Wɛ̀lɛ̀vèlésɔ̃̀ 6 - Wè-dɔ-wè Dɛɛ

Pɛ lé-taa-pɛ̀

¹ Yé e kɛ kília, m Ƃáá nyɔ̀nɔ́ɔ gɛ̃̀ áà pɛ lé-taa-pɛ̀ sálápèèlɛɛ doó-mì lé ɓò. Lɛ̀ e kɛ kília, m pɛ ɓéèe yììsɛɛ doó-mì wéè ma, áà wèè lɛ̀ gbánà lɛ́ ɓe weeá kélɛ̀, “Ì nu.”

² M lɛ̀ gɛ̃̀. Lɛ̀ ma gɛ̃̀ɛ, m sòo púlú gɛ̃̀. Mi lɛ́ e kɛ sòoa làa, sã́ã́ e kɛ à kɛ̀lɛ̀. Zòlò nɔɔ̀ e kɛ à ká à lɛ̀ɛ. À ló-kɔ̀ e kɛ lɛ̀ mi lɛ́ à kɔ̀ aà die gèlè gɔ̃ɔ̀ yía lɛ́ ɓe. E ló kɛɛ à kɔ̀ é die gèlè gɔ̃ɔ̀ yí.

³ Ƃáá nyɔ̀nɔ́ɔ e bɛ̀i, e pɛ lé-taa-pɛ̀ tò-ko-mɔ̀ zɛ̀ɛ lé ɓo. M bɛ̀i m pɛ ɓéèe tò-ko-mɔ̀ zɛ̀ɛ wéè ma zeĩ́ weeá kélɛ̀, “Ì nu.”

⁴ Sòo dò e ɓɔ zeĩ́. E kɛ sòo zóló ká. Yíkɛ̀ gáàa nɔɔ̀ e kɛá mi lɛ́ e kɛ sòo yé e kília làa lɛ̀ɛ kɛ é nu gèlè ká kpóṹ là zèe, kɛɛ mia wáà o kíe zɛ̀. Gèlè-gɔ̃-làà gɛ́í-gɛ̀ì nɔɔ̀ e kɛá à lɛ̀ɛ.

⁵ Ƃáá nyɔ̀nɔ́ɔ e bɛ̀i e pɛ lé-taa-pɛ̀ yààka-mìa lé ɓo. M bɛ̀i m pɛ ɓéèe yààka zɛ̀ɛ wéè ma zeĩ́ weeá kélɛ̀, “Ì nu.” M lɛ̀ gɛ̃̀. Lɛ̀ ma gɛ̃̀ɛ, m sòo tii gɛ̃̀. Pɛ-gɔ̃́-pɛ̀ e kɛ à táá-mì kɛ̀lɛ̀.

⁶ M pɛ lɛ́ à wéè e kɛ lɛ̀ mi wéèa ma áà gò pɛ ɓéèe yììsɛɛ fĩ̀ã̀. A gèe kélɛ̀, “I fɔ́nɔ́ lɛ́ ì bɛ̀i à mɔ̀ ɓá sɔ̀lɔ̀ ɓo lúó doó píéa, ì à nɔ ɓu kɔ́pò yí doó sɔ̃̀ɔ̃́ ká. Ɛ́ɛ̃́ zeĩ́, ì pɛ nɔ́ doóa nɔ báálè-ɓù kɔ́pò yí yààka sɔ̃̀ɔ̃́ ká. Kɛɛ yékɛ̀ í nyɔ́nɔ́ wà wã́ã́ĩ̀ o yí sìè.”

⁷ Ƃáá nyɔ̀nɔ́ɔ e bɛ̀i e pɛ lé-taa-pɛ̀ yììsɛ-mìa lé ɓo. M bɛ̀i m pɛ ɓéèe yììsɛ zɛ̀ɛ wéè ma zeĩ́ weeá kélɛ̀, “Ì nu.”

⁸ M lɛ̀ gɛ̃̀. Lɛ̀ ma gɛ̃̀ɛ, m sòo lɛ́ è fèlè ké fààlea gɛ̃̀. O kɛ à táá-mì sípìà Ga. Ɛ́ɛ̃́ zeĩ́ Hédì e kɛ nɔ́ à ko mɔ̀ ké pɛ̀lɛ́-pɛ̀lɛ́ le. O kpóṹ là yí gìnì. À pɛ̃́ɛ̃́ e kɛ yììsɛ. O yíkɛ̀ gáàa nɔ Ga wà Hédì o lɛ̀ɛ à kɔ̀ pɔ̃́ũ̀ doó là, ó mia zɛ gèlè gɔ̃ɔ̀, wà lɔ̀ɔ, e bɛ̀i yáá, ɛ̃́ɛ̃́ wà wìì nyaàa-nyaàa vɔ̀ ká.

