Wólómà 4 - Wè-dɔ-wè Dɛɛ

Éɓɔ́lɔ́hã́ã̀ lɛ wɔ̃́ gɔ̃̀á ká

¹ Wɔ̃́ kpɛɛ̀ lɛ́ kɔ̀à bɛ̀i à mɔ̀ kɔ́á gèe é gbɛ̃̀á Zúù-mìà kɔa dàa Éɓɔ́lɔ́hã́ã̀ mɔ́ɔ̀ wɔ̃̀ mɔ̀ gbaa?

² É kɛ̀á wɔ̃́ lɛ́ e à kɛɛ a kɛ e kɛ Wálà lɛ̀ɛ kpeĩa, wɔ̃́ áá kɛɛ̀ à kɛ̀lɛ̀ áà lé gbùò kɛ̀ à là. Kɛɛ lɛ̀ɛ́ bɛ̀i lé-gbùò-là kɛɛ̀ Wálà wɛlɛ mɔ̀.

³ Wálà kiia láà gèe kpɛ? Láà gèe, “Éɓɔ́lɔ́hã́ã̀ e e zò dɔ Wálà mɔ̀. À zì zò-dɔ̀à-mɔ̀ e kília kolo là zàáa, Wálà a sí gbaa é kɛ mi kpeĩ ká.”

⁴ Mí è yɛɓo kɛ̀ɛ, lɛ́ɛ̀ e fɔ́nɔ́ si. À fɔ́nɔ́ e kília, òó bɛ̀i à mɔ̀ ó gèe wa nɔ à lɛ̀ɛ ɓɔ̀ɔ, ɓii pɛ́ áá sɔ̀lɔ̀ ɓoòa lɛ.

⁵ Kɛɛ mi lɛ́ lɛ̀ɛ́ yɛɓo kɛ, lɛ́ è e zò dɔ Wálà lɛ́ è mi lɛ́ è wɔ̃́ yɔɔ kɛ̀ à gbĩ mɔ̀ɔ kɛ̀ kpeĩ e lɛ̀ɛ mɔ̀ɔ, Wálà lɛ́ɛ̀ à zì zò-dɔ̀à-mɔ̀ɔ si é kɛ kɛ̀-kpeĩ-kɔ̀ ká.

⁶ Zí nɔ́ doóa káa, Dèɓé e wɔ̃́ gèe e gbɛ̃̀ à ká gɔ̃ lɛ́ Wálà a sí é kɛ mi kpeĩ ká, ɛ̃́ɛ̃́ à sí a ɓoa lɛ̀ɛ́ gbaa wɔ̃́ nɔ́ɔ fé dò kɛ à wɛ̃́ĩ̀a, à zì géli wɔ̃̀ mɔ̀. Dèɓé a gèe weeá kélɛ̀,

⁷ “Mia lɛ́ o zì wɔ̃́ niàa wa kɛɛ wɔ̃̀ aà ɓo o wũ mɔ̀, lɛ́ Wálà aà pɛ kpaa o zì kɛ-wɔ̃̀ yɔɔ làa, o gé liì lɛ.

⁸ Mi lɛ́ ko Dàa-mì lɛ̀ɛ́ ló à zì kɛ-wɔ̃̀ yɔɔ kpɔ́ɔ̀ e géa, à gé liì lɛ.”

⁹ Géli wɔ̃̀ e kília, lɛ mia lɛ́ o bɔ̃́ɔ̃́ síì lɛɛ o doó o wɛ̃́ĩ̀? Ɛ́ɛ̃́ lɛ zeĩ́ mia lɛ́ o bɔ̃́ɔ̃́ síì wáa wɛ̃́ĩ̀ kíli? Ƃii kóò à gèe, Wálà e Éɓɔ́lɔ́hã́ã̀ zì zò-dɔ̀à-mɔ̀ sí é kɛ kɛ̀-kpeĩ-kɔ̀ ká.

¹⁰ Wálà a sí kɔ̀ɔ kɛ̀ kpɛ? A sí kɛɛ Éɓɔ́lɔ́hã́ã̀ aà bɔ̃́ɔ̃́ sí, ɛ̃́ɛ̃́ kɛɛ làá sí nɛ́? Kɛɛ làá sí nɛ́. Wɔ̃́ɔ e kɛ kíli kɛ é tĩã́ bɔ̃́ɔ̃́ síì.

