Wɛ̀lɛ̀vèlésɔ̃̀ 17 - Wè-dɔ-wè Dɛɛ

Lee lɛ́ è e dìè lɔ̀ɔ̀ dɔ nɔ́ teelea

¹ Lɛ̀ e kɛ kília, Wálà là vɔ-mìà sálápèèlɛ lɛ́ kɔ́ɓà sálápèèlɛ e kɛ o kɛ̀lɛ̀ɛ, o doó-mì e nu áà gèè m lɛ̀ɛ, “Nu zèe kɛɛ ḿ zi lɛ́ ò lo wɔ̃́ nyɔ́ɔ̀ɔ kɛɛ̀á lee lɛ́ è e dìè lɔ̀ɔ̀ dɔ nɔ́ teelea káa, kɛ ḿ zɔ̃̀ɔ̃̀ i lɛ̀ɛ. Léé e kília yàà lɛ yíí kù gbùò zɛ̀ gbɛ̃̀-kíe-mɔ̀ pìà.

² Kpóṹ là zèe líé-sí-mìà wà léé e kília nì o sɔ̃̀ɔ̃ yɔɔ kɛ. Ɛ́ɛ̃́ mia lɛ́ o kpóṹ là zèea waà là wã́ã́ĩ̀ lɛ́ e là sɔ̃̀ɔ̃ yɔɔ kɛɛ̀ káa mi, ɛ̃́ɛ̃́ lɛ gbaa o kɛpìà.”

³ Gɛ̀ɛ̀ Púlú e kɛ m là, ɛ̃́ɛ̃́ Wálà là vɔ-mì e ló m ká yɛ̀í là. M lee doó lɛ́ e kɛ yàá luú-wìì zóló dò làa gɛ̃̀ yi. Wìì e kília tɔ́ yɔɔ̀ yɔɔ̀ bɛ̃̀ɛ̃ɛ̃̀ e kɛ à ká à là déĩ́ le. À wũ-kèlè e kɛ sálápèèlɛ. Ɛ́ɛ̃́ à ɓé e kɛ vũ̀ doó.

⁴ Sɔ́ e kɛ lééa mɔ̀ɔ e kɛ sɔ zóló kɛ-kɔ̀ gbɛɛ̀ gbɛɛ zɛ̀ ká. Mia mɛ́-sí-pɛ̀ doò do e kɛ à mɔ̀. O lɛ́ o kélɛ̀ góò, e bɛ̀i gɛ̀lɛ̀ sɔ̃̀ɔ̃́ gbùò zɛ̀, ɛ̃́ɛ̃́ pɛ ɓóŋóló-ɓóŋóló púlú púlú lɛ́ ò kpɛ̃ã̀ kɛáa káa. Góò kɔ́pò e kɛ à kɛ̀lɛ̀. À paà e kɛá wɔ̃́ yɔɔ̀ yɔɔ̀ ɛ̃́ɛ̃́ wɔ̃́ lilì kṹã̀a zɛ̀, lɛ́ e à zì sɔ̃̀ɔ̃ yɔɔ lɛ́ aà kɛɛ káa ká.

⁵ Tɔ́ lɛ́ à yí bĩ̀ĩĩ̀ e kɛáa bɛ̃̀ɛ̃ɛ̃̀ e kɛá à pelà. Tɔ́ e kília lɛ́ e kélɛ̀, “Bábɛ́lɔ́ũ̀ gbùò ɓɛ. Loà séĩ́ lɛ́ ò o dìè lɔ̀ɔ̀ dɔ, ɛ̃́ɛ̃́ mia lɛ́ ò wɔ̃́ yɔɔ̀ yɔɔ̀ lilì kṹã̀a zɛ̀ kɛ̀ kpóṹ là zèea, o lèe lɛ́ ɓɛ.”

⁶ Ma yí dɔ gbaa kélɛ̀ lééa aà Wálà là mia nì, ɛ̃́ɛ̃́ mia lɛ́ waà o zɛ Zízɛ̀ mɔ́ɔ̀ wɔ̃̀ mɔ̀ɔ o léà mi. Ɛ́ɛ̃́ lɛ gbaa à kɛpìà. Lɛ̀ ma gɛ̃̀ɛ, m lé kpó-kpó paà e kɛá.

⁷ Kɛɛ Wálà là vɔ-mìa a gèe m lɛ̀ɛ, “Mɛ́ e kɛ lɛ́ lé-pa sùua lɛ i mɔ̀? Ḿm̀ lo wɔ̃́ lɛ́ à gbɛ̃̀ɛ̃̀ lɛ lééa wà luú-wìì lɛ́ à wũ-kèlè lɛ sálápèèlɛ, ɛ̃́ɛ̃́ zeĩ́ lɛ́ à ɓé lɛ vũ̀ doóa lɛ́ è lo lééa káa mɔ̀, lɛ́ à bĩ̀ĩĩ̀ e kɛáa, ḿm̀ lo à gèeè i lɛ̀ɛ.

⁸ Luú-wìì lɛ́ ɓa gɛ̃̀ɛ e kɛ ɓéèe. Kɛɛ ye wá ɓe gbaa. Lɛ gbaa kɛpìà kɛ é gó gùlù lɛ́ à tèá-pìà wá ɓea yí, kɛ é ló e yí-sìèpìà. Mia lɛ́ o yàlà kṹũ̀ lɛ kpóṹ là, lɛ́ o tɔ́ bɛ̃̀ɛ̃ɛ̃̀ wá nɛ́ kɛ̀ɓe-kiia yí kɛ bɛ̃̀ɛ̃ kpóṹ là é tĩã́ kɛɛ̀ ɓea káa, o lé paà lɛ́ɛ̀ lo kɛɛ̀ à ká yé waà kɛ luú-wìì e kília gɛ̃̀pìàa ká. E kɛ ɓéèe. Kɛɛ ye wá ɓe gbaa. Kɛɛ lɛ́ɛ̀ lo kɛɛ̀ zeĩ́ ɓe.

