Wɛ̀lɛ̀vèlésɔ̃̀ 19 - Wè-dɔ-wè Dɛɛ

¹ Yé e kɛ kília, m wéé gágà lɛ́ à ɓɔɔ̀ e kɛá mia gbũ gbùò zɛ̀ wéè bàa ma lɛ̀í weeá kélɛ̀, “Hálélúyà. La-ɓo, wà tɔ́-ɓɔ, e bɛ̀i yíkɛ̀ gáàa lɛ kò Wálà là pɛ ká.

² Mɛ̀ĩ́-sà lɛ́ à ɓoa lɛ kpeĩ ɛ̃́ɛ̃́ wánà zɛ̀ kpó-kpó ɓo. Aà mɛ̀ĩ́-sà káá lee lɛ́ è e dìè lɔ̀ɔ̀ dɔ nɔ́ teele, lɛ́ e kɛ kpóṹ là zèe sìèpìà à zì sɔ̃̀ɔ̃ yɔɔ e kɛ à kɛpìàa káa wĩĩ́. Wálà aà wɔ̃́ nyɔ́ɔ̀ɔ kpɔ́ à mɔ̀ là yɛɓo-kɛ-mìà léà a kááa mɔ́ɔ̀ wɔ̃̀ mɔ̀.”

³ O bɛ̀i o gbɛ́ɛ́ weeá kélɛ̀, “Hálélúyà. Gélé à ɓoa, à mɔ́ɔ̀ tíé-gbɛ̃́ĩ́ lɛ lópìà lɛ̀í tòá kíli wɔ́lɔ́-wɔ́lɔ́ ká.”

⁴ Mia dìè-dìè vɔ̀ vũ̀ pèèlɛ wɛ́lɛ́ yììsɛɛ, ɛ̃́ɛ̃́ pɛ ɓéèe vɔ̀ yììsɛɛ, o pèlè wáà gbìnì Wálà lɛ́ e kɛ yàá dɔ-táŋáná làa lɛ̀ɛ weeá kélɛ̀, “É kɛ kíli. Hálélúyà.”

Ƃáá nyɔ̀nɔ́ɔ là lee-sí-kpílì

⁵ Mi wéè dò e gó dɔ-táŋánáa là weeá kélɛ̀, “Mia séĩ́ lɛ́ ka Wálà là yɛɓo-kɛ-mìà káa, kà kò Wálà tɔ́ ɓɔ. Ɛ́ɛ̃́ mia lɛ́ kà tùò à lɛ̀ɛ, ká kɛ bɛ̃̀ɛ̃ kpànazɛ̀ ɛ̃́ɛ̃́ fĩ́ĩ́nyɛ zɛ̀ɛ, kà à tɔ́ ɓɔ.”

⁶ Yé e kɛ kília, m wéé lɛ́ à ɓɔɔ̀ e kɛá mia gbũ gbùò zɛ̀ wéè bàa ma. E kɛ lɛ̀ yíí búnùzɛ̀ tɛ́lɛ́ vĩ̀, ɛ̃́ɛ̃́ gbánà wéè gágà zɛ̀ lɛ́ ɓe. Wáà wèè weeá kélɛ̀, “Hálélúyà. Ƃii mia Dàa-mì lɛ́ e kò Wálà lɛ́ yíkɛ̀ gáàa séĩ́ lɛ à kɛ̀lɛ̀ɛ lɛ mia séĩ́ líé sípìà.

⁷ Kɔa gé è li, ɛ̃́ɛ̃́ kɔ́áà géli kɛ̀. Kɔ̀à tɔ́-ɓɔ nɔ à lɛ̀ɛ. Ƃii Ƃáá nyɔ̀nɔ́ɔ là lee-sí-lùò aà ɓɔ. Ɛ́ɛ̃́ léé e kília aà e dìè pɛ̀ kɛ wɔ̃́ sùua mɔ́ɔ̀ wɔ̃̀ mɔ̀.

