Tátɔ̀ 2 - Wè-dɔ-wè Dɛɛ

Pɛ-zɔ̃̀ɔ̃̀-kɔ̀ wánà zɛ̀

¹ Kɛɛ ɓi yee, ì pɛ lɛ́ lɛ mi lɛ́ è wánà-wɔ̃̀ɔ zɔ̃̀ɔ̃̀ɔ mɔ̀ á zɔ̃̀ɔ̃̀ɔ zɔ̃̀ɔ̃̀.

² À gèe gɔ̃à lɛ́ o i dàa nì káa lɛ̀ɛ ó o dìè kṹ tã́ã̀, ɛ̃́ɛ̃́ ó o líé dɔ wɔ̃́ kɛɛ̀ yí, e bɛ̀i, ó kɛ mia lɛ́ o gí kã́ã̀ lɛɛ ká. O mɛ́ è kɛ gágà zò-dɔ̀à-mɔ̀, e bɛ̀i, mia lɔ̀-kpɔ̀ o mɔ̀, ɛ̃́ɛ̃́ lò o líé wɔ̃́ kɛɛ̀ ká yí zàá.

³ Zi nɔ́ doóa káa, ì à gèe loà dìè-dìè vɔ̀ɔ lɛ̀ɛ o zì wɔ̃́ kɛ-kɔ̀ é kɛ lɛ̀ mia lɛ́ o Wálà doó là mia nì káa, wáá wɔ̃́ kɛɛ̀áa lɛ́ ɓe. Yékɛ̀ ó kɛ mia tɔ́ yɔɔ gèe-mìà ká. Yékɛ̀ ó kɛ wã́ã́ĩ̀ là lùò ká. Lɛ o mɔ̀ ó wɔ̃́ lɛ́ lɛ sɛ̀ɛ zɔ̃̀ɔ̃̀ mia lɛ̀ɛ.

⁴ Lɛ o mɔ̀ ó wɔ̃́ kɛ-zì zɔ̃̀ɔ̃̀ loà dɛɛ dɛɛ vɔ̀ lɛ̀ɛ, kɛ o bɛ̃̀ɛ̃ o dɛ̃ nì wà wà nɔ́ɔ̀ nì lɔ̀ é kpɔ́ o mɔ̀.

⁵ Laa mɔ̀ ó zi lɛ́ wáá o líé dɔɔ̀á wɔ̃́ kɛɛ̀ yía zɔ̃̀ɔ̃̀ o lɛ̀ɛ. Yékɛ̀ ó kɛ wélé-wèlè. Laa mɔ̀ ó o yɛ́lɛ́ kɛ o píé kɛ́ì píé e yiè ká, ɛ̃́ɛ̃́ zeĩ́, ó o dɛ̃ nì wéè kɛ. È kɛ kíli yékɛ̀ mi dò é wɔ̃́ yɔɔ gèe Wálà lé-wèa gbĩ mɔ̀.

⁶ Zi nɔ́ doóa káa, ì lìè-wè gèe à ká gɔ̃à dɛɛ dɛɛ vɔ̀ɔ bɛ̃̀ɛ̃ lɛ̀ɛ kélɛ̀ ó bɛ̀i o dìè kũ̀ tã́ã̀ mɔ̀.

⁷ I dìè bɛ̃̀ɛ̃, lɛ sɛ̀ í kɛ wɔ̃́ gɔ̃̀á ká yɛɓo yiè kɛɛ̀ ká, ɛ̃́ɛ̃́ wɔ̃́ séĩ́ yí. Pɛ́ ɓà zɔ̃̀ɔ̃̀ɔ, è kɛ pɛ lɛ́ è go i zò píéa ká, ɛ̃́ɛ̃́ ì i yɛ́lɛ́ kɛ à kɛ-wɔ̃̀ píé.

⁸ Ì wéé wũ zɛ̀ lɛ́ mia òó bɛ̀i à ɓoòo mɛ̀ĩ́a sí ɓáà pɛ zɔ̃̀ɔ̃̀á. Ì à kɛ kíli kɛɛ yɛ́lɛ̀ é kpɔ́ i dàa-gbe vɔ̀ là, yékɛ̀ wɔ̃́ gbɛɛ é kɛ o kɛ̀lɛ̀ ó gèe ko gbĩ mɔ̀.

