Tátɔ̀ 3 - Wè-dɔ-wè Dɛɛ

Zi lɛ́ Wálà-mìà kɛ-kɔ̀ áá kɛɛ̀áa

¹ Ì ɓà mia nì zò vùò ó kɛ mia líé-sí-mìà ɛ̃́ɛ̃́ yíkɛ̀ gáàa séĩ́ wì, wáà o wéè kɛ̀. À gèe o lɛ̀ɛ o pɛ̀ kɛɛ̀ é kɛá wɔ̃́ yiè séĩ́ kɛɛ̀ wɛ̃́ĩ̀.

² À gèe o lɛ̀ɛ yékɛ̀ ó wɔ̃́ yɔɔ gèe mi nɔ́ɔ fé gbĩ mɔ̀. Kɛɛ ò kɛ zò-kũ̀-gé mìà ká, ɛ̃́ɛ̃́ ó kɛ mia kpóló kpɔ̀ɔ mɔ̀ zɛ̀ ká. Ò à zɔ̃̀ɔ̃̀ mia séĩ́ lɛ̀ɛ kélɛ̀ óò o kpóló kpɔ o mɔ̀ wɔ̃́ kɛɛ̀ yí teele.

³ Ƃii ko vɔ̀ɔ, kɔaà kɛ do mia yí gíniìa zɛ̀ ká. Ko kɛ mia lɛ́ òó wɔ̃́ ma mia wè làa ká. Ɛ́ɛ̃́ kɔaà zi ni. Ko kɛ lùò ká pɛ doò do lɛ́ à lɔ̀ è mia kɛ̀ɛò, e bɛ̀i ko dìè-tĩ́ nàà-ká-pɛ̀ séĩ́ wì. Ko zì kɛ̀ɓe làa, ko zò e kɛ yɔɔ mia ká, ɛ̃́ɛ̃́ kɔ́áà ko yɛ́lɛ́ tàà mia ká yɔɔ. Mia dò bɛ̃̀ɛ̃ lɔ̀ nyɛɛ̀ e kɛá ko mɔ̀. Ko bɛ̃̀ɛ̃, ko lɔ̀ nyɛɛ̀ e kɛá o mɔ̀.

⁴ Kɛɛ lɛ̀ lɛ́ ko La-mì Wálà zì sɔ̃̀ɔ̃-kɛ̀-sɛ̀ wà à zì mia lɔ̀-kpɔ̀à-mɔ̀ɔ ɓɔ̀-mia-là lùò e ɓɔɔ,

⁵ e ko la. Lɛ̀ɛ́ gbaa kɛ ko dìè ko zì yɛɓo yiè kɛɛ̀ mɔ́ɔ̀ wɔ̃̀ ká kɛ á mɔ́ɔ̀ à kɛ ɓo. Kɛɛ e kɛ à dìè zì mia yéĩ̀ kṹũ̀ ká lɛ́ e ko laa. E ko la mia mɛ́ pɛ́lɛ́ɛ̀ lɛ́ Gɛ̀ɛ̀ Púlú è kpɔa yí lɛ́ è mia ye dɛɛ ɓo, áà kɛ̀ɓe dɛɛ nɔ̀ mia lɛ̀ɛ kolo là zàá.

⁶ Wálà e Gɛ̀ɛ̀ Púlú káá ko là yí gbùò zɛ̀ Zízɛ̀ Kɛ́lɛ̀ì lɛ́ e ko La-mì káa kolo là zàá.

⁷ A kɛ kíli kɛɛ Wálà zì zò-kɛ̀-sɛ̀ á kɛ kɛ kó kɛ kpeĩ à lɛ̀ɛ, kɛ kó nu kɛ̀ɓe wɔ́lɔ́-wɔ́lɔ́ lɛ́ ko zò lɛ à mɔ̀ɔ, kɛ̀ kò pɛ ká pìà.

⁸ Wɔ̃́ nì e kília lɛ wɔ̃́ wánà zɛ̀ lɛ́ à gèeè lɛɛ ká. Ḿm̀ nàà í wɔ̃́ nì o kília gèe kpó-kpó ɓo, kɛɛ é à kɛ mia lɛ́ o zò dɔɔ̀ lɛ Wálà mɔ̀ɔ zò é kɛ yɛɓo yiè kɛɛ̀ mɔ̀. Wɔ̃́ e kília lɛ sɛ̀, ɛ̃́ɛ̃́ lɛ́ɛ̀ gbũ mia mɔ̀.

⁹ Kɛɛ ì wɔ̃́ nì e kéa mɛ́ kpɔ́. O lɛ́ o kélɛ̀, tèé yí gíniìa zɛ̀ dàaà, e bɛ̀i, mia sùu gã̀ pɛ́ɛ̀, ɛ̃́ɛ̃́ zeĩ́ wéé dɔɔ̀, ɛ̃́ɛ̃́ gèlè lɛ́ ò gɔ̃ Lɔ́ɔ̀ɔ káa káa. O wɔ̃́ fèle wà wɔ̃́ ɓɔ̀ɔ ká.

¹⁰ Ì lìè-wè dɔ kpolà pèèlɛ zɛ̀ mi lɛ́ è mi yí-gìnì wàà ɓèlèa lɛ̀ɛ, í i kɔ̀ ɓo gbaa à mɔ́ɔ̀ wɔ̃̀ yí.

¹¹ Íì à yí dɔ mi sùua wá kpeĩ. Ɛ́ɛ̃́ à zì kɛ-wɔ̃̀ yɔɔ lɛ́ɛ̀ à zɔ̃̀ɔ̃̀ kélɛ̀ wɔ̃́ káà lɛ à wĩĩ́.

Lìè-wè dɔɔ̀ líé-nyɛ-mɔ̀

¹² Ḿm̀ Átímà ɛ̃́ɛ̃́ Tíkíkà vɔ̀á i píéa, ì à kɛ-zì kpó-kpó naa kɛ í nu m píé Nìkɔ́pɔ́lè, ɓii maà à yà m gé kɛ ḿ kɛ yí lɛ̀ɛ-yíí-pɛ̃́.

¹³ Ì à kɛ-zì kpó-kpó naa í Zínà lɛ́ e lɔ́ɔ̀-dɔ-mì káa, wà Àpɔ́lɔ̀ o dɔ zuú. Ì i zò kɛ o píé pɛ́ ò lo lóòá tááa mɔ̀ɔ séĩ́ é kɛ o kɛ̀lɛ̀.

¹⁴ Tó ko mìà nì ó wà lúó séĩ́ nɔ̀ wɔ̃́ yiè kɛɛ̀ lɛ̀ɛ mɛ́ dã́, kɛ ó pɛ nɔ mia lɛ́ lɛ o mɔ̀ ó gbũ̀-mɔ̀ sɔ̀lɔ̀ ɓoa lɛ̀ɛ. Ò kɛ mia lɛ́ o zì kɛ̀ɓe yí lɛ à mɔ̀ɔ ká.

¹⁵ Mia séĩ́ lɛ́ kò ye nì ko zèea, o wéé i bà. Ì wéé ko ɓɛ́ĩ̀ lɛ́ o yí lɛ́ kò ye nì kò dɔ zò-dɔ̀à-mɔ̀ wɔ̃̀ yía bà ko lɛ̀ɛ. Zò-kɛ̀-sɛ̀ é kɛ ka séĩ́ ka píé.