Wólómà 9 - Wè-dɔ-wè Dɛɛ

Wálà e Éézɛ̀lɛ̀-mìà sí

¹ Wánà-wɔ̃̀ lɛ́ m̀ gèe ɓɛ. M Kɛ́lɛ̀ì là mi ká. M̀ḿ nɛ̀ kɛ. Gíkã́ lɛ́ Wálà zì Gɛ̀ɛ̀ Púlú à dà m zò píéa, lɛ́ɛ̀ m̀ kélá-wè ɓo áà zɔ̃̀ɔ̃̀ m lɛ̀ɛ kélɛ̀ wánà-wɔ̃̀ lɛ́ m̀ gèea.

² Zi sùu kpɛɛ̀ zɛ̀ lɛ́ m zì yà-yéĩ̀zɛ̀ kɔ̀ɔ lɛ à ká ké. Ɛ́ɛ̃́ zò-wàà-gé sùu lɛ́ lɛ m mɔ̀ɔ, lɛ̀ɛ́ tèá do.

³ Áá kɛɛ̀ vɔ̀ m lɛ̀ɛ sɛ̀ yé Wálà là náá aà m kṹ, tó áà kò Kɛ́lɛ̀ì ko fĩ̀ã̀ ɓò mia lɛ́ kò ye nì kò go sɛ́lɛ́ doó yí, lɛ́ kò ye nì ko kpóló lɛ doóa mɔ́ɔ̀ wɔ̃̀ mɔ̀ɔ ká.

⁴ O Éézɛ̀lɛ̀-mìà ká. Wálà e o kɛ e gbe nì ká. À zì lɛ̀-fɔ̀nɔ-kɔ̀ e kɛ o píé. Wà Wálà nì o o wè dɔ, áà là Lɔ́ɔ̀ɔ nɔ̀ o lɛ̀ɛ. Óò gbìnì Wálà lɛ̀ɛ Wálà-kà wì. Waà Wálà wè-dɔ-wèa sɔ̀lɔ̀ ɓo.

⁵ O dò o kɛ ko dàa ye dàà nì ká. Kɛ́lɛ̀ì kɛ̀ mi gbunu káa, wà ye nì o kɛ sɛ́lɛ́ doó yí-mìà ká. Wálà lɛ́ e pɛ séĩ́ wũ làa, lɛ à mɔ̀ ó à tɔ́ ɓɔ tòá kíli ká. É kɛ kíli.

⁶ Ma wáá gèepìà kélɛ̀ Wálà lé-wè aà kɔ̃́ à mɔ̀. Ƃii mia lɛ́ o Éézɛ̀lɛ̀-mìà káa, o séĩ́ wá Éézɛ̀lɛ̀-mìà kpó-kpó ká.

⁷ Ɛ́ɛ̃́ mia séĩ́ lɛ́ ò go Éɓɔ́lɔ́hã́ã̀ sùu làa, é kɛ bɛ̃̀ɛ̃ o káa, o séĩ́ wá Éɓɔ́lɔ́hã́ã̀ là nɔ́ɔ̀ ká. Wálà a gèe Éɓɔ́lɔ́hã́ã̀ lɛ̀ɛ, “Mia lɛ́ ò lo kɛɛ̀ Áázè sùu làa, óò lo o síì ɓà mia nì.”

⁸ Wɔ̃́ e kília yí lɛ́ e kélɛ̀ nɔ́ɔ̀ɓé lɛ́ ò go o lèe wà o dàa géa, o wá Wálà là nɔ́ɔ̀ ká. Kɛɛ mia lɛ́ Wálà zì wè-dɔ-wèa a kɛ o o yea, lɛ́ ò o si Éɓɔ́lɔ́hã́ã̀ sùu là mìà wánà zɛ̀ɛ.

⁹ Ƃii Wálà e e wè dɔ weeá kélɛ̀, “À lúó é ɓɔ̀á mɔ̀ɔ, ḿm̀ lo nuù m mɛ̀ĩ́, ɛ̃́ɛ̃́ Sɛ́wàlà lɛ́ɛ̀ lo gɔ̃-nɛ̀ doó yeè.”