⁸ Waà sɔ púlú lɛ́ è ɓɔ zãã lea nɔ à lɛ̀ɛ, kɛ é e mɛ́ sí à ká.” (Sɔ púlú e kília lɛ́ e Wálà là mia nì kɛ-wɔ̃̀ kpeĩ kɛɛ̀ káa.)

⁹ Wálà là vɔ-mìà a gèe m lɛ̀ɛ, “Ì wɔ̃́ e kéa bɛ̃̀ɛ̃. Zò géli lɛ mia lɛ́ waà o súo kɛ Ƃáá nyɔ̀nɔ́ɔ là lee-sí-kpìlìa làa kɛ̀lɛ̀.” A gèe zeĩ́, “Wéé wánà zɛ̀ lɛ́ è go Wálà píéa lɛ́ e kéa.”

¹⁰ M pèlè gbaa à gã̀ dṹɔ̃̀ kɛ ḿ gbini à lɛ̀ɛ. Kɛɛ a gèe m lɛ̀ɛ, “Yékɛ̀ ɓá kɛ kíli. Zí nɔ́ kà i lèe-gé vɔ̀ lɛ́ ò Zízɛ̀ là kélá-wè ɓoa ka à ká yɛɓo-kɛ-mìà káa, zí nɔ́ doóa lɛ́ m à káa. Ì gbini Wálà lɛ̀ɛ.” Ƃii zí nɔ́ Wálà è wɔ̃́ kàà à ká là dɔ̀-lé-là-mìà léa, zí nɔ́ doóa lɛ́ è wɔ̃́ kàà à ká Zízɛ̀ là kélá vɔ̀ léa.

Mi lɛ́ lɛ yàá sòo púlúa làa

¹¹ Yé e kɛ kília, m lɛ̀í lé ɓoòa zɛ̀ gɛ̃̀. Sòo púlú doó e kɛ yí. Mi lɛ́ è à tààa óò si Mi Zò-dɔ̀à-mɔ̀ zɛ̀ ɛ̃́ɛ̃́ Mi Wánà zɛ̀. Yé aà mɛ̀ĩ́-sà ɓo, ɛ̃́ɛ̃́ lɛ́ aà gèlè gɔ̃ɔ, láà kɛ̀ kpeĩ wɔ̃́ kɛ-zì ká.

¹² À nyìɛ-wɛ̀lɛ̀ e kɛ kélɛ̀ tíé kṹã̀a lɛ́ ɓe. Zòlò búnù-búnùzɛ̀ yàaà e kɛá à wĩĩ́. Tɔ́ dò bɛ̃̀ɛ̃ɛ̃̀ e kɛá à mɔ̀, kɛɛ mi gbɛɛ lɛ̀ɛ́ tɔ́ e kília dɔ. À dìè-tĩ́ lɛ́ nɔ́ è à dɔɔ.

¹³ Sɔ lɛ́ e kɛ à mɔ̀ɔ, à kṹũ̀ e kɛá léà ká pɔ̀pɔ̀ le. À tɔ́ lɛ́ ò si à káa lɛ́ e kélɛ̀, “Wálà Lé-wè.”

¹⁴ Gèlè-gɔ̃-mìà lɛ́ o lɛ̀ía o tó à píé. Sɔ púlú sélé tété e kɛ o mɔ̀, o yàá ká sòo púlú púlú là, wáà lò.

¹⁵ Gèlè-gɔ̃-làà líé zɛ̀ dò lɛ́ à kɔ̀ è lo dìè à ká sɛ́lɛ́ gbɛɛ̀ gbɛɛ yí-mìà làa, e kɛ dɔ̀á à lé. Lɛ́ɛ̀ lo o líé síì kpó-kpó ɓo lɛ̀ mi lɛ́ pɛ-kúlú kpuú laa kɛ̀lɛ̀ɛ lɛ́ ɓe. Ɛ́ɛ̃́ lɛ́ɛ̀ lo ɓɛ̀lɛ̀-wɛ́lɛ́ ɓɛɛ ɓolò à yíí-ɓòà-yí-pɛ̀ lɛ́ e Wálà lɛ́ yíkɛ̀ gáàa séĩ́ lɛ à kɛ̀lɛ̀ɛ, là wɔ̃́à-wàa-kɔ̀ gágà ɓɛ káa yí.

