Wɛ̀lɛ̀vèlésɔ̃̀ 14 - Wè-dɔ-wè Dɛɛ

Tã́ lɛ́ mia lɛ́ waà o lɔ́ɔ wa ɓoa

¹ M bɛ̀i m lɛ̀ gɛ̃̀. Lɛ̀ ma gɛ̃̀ɛ m Ƃáá nyɔ̀nɔ́ɔ gɛ̃̀ dɔ̀á Záyɔ̃̀-tɔ̃̀ũ̀ wĩĩ́. Mia wáá wũ doó là vũ̀ yììsɛ wɛ́lɛ́ yììsɛ, lɛ́ Ƃáá nyɔ̀nɔ́ɔ wà e Dàa o tɔ́ bɛ̃̀ɛ̃ɛ̃̀ lɛ o pelàa, wà ye nì o kɛ yí.

² M wéé dò ma áà gò lɛ̀í. Wéé e kília, e kɛ kélɛ̀ yíí búnùzɛ̀ tɛ́lɛ́-vĩ̀ lɛ́ ɓe. Ɛ́ɛ̃́ e kɛ zeĩ́ lɛ̀ gbánà wéè gágà zɛ̀ lɛ́ ɓe. Wéé ma ma kília e kɛ zeĩ́ lɛ̀ kɔ̃̀níì zɛ-mìà lɛ́ o kɛ wà kɔ̃̀níì zɛpìàa wéè lɛ́ ɓe.

³ O dɔ o o wɛlɛ vɔ dɔ-táŋáná, ɛ̃́ɛ̃́ pɛ ɓéèe yììsɛ, ɛ̃́ɛ̃́ zeĩ́ mia dìè-dìè vɔ̀ɔ o píé zàá. O tã́ dɛɛ dò lɛ́ mi gbɛɛ lɛ̀ɛ́ bɛ̀i à dã́ã̀, é kã́ mia wáá wũ doó là vũ̀ yììsɛ wɛ́lɛ́ yììsɛ, lɛ́ o lɔ́ɔ̀ lɛ Wálà lɛ̀ɛ, lɛ́ ò go tã́ã̀ zèea mɔ̀ɔ káa ɓo.

⁴ O lɛ́ o mia lɛ́ òó o dìè sìè nɛ́ mànaà zɛɛ̀ káa káa. Ɛ́ɛ̃́ zeĩ́ òó wéé do lee píé. Óò to Ƃáá nyɔ̀nɔ́ɔ píé lɛ̀ nɔ́ɔ fé è lo yía mɔ̀. Waà o lɔ́ gbaa waà gó mia yé o tóa bà. O lɛ́ o mia bèĩzɛ̀ ká lɛ́ o nɔɔ̀ lɛ Wálà wà Ƃáá nyɔ̀nɔ́ɔ o lɛ̀ɛ.

⁵ Òó gbaa nɛ̀ nɔ́ɔ fé dò kɛ. O kɛɛ gbɛɛ wá o mɔ̀.

Wálà là vɔ-mìà yààkaa

⁶ M bɛ̀i m Wálà là vɔ-mì dò gɛ̃̀ à wɛ̀lɛɛ̀ e kɛá, áà lò lɛ̀í gbèkèni. Wɔ̃́ làṹ yiè lɛ́ lɛ ɓe tòá kíli káa, e kɛ à kɛ̀lɛ̀ kɛ á gèe lòũ̀ ká mia lɛ́ o tã́ã̀ zèe, lɛ́ o mia kpóló kɛ-kɔ̀ gbɛɛ̀ gbɛɛ zɛ̀, ɛ̃́ɛ̃́ síí gbɛɛ̀ gbɛɛ là mìà, e bɛ̀i wè gbɛɛ̀ gbɛɛ gèe-mìà, ɛ̃́ɛ̃́ zeĩ́, sɛ́lɛ́ gbɛɛ̀ gbɛɛ yí-mìà káa o lɛ̀ɛ.

