Wɛ̀lɛ̀vèlésɔ̃̀ 1 - Wè-dɔ-wè Dɛɛ

¹ Wɔ̃́ lɛ́ Zízɛ̀ Kɛ́lɛ̀ì e lɛ́ɛ́ ɓo à làa lɛ́ e kéa. Wálà e pɛ́ e kília nɔ Zízɛ̀ lɛ̀ɛ kɛ é pɛ lɛ́ lɛ à mɔ̀ é kɛ dɛɛ káa, zɔ̃̀ɔ̃̀ Wálà là yɛɓo-kɛ-mìà lɛ̀ɛ. Kɛ́lɛ̀ì e là vɔ-mì doó vɔ ma Zɔ̃̀ɔ̃́ lɛ́ m là yɛɓo-kɛ-mì káa píé, áà m kɛ̀ tó máà wɔ̃́ nì e kéa yí dɔ̀.

² Pɛ séĩ́ lɛ́ m à gɛ̃̀ɛ, maà à séĩ́ wɔ̃̀ gèe. Wɔ̃́ lɛ́ m̀ à gèe lɛ́ à gbɛ̃̀ɛ̃̀ lɛ wè-vɔ-wè lɛ́ è go Wálà píé, ɛ̃́ɛ̃́ kélá-wè lɛ́ Zízɛ̀ Kɛ́lɛ̀ì a ɓoa mɔ̀ɔ, ye gɛ̃̀ e ké.

³ Mí è kíí e kéa gèea, zò géli lɛ à kɛ̀lɛ̀. Ɛ́ɛ̃́ mia lɛ́ ò o tóó dɔ wéé lɛ́ Wálà a káá mi lé lɛ́ e kéa mɔ̀, lɛ́ ò wɔ̃́ lɛ́ à bɛ̃̀ɛ̃ɛ̃̀ lɛ kíí e kéa yía kũ tã́ã̀a, zò géli lɛ o kɛ̀lɛ̀. Ƃii lúó lɛ́ wɔ̃́ nì o kéa ò lo kɛɛ̀ à káa, aà ɓɔ kɔ̀ɛ́.

Zɔ̃̀ɔ̃́ e wéé Wálà-mìà kpolà sálápèèlɛɛ bà

⁴ Ma Zɔ̃̀ɔ̃́, ḿm̀ wèè Wálà-mìà kpolà sálápèèlɛ zɛ̀ lɛ́ ka Ésìàa bà. Zò-kɛ̀-sɛ̀ wà zò-yà-gé è go Wálà lɛ́ lɛ ɓe, ɛ̃́ɛ̃́ lɛ́ e kɛ ɓe, e bɛ̀i lɛ́ lɛ ɓe é nua à kɛ̀lɛ̀, ɛ̃́ɛ̃́ lɛ́ è go pɛ sálápèèlɛ lɛ́ lɛ dɔ̀á là dɔ-táŋáná wɛlɛ mɔ̀ɔ kɛ̀lɛ̀ɛ, ó kɛ ka kɛ̀lɛ̀.

⁵ Zò-kɛ̀-sɛ̀ wà zò-yà-gé è go Zízɛ̀ Kɛ́lɛ̀ì, lɛ́ e kélá zò-dɔ̀à-mɔ̀ zɛ̀ káa kɛ̀lɛ̀ɛ, ó kɛ ka kɛ̀lɛ̀. À ye lɛ́ lɛ Nɛ́ líé lɛ́ e wɛ̀lɛ̀ ga kɛ̀lɛ̀ɛ káa. À ye lɛ́ lɛ mia wũ-là-mìà lɛ́ o kpóṹ là zèea bɛ̃̀ɛ̃ zì dɔ-mì káa. Ko lɔ̀ kpɔ́ɔ̀ lɛ à mɔ̀, ɛ̃́ɛ̃́ ko ɓoò lɛ ɓɛ̀lɛ̀ yí ko zì kɛ-wɔ̃̀ yɔɔ kɛ̀lɛ̀ à zì léà lɛ́ e kááa kolo là zàá.