¹⁶ Tɔ́ dò bɛ̃̀ɛ̃ɛ̃̀ e kɛá à gbã́ã́ wà là sɔ́ɔ mɔ̀. Tɔ́ e kília lɛ́ e kélɛ̀, “Sɛ́lɛ́ líé-sí-mìà bɛ̃̀ɛ̃ zì Líé-sí-mì, ɛ̃́ɛ̃́ mia dàa-mìà séĩ́ bɛ̃̀ɛ̃ zì Dàa-mì.”

¹⁷ Yé e kɛ kília, m Wálà là vɔ-mì doó gɛ̃̀ dɔ̀á nyɛ́nɛ́ wì. E gbɛ́ɛ́ gágà mɔ̀ɔ̀ vɔ̀ lɛ́ o kɛ diepìà lɛ̀í gbèkènia o là weeá kélɛ̀, “Kà nu ká pá ka kíe mɔ̀ Wálà là kpílì kpànazɛ̀ ɓɛ mɔ́ɔ̀ wɔ̃̀ mɔ̀.

¹⁸ Kà nu ká sɛ́lɛ́ líé-sí-mìà, e bɛ̀i sóyà vɔ̀ wũ-là-mìà, ɛ̃́ɛ̃́ mia yí gágà zɛ̀ nɔ̀ɛ ɓèlè. Ɛ́ɛ̃́ zeĩ́, kà nu ká sòo wà e táá-mìà vɔ̀ nɔ̀ɛ ɓèlè. Kà nu zeĩ́ mia séĩ́ lɛ́ o lùò ká, ɛ̃́ɛ̃́ o yé o wá lùò ká, mia fĩ́ĩ́nyɛ zɛ̀ ɛ̃́ɛ̃́ o yé o kpànazɛ̀ɛ nì nɔ̀ɛ ɓèlè.”

¹⁹ Lɛ̀ e kɛ kília, m luú-wììa wà kpóṹ là zèe líé-sí-mìà, ɛ̃́ɛ̃́ wà wà gèlè-gɔ̃-mìàa o gɛ̃̀ o pà-kíe-mɔ̀ zɛ̀ ká. O pá o kíe mɔ̀ kɛ ó gèlè gɔ̃ mi lɛ́ è sòo tààa, wà là gèlè-gɔ̃-mìà o ká.

²⁰ Luú-wììa kṹũ̀ e kɛá gèlè námáná ká. E bɛ̀i, o gɔ̃ lɛ́ è e dìè si dɔ̀-Wálà-lé-là-mì lɛ́ ye wá mɔṹ à ká, lɛ́ e wɔ̃́ kpàlézɛ̀ kɛ à wɛlɛ mɔ̀ɔ kṹ nɔ́ kíli. (Wɔ̃́ kpàlézɛ̀ e kília kɛɛ̀ yía, aà mia lɛ́ luú-wììa là pɛ píé e kɛ o mɔ̀, ɛ̃́ɛ̃́ o yé waà gbini à bĩ́ lɛ̀ɛ bèkɛ̀ ɓo à kɛɛ̀ yí.) O pèèlɛɛ o o dùò e ɓéèe ká tíé-pà. Tíé e kília e kɛ kṹpìà sɔ́fà mɔ̀.

²¹ Mia yé o tóa o o zɛ gèlè-gɔ̃-làà lɛ́ à dɔɔ̀ lɛ mi lɛ́ è sòoa tààa léa ká. Mɔ̀ɔ̀ vɔ̀ɔ séĩ́-séĩ́ o míáa nɔ̀ɛ ɓèlè o fĩ́ĩ́ e nyɛ.