⁷ E e wè wɛ̀lɛ̀ lɛ̀í e wɔ̃́ dò gèe weeá kélɛ̀, “Kà túó Wálà lɛ̀ɛ, ká à tɔ́ ɓɔ. Ƃii lúó lɛ́ è lo mɛ̀ĩ́-sà dɔɔ̀á mia mɔ̀ɔ aà ɓɔ. Kà gbini mi lɛ́ e lɛ̀í kɛ, ɛ̃́ɛ̃́ lɛ́ e kpóṹ là zèe wà mɛ̀ĩ́ ɛ̃́ɛ̃́ yíí to nɔ́ɔ fé kɛɛ lɛ̀ɛ.”

⁸ Wálà là vɔ-mì doó e bɛ̀i e tó à yé e kɛ líéa píé, áà gèè weeá kélɛ̀, “Aà pèlè. Bábɛ́lɔ́ũ̀ sɛ̀lɛ̀ gbùò ɓɛ aà pèlè. Aà à kɛ sɛ́lɛ́ gbɛɛ̀ gbɛɛ yí-mìà séĩ́ waà là wã́ã́ĩ̀ gágàa mi. Wã́ã́ĩ̀a lɛ́ e sɔ̃̀ɔ̃ yɔɔ à kɛ̀ɛ káa.”

⁹ Wálà là vɔ-mì doó-mì, e bɛ̀i e tó à pèèlɛ e kɛ líéa píé, e e wè wɛ̀lɛ̀ lɛ̀í áà gèè, “Mi nɔ́ɔ fé lɛ́ è gbìnì luú-wììa wà e bĩ́a lɛ̀ɛ, ɛ̃́ɛ̃́ zeĩ́, lɛ́ è lo pɛ píéa sɔ̀lɔ̀ ɓoò e pelà ɛ̃́ɛ̃́ e kɔ̀ mɔ̀ɔ,

¹⁰ à dìè-tĩ́ lɛ́ɛ̀ lo Wálà là wã́ã́ĩ̀ lɛ́ e à zì wɔ̃́à-wàa-kɔ̀ káa miì. Wálà zì wɔ̃́à-wàa-kɔ̀ e kíli lɛ́ à bòoò wáa, aà gbɛ̃̀ e zì wɔ̃́à-wàa-kɔ́pò yí. Tíé wà sɔ́fà óò lo mia lɛ́ ò gbìnì luú-wìì e kília lɛ̀ɛ sã̀ dɔɔ̀ Wálà là vɔ-mìàa, e bɛ̀i Ƃáá nyɔ̀nɔ́ɔ o wɛlɛ mɔ̀.

¹¹ Tíé lɛ́ è o sã̀ dɔ kília, à gbɛ̃́ĩ́ lɛ́ɛ̀ lo lɛ̀í tòá kíli wɔ́lɔ́-wɔ́lɔ́ ká. Mia lɛ́ ò gbìnì luú-wììa wà e bĩ́a lɛ̀ɛ, ɛ̃́ɛ̃́ lɛ́ waà pɛ píé lɛ́ lɛ à tɔ́ káa sɔ̀lɔ̀ ɓoa, fĩ́ĩ́-dɔ gbɛɛ wá o kɛ̀lɛ̀ bĩ́á ɛ̃́ɛ̃́ nyɛ́nɛ́ĩ́.”

¹² Wɔ̃́ e kéa yí lɛ́ e kélɛ̀, lɛ sɛ̀ Wálà là mia nì ó o zò kṹ tã́ã̀. Wálà là mia nì lɛ́ o mia lɛ́ ò wɔ̃́ lɛ́ Wálà à gèea kɛ̀, ɛ̃́ɛ̃́ lɛ́ ò o zò dɔ Zízɛ̀ mɔ̀ɔ káa.

¹³ E bɛ̀i m wéé dò ma, áà gò lɛ̀í weeá kélɛ̀, “Pɛ́ e kéa bɛ̃̀ɛ̃. Mia lɛ́ wà ko Dàa-mì o doó lɛ́ ò lo gaà é kã́ pɛ́nɛɛ mɔ̀ é lóá líéa káa, zò géli lɛ o kɛ̀lɛ̀.” Gɛ̀ɛ̀ Púlúa a gèe, “Lɛ dóo wánà kpó-kpó ká. Óò lo o fĩ́ĩ́ dɔɔ̀ wà yɛɓoa kɛɛ̀ mɔ̀, ɓii o kɛ-wɔ̃̀ lɛ́ɛ̀ lo tóò o mɔ̀ o ló à ká.”