⁹ “Lɛ à mɔ̀ wɔ̃́ yí-ma-kɔ̀ wà gíkã́ é kɛ i kɛ̀lɛ̀ wɔ̃́ e kéa mɔ́ɔ̀ wɔ̃̀ mɔ̀. Wũ-kèlè sálápèèlɛ e kília, o lɛ́ o tɔ̃̀ũ̀ sálápèèlɛ lɛ́ lééa lɛ yàá à wĩĩ́a káa.

¹⁰ Ɛ́ɛ̃́ zeĩ́ o sɛ́lɛ́ líé-sí-mìà sálápèèlɛ ká. O sɔ́ɔ́li waà pèlè. À doó-mì lɛ tĩã́ dɔpìà. À yé e tóa lɛ̀ɛ́ nu nɛ́. Yé aà nua, laa mɔ̀ é kɛ nɔ́ zèe lúó zààle píé.

¹¹ Ɛ́ɛ̃́ luú-wìì lɛ́ e kɛ ɓéèe, lɛ́ ye wá gbaa ɓea, à ye lɛ́ e sɛ́lɛ́ líé-sí-mìà sálàka mì káa. É kɛ bɛ̃̀ɛ̃ kília, lɛ nɔ́ sɛ́lɛ́ líé-sí-mìà sálápèèlɛɛ o dò ká. Ɛ́ɛ̃́ lɛ lópìà lɛ̀ lɛ́ à yí è lo sìè yia mɔ̀.

¹² “Ƃé vũ̀ doó lɛ́ ɓa gɛ̃̀ɛ, o lɛ́ o sɛ́lɛ́ líé-sí-mìà vũ̀ doó lɛ́ òó gbɛ̃̀ nɛ́ sɛ́lɛ́ líé síì mɔ̀ɔ káa. Kɛɛ yíkɛ̀ gáàa nɔɔ̀ lɛ́ɛ̀ lo kɛɛ̀á o lɛ̀ɛ áwà doó píé, kɛ wà luú-wììa nì ó dɔ à píé kɛ ó sɛ́lɛ́ líé sí à ká.

¹³ Mia vũ̀ doó o kília, o séĩ́ o zì yɛ́lɛ́-táá lɛ doó. Óò o zì yíkɛ̀ gáàa wà o zì kɛ̀-mia-làa nɔ luú-wììa lɛ̀ɛ.

¹⁴ Óò lo gèlè gbinì Ƃáá nyɔ̀nɔ́ɔ mɔ̀. Kɛɛ Ƃáá nyɔ̀nɔ́ɔ kɔ̀ lɛ́ɛ̀ lo diè o là. Ƃii à ye lɛ́ e mia dàa-mìà bɛ̃̀ɛ̃ zì Dàa-mì káa. Ɛ́ɛ̃́ à ye lɛ́ e sɛ́lɛ́ líé-sí-mìà séĩ́ Líé-sí-mì káa. Mia lɛ́ wà ye nì o yía, lɛ́ o kélɛ̀ mia lɛ́ aà o súo kɛ, ɛ̃́ɛ̃́ lɛ́ aà o sí, e bɛ̀i lɛ́ o zò-dɔ̀à-mɔ̀ zɛ̀ɛ káa.”

¹⁵ Wálà là vɔ-mìa a gèe zeĩ́ m lɛ̀ɛ kélɛ̀, “Yíí lɛ́ lee lɛ́ è e dìè lɔ̀ɔ̀ dɔɔ e kɛ yàá là lɛ́ ɓa gɛ̃̀ɛ, o lɛ́ o sɛ́lɛ́ gbɛɛ̀ gbɛɛ yí-mìà, ɛ̃́ɛ̃́ lɛ́ o mia kù búnùzɛ̀, e bɛ̀i mia kpóló kɛ-kɔ̀ gbɛɛ̀ gbɛɛ zɛ̀, ɛ̃́ɛ̃́ zeĩ́ wè gbɛɛ̀ gbɛɛ gèe-mìà káa.

¹⁶ Ƃé vũ̀ doó lɛ́ ɓa gɛ̃̀ɛ, é dàá luú-wììa bàa, lee lɛ́ è e dìè lɔ̀ɔ̀ dɔɔ, à lɔ̀ lɛ́ɛ̀ lo nyɛɛ̀ o mɔ̀. Óò lo pɛ séĩ́ lɛ́ lɛ à kɛ̀lɛ̀ɛ kṹũ̀ à kɛ̀lɛ̀, tó wa tó dàá e kpã́ã́ ká. Óò lo à nɔ̀ɛ ɓèlè à mɔ̀, tó wa yí sìè tíé ká.

¹⁷ Ƃii Wálà e wɔ̃́ lɛ́ a yà e gé á kɛɛ dà o zò píé kɛ ó à kɛ. Óò lo à kɛɛ̀ o zì zò-kɛ̀-doó ká, wáà o zì yíkɛ̀ gáàa lɛ́ ò sɛ́lɛ́ líé sí à káa nɔ̀ luú-wììa lɛ̀ɛ ká, é tóá kíli wɔ̃́ nì lɛ́ Wálà a gèea é kɛ.

¹⁸ “Lee lɛ́ ɓa gɛ̃̀ɛ, ye lɛ́ e pɛ́lɛ yí gbùò zɛ̀ lɛ́ e sɛ́lɛ́ líé-sí-mìà là kpóṹ là zèea káa.”