⁶ Aà ko kɛ mia lɛ́ à tóò lɛ o làa o dò ká, áà ko kɛ̀ sálà-ɓò-Wálà-mɔ̀-mìà ká, kɛ kó yɛɓo kɛ là Wálà lɛ́ zeĩ́ lɛ à Dàa káa mɔ̀. Tɔ́-ɓɔ wà yíkɛ̀ gáàa è kɛ Zízɛ̀ Kɛ́lɛ̀ì kɛ̀lɛ̀ tòá kíli wɔ́lɔ́-wɔ́lɔ́ ká. É kɛ kíli.

⁷ Kà lɛ̀ gɛ̃̀. Lɛ nupìà lɛ̀í-kii yí. Nyìɛ séĩ́-séĩ́ lɛ́ɛ̀ lo à gɛ̃̀ɛ̃̀, é ló é dàá mia lɛ́ wa pá dí káa bà. Mia sùu gbɛɛ̀ gbɛɛ zɛ̀ séĩ́ lɛ́ o tã́ã̀ zèea, óò lo dàà yéĩ̀ yí à mɔ́ɔ̀ wɔ̃̀ mɔ̀. Zía lɛ́ lɛ à káa. É kɛ kíli.

⁸ “Ma lɛ́ m Áfà wà Òmégà káa.” Zi lɛ́ ko Dàa-mì Wálà lɛ́ yíkɛ̀ gáàa séĩ́ laa kɛ̀lɛ̀, lɛ́ lɛ ɓe, ɛ̃́ɛ̃́ lɛ́ e kɛ ɓe, e bɛ̀i, lɛ́ lɛ ɓe é nua, à gèe à káa lɛ́ ɓɛ.

Zɔ̃̀ɔ̃́ e Kɛ́lɛ̀ì gɛ̃̀

⁹ Ma Zɔ̃̀ɔ̃́ lɛ́ m ka lèe-gé káa. Kò Zízɛ̀ ko kɛ̀ à yí doóa kolo là zàáa, kɔa nɔ́ à yí doó wɔ̃́ nyɔ́ɔ̀ɔ gɛ̃̀ɛ̃ɛ̃̀, e bɛ̀i, à zì tò-mia-là, ɛ̃́ɛ̃́ zeĩ́ zò-kũ̀-tã́ã̀ yí zàá. M kɛ sɛ́lɛ́ lɛ́ yíí nìɛ̀ lɛ à mɔ̀, lɛ́ ò si Pámɔ̀ɔ à lɛ̀ mɔ̀. O m yà yi, ɓii m Wálà lé-wè ɛ̃́ɛ̃́ kélá-wè lɛ́ Zízɛ̀ a ɓoa wɔ̃̀ gèea mɔ́ɔ̀ wɔ̃̀ mɔ̀.

¹⁰ Ko Dàa-mì zì lúó káa, à zì Gɛ̀ɛ̀ e kɛ m là. M wéé gágà dò ma m mɛ̀ĩ́. Wéé e kília, e kɛ lɛ̀ túlú wéè lɛ́ ɓe.

¹¹ A gèe kélɛ̀, “Pɛ́ ɓà gɛ̃̀ɛ à bɛ̃̀ɛ̃ kii yí, ɓá vɔ Wálà-mìà kpolà sálápèèlɛ zɛ̀ o kéa píé. Wálà-mìà kpolà sálápèèlɛ zɛ̀ o kília, o lɛ́ o kélɛ̀, Ɛ́fɔ́sɔ̀, Sámánà, Pógómà, ɛ̃́ɛ̃́ Táyàtélà, Sádà, ɛ̃́ɛ̃́ zeĩ́ Felèdáfìà wà Leodòsíà.”

¹² M nìɛ̀ kɛ ḿ mi lɛ́ e kɛ wéépìà m lɛ̀ɛ gɛ̃̀. Lɛ̀ m nìɛ̀ɛ, m nábò yàà-là-pɛ̀ sálápèèlɛ lɛ́ à kɛɛ̀ e kɛá góò káa gɛ̃̀.

