Wólómà 2 - Wè-dɔ-wè Dɛɛ

Wálà zì mɛ̀ĩ́-sà dɔ̀-mia-mɔ̀

¹ À mɔ́ɔ̀ wɔ̃̀ mɔ̀ɔ, mi lɛ́ ì wɔ̃́ kàà i ɓɛ́ĩ̀ wĩĩ́a, í kɛ bɛ̃̀ɛ̃ mi nɔ́ɔ fé káa, à ɓò-mɛ̀ĩ́-zì gbɛɛ wá i kɛ̀lɛ̀. Ƃii yé ɓaà wɔ̃́ káá i ɓɛ́ĩ̀ gbɛɛ wĩĩ́a, kɛ ɓaà mɛ̀ĩ́-sà káá i dìè wĩĩ́. Ƃii ɓi lɛ́ ì wɔ̃́ kàà mia wĩĩ́a, i wɔ̃́ nɔ́ doóa kɛpìà.

² Kóò à yí dɔ lɛ kpeĩ lɛ́ Wálà è mia lɛ́ ò wɔ̃́ sùua kɛ̀ɛ, lɛ́ è mɛ̀ĩ́-sà kàà o wĩĩ́a.

³ Mi lɛ́ ì wɔ̃́ kàà mia lɛ́ ò wɔ̃́ sùu e kéa kɛ̀ɛ wĩĩ́, tó i dìè ɓáà wɔ̃́ sùu nɔ́ doóa kɛ̀ɛ, ɓáà yí dɔ íì lo laà Wálà là mɛ̀ĩ́-sà kàà-mia-wĩĩ́ kɛ̀lɛ̀?

⁴ Ɛ́ɛ̃́ Wálà zì sɔ̃̀ɔ̃-kɛ-sɛ̀, e bɛ̀i à zì zò-kũ̀-gé kɔ̀, ɛ̃́ɛ̃́ à zì zò-kɛ̀-dɔ́ɔ́lɔ́ kɔ̀ ɓɛ, íì o vɛ̀ì zɛ? Ƃàá yí dɔ Wálà sɔ̃̀ɔ̃ lɛ sɛ̀, ɓii láà nàà é zi ɓo i ká í i sɔ̃̀ɔ̃ yɔɔ mɛ́ vɔ̀ɔ?

⁵ Kɛɛ i wũ-kèlè yí lɛ gágà, ɛ̃́ɛ̃́ ɓàá naa í i zò nìɛ̀. À mɔ́ɔ̀ wɔ̃̀ mɔ̀ɔ, i à kɛpìà kɛɛ Wálà zì wɔ̃́à-wàa-kɔ̀ lɛ́ è lo ɓɔɔ̀ i mɔ̀ɔ, é kɛ gbùò. Lɛ́ɛ̀ lo kɛɛ̀ gbùò Wálà zì wɔ̃́à-wàa-lùò ká, lúó lɛ́ à zì mɛ̀ĩ́-sà dɔ̀-mia-mɔ̀ kpeĩa lɛ́ɛ́ è lo ɓoò à ká à làa ká.

⁶ Ƃii Wálà lɛ́ɛ̀ lo mia séĩ́-séĩ́ fɔ́nɔ́ nɔɔ̀ síì o kɛ-wɔ̃̀ mɔ̀.

⁷ Mia dò óò wɔ̃́ yiè kɛ̀ teele. Tó wáà nàà wɔ̃́ kpàlézɛ̀ wà Wálà zì ɓɛ̀lɛyà ká. Zéniía, óò nàà ó kɛ ɓe kpɔ̃́ṹ-kpɔ̃́ṹ ká. Míá o kília, Wálà lɛ́ɛ̀ lo kɛ̀ɓe wɔ́lɔ́-wɔ́lɔ́ nɔɔ̀ o lɛ̀ɛ.

⁸ Mia dò bɛ̃̀ɛ̃ o dìè mɔ́ɔ̀ wɔ̃̀ lɛ́ nɔ́ ò yí dɔɔ. Óò o wũ ɓo wɔ̃́ yé lɛ wánà zɛ̀ɛ wì, tó wáà à yé lɛ nɛ̀ zɛ̀ɛ, kũ̀ o zɔ̃̀ɔ̃̀ ká. Míá o kília, óò lo Wálà zì wɔ̃́à-wàa zò wà à zì wɔ̃́à-wàa-kɔ̀ gɛ̃̀ɛ̃̀.

⁹ Mia séĩ́ lɛ́ ò wɔ̃́ lɛ́ lɛ yɔɔ kɛ̀ɛ, óò lo wàa ɓèlè, ɛ̃́ɛ̃́ o sã̀ lɛ́ɛ̀ lo dɔɔ̀. Zúù-mìà lɛ́ è lo kɛɛ̀ o ká nɛ́, kɛɛ é tĩã́ ɓɔɔ̀ sɛ́lɛ́ gbɛɛ yí-mìà làa.