¹⁰ Kɛɛ à séĩ́ wáá ká. Wìlìbɛ́kà là gɔ̃ã̀-nɛ̃̀ĩ́ pèèlɛɛ o dàa lɛ nɔ́ doó. Ye lɛ́ nɔ́ e ko dàa ye dàà nɔ́ e Áázè káa káa.

^11-12 Kɛ ó tĩã́ nɔ́ɔ̀ɓé o kília o yeè, ɛ̃́ɛ̃́ kɛ ó tĩã́ wɔ̃́ yɔɔ ɛ̃́ɛ̃́ à yiè kɛɛ̀ɛ, Wálà a gèe Wìlìbɛ́kà lɛ̀ɛ weeá kélɛ̀, “Ƃà nɛ́ líéa lɛ́ɛ̀ lo kɛɛ̀ nɛ́ zízàá là yɛɓo-kɛ-mì ká.” Wálà e à gèe kíli kɛɛ mi sí à ɓoa, é kɛ wɔ̃́ lɛ́ a yà e gé á kɛɛ à yí ká. Sí ɓo lɛ́ à kɛ̀ɛ, ye wá wɔ̃́ nɔ́ɔ fé lɛ́ mi ɓà kɛ̀ɛ mɔ́ɔ̀ wɔ̃̀ wɛ̃́ĩ̀. Mí Wálà à súo kɛ̀ɛ, ye lɛ́ à sia.

¹³ Zi lɛ́ à bɛ̃̀ɛ̃ɛ̃̀ lɛ à ká Wálà là kíía yía, gɛ̃̀ e ké. “Ma lɔ̀ kɛ Zékɔ̀ ká. Kɛɛ Íísɔ̀ lɔ̀ e nyɛ m mɔ̀.”

¹⁴ Kóò bɛ̀i à mɔ̀ kó gèe mɔṹ kpɛ? Lɛ ko mɔ̀ kó gèe Wálà wá kpeĩ? Gbàaò, kòó bɛ̀i à mɔ̀ kó gèe gbɛɛ ɓo kíli.

¹⁵ Ƃii a gèe Móózè lɛ̀ɛ kélɛ̀, “Mí m̀ nàà ḿ yéĩ̀ kṹa, ḿm̀ lo à yéĩ̀ kṹũ̀. Mí m̀ nàà à yéĩ́ é kɛ m mɔ̀ɔ, lɛ́ɛ̀ lo kɛɛ̀ m mɔ̀.”

¹⁶ À mɔ́ɔ̀ wɔ̃̀ mɔ̀ɔ, ye wá wɔ̃́ mi ɓà nàà ká, ɛ̃́ɛ̃́ mi zì fã̀ã́-wàà kɛɛ̀ mɔ̀. Kɛɛ Wálà zì mia yéĩ̀ kṹũ̀ doó lɛ́ nɔ́ lɛ à mɔ̀ɔ.

¹⁷ Ƃii Wálà kiia a gèe Fɛ́ɛ́lò lɛ̀ɛ weeá kélɛ̀, “Maà i kɛ mia-là-mì ká wɔ̃́ nɔ́ e kéa wɛ̃́ĩ̀. Ye lɛ́ e kélɛ̀ kɛ ḿ i kɛ í m̀ yíkɛ̀ gáàa zɔ̃̀ɔ̃̀, ɛ̃́ɛ̃́ kɛɛ ḿ à kɛ m tɔ́ é ɓɔ sɛ́lɛ́ gé lɛ̀ɛ tɛ̃̀ɛ̃́ɛ mɔ̀.”

¹⁸ À mɔ́ɔ̀ wɔ̃̀ mɔ̀ɔ, mí nɔ́ Wálà à nàà á yéĩ̀ kṹa, lɛ́ nɔ́ à yéĩ̀ kũa. Ɛ́ɛ̃́ mí nɔ́ à nàà á wũ-kèlè yí kɛ gágàa, lɛ́ nɔ́ à kɛ̀ gágàa.

Wálà zì wɔ̃́à-wàa-kɔ̀ ɛ̃́ɛ̃́ à zì mia yéĩ̀-kṹ-kɔ̀

¹⁹ Íì lo à gèeè m lɛ̀ɛ, “Yé lɛ kília, lɛ́ɛ̀ dɔ mɔṹ kpɛ lɛ́ Wálà è mia gã̀ nàà kɛ-wɔ̃̀ yɔɔ kɛɛ̀ wɛ̃́ĩ̀? Deĩ̀ lɛ́ è bɛ̀i à mɔ̀ é gèlè gɔ̃ pɛ́ Wálà à nàà káa ká?”

