Wɛ̀lɛ̀vèlésɔ̃̀ 4 - Wè-dɔ-wè Dɛɛ

Gbìnì-Wálà-lɛ̀ɛ-kɔ̀ lɛ́ e lɛ̀ía

¹ Lɛ̀ e kɛ kília, m pɛ dò gɛ̃̀ zeĩ́. M ká lé ɓoòa zɛ̀ gɛ̃̀ lɛ̀í. Ɛ́ɛ̃́ wéé lɛ́ maà ma do, lɛ́ e kɛ kélɛ̀ túlú wéè lɛ́ ɓea, ma ma zeĩ́ áà gèè kélɛ̀, “Ì nu lɛ̀í zèe ḿ pɛ lɛ́ laa mɔ̀ é kɛ wɔ̃́ yé e kéa mɛ̀ĩ́a zɔ̃̀ɔ̃̀ i lɛ̀ɛ.”

² Nɔ́ zá lea, Gɛ̀ɛ̀ Púlú e kɛ m là. Lɛ̀ gɛ̃̀, dɔ-táŋáná e kɛ lɛ̀í yi. Mi dò e kɛ yàá à là.

³ Mi lɛ́ e kɛ yàá làa wɛlɛ yí mɛ́ nyɔ́nɔ́ e kɛ ɓɔpìà lɛ̀ gɛ̀lɛ̀ kpàna-kpànazɛ̀ lɛ́ ò si zásépà wà kànélìàa o zì mɛ́ ɓɔ-kɔ̀ lɛ à káa lɛ́ ɓe. Gbèĩ́-ɓɛ̀lɛ̀ nìɛɛ̀ e kɛá táŋáná e kília mɔ̀. À zì bɛ̃̀ɛ̃-kɔ̀ɔ e kɛ lɛ̀ gɛ̀lɛ̀ kpànazɛ̀ lɛ́ ò si ɛ́málòa bɛ̃̀ɛ̃-kɔ̀ lɛ́ ɓe.

⁴ Dɔ-táŋáná vũ̀ pèèlɛ wɛ́lɛ́ yììsɛ nìɛɛ̀ e kɛá táŋáná doó e kília mɔ̀ déĩ́ le. Ɛ́ɛ̃́ zeĩ́, mia dìè-dìè vũ̀ pèèlɛ wɛ́lɛ́ yììsɛ o kɛ yàá táŋáná vɔ̀ o kília là. O mɔ̀-sɔ̀ɔ e kɛ púlú, ɛ̃́ɛ̃́ zòlò lɛ́ à kɛɛ̀ lɛ góò káa, e kɛ o wĩĩ́.

⁵ Lɛ̀í-kɛ-gɛ́lɛ́ áà kɛ̀ wɛ̃̀ĩ̀-wɛ̃̀ĩ̀ le, áà gò táŋáná zèí zɛ̀ɛ píé, e bɛ̀i, pɛ wéè, ɛ̃́ɛ̃́ lɛ̀í wéè áà gò à lɛ̀ mɔ̀ nɔ́ kíli. Kpã́ã̀ kṹàa sálápèèlɛ e kɛ dɔ̀á táŋáná e kília wɛlɛ mɔ̀ áà kũ̀. Pɛ sálápèèlɛ lɛ́ è go Wálà kɛ̀lɛ̀ɛ, o lɛ́ o kíli ɓɛ.

⁶ Táŋáná e kília wɛlɛ mɔ̀ɔ pɛ dò lɛ́ à ɓɔɔ̀ lɛ mɛ̀ĩ́ lɛ́ à kɛɛ̀ e kɛá gálásì káa bàa, e kɛ yí. E kɛ zéĩ́-zèĩ̀ lɛ̀ laa-wɛ́lɛ́ lɛ́ ɓe. Pɛ ɓéèe yììsɛ e kɛ táŋáná e kília sɛ̃́ĩ́ mɔ̀ doó doó. Pɛ ɓéèe e kília o nyìɛ-wɛ̀lɛ̀ nìɛɛ̀ e kɛá o líé wà o zízàá mɔ̀ fèkpè-fèkpè le.

⁷ Pɛ ɓéèe bèĩzɛ̀ɛ e kɛ kélɛ̀ wɔ̀ɔ́ù lɛ́ ɓe. À tò-ko-mɔ̀ɔ e kɛ kélɛ̀ dìì nyɔ̀nɔ́ lɛ́ ɓe. À kpolà yààka zɛ̀ɛ wɛlɛ e kɛ kélɛ̀ gɔ̃ wɛlɛ lɛ́ ɓe. À yììsɛ zɛ̀ɛ e kɛ kélɛ̀ kɔ̀a wɛ̀lɛɛ̀ɛ zɛ̀ lɛ́ ɓe.

⁸ Pɛ ɓéèe yììsɛ e kília, o gbã e kɛ o mɔ̀ sáláádo sáláádo. O mɛ́ ɓaà e kɛá o gbĩ-kpàla wà o yí zàá mɔ̀ o nyìɛ-wɛ̀lɛ̀ ká fèkpè-fèkpè le. O kɛ tã́ ɓopìà bĩ́ ká wáà ɓò nyɛ́nɛ́ĩ́. Wà tã́a lɛ́ e kéa, “Mi púlú, mi púlú, mi púlú, ye lɛ́ e ko Dàa-mì Wálà lɛ́ yíkɛ̀ gáàa séĩ́ lɛ à kɛ̀lɛ̀ɛ káa. E kɛ ɓe, lɛ́ lɛ ɓe, ɛ̃́ɛ̃́ lɛ́ lɛ ɓe é nua.”

⁹ Pɛ ɓéèe yììsɛɛ óò mi lɛ́ lɛ yàá dɔ-táŋánáa yí, lɛ́ lɛ ɓe tòá kíli wɔ́lɔ́-wɔ́lɔ́ káa tɔ́ ɓɔ, ɛ̃́ɛ̃́ wáà ɓɛ̀lɛyà nɔ̀ à lɛ̀ɛ ɛ̃́ɛ̃́ wáà à zúo ɓò. Yé waà kɛ kília,

¹⁰ mia dìè-dìè vũ̀ pèèlɛ wɛ́lɛ́ yììsɛɛ, óò dà mi lɛ́ lɛ yàá táŋánáa yía wɛlɛ mɔ̀, wáà gbìnì à lɛ̀ɛ. À ye lɛ́ lɛ ɓe tòá kíli wɔ́lɔ́-wɔ́lɔ́ káa. Óò wà zòlò e kɛ o wĩĩ́a dùò táŋánáa dĩ́ mɔ̀, wáà gèè,

¹¹ “Ko Dàa-mì wà kò Wálà. I dóo kpeĩ kɛ í tɔ́-ɓɔ wà ɓɛ̀lɛyà ɛ̃́ɛ̃́ yíkɛ̀ gáàa sɔ̀lɔ̀ ɓo. Ƃii ɓi lɛ́ i pɛ séĩ́ kɛɛ. Ɛ́ɛ̃́ i zì wèè-wɔ̃́-mɔ̀ yí zàáa, ye lɛ́ o kɛɛ̀ e kɛá, ɛ̃́ɛ̃́ lɛ́ kɛ̀ɓe nɔɔ̀ e kɛ à ká o lɛ̀ɛ.”