ndzě ghe. Ma lan, á nɨ tsi nɨ nɨdorɨ nə wi nə nɨfáŋ na ntsu chinɨ keʼ soŋ,

⁹ mbɨ́ʼ ngə́ nɨ kwárə́ lá ɨloŋ bɨgharɨ ɨbən, mbáʼ lá anu za abeməntəm azən a nye wɛrə a lɔnə lá.

¹⁰ A bé lá mbɨ́ʼ ɨloŋ məwen mbáʼ ntóm Ŋwi kwábɨ́nɨ́ nkɨ ntsɔʼ aku a nɨyerɨ nɨyerɨ, ntiʼ nkɨ soŋ mɨnkən ma mɨ lónɨ́ a mbó Ŋwi mbɨ́ʼ azúm zə ghanɨ zen za Ŋwi a ghɨ gha a mbó bən lá.

¹¹ Bo zhwə́ŋtɨ́ a ntsɔʼ aku ɨ zhi nkfu za ɨ ghɨnɨ be zɛrə abɔʼnɨ adzaŋ za a ghɨnɨ fuə. Azhwi a Kristo za a tsínɨ́ a mu ɨnye ɨtsa a kə́ ndiʼə lá nkfu məzen, a fɨʼtə bɔŋ a ɨ ghɨ ndáʼ fu, ngɨ́ʼ za Kristo ghɨnɨ zɛ́n abɔʼnɨ nɨfáŋ na nɨ ghɨnɨ zɔŋə.

¹² Ŋwi a kyɛ́ʼ a mbó ntóm Ŋwi tsen ngə́ afaʼ aza a sé tsi ngə́ á bo sə́ŋə́ ɨwu, lá ngə́ nɨ ghɨ baŋnɨ sə́ŋ ɨwu, adzaŋ za bo ghámnɨ́ mbɨ́ʼ ɨnu tsa nɨ zuʼnə mbɨ́ʼ a tsɛrə a mbó ntóm tsa tsɨ chwítɨ́nɨ́ Nkən wu Shiʼnɨ wa lá. Bo chwítɨ́ a wɛrə ntsa lá a ndzum mɨtən mɨ Azhwi zə Fɛmnɨ ma mɨ lónɨ́ a fɔməbvurə ghe. Nə nɨ ɨnu tsa tsɛʼ bɨtsen bɨ ndá bɨ Ŋwi mɨ kɔŋ a ndzúʼə kɨ zhyɛ.

Bɨgɨnə Tsi nɨ ɨ Zagɨ Tsi nɨ Ntsi Mbyi zɨ Fɛmnɨ ə

¹³ Ma lan, á nɨ kyaŋtɨ ɨnye ɨtsən a ngɨ anu ə. A nɨ lə ɨtú ɨtsən, nkɨ nden ntsiŋə nɨ ntəm tsum ɨzən tsɛʼ a nye abɔŋəntəm za bɨ ghɨnɨ gha a mbó bən a nkfu za bɨ ghɨnɨ kyɛʼ a Yeso Kristo lá.

¹⁴ A nɨ ndzúʼnə́ a Ŋwi, nkeʼ kɨ nyɛʼtɨ á ɨnu tsa nɨ kɨ́nə́ ndǒ a nkfu za nɨ bvúrɨ́nɨ́ tɨ zhi anu zə tsɛrə á tsɨ ntsɨŋnɨ ntsi mbyi ɨtsɨŋ ə.

¹⁵ A nɨ baŋnɨ fɛm a nye ɨnu ɨtsum tsa nɨ ghɨnə, tsɛʼ adzaŋ za Ŋwi, zɨ wa a tsɔ́ʼnɨ́ awən a fɛmnɨ lá.

¹⁶ Aŋwaʼnɨ a Ŋwi a soŋ ngə́, “A nɨ fɛm tso mbáʼ ma kɨnɨ nkɨ fɛm lá.”

