Wɛ̀lɛ̀vèlésɔ̃̀ 9 - Wè-dɔ-wè Dɛɛ

¹ Zéniía, Wálà là vɔ-mì tò-ko-mɔ̀ sɔ́ɔ́li zɛ̀ɛ e là túlúa pìè. Lɛ̀ a pìèa, m sĩ̀ã́ã̀ŋèlè lɛ́ e gó lɛ̀í lɛ́ e dà tã́ã̀a gɛ̃̀. O gùlù lɛ́ à tèá-pìà wá ɓea kíì nɔ à lɛ̀ɛ.

² Sĩ̀ã́ã̀ŋèlèa e gùlùa lé ɓo. Tíé-gbɛ̃́ĩ́ e gó à yí áà ɓɔ̀ lɛ̀ zí lɛ̀ gélé tíé-gbɛ̃́ĩ́ è ɓɔá pùtí-pùtí lea lɛ́ ɓe. Nyɛ́nɛ́ wà fã̀ã̀ lɛ́ è dìèa, à kɛɛ̀ e kɛá tii tíé-gbɛ̃́ĩ́ lɛ́ e gó gùlùa yía ká.

³ Pélé-tòo-tòo vɔ̀ o gó tíé-gbɛ̃́ĩ́a yí o nu tã́ã̀. O yíkɛ̀ gáàa lɛ́ lɛ zɛ̃̀ĩ̀-yɛ̀lɛ̀ kɛ̀lɛ̀ɛ nɔ o lɛ̀ɛ.

⁴ Wa gèe o lɛ̀ɛ yékɛ̀ ó sùu ɛ̃́ɛ̃́ yílí, e bɛ̀i pɛ nɔ́ɔ fé lɛ́ à ɓɔɔ̀ lɛ tã́ã̀ zèea, yékɛ̀ ó pɛ gbɛɛ kɛ o ká. Pɛ nɔ́ e kɛ o mɔ̀ ó pɛ kɛ à káa lɛ́ e mia lɛ́ Wálà dɔ̀á lɛ̀ɛ́ gbaa kɛ o pelàa káa.

⁵ Lɛ̀ɛ́ gbaa kɛ pélé-tòo-tòò vɔ̀ɔ mɔ̀ kɛ ó míáa zɛ. Kɛɛ e kɛ o mɔ̀ ó o sã̀ dɔ mɛnɛ sɔ́ɔ́li píé. Wàa lɛ́ wa sɔ̀lɔ̀ ɓo sã̀ dɔɔ kolo là zàáa, e kɛ lɛ̀ zí zɛ̃̀ĩ̀-yɛ̀lɛ̀ aà i páa è wàa káa lɛ́ ɓe.

⁶ Mɛnɛ sɔ́ɔ́li e kília káa, míá o kília óò lo ga naà, kɛɛ òó ló à gɛ̃̀ɛ̃̀. Ga-lɔ̀ lɛ́ɛ̀ lo o kɛɛ̀, kɛɛ ga lɛ́ɛ̀ lo wàà o mɔ̀.

⁷ Pélé-tòo-tòò vɔ̀ɔ o kélɛ̀ sòo vɔ̀ lɛ́ o pɛ̀ kɛɛ̀ lɛ kɛ ó ló gèlè píéa lɛ́ ɓe. Pɛ́ e kɛ o wĩĩ́a e kɛ lɛ̀ zòlò lɛ́ à kɛɛ̀ lɛ góò káa lɛ́ ɓe. O wɛlɛ ɓɔɔ̀ e kɛá mia wɛlɛ bà.

⁸ O wĩĩ́-wũ̀ ɓɔɔ̀ e kɛá loà wĩĩ́-wũ̀ bà. O sɔ̃́ɔ̃́ e kɛ lɛ̀ wɔ̀ɔ́ù sɔ̃́ɔ̃́ lɛ́ ɓe.

⁹ O pɛ-kúlú pɛ̃́ɛ̃́ gbálá-gbàlà dò kpɔ́ o zò là. O gbã vĩ e kɛ nɔ́ lɛ̀ mia yàà-yí-pɛ̀ lɛ́ ò yèlè sòo mɔ̀ áà mi gã̀ã̀ ɓáà lò gèlè gɔ̃̀á sía vĩ lɛ́ ɓe.

¹⁰ O woũ wà o pìnì lɛ́ e kélɛ̀ zɛ̃̀ĩ̀-yɛ̀lɛ̀ zì lɛ́ ɓea, e kɛ o mɔ̀. Ɛ́ɛ̃́ o woũ lɛ́ yíkɛ̀ gáàa e kɛ à kɛ̀lɛ̀ kɛ é mia gĩ̀ĩ à ká mɛnɛ sɔ́ɔ́li píéa.

¹¹ O líé-sí-mì e kɛ ɓe. Ye lɛ́ e Wálà là vɔ-mì lɛ́ gùlù gbùòa kíì lɛ à kɛ̀lɛ̀ɛ káa. À Hííbúlù-tɔ̀ lɛ́ Àbádɔ̀ũ̀. À Gílíì-tɔ̀ lɛ́ zeĩ́ Àpólìã̀. (Tɔ́ɔ yí lɛ́ e kélɛ̀ Pɛ Yí-sìè-mì.)