¹¹ Bɔ̃́ɔ̃́ lɛ́ a sía, e kɛ wɔ̃́ dɔ̀á ká. A zɔ̃̀ɔ̃̀ kélɛ̀ kɛ bɛ̃̀ɛ̃ é tĩã́ bɔ̃́ɔ̃́ síìa, Wálà aà sí é kɛ mi kpeĩ ká à lɛ̀ɛ à zì zò-dɔ̀à-mɔ̀ kolo là zàá. E kɛ kíli, kɛɛ é kɛ mia séĩ́-séĩ́ lɛ́ zò-dɔ̀à-mɔ̀ lɛ o yí, ɛ̃́ɛ̃́ lɛ́ Wálà aà o sí ó kɛ mia kpeĩ ká e lɛ̀ɛ dàa ká, yé bɛ̃̀ɛ̃ o bɔ̃́ɔ̃́ síì wáa ká.

¹² Ɛ́ɛ̃́ zeĩ́a, lɛ nɔ́ zeĩ́ mia lɛ́ o bɔ̃́ɔ̃́ síì lɛɛ, o dàa ká kíli. Ye wá bɔ̃́ɔ̃́ wa sía mɔ́ɔ̀ wɔ̃̀ dòló ká. Kɛɛ lɛ kíli, ɓii o tó zi lɛ́ ko dàa Éɓɔ́lɔ́hã́ã̀ e tó à píéa píé. Zí e kília, zò-dɔ̀-Wálà-mɔ̀ zì lɛ. Éɓɔ́lɔ́hã́ã̀ e tó à píé kɛɛ é tĩã́ bɔ̃́ɔ̃́ síì.

Mia óò Wálà là wè-dɔ-wèa sɔ̀lɔ̀ ɓo o zì zò-dɔ̀à-mɔ̀ kolo là

¹³ Wálà e e wè dɔ Éɓɔ́lɔ́hã́ã̀ wà e sùu-là-mìà o lɛ̀ɛ weeá kélɛ̀ kpóṹ là zèe séĩ́ lɛ́ɛ̀ lo tóò wà pɛ ká. Lɔ́ɔ̀ɔ ye wáá ká kɛ á kɛ Wálà é e wè dɔ Éɓɔ́lɔ́hã́ã̀ lɛ̀ɛ. Wálà a kɛ kíli ɓii aà Éɓɔ́lɔ́hã́ã̀ sí mi kpeĩ ká Éɓɔ́lɔ́hã́ã̀ dìè zì zò-dɔ̀à-mɔ̀ kolo là.

¹⁴ È kɛ̀á mia lɛ́ pɛ è lo tóò o kɛ̀lɛ̀ɛ o lɛ́ ò Lɔ́ɔ̀ɔ kũ tã́ã̀a, è kɛ̀á kília, mi zì zò-dɔ̀à-mɔ̀ áá kɛɛ̀ wɔ̃́ ɓɔ̀ɔ ɓɔ̀ɔ ká, ɛ̃́ɛ̃́ Wálà zì wè-dɔ-wèa à yí lɛ̀ɛ́ gɔ̃̀ kɛɛ̀ à mɔ̀.

¹⁵ Lɔ́ɔ̀ɔ lɛ́ɛ̀ nu Wálà zì wɔ̃́à-wàa-kɔ̀ ká. Kɛɛ lɛ̀ lɛ́ lɔ́ɔ̀ wá yia, mi gbɛɛ lɛ̀ɛ́ lɔ́ɔ̀ sìè yi.

¹⁶ Wálà wè a dɔɔ, a dɔ zò-dɔ̀à-mɔ̀ là, kɛɛ à zì zò-kɛ̀-sɛ̀ɛ á kɛ à zì wè-dɔ-wèa é kɛ wánà ká Éɓɔ́lɔ́hã́ã̀ sùu-là-mìà séĩ́ lɛ̀ɛ. Míá o kília, o wá nɔ́ ɓɔ̀ɔ míá ò Lɔ́ɔ̀ɔ kũ tã́ã̀a ká. Kɛɛ o mia lɛ́ zò-dɔ̀à-mɔ̀ doó lɛ́ e kɛ Éɓɔ́lɔ́hã́ã̀ yía, lɛ o yía ká. Ƃii Éɓɔ́lɔ́hã́ã̀ lɛ́ e kɔa séĩ́ kɔa dàa káa.

¹⁷ À bɛ̃̀ɛ̃ɛ̃̀ lɛ Wálà kiia yí weeá kélɛ̀, “Maà i kɛ sɛ́lɛ́ búnù-búnùzɛ̀ dàa ká.” À mɔ́ɔ̀ wɔ̃̀ mɔ̀ɔ, wè-dɔ-wèa lɛ gágà Wálà lɛ́ Éɓɔ́lɔ́hã́ã̀ zò dɔɔ̀ e kɛá à mɔ̀ɔ nyìɛ là. Wálà e kília, lɛ́ɛ̀ mia lɛ́ waà gaa wɛ̀lɛ̀ ga kɛ̀lɛ̀, ɛ̃́ɛ̃́ pɛ lɛ́ à kɛɛ̀ lɛ̀ɛ́ gbaa kɛ à káa, Wálà zì mɛ́ĩ́-ɓo-kɔ̀ɔ láà kɛ̀, tó wáà kɛ̀ ɓe.

