Wɛ̀lɛ̀vèlésɔ̃̀ 11 - Wè-dɔ-wè Dɛɛ

Kélá vɔ̀ pèèlɛ

¹ E bɛ̀i pɛ-gɔ̃́-yìlì lɛ́ e kélɛ̀ kpeĩ̀ lɛ́ ɓea, nɔɔ̀ e kɛá m lɛ̀ɛ. Wa gèe zeĩ́ m lɛ̀ɛ, “Wɛ̀lɛ̀ í sálà-ɓò-Wálà-lɛ̀ɛ-kà e bɛ̀i sálà-ɓòà-là-pɛ̀ɛ ɓá gɔ̃́, í bɛ̀i í mia lɛ́ ò gbìnì Wálà lɛ̀ɛ ká e kília wìa lóní.

² Kɛɛ yékɛ̀ í pɛ́lɛ̀ zèí lɛ́ lɛ káa sɔ́nɔ́ píéa gɔ̃́. Ì kã́ à lɛ̀ɛ. Ƃii waà o nɔ sɛ́lɛ́ gbɛɛ yí-mìà lɛ̀ɛ. Míá o kília, óò lo táà Wálà là Sɛ́lɛ́ɛ là mɛnɛ vũ̀ yììsɛ wɛ́lɛ́ pèèlɛ mɔ̀.

³ Ḿm̀ lo m̀ kélá vɔ̀ pèèlɛ vɔɔ̀. Sɔ gɔ́á-gɔ̀à sùu dò lɛ́ɛ̀ lo kɛɛ̀ o mɔ̀ɔ. Ɛ́ɛ̃́ óò lo wɔ̃́ lɛ́ Wálà à kàà o léa gèeè lúó wáá doó, là wũ pèèlɛ là vũ̀ sáláádo e kília píé.”

⁴ Kélá vɔ̀ pèèlɛ o kília, o lɛ́ o ɔ́lè-yìlì pèèlɛɛ wà nábò yàà-là-pɛ̀ pèèlɛɛ, lɛ́ à dɔɔ̀ lɛ kpóṹ là zèe Dàa-mì wɛlɛ mɔ̀ɔ káa.

⁵ Yé mi dò aà kɛ à kɛ-zì naapìà é wɔ̃́ yɔɔ kɛ o káa, tíé lɛ́ɛ̀ lo góò o lé tó e mia lɛ́ ò gèlè gɔ̃ o káa yí sìè. Zí e kéa káa, mi nɔ́ɔ fé lɛ́ è lo à naà é wɔ̃́ yɔɔ kɛ o káa, óò lo à zɛɛ̀a.

⁶ Yíkɛ̀ gáàa lɛ o kɛ̀lɛ̀ kɛ ó lɛ̀í lé kṹ, tó lɛ̀ɛ lɛ̀ɛ́ bã lúó lɛ́ ò lo wɔ̃́ lɛ́ Wálà a káá o lé ó gèea gèeè à káa ká. Yíkɛ̀ gáàa lɛ o kɛ̀lɛ̀ zeĩ́ kɛ ó yíí kɛ é kɛ léà dòló ká. E bɛ̀i, yíkɛ̀ gáàa lɛ o kɛ̀lɛ̀ kɛ ó kpóṹ là zèe mìà mɛ̀ mi sã̀-dɔ-pɛ̀ nɔ́ɔ fé ká zí nɔ́ ò nàà ó kɛ à káa ká.

⁷ Yé waà nyɛ wà kélá-wè ɓoò mɔ̀ɔ, luú-wìì lɛ́ è lo góò gùlù lɛ́ à tèá-pìà wá ɓea yía, lɛ́ɛ̀ lo gèlè gɔ̃ɔ̀ o ká. Luú-wììa kɔ̀ lɛ́ɛ̀ lo diè o là, tó e o zɛ.

⁸ O bílí lɛ́ɛ̀ lo kɛɛ̀ kàá sɛ́lɛ́ gbùò lɛ́ o o Dàa-mì pá nélè ká kɔ́lɔ́sì mɔ̀ à yía, mɔ́ɔ̀ pɛ́lɛ̀ zèí píé. Pɛ́lɛ e kília pĩ̀ã̀-tɔ̀ lɛ́ Sɔ́dɔ̃̀ wà Ízè.

⁹ Mia lɛ́ ò go sɛ́lɛ́ gbɛɛ̀ gbɛɛ yía, e bɛ̀i, síí-sɛ̀lɛ̀ gbɛɛ̀ gbɛɛ là mìà, ɛ̃́ɛ̃́ wè gbɛɛ̀ gbɛɛ gèe-mìà, ɛ̃́ɛ̃́ zeĩ́ mia kpóló kɛ-kɔ̀ gbɛɛ̀ gbɛɛ zɛ̀, óò lo o bílí gɛ̃̀ɛ̃̀ lɛ̀-kpɛ̀iì yààka wà e lé-gbú píé. Òó ló wéè à mɔ̀ kɛ ó o bĩ̀ĩ̀.

¹⁰ Mia lɛ́ o kpóṹ là zèea, o gé lɛ́ɛ̀ lo liì míá o kéa gaà mɔ́ɔ̀ wɔ̃̀ mɔ̀. Óò lo géli kɛɛ̀ wáà nɔ̀-lɛ̀ɛ-pɛ̀ vɔ̀ o kíe nì lɛ̀ɛ, ɓii dɔ̀-Wálà-lé-là-mìà pèèlɛɛ o lɛ́ o nu wɔ̃́ nyɔ́ɔ̀ɔ gɛ̃̀ɛ̃ɛ̃̀ ká kpóṹ là mìà mɔ̀ɔ.