¹⁰ Kɛɛ mia séĩ́ lɛ́ ò wɔ̃́ lɛ́ lɛ sɛ̀ɛ kɛ̀ɛ, óò lo wɔ̃́ kpàlézɛ̀, e bɛ̀i ɓɛ̀lɛyà, ɛ̃́ɛ̃́ zò-yà-gé sɔ̀lɔ̀ ɓoò. Zúù-mìà lɛ́ ò lo à sɔ̀lɔ̀ ɓoò nɛ́, kɛɛ sɛ́lɛ́ gbɛɛ yí-mìà ó tĩã́ à sɔ̀lɔ̀ ɓoòa.

¹¹ Ƃii Wálà lɛ̀ɛ́ dɔ mi nɔ́ɔ fé dò píé.

¹² Mia séĩ́ lɛ́ Móózè là Lɔ́ɔ̀ɔ wá o kɛ̀lɛ̀, tó wáà kɛ-wɔ̃̀ yɔɔ kɛ̀ɛ, o gíniì lɛ́ɛ̀ lo kɛɛ̀ à ká, yé bɛ̃̀ɛ̃ Lɔ́ɔ̀ɔ wá o kɛ̀lɛ̀ɛ ká. Mia séĩ́ lɛ́ Móózè là Lɔ́ɔ̀ɔ lɛ o kɛ̀lɛ̀, tó wáà kɛ-wɔ̃̀ yɔɔ kɛ̀ɛ, óò lo mɛ̀ĩ́-sà dɔɔ̀ o mɔ̀ Lɔ́ɔ̀ e kília ká.

¹³ Mia lɛ́ o Lɔ́ɔ̀ e kília ma-mìà káa, o wáá ká kɛ ó kɛ Wálà lɛ̀ɛ kpeĩ. Kɛɛ mia lɛ́ ò lo kɛɛ̀ à lɛ̀ɛ kpeĩa, lɛ́ o mia lɛ́ ò wɔ̃́ lɛ́ Lɔ́ɔ̀ɔ à gèea, kɛ̀ɛ káa.

¹⁴ Lɔ́ɔ̀ɔ wá sɛ́lɛ́ gbɛɛ yí-mìà kɛ̀lɛ̀. Kɛɛ yé waà wɔ̃́ lɛ́ Lɔ́ɔ̀ɔ à gèea, sí o dìè yí wáà kɛ̀ɛ, yé bɛ̃̀ɛ̃ Lɔ́ɔ̀ɔ wá o kɛ̀lɛ̀ɛ káa, kɛɛ waà Lɔ́ɔ̀ɔ zɔ̃̀ɔ̃̀ o dìè lɛ̀ɛ.

¹⁵ O zì kɛ-wɔ̃̀ ò kɛ̀ɛ, a zɔ̃̀ɔ̃̀ kélɛ̀ wɔ̃́ lɛ́ Lɔ́ɔ̀ɔ à gèe mia ó kɛɛ, à bɛ̃̀ɛ̃ɛ̃̀ lɛ o zò píé. O zò gíkã́ lɛ zeĩ́ o kélá ká. Ƃii o zì yɛ́lɛ́-táá-kɔ̀ lɛ́ɛ̀ wɔ̃́ kàà o wĩĩ́ lúó dò ká. Lúó gbú bɛ̃̀ɛ̃, áà o ɓò wɔ̃́ yí.

¹⁶ Zí è lo kɛɛ̀ à ká lúó lɛ́ Wálà è lo à kɛɛ̀ Zízɛ̀ Kɛ́lɛ̀ì é mɛ̀ĩ́-sà dɔ mia zì yɛ́lɛ́-tàà-yí-wɔ̃̀ lɛ́ à bĩ̀ĩĩ̀ lɛɛ mɔ̀ɔ lɛ́ ɓɛ. Zi lɛ́ wɔ̃́ làṹ yiè lɛ́ m̀ gèea à gèe à káa lɛ́ ɓɛ.

Zúù-mìà wà Móózè là Lɔ́ɔ̀

¹⁷ Kɛɛ ɓí ɓi bɛ̃̀ɛ̃, ì i dìè si Zúù-mì ɓɛ. Íì i zò dɔ Lɔ́ɔ̀ɔ mɔ̀. Íì lé-gbùò-là kɛ̀ Wálà mɔ́ɔ̀ wɔ̃̀ mɔ̀.

¹⁸ Íì wɔ̃́ lɛ́ Wálà à nàà í à kɛɛ dɔ. Lɔ́ɔ̀ e kília aà wɔ̃́ kɛ-zì zɔ̃̀ɔ̃̀ i lɛ̀ɛ. À mɔ́ɔ̀ wɔ̃̀ mɔ̀ɔ, íì bɛ̀i à mɔ̀ í wɔ̃́ yiè dɔ wɔ̃́ yɔɔ bà.

¹⁹ Ƃáà yí dɔ kpó-kpó ɓo kélɛ̀ íì bɛ̀i à mɔ̀ í zi zɔ̃̀ɔ̃̀ nyìɛ-káá-mì lɛ̀ɛ. I lɛ̀-fɔ̀nɔɔ̀ɔ ká mia lɛ́ o bĩ́ bàa lɛ̀ɛ.