¹² Wɔ̃́ yéĩ̀zɛ̀ bèĩzɛ̀ aà die. Ɛ̀ɛ̀, é kã́ à yé e kéa mɔ̀ɔ, aà tó tĩã́ pèèlɛ kɛ é nu.

¹³ Wálà là vɔ-mì sáláádo zɛ̀ɛ e là túlúa pìè. M wéé dò ma áà gò sálà-ɓòà-là-pɛ̀ lɛ́ à kɛɛ̀ lɛ góò ká, lɛ́ lɛ dɔ̀á Wálà wɛlɛ mɔ̀ɔ à góó yììsɛɛ mɔ̀.

¹⁴ Wééa wa ɓo Wálà là vɔ-mì sáláádo zɛ̀ lɛ́ túlúa laa kɛ̀lɛ̀ɛ lɛ̀ɛ kélɛ̀, “Wálà là vɔ-mìà yììsɛ lɛ́ o yèleè lɛ yíí gbùò lɛ́ ò si Yùfélétèa sɔ́nɔ́ɔ, ì o ɓo ɓɛ̀lɛ̀ là.”

¹⁵ O Wálà là vɔ-mìà yììsɛɛ ɓo ɓɛ̀lɛ̀ là. O pɛ̀ kɛɛ̀ e kɛá kɛ̀ɛ̀ e kéa, wà à mɛnɛ e kéa, e bɛ̀i à lɛ̀-kpɛ̀iì ɛ̃́ɛ̃́ à lúó téé-tèè e kéa mɔ́ɔ̀ wɔ̃̀ mɔ̀ kɛ ó mia lɛ́ waà o yí gìnì lɛ́ o yí gìniìi zɛ̀ɛ kpolà aà kɛ yààkaa, kɛ ó o kpolà doó-mì zɛ.

¹⁶ Sóyà vɔ̀ lɛ́ o kɛ sòo làa, o zí o kɛá gbùòa wɔ̃̀ gèe m lɛ̀ɛ. O kɛ méyɔ̃̀ wũ pèèlɛ ká.

¹⁷ Pɛ lɛ́ wa zɔ̃̀ɔ̃̀ m lɛ̀ɛ lɛ́ ma gɛ̃̀ɛ, gɛ̃̀ɛ̃ɛ̃̀ yía, m sòo vɔ̀ wà e táá-mìà gɛ̃̀ yi. Pɛ-kúlú lɛ́ e kɛ o zò làa e kɛ zóló lɛ̀ tíé lɛ́ ɓe. Ɛ́ɛ̃́ e kɛ kélɛ̀ gàla-gɛ̀lɛ̀ lɛ́ ò si sáfàa lɛ́ ɓe. Ɛ́ɛ̃́ e kɛ weĩ̀ zɛ̀ lɛ̀ pɛ́ ò si sɔ́fàa lɛ́ ɓe. Sòo vɔ̀ɔ wũ-kèlè e kɛ lɛ̀ wɔ̀ɔ́ù wũ lɛ́ ɓe. Tíé wà e gbɛ̃́ĩ́, e bɛ̀i sɔ́fà e kɛ gópìà o lé.

¹⁸ Mia yí gìniì kpolà yààka zɛ̀ɛ, mia sã̀-dɔ-pɛ̀ yààka e yía e o kpolà doó-mì zɛ. Pɛ́ e zɔɔ kɛ kília, ye lɛ́ e kélɛ̀, tíé wà e gbɛ̃́ĩ́, e bɛ̀i sɔ́fà lɛ́ e kɛ gópìà sòo vɔ̀ɔ léa káa.

¹⁹ Ƃii sòo vɔ̀ɔ wà yíkɛ̀ gáàa lɛ o lé, e bɛ̀i, lɛ o woũ yí. O woũ lɛ kélɛ̀ mɛ̀nɛ lɛ́ à wũ lɛ à làa lɛ́ ɓe. Óò mia gĩ̀ĩ à ká.

²⁰ Míá yé o tó lɛ́ mia sã̀-dɔ-pɛ̀ e kéa lɛ̀ɛ́ o zɛ nɛ́ɛ, òó gbaa kã́ o kɛ-wɔ̃̀ mɔ̀. Òó gbaa tèá gbìnì pɛ yɔɔ lɛ̀ɛ mɔ̀. Ɛ́ɛ̃́ òó gbaa tèá gbìnì kɛ̀ɛ̀-wɛ́lɛ́ lɛ́ wa kɛ góò wà sévà, pɛ-kúlú ɛ̃́ɛ̃́ gɛ̀lɛ̀, e bɛ̀i yílí ká, lɛ́ òó bɛ̀i lɛ̀ gɛ̃̀ɛ̃̀, ɛ̃́ɛ̃́ òó bɛ̀i wɔ̃́ maà, ɛ̃́ɛ̃́ lɛ́ òó bɛ̀i táàa lɛ̀ɛ mɔ̀.

²¹ Ɛ́ɛ̃́ sɔ̃̀ɔ̃ lɛ́ o kɛ à kɛpìà lɛ́ e kɛ mi zɛɛ̀ wà nyìɛ̀ yɔɔ̀ yɔɔ̀ kɛɛ̀, ɛ̃́ɛ̃́ sɔ̃̀ɔ̃ yɔɔ kɛɛ̀, e bɛ̀i kã̀ã ɓoò káa, òó gbaa tèá à kɛɛ̀ ká.