²⁰ M ɓɛ́ɛ, kɛɛ dé i ká lɛ́ ì Wálà wéè dàà mɔ̀ ɓe? À gɛ̃̀ ɓà ɓo ɓaa, sɛ́lɛ́ gbɔɔ lɛ́ ò dɔɔ, aà gèe do e dɔ-mì lɛ̀ɛ, “Mɛ́ e kɛ lɛ́ i m kɛ ké?”

²¹ Ḿ gɔ̃̀, mi lɛ́ è gbɔ́ɔ́ɔ dɔɔ, lɛ́ɛ̀ beìa kɛ̀ lɛ̀ zí à nàà á kɛáa lɛ́ ɓe? Káà yí dɔ lɛ̀ɛ́ bɛ̀i à mɔ̀ kɛɛ é gbɔɔ pèèlɛ kɛ beì-kpo doó ká, gbɔ́ɔ́ e kília à doó-mì é kɛ wɔ̃́ kpànazɛ̀ kɛ̀à yí wɛ̃́ĩ̀, ɛ̃́ɛ̃́ à doó-mì bɛ̃̀ɛ̃ é kɛ nɔ́ ɓɔ̀ɔ teele à kɔ̀-lé ká yé à nàà à káa ká?

²² Yé Wálà aà wɔ̃́ sùu e kília dò kɛɛ, lɛ wɔ̃́ ká? Wálà a naa é là wɔ̃́à-wàa-kɔ̀ zɔ̃̀ɔ̃̀ mia lɛ̀ɛ, ɛ̃́ɛ̃́ é e zì yíkɛ̀ gáàa kɔ̀ kɛ mia ó dɔ. À mɔ́ɔ̀ wɔ̃̀ mɔ̀ɔ, zò-kũ̀-tã́ã̀ e kɛ à mɔ̀ nyɔ́ɔ̀ɔ, áà mia lɛ́ à zì wɔ̃́à-wàa-kɔ̀ e kɛ nupìà o mɔ̀, lɛ́ o pɛ̀ kɛɛ̀ e kɛá kɛ o yí é sìèa, áà o kɛ-wɔ̃̀ kàà e píé.

²³ A naa zeĩ́ é e zì lɛ̀-fɔ̀nɔ-kɔ̀ kpàna-kpànazɛ̀ɛ kɛ kɛɛ mia ó dɔ. Lɛ̀-fɔ̀nɔ-kɔ̀ e kília, à ɓɔɔ̀ lɛ mia lɛ́ là mia yéĩ̀ kṹũ̀ ɓɔɔ̀ lɛ ko mɔ̀ɔ mɔ̀. Míá ko kília, ko lɛ́ aà ko pɛ̀ kɛ, kɛ kó là lɛ̀-fɔ̀nɔ-kɔ̀ɔ sɔ̀lɔ̀ ɓoa.

²⁴ Ƃii ko lɛ́ ko mia lɛ́ e o súo kɛɛ káa. Lɛ̀ɛ́ gbaa ko súo kɛ nɔ́ Zúù-mìà doó bà, kɛɛ e ko súo kɛ sɛ́lɛ́ gbɛɛ yí-mìà bà nɔ́ kíli.

²⁵ Wɔ̃́ lɛ́ a gèe kii lɛ́ ò si Hòzíàa yía, gɛ̃̀ e ké. “Mia lɛ́ òó gbaa kɛ m̀ mia káa, ḿm̀ lo o síì ‘m mìà nì.’ Ɛ́ɛ̃́ mi lɛ́ à lɔ̀ lɛ̀ɛ́ gbaa kɛ m mɔ̀ɔ, ḿm̀ lo à síì ‘m̀ lɔ̀-kɛ̀á-mì.’