⁹ Ƃáá nyɔ̀nɔ́ɔ e bɛ̀i e pɛ lé-taa-pɛ̀ sɔ́ɔ́li-mìa lé ɓo. M mia lɛ́ waà o zɛɛ gɛ̀ɛ̀ gɛ̃̀ sálà-ɓòà-là-pɛ̀ɛ wì. O o zɛ, ɓii o Wálà lé-wè gèe lòũ̀ ká, ɛ̃́ɛ̃́ o kélá-wè ɓoa mɔ́ɔ̀ wɔ̃̀ mɔ̀.

¹⁰ O gbɛ́ɛ́ gágà wáà gèè, “Ko Dàa-mì lɛ́ yíkɛ̀ gáàa séĩ́ lɛ i kɛ̀lɛ̀ ɓɛ. I mi púlú wà mi wánà zɛ̀ ká. Lúó aà tó wɛ̀ɛɛ̀ kɛ í mɛ̀ĩ́-sà dɔ mia lɛ́ o kpóṹ làa mɔ̀ kɛ í wɔ̃́ nyɔ́ɔ̀ɔ nɔ o lɛ̀ɛ ko zɛ wa ɓoa mɔ́ɔ̀ wɔ̃̀ mɔ̀?”

¹¹ O sɔ púlú nɔ o lɛ̀ɛ o tɔ̀ là doó doó. Wa gèe ó o fĩ́ĩ́ ɓéĩ́ dɔ ɓɛ̀lɛ̀-píé gbèĩ zɛ̀, é tóá kíli o ɓɛ́ĩ̀ yɛɓo-kɛ-mìà wà o lèe-gé vɔ̀ lɛ́ ò lo o zɛɛ̀ lɛ̀ zí o o zɛ à káa lɛ́ ɓea, o nyáá é pá nɛ́ e kíe mɔ̀.

¹² Yé e kɛ kília, m Ƃáá nyɔ̀nɔ́ɔ gɛ̃̀ áà pɛ lé-taa-pɛ̀ sáláádo-mìa lé ɓò. Lɛ̀ ma gɛ̃̀ɛ, m tã́ã̀ gɛ̃̀ áà kã̀ e kíe mɔ̀ gbáà le. Nyɛ́nɛ́ e kɛ tii bìní-bìní le lɛ̀ sɔ tii gɔ́á-gɔ̀à kpó-kpó lɛ́ ɓe. Ɛ́ɛ̃́ mɛnɛ e kɛ zóló pɔ̃́ũ̀-pɔ̃́ũ̀ lɛ̀ léà lɛ́ ɓe.

¹³ Sĩ̀ã́ã̀ŋèlè vɔ̀ o gó lɛ̀í o káá tã́ã̀, lɛ̀ féè yé à tãã̀ wá, tó fã̀ã̀ aà diea áà gò e yìlì wĩĩ́, áà kàà tã́ã̀a lɛ́ ɓe.

¹⁴ O kɔ̃́ lɛ̀í kii ká. Yé e lóa, e kɛ lɛ̀ mi lɛ́ e kii lɛ́ɛ́ kpɛ́nɛ́ e kíe ká. Tɔ̃̀ũ̀ séĩ́, e bɛ̀i sɛ́lɛ́ lɛ́ yíí nìɛ̀ lɛ à mɔ̀ɔ o séĩ́ o wɛ̀lɛɛ̀ e kɛ à ká o yàlà mɔ̀.

¹⁵ Yé e kɛ kília, sɛ́lɛ́ líé-sí-mìà lɛ́ o tã́ã̀ zèe, ɛ̃́ɛ̃́ mia wũ-là-mìà, e bɛ̀i sóyà vɔ̀ wũ-là-mìà, ɛ̃́ɛ̃́ zeĩ́ mia kpànazɛ̀ ɛ̃́ɛ̃́ mia yí gágà zɛ̀, ɛ̃́ɛ̃́ mia séĩ́ yé o tó lɛ́ o kélɛ̀ lùò vɔ̀, ɛ̃́ɛ̃́ mia yé òó gbaa kɛ lùò káa, o o dìè bĩ̀ĩ̀ tɔ̃̀ũ̀ bũ yí, e bɛ̀i gɛ̀lɛ̀ gbàa wì píé,

¹⁶ wáà gèè gɛ̀lɛ̀ wà tɔ̃̀ũ̀a nì lɛ̀ɛ kélɛ̀, “Kà dà ko là ká ko bĩ̀ĩ̀ kó gó mi lɛ́ lɛ yàá dɔ-táŋánáa làa wɛlɛ mɔ̀, ɛ̃́ɛ̃́ ká ko bĩ̀ĩ̀ Ƃáá nyɔ̀nɔ́ɔ zì wɔ̃́à-wàa-kɔ̀ mɔ̀.

¹⁷ O zì wɔ̃́à-o-wàa-lùò gbùò ɓɛ aà ɓɔ. Dé è bɛ̀i à mɔ̀ é dɔ e gã̀ mɔ̀ à wɛlɛ mɔ̀?”