Wɛ̀lɛ̀vèlésɔ̃̀ 5 - Wè-dɔ-wè Dɛɛ

Kii lɛ́ɛ́ kpíní kṹàa zɛ̀ɛ wà Ƃáá nyɔ̀nɔ́ɔ

¹ M kii lɛ́ɛ́ kpíní kṹã̀a zɛ̀ gɛ̃̀ mi lɛ́ e kɛ yàá táŋánáa làa kɔ̀ yiè kɛ̀lɛ̀. À bɛ̃̀ɛ̃ɛ̃̀ e kɛá zi pèèlɛ ká. À lé taà e kɛá pɛ lé-taa-pɛ̀ sálápèèlɛ ká.

² M Wálà là vɔ-mì yí gágà zɛ̀ gɛ̃̀, áà wɔ̃́ gèè lòũ̀ ká kélɛ̀, “Dé e kpeĩ kɛ é pɛ lé-taa-pɛ̀ɛ wí, kɛ é kii lɛ́ɛ́ kpíní kṹã̀a zɛ̀ɛ lé ɓo?”

³ Kɛɛ mi gbɛɛ lɛ̀ɛ́ gbaa kɛ ɓe lɛ̀í-sɛ̀lɛ̀ yí, e bɛ̀i kpóṹ là zèe, ɛ̃́ɛ̃́ kpóṹ là zèe wì tã́ã̀, kɛ bɛ̀i é kɛ à mɔ̀ é kíía lé ɓo á yí gɛ̃̀.

⁴ M gbóó ɓo dóo kpó-kpó ɓo, ɓii òó gbaa mi gbɛɛ gɛ̃̀ kɛ é kɛ kpeĩ é kíía lé ɓo, á yí gɛ̃̀.

⁵ Yé e kɛ kília, mia dìè-dìè vɔ̀ɔ doó-mì a gèe m lɛ̀ɛ, “Yékɛ̀ í gbóó ɓo. Lɛ̀ gɛ̃̀, Wɔ̀ɔ́ù lɛ́ è go Zúdà sùu là, lɛ́ e Dèɓé sùu-là-mì kpànazɛ̀ káa, à kɔ̀ aà die gèlè gɔ̃ɔ̀ yí. Bɛ̀i lɛ à mɔ̀ kɛ é pɛ lé-taa-pɛ̀ sálápèèlɛɛ wí, ɛ̃́ɛ̃́ kɛ é kíía lé ɓo.”

⁶ Lɛ̀ e kɛ kília, m Ƃáá nyɔ̀nɔ́ doó gɛ̃̀ dɔ̀á táŋáná zèí zɛ̀ɛ wà pɛ ɓéèe yììsɛɛ nì o zèí. Mia dìè-dìè vɔ̀ɔ o nìɛɛ̀ e kɛá o mɔ̀. Ƃáá nyɔ̀nɔ́ɔ kɛɛ̀ e kɛá lɛ̀ pɛ lɛ́ à zɛɛ̀ e kɛá. Ƃé sálápèèlɛ dɔɔ̀ e kɛá à mɔ̀. Ɛ́ɛ̃́ à nyìɛ-wɛ̀lɛ̀ e kɛ sálápèèlɛ. Nyìɛ-wɛ̀lɛ̀ e kília, lɛ́ e kɛ pɛ sálápèèlɛ lɛ́ è go Wálà kɛ̀lɛ̀, lɛ́ aà o vɔ kpóṹ là zèe lɛ̀ séĩ́ mɔ̀ɔ káa.

⁷ Ƃáá nyɔ̀nɔ́ɔ e ló e kii lɛ́ɛ́ɛ kṹ mi lɛ́ e kɛ yàá táŋánáa làa kɔ̀ yiè kɛ̀lɛ̀.