²⁰ I wɔ̃́ kɛ-zì zɔ̃̀ɔ̃̀-mì ká mia bè zɛ̀ lɛ̀ɛ. I pɛ-zɔ̃̀ɔ̃̀-mì ká nɔ́ɔ̀ɓé lɛ̀ɛ. Ƃáà yí dɔ Lɔ́ɔ̀ e kília yía, wɔ̃́ yí-dɔ-kɔ̀ wà wánà-wɔ̃̀ o lɛ̀ kpànazɛ̀ pìà lɛ yí i lɛ̀ɛ.

²¹ Mi lɛ́ ì pɛ zɔ̃̀ɔ̃̀ mia gbɛɛ lɛ̀ɛ, ìí bɛ̀i pɛ zɔ̃̀ɔ̃̀ i dìè lɛ̀ɛ? Íì wɔ̃́ gèe kélɛ̀ yékɛ̀ mia ó kã̀ã ɓo. Kɛɛ ɓie i kã̀ã ɓopìà?

²² Íì à gèe kélɛ̀ yékɛ̀ mia ó wàà o ɓɛ́ĩ̀ gbɛɛ na ɛ̃́ɛ̃́ dɛ̃ píé kɛ́ì. Kɛɛ ɓie i wààpìà i ɓɛ́ĩ̀ gbɛɛ na ɛ̃́ɛ̃́ dɛ̃ píé kɛ́ì? Ƃàá naa kɛ̀ɛ̀-wɛ́lɛ́ ká gbɛɛ ɓo. Kɛɛ i kã̀ã ɓopìà kɛ̀ɛ̀-wɛ́lɛ́-kà wì?

²³ Íì lé-gbùò-là kɛ̀, ɓii Wálà là Lɔ́ɔ̀ɔ lɛ i kɛ̀lɛ̀. Kɛɛ i yɛ́lɛ̀ kpɔ́pìà Wálà là là Lɔ́ɔ̀ɔ sìeè ká?

²⁴ Ƃii à bɛ̃̀ɛ̃ɛ̃̀ lɛ Wálà là kíía yí kélɛ̀, “Ka mɔ́ɔ̀ wɔ̃̀ mɔ̀ɔ, óò wɔ̃́ yɔɔ gèe Wálà gbĩ mɔ̀ sɛ́lɛ́ gbɛɛ yí-mìà fĩ̀ã̀.”

²⁵ Yé ɓaà Lɔ́ɔ̀ɔ kṹ tã́ã̀a, kɛɛ i zì bɔ̃́ɔ̃́ síì yí lɛ à mɔ̀. Kɛɛ yé ìí à kṹ tã́ã̀a, kɛɛ i zì bɔ̃́ɔ̃́ síì lɛ kélɛ̀ pɛ lɛ́ ìí bɔ̃́ɔ̃́ sí nɛ́.

²⁶ Kɛɛ yé mi lɛ́ à bɔ̃́ɔ̃́ síì wáa, aà wɔ̃́ lɛ́ Lɔ́ɔ̀ɔ à gèea kɛɛ, Wálà lɛ̀ɛ́ ló à gɛ̃̀ɛ̃̀ lɛ̀ pɛ lɛ́ à bɔ̃́ɔ̃́ síì lɛ?

²⁷ Mia lɛ́ òó gbaa bɔ̃́ɔ̃́ kpó-kpó sí lɛ́ ò Lɔ́ɔ̀ɔ kũ tã́ã̀a, óò lo mɛ̀ĩ́-sà káà i wĩĩ́. Ƃii Lɔ́ɔ̀ɔ bɛ̃̀ɛ̃ɛ̃̀ɛ zɛ̀ lɛ i kɛ̀lɛ̀, ɛ̃́ɛ̃́ i bɔ̃́ɔ̃́ síì lɛ, kɛɛ íì Lɔ́ɔ̀ɔ sìè.

²⁸ Mi lɛ́ ò gɛ̃̀ e gbĩ mɔ̀ wáà sì Zúù mia, ye wá Zúù mi kpó-kpó ká. Ɛ́ɛ̃́ zeĩ́a, bɔ̃́ɔ̃́ kpó-kpó zɛɛ̀ wá à yé ò kɛ̀ làà káa ká.

²⁹ Mi lɛ́ lɛ Zúù mi kpó-kpó káa, lɛ Zúù mi ká e dìè gé. À yí lɛ́ e kélɛ̀ à zò bɔ̃́ɔ̃́ zɛɛ̀ lɛ. Wálà zì Gɛ̀ɛ̀ Púlú lɛ́ è mi zò bɔ̃́ɔ̃́ zɛɛ. Ye wá Lɔ́ɔ̀ bɛ̃̀ɛ̃ɛ̃̀ɛ zɛ̀ɛ ká kɛ á kɛ. Mi sùu e kília zì tɔ́-ɓɔ lɛ́ɛ̀ go Wálà kɛ̀lɛ̀. Kɛɛ lɛ̀ɛ́ gó mia kɛ̀lɛ̀.