⁹ Lɛ lùò vɔ̀ mɔ̀ ó wɔ̃́ ma o dàa-mìà wè là, wáà o dàa-mìà zò-dà-wɔ̃̀ kɛ̀ zi séĩ́ ká. Yékɛ̀ ó wéé kṹ o dàa-mìà nì lé.

¹⁰ Yékɛ̀ ó kã̀ã ɓo o dàa-mìà nì mɔ̀. Kɛɛ lɛ o mɔ̀ ó zɔ̃̀ɔ̃̀ o dàa-mìà lɛ̀ɛ kélɛ̀ o sɔ̃̀ɔ̃ lɛ sɛ̀ teele, ɛ̃́ɛ̃́ o mia lɛ́ mi ì bɛ̀i i zò dɔɔ̀ o mɔ̀ɔ ká. Laa mɔ̀ é kɛ kíli kɛɛ mia ó wɔ̃́ yiè gèe pɛ-zɔ̃̀ɔ̃̀-kɔ̀ lɛ́ à gbɛ̃̀ɛ̃̀ lɛ ko La-mì Wálà mɔ̀ɔ, gbĩ mɔ̀ wɔ̃́ séĩ́ lɛ́ ò kɛ̀ɛ kolo là zàá.

¹¹ Ƃii Wálà aà e zì zò-kɛ̀-sɛ̀ yí zɔ̃̀ɔ̃̀ mia lɛ̀ɛ o séĩ́ o zì la-ɓo mɔ́ɔ̀ wɔ̃̀ mɔ̀.

¹² À zì zò-kɛ̀-sɛ̀ e kília lɛ́ɛ̀ wɔ̃́ kɛ-zì zɔ̃̀ɔ̃̀á ko lɛ̀ɛ kɛ kó kã́ kɛ̀ɓe lɛ́ lɛ̀ɛ́ Wálà zò dàa lɛ̀ɛ, ɛ̃́ɛ̃́ kɛ kó kã́ pɔɔ̀ lɛ́ à lɔ̀ lɛ kpóṹ là zèe mìà kɛpìàa lɛ̀ɛ. Lɛ́ɛ̀ zi lɛ́ lɛ ko mɔ̀ kó ko dìè kṹ à ká tã́ã̀, ɛ̃́ɛ̃́ zi lɛ́ kò bɛ̀i kɛɛ̀á ɓe kpeĩ lea, ɛ̃́ɛ̃́ zeĩ́ zi lɛ́ kò bɛ̀i kɛɛ̀á ɓe Wálà lɛ̀ɛ kpóṹ là zèea, zɔ̃̀ɔ̃̀ ko lɛ̀ɛ,

¹³ lɛ̀ lɛ́ ko tĩã́ yàá lúó géli zɛ̀ lɛ́ ko zò lɛ à mɔ̀ é nua gɛ̀nɛ̀ɛ káa ká. Lúó e kília lɛ́ Zízɛ̀ Kɛ́lɛ̀ì, lɛ́ e kò Wálà kpànazɛ̀ e bɛ̀i ko La-mì káa, à zì lɛ̀-fɔ̀nɔ-kɔ̀ è lo ɓíèá mia làa.

¹⁴ E e dìè nɔ ko mɔ́ɔ̀ wɔ̃̀ mɔ̀ kɛ é ko ɓo wɔ̃́ yɔɔ séĩ́ kɛ̀lɛ̀, ɛ̃́ɛ̃́ é ko kɛ mia púlú lɛ́ ko à doó là mia nì ká, lɛ́ fã̀ã́-wàà lɛ o kɛ̀lɛ̀ kɛ ó wɔ̃́ yiè kɛɛ káa ká.

¹⁵ Wɔ̃́ nì e kéa zɔ̃̀ɔ̃̀ mia lɛ̀ɛ. Ì o kɛ o fã̀ã́ é wàà. Ì o gbɛ̃̀ zi píé yíkɛ̀ gáàa lé paàa zɛ̀ lɛ́ e i kɛ̀lɛ̀ɛ ká. Yékɛ̀ ɓá tó o dò nyìɛ é fɔ̃́ i yí.