²⁶ Ɛ́ɛ̃́ lɛ̀ kpó-kpó nɔ́ lɛ́ wa gèe o lɛ̀ɛ yí kélɛ̀, ‘Ka wá m̀ mia nì káa,’ à lɛ̀ mɔ̀ lɛ́ nɔ́ ò lo o síì yi ‘Wálà lɛ́ lɛ ɓéèea là nɔ́ɔ̀ɔ.’ ”

²⁷ E bɛ̀i, Ààzáyà e wɔ̃́ gèe dóo gágà é gbɛ̃̀á Éézɛ̀lɛ̀ mɔ̀, áà gèè kélɛ̀, “É kɛ bɛ̃̀ɛ̃ zi lɛ́ mia lɛ́ o Éézɛ̀lɛ̀-mìà káa, waa ká gbùò lɛ̀ zí nyìɛ́-sɛ́lɛ́ laa ká mɛ̀ĩ́ kpóṹ làa lɛ́ ɓea, o wɛ́lɛ́ ɓéĩ́ lɛ́ nɔ́ o laà è lo kɛɛ̀ à káa.

²⁸ Ƃii ko Dàa-mì lɛ́ɛ̀ lo wɔ̃́ lɛ́ a gèe lɛ́ɛ̀ lo à kɛɛ̀ kpóṹ là zèe mìà káa, kɛɛ̀ à lé e kpɔ́, ɛ̃́ɛ̃́ lɛ̀ɛ́ ló túò à kɛpìà bɛ̃̀ɛ̃.”

²⁹ Ààzáyà aà gèe mɔ́ do kíli. A gèe weeá kélɛ̀, “Yé ko Dàa-mì lɛ́ là yíkɛ̀ gáàa lɛ pɛ séĩ́ làa, è kɛ̀á lɛ̀ɛ́ gbaa ko sùu dò tóa, kɔ́áá kɛɛ̀ nɔ́ lɛ̀ pɛ́lɛ lɛ́ ò si Sɔ́dɔ̃̀ɔ yí-mìà lɛ́ ɓe. Ɛ́ɛ̃́ kɔ́áá kɛɛ̀ nɔ́ zeĩ́ lɛ̀ pɛ́lɛ ò si Gòmálàa yí-mìà lɛ́ ɓe.”

Wɔ̃́ làṹ yièa wà Éézɛ̀lɛ̀-mìà

³⁰ Kóò bɛ̀i à mɔ̀ kó gèe mɔṹ kpɛ? Kóò lo à gèeè kélɛ̀, sɛ́lɛ́ gbɛɛ yí-mìà lɛ́ òó gbaa kɛ à kɛ-zì gbɛɛ naapìà kɛ ó kɛ kpeĩ Wálà lɛ̀ɛ, waà kɛ kpeĩ Wálà lɛ̀ɛ o zì zò-dɔ̀à-mɔ̀ kolo là zàá gbaa.

³¹ Ɛ́ɛ̃́ Éézɛ̀lɛ̀-mìà lɛ́ o kɛ lɔ́ɔ̀ lɛ́ è lo o kɛɛ̀ kpeĩ Wálà lɛ̀ɛ naapìàa, òó gbaa lɔ́ɔ̀ e kília gɛ̃̀.

³² Mɛ́ e kɛ lɛ́ e kɛ kíli? Pɛ́ a kɛ lɛ́ e kɛ kília, lɛ́ e kélɛ̀ pɛ́ o kɛ à kɛpìàa, gã̀ gbɛ̃̀ɛ̃̀ lɛ̀ɛ́ gbaa kɛá zò-dɔ̀à-mɔ̀ là. Kɛɛ à gã̀ gbɛ̃̀ɛ̃̀ e kɛá o zì kɛ-wɔ̃̀ o kɛ à kɛpìàa là. Waà sã́ gbaa sã́-gɛ̀lɛ̀ ká.

³³ Zí Wálà kii e wɔ̃́ gèe à ká, áà gbɛ̃̀ à mɔ̀ɔ, gɛ̃̀ e ké. “Lɛ̀ gɛ̃̀, ḿm̀ gɛ̀lɛ̀ kpɔ Záyɔ̃̀-pɛlɛí, ɛ̃́ɛ̃́ lɛ́ɛ̀ lo à kɛɛ̀ mia wáà sã̀ à ká. Lɛ gɛ̀lɛ̀-kpùlù lɛ́ è lo à kɛɛ̀ ó pèlèa ká. Kɛɛ mi lɛ́ è lo e zò dɔɔ̀ à mɔ̀ɔ, à zò lɛ̀ɛ́ ló tóò lɛ̀í.”