Wɛ̀lɛ̀vèlésɔ̃̀ 3 - Wè-dɔ-wè Dɛɛ

Wè-vɔ-wèa yé è lo Sádàa

¹ “Wɔ̃́ e kéa bɛ̃̀ɛ̃ Wálà-mìà lɛ́ o Sádàa wà vɔ-mì píé. À bɛ̃̀ɛ̃ weeá kélɛ̀, “Mi lɛ́ pɛ sálápèèlɛ lɛ́ è go Wálà kɛ̀lɛ̀, ɛ̃́ɛ̃́ sĩ̀ã́ã̀ŋèlè sálápèèlɛ lɛ à kɛ̀lɛ̀ɛ, wɔ̃́ lɛ́ à gèea, gɛ̃̀ e ké. Ḿm̀ i kɛ-wɔ̃̀ dɔ. Ḿm̀ à yí dɔ óò à gèe kélɛ̀ i ɓéèe yé bɛ̃̀ɛ̃ i gaà lɛɛ ká.

² À mɔ́ɔ̀ wɔ̃̀ mɔ̀ɔ, vùò í pɛ lɛ́ lɛ tĩã́ i kɛ̀lɛ̀ɛ wɛ́lɛ́ dà à yí, yékɛ̀ é ga kpó-kpó ɓo. Ƃii wɔ̃́ lɛ́ ɓaà à kɛɛ, maà à gɛ̃̀ kélɛ̀ ye wá nɛ́ kpeĩ m̀ Wálà wɛlɛ mɔ̀.

³ À mɔ́ɔ̀ wɔ̃̀ mɔ̀ɔ, i zò è vùò pɛ lɛ́ wa zɔ̃̀ɔ̃̀ i lɛ̀ɛ, ɛ̃́ɛ̃́ zi lɛ́ i à ma à káa ká. Ì à kɛ, ɛ̃́ɛ̃́ í i sɔ̃̀ɔ̃ mɛ́ vɔ̀ɔ. Í gɔ̃̀á vùòa, ḿm̀ lo nuù i là lɛ̀ kã̀ã-mì lɛ́ ɓe. Ɛ́ɛ̃́ ìí ló bɛ̃̀ɛ̃ lúó lɛ́ m̀ lo nuù à káa dɔɔ̀.

⁴ Kɛɛ mia wɛ́lɛ́ ɓéĩ́ o ka bà Sádà yia, òó wà sɔ́ɔ mɛ́ lilì kṹ nɛ́. Sɔ púlú lɛ́ɛ̀ lo kɛɛ̀ o mɔ̀, kò ye nì kɔ́áà tàà-kíe-píé kɛ̀ à yí, ɓii o kpeĩa mɔ́ɔ̀ wɔ̃̀ mɔ̀.

⁵ Mi lɛ́ à kɔ̀ diè lɛ gèlè gɔ̃ɔ̀ yía, sɔ púlú lɛ́ɛ̀ lo kɛɛ̀ à mɔ̀ zi nɔ́ doóa ká. Ɛ́ɛ̃́ m̀ḿ ló à tɔ́ ɓoò kɛ̀ɓe-kiia yí. Ḿm̀ lo à gèeè m̀ pɔɔ̀ lɛ́ e à ká m Dàa wà là vɔ-mìà wɛlɛ mɔ̀.

⁶ “Mi lɛ́ à tóó lɛ à wũ mɔ̀ɔ, è e tóó dɔ wɔ̃́ lɛ́ Gɛ̀ɛ̀ Púlú à gèe Wálà-mìàa lɛ̀ɛ mɔ̀.

Wè-vɔ-wèa yé è lo Felèdáfìàa

⁷ “Wɔ̃́ e kéa bɛ̃̀ɛ̃ Wálà-mìà lɛ́ o Felèdáfìàa wà vɔ-mì píé. À bɛ̃̀ɛ̃ weeá kélɛ̀, “Mi lɛ́ lɛ púlú, ɛ̃́ɛ̃́ wánà zɛ̀, lɛ́ kíì lɛ́ e kɛ Dèɓé là pɛ káa lɛ à kɛ̀lɛ̀, lɛ́ è pɛ lé ɓo, lɛ́ mi gbɛɛ lɛ̀ɛ́ bɛ̀i à lé taà, ɛ̃́ɛ̃́ lɛ́ è pɛ lé tàà, lɛ́ mi gbɛɛ lɛ̀ɛ́ bɛ̀i à lé ɓoòa, wɔ̃́ lɛ́ à gèea gɛ̃̀ e ké.