¹⁸ Éɓɔ́lɔ́hã́ã̀ zò dɔɔ̀ e kɛ à ká Wálà mɔ̀, ɛ̃́ɛ̃́ à zò e kɛ pɛ mɔ, yé bɛ̃̀ɛ̃ zò-kɛ̀à-mɔ̀-pɛ̀ lɛ̀ɛ́ gbaa kɛ ɓea ká. À mɔ́ɔ̀ wɔ̃̀ mɔ̀ɔ, e kɛ gbaa sɛ́lɛ́ búnù-búnùzɛ̀ dàa ká, lɛ̀ zí lɛ́ Wálà e à gèe à ká à lɛ̀ɛ lɛ́ ɓe. A gèe kélɛ̀, “Zi lɛ́ i sùu-là-mìà ò lo kɛɛ̀ à káa, lɛ́ e kéa.”

¹⁹ Éɓɔ́lɔ́hã́ã̀ zì zò-dɔ̀à-mɔ̀ yí lɛ̀ɛ́ gbaa ga, lɛ̀ lɛ́ e e yɛ́lɛ́ táá e gbĩ-kpàlaa mɔ́ɔ̀ wɔ̃̀ mɔ̀ɔ ká. À gbĩ-kpàlaa e kɛ kɛpìà lɛ̀ pɛ lɛ́ à gaà lɛ, ɓii à kɛ̀ɛ̀ e kɛ lèĩ wũ doó. Ɛ́ɛ̃́ zeĩ́, à zì zò-dɔ̀à-mɔ̀ yí lɛ̀ɛ́ gbaa ga, lɛ̀ lɛ́ e e yɛ́lɛ́ táá zi lɛ́ bɛ̀i lɛ̀ɛ́ gbaa kɛ à ká Sɛ́wàlà mɔ̀ é nɛ́ yea mɔ́ɔ̀ wɔ̃̀ káa ká.

²⁰ Wálà zì wè-dɔ-wèa mɔ́ɔ̀ wɔ̃̀ mɔ̀ɔ, zò pèèlɛ lɛ̀ɛ́ gbaa mɔ́ɔ̀ kɛ ɓo Éɓɔ́lɔ́hã́ã̀ gé. À zì zò-dɔ̀à-mɔ̀ lɛ̀ɛ́ gbaa nyɛ. Kɛɛ a kɛ à yí áà kɛ̀ gágà, ɛ̃́ɛ̃́ áà Wálà tɔ́ ɓɔ̀.

²¹ Ƃii a yí kpó-kpó dɔ kélɛ̀ Wálà lɛ́ɛ̀ bɛ̀i à mɔ̀ é wɔ̃́ lɛ́ e e wè dɔ à káa kɛ.

²² Pɛ́ a kɛ lɛ́ Éɓɔ́lɔ́hã́ã̀ zì zò-dɔ̀à-mɔ̀ɔ a kɛ Wálà a sí é kɛ mi kpeĩ káa lɛ́ ɓɛ.

²³ À sí lɛ́ Wálà a ɓo é kɛ mi kpeĩ káa, à bɛ̃̀ɛ̃ɛ̃̀ lɛ̀ɛ́ gbaa kɛ à ká à doó lɛ̀ɛ.

²⁴ Kɛɛ à bɛ̃̀ɛ̃ɛ̃̀ e kɛ à ká mia lɛ́ kɔ̀à kɔa zò dɔ mi lɛ́ e kɔa Dàa-mì Zízɛ̀ wɛ̀lɛ̀ ga kɛ̀lɛ̀ɛ mɔ̀ɔ lɛ̀ɛ nɔ́ kíli. Wálà lɛ́ɛ̀ lo kɔa síì kɔ́á kɛ mi kpeĩ ká nɔ́ kíli.

²⁵ Zízɛ̀ kɔa Dàa-mì nɔɔ̀ e kɛ à ká é ga kɔa zì kɛ-wɔ̃̀ yɔɔ mɔ́ɔ̀ wɔ̃̀ mɔ̀. Ɛ́ɛ̃́ e wɛ̀lɛ̀ ga kɛ̀lɛ̀, kɛ é kɔa kɛ kpeĩ Wálà lɛ̀ɛ.