Tátɔ̀ 1 - Wè-dɔ-wè Dɛɛ

¹ Óò m si Pɔ́ɔ̀. M Wálà là yɛɓo-kɛ-mì, wà Zízɛ̀ Kɛ́lɛ̀ì là àpɔ́sɔ̀lɔ̀ ká. À kɛɛ̀ lɛ kíli kɛɛ ḿ gbũ mia lɛ́ Wálà aà o sía zì zò-dɔ̀à-mɔ̀ mɔ̀, ɛ̃́ɛ̃́ zeĩ́ kɛ ḿ zi wánà zɛ̀ lɛ́ mia wáá gbiniìá Wálà lɛ̀ɛ,

² lɛ́ à gã̀ gbɛ̃̀ɛ̃̀ lɛ kɛ̀ɓe wɔ́lɔ́-wɔ́lɔ́ lɛ́ mia zò lɛ à mɔ̀ɔ wɔ̃̀ zɔ̃̀ɔ̃̀ o lɛ̀ɛ. Wálà lɛ́ lɛ̀ɛ́ nɛ̀ kɛɛ, e e wè dɔ kɛ̀ɓe e kília ká, kɛ bɛ̃̀ɛ̃ pɛ séĩ́ é tĩã́ kɛɛ̀ ɓe.

³ Ɛ́ɛ̃́ a zɔ̃̀ɔ̃̀ mia lɛ̀ɛ à zɔ̃̀ɔ̃̀-lùò ká à zì lé-wèa yí. Wálà e e lé-wè e kéa kpɔ́ m kɔ̀ là. Ɛ́ɛ̃́ ma bɛ̃̀ɛ̃, ḿm̀ à gèe lòũ̀ ká, ɓii zi lɛ́ ko La-mì Wálà a gèe ḿ kɛáa lɛ.

⁴ Ḿm̀ kíí e kéa bɛ̃̀ɛ̃ ɓi Tátɔ̀ lɛ́ i m̀ nɛ́ wánà zɛ̀ ká zò-dɔ̀à-mɔ̀ lɛ́ kɔ̀à ɓi nì kɔ̀à dɔ à yía kolo là zàáa píé. Wálà lɛ́ e mia Dàa káa, é dàá Kɛ́lɛ̀ì Zízɛ̀ lɛ́ e ko La-mì káa bàa, o zì zò-kɛ̀-sɛ̀ɛ é kɛ i píé, wáà zò-yà-gé nɔ̀ i lɛ̀ɛ.

Yɛɓo lɛ́ lɛ Tátɔ̀ mɔ̀ á kɛ Kílíìa

⁵ M i tó Kílíì kɛ í pɛ lɛ́ à yàlà ɓoò wáa yàlà bɛ̀i. Ɛ́ɛ̃́ zeĩ́ kɛ í mia dìè-dìè vɔ̀ sí déĩ́ le, í o yà pɛ́lɛ doò doa yí Wálà-mìà bà. Wɔ̃́ lɛ́ ma gèe i lɛ̀ɛ è tó i yɛ́lɛ́ píé.

⁶ Ye lɛ́ e kélɛ̀, yékɛ̀ kɛɛ é kɛ mia dìè-dìè vɔ̀ dò mɔ̀. Laa mɔ̀ mi doó na é kɛ nɔ́ doó. Lɛ à mɔ̀ wà nɔ́ɔ̀ ó kɛ mia lɛ́ o zò dɔɔ̀ lɛ Wálà mɔ̀, lɛ́ mi gbɛɛ lɛ̀ɛ́ bɛ̀i à gèeè o wũ nyɛɛ̀ lɛ o mɔ̀, ɛ̃́ɛ̃́ o vɔɔ̀ lɛ o mìà nì kɔ̀ zìa ká.

⁷ Yé Wálà-yɛ̀ɓo e kéa kpɔ́ɔ̀ lɛ Wálà-mìà líé-sí-mìà kɔ̀ làa, yékɛ̀ kɛɛ gbɛɛ é kɛ míá o kília mɔ̀. Yékɛ̀ ó kɛ dìè-nàà-ká-wɔ̃̀ kɛ-mìà ká. Yékɛ̀ ó kɛ míá o zò lɛ o kɛ̀lɛɛ̀ɛò, e bɛ̀i mia lɛ́ yɔ-yíí-mi wɔ̃̀ diè lɛ o zò káa ká. Yékɛ̀ ó kɛ mia gana zɛ̀ ká. Ɛ́ɛ̃́ yékɛ̀ pɛlèe sɔ̀lɔ̀ ɓò yɛ̀ì-yɛ́í ká mɔ́ɔ̀ fã̀ã́-wàà é kɛ o yí.