⁸ Lɛ̀ a kɛ kília, pɛ ɓéèe yììsɛɛ wà mia dìè-dìè vũ̀ pèèlɛ wɛ́lɛ́ yììsɛɛ, o pèlè gbaa Ƃáá nyɔ̀nɔ́ɔ wɛlɛ mɔ̀. Kɔ̃̀níì e kɛ o kɛ̀lɛ̀ o tɔ̀ là doò do. Ɛ́ɛ̃́ kɔ́ɓà lɛ́ à kɛɛ̀ lɛ góò káa, e kɛ o kɛ̀lɛ̀. O paà e kɛá pɛ gĩĩ yiè zɛ̀ lɛ́ e Wálà là mia nì zì sɛ̀nɛ ò ɓoa káa ká.

⁹ O tã́ dɛɛ ɓo weeá kélɛ̀, “I dóo kpeĩ kɛ í kii lɛ́ɛ́ kpíní kṹã̀a zɛ̀ɛ sí kɛ í à lé-taa-pɛ̀ɛ wí. Ƃii i zɛɛ̀ e kɛ à ká. I mia lɛ́ ò go síí-sɛ̀lɛ̀ séĩ́ là, ɛ̃́ɛ̃́ wè gbɛɛ̀ gbɛɛ gèe-mìà séĩ́ bà, e bɛ̀i, sɛ́lɛ́ gbɛɛ̀ gbɛɛ yí-mìà séĩ́, e bɛ̀i mia kpóló kɛ-kɔ̀ gbɛɛ̀ gbɛɛ zɛ̀ séĩ́ lɔ́ i léà ká Wálà lɛ̀ɛ.

¹⁰ Ƃaà o kɛ mia lɛ́ i tóò lɛ o làa dò ká, ɓáà o kɛ̀ sálà-ɓò-Wálà-mɔ̀-mìà ká, kɛ ó yɛɓo kɛ kò Wálà lɛ̀ɛ. Ɛ́ɛ̃́ óò lo tóò mia là kpóṹ là.”

¹¹ M bɛ̀i, m lɛ̀ gɛ̃̀. M Wálà là vɔ-mìà wáá búnù-búnùzɛ̀ lɛ́ òó bɛ̀i à mɔ̀ ó o lónía wéè ma. O nìɛɛ̀ e kɛá táŋánáa wà pɛ ɓéèe yììsɛò, e bɛ̀i mia dìè-dìè vɔ̀ɔ o ká.

¹² O wéè áà wɛ̀lɛ̀ lɛ̀í weeá kélɛ̀, “Ƃáá nyɔ̀nɔ́ lɛ́ à zɛɛ̀ e kɛáa lɛ dóo kpeĩ kɛ é yíkɛ̀ gáàa, wà mi kɛ̀-kpànazɛ̀-pɛ̀, gíkã́ ɛ̃́ɛ̃́ zeĩ́ mɛ́-kɛ̀-gágà, ɓɛ̀lɛyà, mi tɛ̀nɛɛ̀ wà tɔ́-ɓɔ o sɔ̀lɔ̀ ɓo.”

¹³ Pɛ séĩ́ lɛ́ à kɛɛ̀ e kɛá lɛ̀í, e bɛ̀i kpóṹ là zèe ɛ̃́ɛ̃́ kpóṹ là zèe wì tã́ã̀, ɛ̃́ɛ̃́ pɛ séĩ́ lɛ́ à kɛɛ̀ e kɛá mɛ̀ĩ́ bà, ɛ̃́ɛ̃́ pɛ séĩ́ lɛ́ e lɛ̀ séĩ́ mɔ̀ɔ, m o wéè ma kélɛ̀, “Mi tɛ̀nɛɛ̀ wà ɓɛ̀lɛyà, tɔ́-ɓɔ ɛ̃́ɛ̃́ yíkɛ̀ gáàa, è kɛ mi lɛ́ lɛ yàá táŋánáa làa, ɛ̃́ɛ̃́ Ƃáá nyɔ̀nɔ́ɔ kɛ̀lɛ̀ tòá kíli wɔ́lɔ́-wɔ́lɔ́ ká.”

¹⁴ Pɛ ɓéèe yììsɛɛ wa gèe kélɛ̀, “É kɛ kíli.” Mia dìè-dìè vɔ̀ɔ o pèlè tã́ã̀ wáà gbìnì Wálà lɛ̀ɛ.