Wɛ̀lɛ̀vèlésɔ̃̀ 16 - Wè-dɔ-wè Dɛɛ

Kɔ́ɓà vɔ̀ lɛ́ Wálà zì wɔ̃́à-wàa-kɔ̀ e kɛ o yía

¹ M wéé gágà dò ma áà gò Wálà là káa wì, áà gèè vɔ-mìà sálápèèlɛɛ lɛ̀ɛ kélɛ̀, “Kà lo Wálà là wɔ̃́à-wàa-kɔ̀ lɛ́ lɛ kɔ́ɓà sálápèèlɛɛ yía ká, ká à káá kpóṹ là.”

² Wálà là vɔ-mì bèĩzɛ̀ɛ e ló e zì kɔ́ɓàa ká, a gĩ́ ɓo kpóṹ là. Mia lɛ́ luú-wììa píé e kɛ o mɔ̀, lɛ́ o kɛ gbinipìà à bĩ́ lɛ̀ɛ, ɓa nyɔ́ɔ̀ɔ nyɔ́ɔ̀ɔ yɔɔ̀ yɔɔ̀ e kɛ kã́pìà o mɔ̀.

³ Wálà là vɔ-mì tò-ko-mɔ̀ pèèlɛɛ e e zì kɔ́ɓàa gĩ́ ɓo mɛ̀ĩ́ bà. Yíía e kɛ nɔ́ gbaa lɛ̀ mi bílí léà lɛ́ ɓe. Pɛ ɓéèe séĩ́ lɛ́ e kɛ mɛ̀ĩ́ bàa e ga.

⁴ Wálà là vɔ-mì kpolà yààka zɛ̀ɛ e e zì kɔ́ɓàa gĩ́ ɓo yíí to yí ɛ̃́ɛ̃́ yíí gbùò gbùò píé píé. Yíí e kília e kã́ gbaa léà dòló ká.

⁵ M Wálà là vɔ-mì yé e kɛ yíía wũ làa wéè ma kélɛ̀, “Ƃí i mi púlú ká lɛ́ i ɓe, ɛ̃́ɛ̃́ lɛ́ i kɛ ɓea, i dóo kpeĩ mɛ̀ĩ́-sà kàà o wĩĩ́ pìà zi sùua ká.

⁶ Ƃii waà Wálà là mia nì ɛ̃́ɛ̃́ là dɔ̀-à-lé-là-mìà nì léà káá. À mɔ́ɔ̀ wɔ̃̀ mɔ̀ɔ, ɓaà mɔ́ɔ̀ léà nɔ ɓo o lɛ̀ɛ ó mi. Pɛ lɛ́ wa naa lɛ́ ò à gɛ̃̀ ɓɛ.”

⁷ Yé e kɛ kília, m wéé dò ma áà gò sálà-ɓòà-là-pɛ̀ɛ píé weeá kélɛ̀, “Ko Dàa-mì Wálà lɛ́ yíkɛ̀ gáàa séĩ́ lɛ i kɛ̀lɛ̀ ɓɛ. Mɛ̀ĩ́-sà lɛ́ ɓà ɓoa lɛ kpeĩ ɛ̃́ɛ̃́ wánà zɛ̀ kpó-kpó ɓo.”

⁸ Wálà là vɔ-mì yììsɛ-mìa, e e zì kɔ́ɓàa gĩ́ ɓo nyɛ́nɛ́ là. O yíkɛ̀ gáàa nɔ nyɛ́nɛ́ e kília lɛ̀ɛ kɛ é mia gélé lɛ̀-tíèe ká.

⁹ Mia o gélé lɛ̀-tíèe sùu e kília ká. Yé e kɛ kília, o Wálà lɛ́ yíkɛ̀ gáàa lɛ à kɛ̀lɛ̀ mia sã̀-dɔ-pɛ̀ séĩ́ lɛ́ e kília làa wa tɔ́ sí. Kɛɛ òó gbaa o sɔ̃̀ɔ̃ yɔɔ mɛ́ vɔ̀ɔ kɛ ó à tɔ́ ɓɔ.

¹⁰ Wálà là vɔ-mì sɔ́ɔ́li zɛ̀ɛ e e zì kɔ́ɓàa gĩ́ ɓo luú-wììa zì dɔ-táŋánáa là. Bĩ́ e mí gbaa luú-wììa zì sɛ́lɛ́ lɛ́ e kɛ à wũ làa yí. Mia ɓéèe o kɛ o nanà tùwè ɓèlèpìà wàa lɛ́ o kɛ à ɓèlèpìàa mɔ́ɔ̀ wɔ̃̀ mɔ̀.

¹¹ O Wálà lɛ́ e lɛ̀ía tɔ́ sí ɓa wà wàa lɛ́ e kɛ o mɔ̀ɔ mɔ́ɔ̀ wɔ̃̀ mɔ̀. Kɛɛ òó gbaa o kɛ-wɔ̃̀ yɔɔ lɛ́ o kɛ à kɛpìàa mɛ́ vɔ̀ɔ.