⁸ Lɛ o mɔ̀ ó kɛ míá ò lɔ̀ɔ̀-mìà wɔ̀lɔ̀ kpɔɔ ká. Lɛ à mɔ̀ pɛ lɛ́ lɛ sɛ̀ɛ lɔ̀ é kpɔ́ o mɔ̀. Lɛ o mɔ̀ ó o líé dɔ wɔ̃́ kɛɛ̀ yí. Lɛ o mɔ̀ ó kɛ mia kpeĩ, ɛ̃́ɛ̃́ mia púlú, e bɛ̀i mia lɛ́ ò bɛ̀i o dìè kũ̀ tã́ã̀ mɔ̀ɔ ká.

⁹ Lɛ à mɔ̀ ó kùnù wéé lɛ́ ò bɛ̀i à mɔ̀ ó o zò dɔ à mɔ̀, lɛ́ è wèè pɛ-zɔ̃̀ɔ̃̀-kɔ̀ɔ wéè mɔ̀ɔ mɔ̀. Zí e kéa káa, bɛ̀i lɛ́ɛ̀ lo kɛɛ̀ o mɔ̀ kɛ ó mia fã̀ã́ wàà pɛ-zɔ̃̀ɔ̃̀-kɔ̀ wánà zɛ̀ɛ ká, ɛ̃́ɛ̃́ tó wáà mia lɛ́ ò gèlè gɔ̃ o káa zì wɔ̃́ niàa zɔ̃̀ɔ̃̀á o lɛ̀ɛ.

¹⁰ Ƃii mia búnùzɛ̀ o ɓe, mia òó bɛ̀i o wũ kṹũ̀ tã́ã̀. Míá o kília, óò mia bèkɛ̀ ɓo wà wéé yí gíniìa zɛ̀ lɛ́ ò gèea ká. Mia kpó-kpó lɛ́ ò wɔ̃́ e kéa kɛ̀ɛ, o lɛ́ o Zúù-mìà káa.

¹¹ Lɛ sɛ̀ kɛ mi dò á kɛ ó o lɛ̀à ga. Ƃii o ye-mìà kù gbɔ́ù zɛ̀ bùlé gbinipìà wɔ̃́ lɛ́ ye wá o mɔ̀ ó zɔ̃̀ɔ̃̀, lɛ́ ò zɔ̃̀ɔ̃̀ɔ ká. Wɔ̃́ yɛ́lɛ̀ zɛ̀ lɛ́ ò mɔ́ɔ̀ à kɛ ɓoa, lɛ́ e kélɛ̀, óò nàà ó pɛlèe sɔ̀lɔ̀ ɓo.

¹² Mia lɛ́ ò go o pà Kílíìa doó-mì lɛ́ e kɛ o zì dɛ̀-vɔ-mìàa doó-mì káa, a gèe kélɛ̀, “Mia lɛ́ ò go Kílíìa, o nɔ́ nɛ̀-kɛ-mìà ká teele. O luú-wìì kɛ-pɛ̀ yɔɔ zɛ̀ ká. Ɛ́ɛ̃́ zeĩ́, o fíà lɛ. Pɛ ɓèleè lɛ́ nɔ́ o à mɔ̀ wɛ́í-wɛ̀ìa.”

¹³ Wɔ̃́ lɛ́ a gèe kília lɛ wánà ká. Wɔ̃́ e kéa mɔ́ɔ̀ wɔ̃̀ mɔ̀ɔ, lɛ à mɔ̀ í o gbɛ̃̀ zuú wɛlɛ káá kpó-kpó ká, kɛɛ o zì zò-dɔ̀à-mɔ̀ mɛ́ é kɛ gágà,

¹⁴ ɛ̃́ɛ̃́ yékɛ̀ ó kùnù gbaa Zúù-mìà zì pĩ̀ã̀, e bɛ̀i, wɔ̃́ lɛ́ mia waà à gèe ó kɛɛ mɔ̀. Wɔ̃́ nì o kília, óò go mia lɛ́ waà o ko gbɛ̃̀ wɔ̃́ wánà zɛ̀ɛ mɔ̀ɔ kɛ̀lɛ̀.

¹⁵ Mia lɛ́ o púlúa, pɛ séĩ́ lɛ o lɛ̀ɛ púlú. Kɛɛ mia lɛ́ o mɛ́ lilì kṹã̀ lɛ, lɛ́ o zò dɔɔ̀ wá Wálà mɔ̀ɔ, pɛ dò fé wá o lɛ̀ɛ púlú. Lɛ kíli ɓii o zì yɛ́lɛ́-táá wà o zò gíkã́ mɛ́ lilì kṹã̀ lɛ.

¹⁶ Óò à gèe kélɛ̀ óò Wálà dɔ. Kɛɛ o zì kɛ-wɔ̃̀ láà zɔ̃̀ɔ̃̀ kélɛ̀ wɔ̃́ ò gèea wá wánà ká. Wɔ̃́ lɛ́ ò à kɛ̀ɛ lɛ yɔɔ mia lɛ̀ɛ. Òó Wálà wéè kɛ. Ƃɛ̀i wá o mɔ̀ kɛ ó wɔ̃́ yiè nɔ́ɔ fé dò kɛ.