¹¹ Lɛ̀ lúó yààka wà e lé-gbú e diea, pɛ wúú yé è nu kɛ̀ɓe káa, e gó Wálà kɛ̀lɛ̀ e nu o yí. O wɛ̀lɛ̀ o dɔ. Mia séĩ́ lɛ́ o o gɛ̃̀ɛ, o túó kpànazɛ̀.

¹² Dɔ̀-Wálà-lé-là-mìà pèèlɛ o kília o wéé gágà dò ma áà gò lɛ̀í áà mɛ́ĩ́ ɓò o lɛ̀ɛ weeá kélɛ̀, “Kà nu lɛ̀í zèe.” O wɛ̀lɛ̀ gbaa o dàa-gbe vɔ̀ nyìɛ́ wáà wàà lúé-lúé yí, wáà lò lɛ̀í.

¹³ Yé e kɛ kília, à lɛ̀ lɛ̀ɛ́ gbaa túó bɛ̃̀ɛ̃ sɛ́lɛ́ lé áà kã̀, áà lò gìè yí gbùò zɛ̀. Sɛ́lɛ́ e kília yí gìniì e kɛá e kíe yí vũ̀ doó. À mɛ́ɛ́ doó yí e sìè. Sɛ́lɛ́ lɛ́ e kã́ lɛ́ e ló gìèa, e mia wáá sálápèèlɛ zɛ. Mia yé o tóa, mɛ́-tàle-dìè e kɛ o mɔ̀. A kɛ tó wáà Wálà lɛ́ e lɛ̀ía tɔ́ ɓɔ̀.

¹⁴ Wɔ̃́ yéĩ̀zɛ̀ kpolà pèèlɛ zɛ̀ɛ aà die. Kà lɛ̀ gɛ̃̀. À tò-ko-mɔ̀ yààka zɛ̀ɛ aà dɔ é nu.

Túlú sálápèèlɛ zɛ̀ɛ

¹⁵ Wálà là vɔ-mì sálápèèlɛ zɛ̀ɛ e là túlúa pìè. Mia wéè gágà e dɔ lɛ̀í weeá kélɛ̀, “Tò-kpóṹ-là-mìà-là aà kɛ gbaa ko Dàa-mì wà là Kɛ́lɛ̀ì wà pɛ ká. Ɛ́ɛ̃́ lɛ́ɛ̀ lo tóò mia là tòá kíli wɔ́lɔ́-wɔ́lɔ́ ká.”

¹⁶ Yé e kɛ kília, mia dìè-dìè vũ̀ pèèlɛ wɛ́lɛ́ yììsɛ lɛ́ o yàá o zì táŋáná là Wálà wɛlɛ mɔ̀ɔ, o pèlè o gí là wáà gbìnì Wálà lɛ̀ɛ

¹⁷ weeá kélɛ̀, “Ko Dàa-mì Wálà lɛ́ yíkɛ̀ gáàa séĩ́ lɛ i kɛ̀lɛ̀ ɓɛ, lɛ́ i ɓe, ɛ̃́ɛ̃́ lɛ́ i kɛ ɓea, kóò i zúo ɓo lɛ́ ɓaà i kɔ̀ wàà ɓà yíkɛ̀ gáàa kpànazɛ̀ɛ wì kɛ í dɔ à ká, ɛ̃́ɛ̃́ lɛ́ ɓaà gbɛ̃̀ ɓà tò-mia-làa káa.

¹⁸ Wɔ̃́ aà sɛ́lɛ́ gbɛɛ̀ gbɛɛ yí-mìà wàa, kɛɛ i zì wɔ̃́à-i-wàa-lùò aà ɓɔ à mɔ̀. Lɛ gbaa lúó lɛ́ ò mɛ̀ĩ́-sà dɔ̀á mia lɛ́ waà gaa mɔ̀ɔ ká. Lúó lɛ́ ì lo ɓà yɛɓo-kɛ-mìà lɛ́ o dɔ̀-i-lé-là-mìà ká, e bɛ̀i, ɓà mia nì séĩ́, ɛ̃́ɛ̃́ zeĩ́ mia séĩ́ lɛ́ ò tùò i lɛ̀ɛò, ó kɛ bɛ̃̀ɛ̃ kpànazɛ̀ ɛ̃́ɛ̃́ fĩ́ĩ́nyɛ zɛ̀ɛò, ì lo o fɔ́nɔ́ nɔɔ̀ à káa, aà ɓɔ. Lúó lɛ́ ì lo mia lɛ́ ò kpóṹ là yí sìèa yí sìè à káa, aà ɓɔ.”

¹⁹ Wálà-kà lɛ́ e lɛ̀ía, lé ɓoò e kɛá. Gbɔ̀lɔ̀ lɛ́ Wálà là wè-dɔ-wè e kɛ à yía, wa gɛ̃̀ à zì káa wì. Lɛ̀í-kɛ-gɛ́lɛ́, wà pɛ wéè, e bɛ̀i gbánà wéè nì e dɔ yí. Sɛ́lɛ́ e kã́ áà lò gìè. Laa-wɛ́lɛ́ káà e kɛá yi yí gbùò zɛ̀.