¹³ M pɛ dò lɛ́ à ɓɔɔ̀ e kɛá mi bàa gɛ̃̀ dɔ̀á o zèí. Sɔ lɛ́ e kɛ à mɔ̀ɔ, à káà e kɛ à ká à gã̀ líà. Góò ɓɛ̀lɛ̀ diè e kɛ à ká à zò là.

¹⁴ À wũ-kèlè wà wũ lɛ́ e kɛ à wĩĩ́a e kɛ púlú sélé tété lɛ̀ ɓáá púlú kɛì lɛ́ ɓe. E kɛ púlú kpó-kpó ɓo lɛ̀ laa-wɛ́lɛ́ lɛ́ ɓe. À nyìɛ-wɛ̀lɛ̀ e kɛ kélɛ̀ tíé kṹàa lɛ́ ɓe.

¹⁵ À gã̀ mɛ́ e kɛ ɓɔpìà lɛ̀ zí pɛ-kúlú lɛ́ wa sèŋe pɛ-kúlú sèŋepìà, lɛ́ o à kɛ à mɛ́ nyɔ́nɔ́ áà ɓɔ̀ɔ lɛ́ ɓe. À wéè e kɛ kélɛ̀ yíí búnùzɛ̀ tɛ́lɛ́ vĩ̀ lɛ́ ɓe.

¹⁶ Sĩ̀ã́ã̀ŋèlè sálápèèlɛ e kɛ à kɔ̀ yiè kɛ̀lɛ̀. Gèlè-gɔ̃-làà lé pèèlɛ líé zɛ̀ dɔɔ̀ e kɛá à lé. À wɛlɛ mɛ́ e kɛ ɓɔpìà lɛ̀ zí nyɛ́nɛ́ è ɓɔá nyɛ́nɛ́ sósóa lɛ́ ɓe.

¹⁷ Lɛ̀ ma gɛ̃̀ɛ, m pèlè à gã̀ dṹɔ̃̀. M dà nɔ́ lɛ̀ mi bílí lɛ́ ɓe. E e kɔ̀ yiè kpɔ́ m là, áà gèè kélɛ̀, “Yékɛ̀ í túó. Ma lɛ́ m mi bèĩzɛ̀ wà à léĩ́-tó-mɔ̀ káa.

¹⁸ Ma lɛ́ m mi lɛ́ lɛ ɓea káa. M gaà e kɛá. Kɛɛ lɛ̀ gɛ̃̀, m ɓe, ɛ̃́ɛ̃́ ḿm̀ lo kɛɛ̀ ɓe tòá kíli ká. Yíkɛ̀ gáàa lɛ m kɛ̀lɛ̀ ga wà lɛ̀ lɛ́ mia yé o gaà lɛɛ o yía o là.

¹⁹ Ì pɛ lɛ́ ì à gɛ̃̀ɛ bɛ̃̀ɛ̃. Wɔ̃́ lɛ́ lɛ ɓe dɛɛ káa, ɛ̃́ɛ̃́ wà à yé è lo kɛɛ̀ líéa o bɛ̃̀ɛ̃.

²⁰ Sĩ̀ã́ã̀ŋèlè sálápèèlɛ lɛ́ ɓà gɛ̃̀ m kɔ̀ yiè kɛ̀lɛ̀ɛ, ɛ̃́ɛ̃́ nábò yàà-là-pɛ̀ sálápèèlɛ lɛ́ o kɛɛ̀ lɛ góò káa, tó ḿ wɔ̃́ lɛ́ à gbɛ̃̀ɛ̃̀ lɛ o mɔ̀, lɛ́ mia òó gbaa kɛ à dɔpìàa, ḿ gèe i lɛ̀ɛ. Sĩ̀ã́ã̀ŋèlè sálápèèlɛɛ o lɛ́ o Wálà-mìà kpolà sálápèèlɛɛ wà vɔ-mìà káa. E bɛ̀i, nábò yàà-là-pɛ̀ sálápèèlɛɛ lɛ́ o Wálà-mìà kpolà sálápèèlɛɛ káa.