¹⁷ Nɨ tɔ́ŋə́ ayi ngə́ Tarɨ, a nkfu za nɨ tsaʼtɨnə a Ŋwi a mbó Ŋwi, zɨ wa a sáʼnə́ a ŋwɔn tsum nɨ ndəŋndəŋ ɨfɨʼ, ndzɔŋə anu za ŋwɔn tsum ɨ mɔ́ʼɔ́ mɔ́ʼɔ́ a ghɨnɨ; ma lan, á nɨ tiʼə nchyɛ̌ abvuʼ a ntsi mbyi azən atuəshe wen adiʼ wa nɨ tsinɨ ɨwu tso bɨngyen-yenɨ lá a mbɔ́gɨ́tɨ́ wɛrə ghe.

¹⁸ Mbɨ́ʼ ngə́ nɨ zhi azúm za bɨ tfúnɨ́ a nkyɛtɨ mɨnkɨ mɨ abuʼ a ɨnye bən, a nye ntsi mbyi adaŋədaŋə za bɨta ɨbən bə kɔ́ʼɔ́nguʼ nyɛ́ʼtɨ́nɨ́ a mbó bən lá. A sé bé lá azúm za be bɨ tsənkɨ, azúm tso tsə́ŋtsə́ŋ kə ŋwaʼŋwaʼ;

¹⁹ lá a bé lá alɛm a Kristo, azúm atɨŋndvuŋ, zɨ wa a bénɨ́ tso mɔn mbyindzɨ wa a sé nɨ akɔkɨ anu zə tsɛrə a ɨnye zɨ tsi lá.

²⁰ Bɨ tsɔ́ʼ a wɛrə bɔŋ á Ŋwi a kaʼ atuəshe, nkɨ nkyɛʼ ayi a nye njwi ntsɨrɨndzum tsen lá mbɨ́ʼ atú azɨŋ ə.

²¹ A ntsǎ a ndzum wɛrə, nɨ tsi nɨ abeməntəm a nye Ŋwi, zɨ wa a zhwémnɨ́nɨ́ a wɛrə a mbó nɨvwo nkɨ nga nɨfáŋ wəmbo; ma lan, abeməntəm azən abɔʼnɨ ntsiŋə nɨ ntəm tsum ɨzɨŋ tiʼ ntsi lá a nye Ŋwi ə.

²² Tɨtsɔŋnɨ wa a ntsǎ a ndzum ndzuʼnɨ nkənu za, nɨ sugɨnɨ ɨtumbəm ɨtsən ɨ fɛm, nkɨ ntsi nɨ ngótɨ́ akɔŋnɨ a nye ɨbɛn ba bɨŋ bo nɨŋnɨ mɨntəm ɨmɨŋ bo a nye Kristo lá, á nɨ tiʼ nkɔŋ a ŋwɔn nɨ ŋwɔn nɨ mɨntəm ɨmən mɨtsum ə.

²³ A nɨ kɔŋ a ŋwɔn nɨ ŋwɔn mbɨ́ʼ ngə́ a ntsǎ a ndzum nɨgham nɨ Ŋwi na nɨ ghánɨ́ ntsi ntən nkə́ nghɔ́ŋə́ nɨnkoŋ lá, bɨ bənə nkwiʼ njwi awən tso ɨbɔ bɨ tarɨ wa ka a nkfǒ ayi, nkeʼ ɨbɔ bɨ tarɨ wa a kfónə́ be.

²⁴ Tso mbáʼ aŋwaʼnɨ a Ŋwi a soŋnɨ ngə́: “Ŋwɔn mɨsɔŋ a ntsu tsum a tsi lá tso ngyɛn, nɨbɔŋ ɨna nɨtsum tsi lá tso baŋbaŋ wu ɨmu mɨbaʼ ə. Ngyɛn zómnkə́, bɨbaŋbaŋ ɨba vwokɨnə a tɨshe,

²⁵ lá nɨgham nɨ Maʼmbyí ghɔ́ŋə́ nɨnkoŋ ə.” Nɨgham məniŋ lá Nkən wu Shiʼnɨ wa bɨ chwítɨ́nɨ́ a mbó bən lá.