⁸ Ḿm̀ i kɛ-wɔ̃̀ dɔ. Ì i tóó dɔ. Maà ká lé ɓo i wɛlɛ mɔ̀. Ɛ́ɛ̃́ mi gbɛɛ lɛ̀ɛ́ bɛ̀i ká e kília lé taà. Ḿm̀ à yí dɔ kélɛ̀ yíkɛ̀ gáàa ɓéĩ́ lɛ i kɛ̀lɛ̀. Ƃaà m wéè kɛ, ɛ̃́ɛ̃́ ìí m tɔ́ tèé ɓo do.

⁹ Ì i tóó dɔ. Ḿm̀ lo à kɛɛ̀ tó mia kù lɛ́ o Sétɔ̃̀ là mia nì ká, lɛ́ ò nɛ̀ kɛ̀ wáà gèè o Zúù-mìà ká, lɛ́ o wá mɔṹ à káa, ḿm̀ lo à kɛɛ̀ ó nu ka líé, wáà gbìnì ka gã̀ dṹɔ̃̀. Óò lo à yí dɔɔ̀ kélɛ̀ ka lɔ̀ kpɔ́ɔ̀ lɛ m mɔ̀.

¹⁰ Yé ma gèe i lɛ̀ɛ í i zò kṹ tã́ã̀a, lɛ́ ɓa kɛ kília, ḿm̀ lo i laà wɔ̃́ nyɔ́ɔ̀ɔ gɛ̃̀-lùò lɛ́ lɛ nupìà kpóṹ là zèe lɛ̀ séĩ́ mɔ̀, kɛ é kpóṹ là zèe mìà yí dã́a kɛ̀lɛ̀.

¹¹ Ḿm̀ lo kɛɛ̀ nupìà dɛɛ ká. Ì i kɔ̀ kùnù pɛ lɛ́ lɛ i kɛ̀lɛ̀ɛ mɔ̀, yékɛ̀ mi gbɛɛ é i fɔ́nɔ́ lɛ́ ì lo à gɛ̃̀ɛ̃̀, lɛ́ e zòlò káa, yékɛ̀ é à kṹ i kɛ̀lɛ̀.

¹² Mi lɛ́ à kɔ̀ diè lɛ gèlè gɔ̃ɔ̀ yía, ḿm̀ lo à kɛɛ̀ m̀ Wálà là ká gɛ̀nɛ̀-yìlì ká. Ɛ́ɛ̃́ lɛ̀ɛ́ ló góò gbaa ká e kília wì. Ḿm̀ lo m̀ Wálà tɔ́ bɛ̃̀ɛ̃ɛ̃̀ à mɔ̀. Ɛ́ɛ̃́ ḿm̀ lo m̀ Wálà là sɛ́lɛ́ tɔ́ lɛ́ ò si Zùlúsàlɛ̀ dɛɛ-mì, lɛ́ è lo góò lɛ̀í m̀ Wálà kɛ̀lɛ̀ɛ tɔ́ bɛ̃̀ɛ̃ɛ̃̀ à mɔ̀. Ɛ́ɛ̃́ zeĩ́, ḿm̀ lo m tɔ́ dɛɛ bɛ̃̀ɛ̃ɛ̃̀ à mɔ̀.

¹³ “Mi lɛ́ à tóó lɛ à wũ mɔ̀ɔ, è e tóó dɔ wɔ̃́ lɛ́ Gɛ̀ɛ̀ Púlú à gèe Wálà-mìàa lɛ̀ɛ mɔ̀.

Wè-vɔ-wèa yé è lo Leodòsíàa

¹⁴ “Wɔ̃́ e kéa bɛ̃̀ɛ̃ Wálà-mìà lɛ́ o Leodòsíàa wà vɔ-mì píé. À bɛ̃̀ɛ̃ weeá kélɛ̀, “Mi lɛ́ ò si ‘É kɛ kíli’ lɛ́ lɛ kélá zò-dɔ̀à-mɔ̀ zɛ̀ ɛ̃́ɛ̃́ wánà zɛ̀ ká, lɛ́ pɛ séĩ́ lɛ́ Wálà a kɛɛ è go à kɛ̀lɛ̀ɛ, wɔ̃́ lɛ́ à gèea gɛ̃̀ e ké.

