Zĩ́ĩ̀ 4 - Wè-dɔ-wè Dɛɛ

Kpóṹ là zèe zì ɓɛ́ɛ-là

¹ Mɛ́ è nu wéé dɔɔ̀ wà gèlè gɔ̃ɔ̀ nì lɛ́ o ka fĩ̀ã̀a ká tã́ã̀? Óò go ka nàà-ká-wɔ̃̀ doò do lɛ́ ò gèlè gɔ̃ ka gbĩ-kpàla yí teelea kɛ̀lɛ̀.

² Káà nàà pɔɔ̀ ká, kɛɛ kàá à sɔ̀lɔ̀ ɓo. À mɔ́ɔ̀ wɔ̃̀ mɔ̀ɔ, káà à mɔ́ɔ̀ mi zɛ ɓo. Pɛ séĩ́ lɔ̀ kpɔ́ɔ̀ lɛ ka mɔ̀ kɛɛ zi wá ɓe kɛ ká sɔ̀lɔ̀ ɓo. À mɔ́ɔ̀ wɔ̃̀ mɔ̀ɔ, káà mɔ́ɔ̀ wéé dɔ ɓo, tó káà gèlè gɔ̃̀. Pɛ lɛ́ kà nàà à káa, kàá à sɔ̀lɔ̀ ɓo, ɓii kàá à pɛ̃́ Wálà mɔ̀ɔ mɔ́ɔ̀ wɔ̃̀ mɔ̀.

³ Ɛ́ɛ̃́ yé kaà pɛ̃́ɛ, kàá à sɔ̀lɔ̀ ɓo, ɓii wɔ̃́ kà mɔ́ɔ̀ à pɛ̃́ ɓoa lɛ yɔɔ. Káà pɔɔ̀ lɛ́ kà lo ka dìè zì nàà-ká-wɔ̃̀ kɛɛ̀ à káa pɛ̃.

⁴ Míá kaà ka ko gbɛ̃̀ Wálà mɔ̀ e ké ɓɛ. Kàá à yí dɔ kélɛ̀ yé kaà kɛ kpóṹ là zèe ɓɛ́ɛ káa, kɛɛ ka Wálà dàa-gbe ká? Mi lɛ́ à nàà é ɓɛ́ɛ-là kṹ kpóṹ là mɔ̀ɔ, á kɛ̀á kília, kɛɛ aà e dìè kɛ Wálà dàa-gbe ká.

⁵ Yékɛ̀ ká gɛ̃̀ ɓɔ̀ɔ kélɛ̀ wɔ̃́ lɛ́ à bɛ̃̀ɛ̃ɛ̃̀ lɛ Wálà là kíía yía, lɛ wɔ̃́ dà tã́ã̀ zɛ̀ ká. Wɔ̃́ e kília lɛ́ e kélɛ̀, “Wɔ̃́ kɛ-lɔ̀ lɛ́ɛ̀ gɛ̀ɛ̀ lɛ́ Wálà a yàlà bɛ̀i ko yía kɛ̀ nyɔ́ɔ̀ɔ.”

⁶ Kɛɛ zò-kɛ̀-sɛ̀ lɛ́ e Wálà kɛ̀lɛ̀ ko wɛ̃́ĩ̀a, lɛ dóo gágà é diá à là. À mɔ́ɔ̀ wɔ̃̀ mɔ̀ɔ, Wálà là kíía láà gèe kélɛ̀, “Wálà lɛ́ɛ̀ gèlè gɔ̃ mia lɛ́ ò o dìè si gbùòa ká. Kɛɛ zò-kɛ̀-sɛ̀ lɛ ɓe à kɛ̀lɛ̀ mia lɛ́ ò o dìè si péĩ́a wɛ̃́ĩ̀.”

⁷ À mɔ́ɔ̀ wɔ̃̀ mɔ̀ɔ, kà ka dìè kɛ Wálà wì. Kà gèlè gɔ̃ Dɛ́ɓò ká. Ká kɛ̀á kília, lɛ́ɛ̀ lo e ko-là kpɔ́ɔ̀ bàlà ká ka lɛ̀ɛ.

⁸ Kà nu Wálà ká kɔ̀ɛ́. Ká kɛ̀á kília, lɛ́ɛ̀ lo nuù ka bɛ̃̀ɛ̃ ka ká kɔ̀ɛ́. Kɛ-wɔ̃̀ yɔɔ kɛ-mìà ka ké ɓɛ, kà ka kɔ̀ pɛ́lɛ́. Mia lɛ́ ka yɛ́lɛ́-táá kpolà lɛ pèèlɛ ɓɛ, kà ka zò píé kɛ é kɛ púlú.