¹² Wálà là vɔ-mì sáláádo-mìa e e zì kɔ́ɓàa gĩ́ ɓo yíí gbùò lɛ́ ò si Yùfélétèa bà. Yíí e kília e wàà kɛ é zi kɛ ɓe sɛ́lɛ́ líé-sí-mìà lɛ́ ò go nyɛ́nɛ́ wɛ̀lɛ̀pìàa lɛ̀ɛ kɛ ó die.

¹³ Yé e kɛ kília, m pɛ yɔɔ vɔ̀ yààka gɛ̃̀. O ɓɔɔ̀ e kɛá fo bà. O kɛ gópìà dálágɔ̃̀ɔò, e bɛ̀i luú-wììaò, ɛ̃́ɛ̃́ zeĩ́ mi lɛ́ è e dìè si dɔ̀-Wálà-lé-là-mì lɛ́ ye wá mɔṹ à káa o lé.

¹⁴ Pɛ yɔɔ vɔ̀ lɛ́ ò wɔ̃́ kpàlézɛ̀ kɛ̀ɛ o lɛ́ ɓɛ. Pɛ yɔɔ vɔ̀ o kéa, óò lo kpóṹ là zèe líé-sí-mìà séĩ́ píé kɛ ó o pá o kíe mɔ̀ gèlè lɛ́ è lo kɛɛ̀ ɓe Wálà lɛ́ yíkɛ̀ gáàa séĩ́ laa kɛ̀lɛ̀ɛ zì lúóa káa kɛ ó gɔ̃.

¹⁵ “Kà ka tóó dɔ. M nupìà lɛ̀ kã̀ã-mì lɛ́ è nu. Mi lɛ́ è yà e nyìɛ́, ɛ̃́ɛ̃́ lɛ́ è e zò kɛ̀ e mɔ̀-sɔ̀ píé, yékɛ̀ é die píé e kpã́ã́ ká, ɛ̃́ɛ̃́ yékɛ̀ yɛ́lɛ̀ é kpɔ́ à là mia gbũ fĩ̀ã̀a, zò géli lɛ à kɛ̀lɛ̀.”

¹⁶ Pɛ yɔɔ vɔ̀ɔ o sɛ́lɛ́ líé-sí-mìàa pá o kíe mɔ̀ gbaa lɛ̀ lɛ́ ò si Hííbúlù-wè yí Ámàgɛ́dã̀a mɔ̀.

¹⁷ Wálà là vɔ-mì sálápèèlɛ-mìa e e zì kɔ́ɓàa gĩ́ ɓo lɛ̀í. Wéé gágà dò e gó dɔ-táŋáná lɛ́ e kɛ Wálà là káa wìa píé weeá kélɛ̀, “À kɛɛ̀ lɛ gbaa.”

¹⁸ Lɛ̀í-kɛ-gɛ́lɛ́ e kɛ kɛpìà. Pɛ wéè áà dɔ̀. Lɛ̀í áà wèè. Ɛ́ɛ̃́ sɛ́lɛ́ áà kã̀ áà lò gìè yí gbùò zɛ̀. Sɛ́lɛ́ zì kã́ lɛ́ a ɓo e kíe mɔ̀ áà lò gìè kília, à sùu nɔ́ɔ fé dò lɛ̀ɛ́ kɛ do kíli mia kɛ́ wa ɓoa yí. À yé e kéa e kɛ dóo wɔ̃́ lé nyɔ́ɔ̀ɔ zɛ̀ ká lɛ́ e kɛɛ.

¹⁹ Pɛ́lɛ gbùòa yí gìniì e kɛá yààka. Ɛ́ɛ̃́ sɛ́lɛ́ gbɛɛ̀ gbɛɛ mɔ́ɔ̀ pɛ́lɛ gbùò gbùòa yí sìeè e kɛ à ká. Wálà zò vùoò e kɛ à ká Bábɛ́lɔ́ũ̀-pɛ̀lɛ̀ gbùòa mɔ́ɔ̀ wɔ̃̀ ká. E à kɛ Bábɛ́lɔ́ũ̀ e wã́ã́ĩ̀ mi là kɔ́pòa yí. Wã́ã́ĩ̀ e kília lɛ́ e kélɛ̀, Wálà là wɔ̃́à-wàa-kɔ̀ mɛ́ gágà zɛ̀ɛ.

²⁰ Ɛ́ɛ̃́ sɛ́lɛ́ séĩ́ lɛ́ yíí nìɛɛ̀ e kɛá à mɔ̀ɔ, o kɔ̃́ o ká. E bɛ̀i, tɔ̃̀ũ̀ gbùò gbùò lɛ́ e kɛ yía, e wàà sɛ́lɛ́ ká.

²¹ Laa-wɛ́lɛ́ gɛ̀lɛ̀ kpùlù lɛ́ à doó pã́ã́ũ̀ è bɛ̀i à mɔ̀ é kɛ wũ doóa, e gó lɛ̀í áà dà mia là. Mia o Wálà tɔ́ sí mia sã̀-dɔ-pɛ̀ lɛ́ e laa-wɛ́lɛ́ kpùlù e kília káa mɔ́ɔ̀ wɔ̃̀ mɔ̀, ɓii mia sã̀-dɔ-pɛ̀ e kília e kɛ dóo yɔɔ.