Ƃu kã́-pɛ̃́ yé e tã́ã̀ zèea

¹⁴ M bɛ̀i m lɛ̀ gɛ̃̀. Lɛ̀ ma gɛ̃̀ɛ, m lúé-lúé púlú gɛ̃̀. Pɛ dò e kɛ yàá lúé-lúé e kília là. À ɓɔɔ̀ e kɛá mi bà. Zòlò lɛ́ à kɛɛ̀ e kɛá góò káa e kɛ à wĩĩ́. Làà kɔ̃̀nɔɔ̀ɔ líé zɛ̀ e kɛ à kɛ̀lɛ̀.

¹⁵ Wálà là vɔ-mìà doó-mì, e bɛ̀i e gó Wálà là káa wì. E gbɛ́ɛ́ gbóó ká áà gèè mi lɛ́ e kɛ yàá lúé-lúéa làa lɛ̀ɛ, “Ƃà lààa sí í ɓúa kã́ à ká, ɓii ɓu kã́-pɛ̃́ aà ɓɔ. Ƃii ɓu lɛ́ e tã́ã̀a aà ga kpó-kpó ɓo.”

¹⁶ Mi lɛ́ e kɛ yàá lúé-lúéa làa, e là lààa vĩ́-nòóò dùò tã́ã̀ zèe áà ɓu lɛ́ e kɛ tã́ã̀ zèea kã̀ à ká.

¹⁷ M bɛ̀i m Wálà là vɔ-mìàa doó-mì gɛ̃̀ áà gò là káa wì lɛ̀í. Làà kɔ̃̀nɔɔ̀ɔ líé zɛ̀ɛ dò e kɛ nɔ́ à kɛ̀lɛ̀ kíli.

¹⁸ Yé e kɛ kília, Wálà là vɔ-mì yé yíkɛ̀ gáàa e kɛ à kɛ̀lɛ̀ tíéa làa, e kɛ gópìà sálà-ɓòà-là-pɛ̀ɛ píé. E gbɛ́ɛ́ gbóó ká áà gèè vɔ-mì yé làà líé zɛ̀ e kɛ à kɛ̀lɛ̀ɛ lɛ̀ɛ, “Ƃà lààa sí í wã́ã́ĩ̀-kɛ-ɓɛ̀lɛ̀-wɛ́lɛ́ ɓɛɛ yé lɛ́ o tã́ã̀a kã́ à ká, ɓii o tãã̀ lɛɛ mɔ́ɔ̀ wɔ̃̀ mɔ̀.”

¹⁹ Zeĩ́a, Wálà là vɔ-mì yéa e là lààa vĩ́-nòóò dùò tã́ã̀ zèe, áà ɓɛ̀lɛ̀-wɛ́lɛ́ ɓɛɛ kã̀ e kɔ́ɔ́ mɔ̀, áà o dùò lɛ̀ lɛ́ ò o yíí ɓo yí wã́ã́ĩ̀ wɛ̃́ĩ̀a lɛ̀ mɔ̀. Pɛ ɓɛɛ yíí-ɓopìà e kília ye lɛ́ e Wálà là wɔ̃́à-wàa-kɔ̀ yí gbùò zɛ̀ ɓɛ káa.

²⁰ O kɛ ɓɛ̀lɛ̀-wɛ́lɛ́ ɓɛɛ e kília ɓolopìà ɓɛ̀lɛ̀-wɛ́lɛ́ ɓɛɛ yíí-ɓòà-yí-pɛ̀ɛ yí pɛ́lɛɛ sɔ́nɔ́. Lɛ̀ e kɛ kília, léà e gó ɓɛ̀lɛ̀-wɛ́lɛ́ yíí-ɓo-pɛ̀ɛ yí, áà dìè zùù le. À tɔ̀lɔ lɛ́ e kɛ diepìàa, e ló gbèkèni vɔ̀ máà wũ pèèlɛ píé. Ɛ́ɛ̃́ e ló lèĩ gã̀-fùlùà yí sɔ́ɔ́li ká gìè.