⁹ Kà kɛ yéĩ̀zɛ̀. Kà gbóó ɓo, káà dà yéĩ̀ yí. Kà yéí è nìɛ̀ gbóó yí. Kà géli è nìɛ̀ lè-dũ yí.

¹⁰ Kà ka dìè kɛ péĩ́ ko Dàa-mì wɛlɛ mɔ̀, ɛ̃́ɛ̃́ lɛ́ɛ̀ lo ka síì lɛ̀í yé kaà kɛ kília ká.

Lìè-wè lɛ́ à gbɛ̃̀ɛ̃̀ lɛ mɛ̀ĩ́-sà dɔ̀-mi-mɔ̀ wɔ̃̀ mɔ̀ɔ

¹¹ M lèe-gé vɔ̀, yékɛ̀ ká wɔ̃́ yɔɔ gèe ka kíe nì gbĩ mɔ̀. Mí è lo wɔ̃́ yɔɔ gèeè, ɛ̃́ɛ̃́ lɛ́ è lo mɛ̀ĩ́-sà dɔɔ̀ e ɓɛ́ɛ ye-mì mɔ̀ɔ, kɛɛ aà wɔ̃́ yɔɔ gèe ɛ̃́ɛ̃́ kɛ aà mɛ̀ĩ́-sà dɔ Lɔ́ɔ̀ɔ mɔ̀. Í mɛ̀ĩ́-sà dɔ̀á Lɔ́ɔ̀ɔ mɔ̀ɔ, kɛɛ ɓi wá gbaa Lɔ́ɔ̀ɔ kɛ-mì ká. Kɛɛ ɓaà kɛ gbaa mɛ̀ĩ́-sà dɔ̀ Lɔ́ɔ̀ɔ mɔ̀ mì ká.

¹² Wálà lɛ́ nɔ́ e Lɔ́ɔ̀ɔ nɔ-mì ɛ̃́ɛ̃́ mɛ̀ĩ́-sà ɓo-mì káa. À doó lɛ́ɛ̀ bɛ̀i à mɔ̀ é pɛ la, ɛ̃́ɛ̃́ é pɛ yí sìè. Íì i dìè gɛ̃̀ deĩ̀ ká, lɛ́ ì mɛ̀ĩ́-sà dɔ i ɓɛ́ɛ mɔ̀ ɓɛ?

Lìè-wè lɛ́ à gbɛ̃̀ɛ̃̀ lɛ lé-gbùò-là kɛ wɔ̃̀ mɔ̀ɔ

¹³ Ka dò káà gèe kélɛ̀, “Kóò lo lóò sɛ́lɛ́ dò yí pɛ́nɛɛ, ɛ̃́ɛ̃́ tòò. Kóò lo kɛ̀ɛ̀ doó ɓoò yi. Kóò lo kɛɛ̀ pɔɔ̀ lɔ̀ɔ̀ dɔpìà, tó kɔ́áà pɛlèe kɛ̀ gbùò.” Míá kà wɔ̃́ nì e kéa gèea, kà ka tóó dɔ m mɔ̀.

¹⁴ Kàá zi lɛ́ ka zì kɛ̀ɓe è lo kɛɛ̀á tòòa dɔ bɛ̃̀ɛ̃. Ka kélɛ̀ lúé-lúé lɛ́ è yà lúó kpuú píé, tó waà o nyìɛ mɛ̀ nɔ́ɔ, kɛ waà kɔ̃́ à káa lɛ́ ɓe.

¹⁵ Wɔ̃́ lɛ́ káá gèeèa, gɛ̃̀ e ké. “Ko Dàa-mì é wèèá mɔ̀ɔ, kóò lo kɛɛ̀ ɓe, tó kɔ́áà wɔ̃́ tɔ́ zɛ̀ kɛ̀.”

¹⁶ Kɛɛ dɛɛ káa, dìè-sì-gbùò lɛ ka là, tó káà lé-gbùò-là kɛ̀. Lé-gbùò-là sùu e kília séĩ́ lɛ wɔ̃́ yɔɔ ká.

¹⁷ À mɔ́ɔ̀ wɔ̃̀ mɔ̀ɔ, mi lɛ́ lɛ̀ɛ́ wɔ̃́ yiè lɛ́ à yí dɔ lɛ à mɔ̀ á kɛɛ kɛɛ, kɛ-wɔ̃̀ yɔɔ kɛ-wɔ̃̀ káà lɛ à wĩĩ́.