¹⁵ Ḿm̀ i kɛ-wɔ̃̀ dɔ. Ƃi wá dɔ́ɔ́lɔ́ ɛ̃́ɛ̃́ ɓi wá mɔṹ tíèe. Zi sùu kpɛɛ̀ lɛ́ ì kɛ̀á dɔ́ɔ́lɔ́, ɛ̃́ɛ̃́ ì kɛ̀á tíèea, à lɔ̀ áá kɛɛ̀á m mɔ̀ ké.

¹⁶ I kélɛ̀ yíí fɛ́í-fɛ̀ì lɛ́ ɓe. Ƃi wá dɔ́ɔ́lɔ́ ɛ̃́ɛ̃́ ɓi wá tíèe. À mɔ́ɔ̀ wɔ̃̀ mɔ̀ɔ, ḿm̀ lo i suò tã́ã̀ í gó m lé.

¹⁷ Ƃáà gèe weeá kélɛ̀, ‘M kpànazɛ̀. Pɛ lɛ m kɛ̀lɛ̀. Pɛ lɛ́ m̀ nàà à káa séĩ́ lɛ m kɛ̀lɛ̀.’ Kɛɛ zi lɛ́ i à ká zò-dà-zízàá zɛ̀ ɛ̃́ɛ̃́ zi lɛ́ i à ká yéĩ̀zɛ̀ɛ, ìí à dɔ. Pɛ wá i kɛ̀lɛ̀, ɛ̃́ɛ̃́ i nyìɛ káà lɛ, e bɛ̀i, i i kpã́ã́ ká.

¹⁸ À mɔ́ɔ̀ wɔ̃̀ mɔ̀ɔ, ḿm̀ lìè-wè dɔ i lɛ̀ɛ kɛ í góò lɛ́ à bà ɓoò lɛ tíé káa lɔ́ m kɛ̀lɛ̀, kɛɛ é i kɛ kpànazɛ̀. Ɛ́ɛ̃́ zeĩ́a, ì sɔ púlú lɔ́, kɛ í i mɛ́ sí à ká, kɛɛ i kpã́ã́ yɛ́lɛ̀ yɛ́lɛ̀ zɛ̀ ɓɛ là é kpaa. Ɛ́ɛ̃́ zeĩ́, ì nyìɛ̀-yíí dò lɔ́ ɓá káá i nyìɛ, kɛ í lɛ̀ gɛ̃̀.

¹⁹ Mia lɛ́ o lɔ̀ kpɔ́ɔ̀ lɛ m mɔ̀ɔ, ḿm̀ wèè o lɛ̀ɛ máà o kũ̀ gágà. À mɔ́ɔ̀ wɔ̃̀ mɔ̀ɔ, fã̀ã́-wàà è kɛ i yí ɓáà i sɔ̃̀ɔ̃ mɛ́ vɔ̀ɔ̀.

²⁰ Ì i tóó dɔ. M dɔ̀á ká lé mɔ̀ máà lé mɛ̀. Yé mi dò aà m wéè ma lɛ́ aà ká lé ɓoa, ḿm̀ lo wàà à píé kɛ́ì, tó kò ye ko pɛ ɓèlè e kíe là.

²¹ Mi lɛ́ à kɔ̀ diè lɛ gèlè gɔ̃ɔ̀ yía, ḿm̀ lo yíkɛ̀ gáàa nɔɔ̀ à lɛ̀ɛ kɛ kò ye kó yà ko kíe sɔ́nɔ́ m̀ dɔ-táŋáná là, lɛ̀ zí m kɔ̀ aà die à ká gèlè gɔ̃ɔ̀ yí, lɛ́ kò m Dàa ko yàá ko kíe sɔ́nɔ́ à zì dɔ-táŋáná làa lɛ́ ɓe.

²² “Mi lɛ́ à tóó lɛ à wũ mɔ̀ɔ, è e tóó dɔ wɔ̃́ lɛ́ Gɛ̀ɛ̀ Púlú à gèe Wálà-mìàa lɛ̀ɛ mɔ̀.”