WƆ̃́ LÀṸ YIÈ ZÍ MÁÀ E À BƐ̃̀Ɛ̃ À KÁA 4 - Wè-dɔ-wè Dɛɛ

Pĩ̀ã̀ lɛ́ à gbɛ̃̀ɛ̃̀ lɛ pɛ-taa-mì mɔ̀ɔ

¹ Zízɛ̀ e gbɛ̃̀ zeĩ́, áà pɛ zɔ̃̀ɔ̃̀ mia lɛ̀ɛ Gálàlíì Yíí-pṹã́a sɔ́nɔ́. Mia gbũ páà e kɛ à ká à mɔ̀ yí gbùò zɛ̀. Lɛ̀ e kɛ kília, a mɔ́ɔ̀ wàà ɓo gɔɔ yí, e yà à yí yíía là. Mia kù e kília, o kɛ gbaa kàá kpóṹ là yíía sɔ́nɔ́.

² E pɛ búnùzɛ̀ zɔ̃̀ɔ̃̀ o lɛ̀ɛ pĩ̀ã̀ vɔɔ̀ ká. Lɛ̀ e kɛ pɛ zɔ̃̀ɔ̃̀pìàa, a gèe o lɛ̀ɛ,

³ “Kà ka tóó dɔ. E kɛ gɔ̃ doó ká, lɛ́ e wɛ̀lɛ̀ e ló pɛ taàa.

⁴ Lɛ̀ e kɛ pɛ́ e kília pɛ̃̀ɛ̃̀pìàa, à dò e dà zi gbùò píé. À yé e dà zi gbùò píéa, mɔ̀ɔ̀ vɔ̀ o nu, wa mání.

⁵ À dò bɛ̃̀ɛ̃ e dà gɛ̀lɛ̀ là lɛ́ sɛ́lɛ́ lɛ̀ɛ́ gbaa kɛ yí kpã́-kpã̀a mɔ̀. À yé e kília, e ɓɔ tíè-tíèe, ɓii sɛ́lɛ́ lɛ̀ɛ́ gbaa kɛ yí kpã́-kpã̀.

⁶ Yé nyɛ́nɛ́ e gbɛ̃̀ɛ, e pɛ píní dɛɛ e kília gélé. E kpáa kṹ, ɓii à gáná lóò lɛ̀ɛ́ gbaa kɛ à ká gìè.

⁷ Pɛ wɛ́lɛ́ e kília dò e dà lɛ̀ lɛ́ gɛ́nɛ́ e kɛ yía mɔ̀. Gɛ́nɛ́ e kília, e fàa, e pɛ pínía kṹ e kpɛí. Lɛ̀ e kɛ kília, lɛ̀ɛ́ gbaa ɓa gbaa.

⁸ Ɛ́ɛ̃́ zeĩ́a, à dò e dà sɛ́lɛ́ yiè yí. E ɓɔ. E fàa gbaa, áà ɓà. À gbã̀ã̀ dò wɛ́lɛ́ e kɛ à mɔ̀ vũ̀ yààka, à dò bɛ̃̀ɛ̃ vũ̀ sáláádo, ɛ̃́ɛ̃́ à dò bɛ̃̀ɛ̃ wũ doó.”

⁹ Lɛ̀ e kɛ kília, Zízɛ̀ a gèe, “Mi lɛ́ à tóó è wɔ̃́ maa, è e tóó dɔ.”

Pɛ́ è kɛ̀ lɛ́ Zízɛ̀ è pĩ̀ã̀ vɔɔ

¹⁰ Lɛ̀ lɛ́ Zízɛ̀ lɛ̀ɛ́ gbaa kɛ gbaa mia gbũ fĩ̀ã̀a, mia lɛ́ o kɛ à sɔ́nɔ́, ɛ̃́ɛ̃́ é dàá là tòà-píé-mìà vũ̀ doó wɛ́lɛ́ pèèlɛ bàa, wa wɛ̃́ĩ́-lɔ̀ɔ kɛ pĩ̀ã̀ lɛ́ e o vɔɔ mɔ́ɔ̀ wɔ̃̀ ká.

¹¹ Zízɛ̀ a gèe o lɛ̀ɛ, “Wɔ̃́ lɛ́ à bĩ̀ĩĩ̀ e kɛ à ká, lɛ́ à gbɛ̃̀ɛ̃̀ lɛ Wálà là tò-mia-là mɔ́ɔ̀ wɔ̃̀ mɔ̀ɔ, à nɔɔ̀ lɛ gbaa ka lɛ̀ɛ. Kɛɛ mia gbɛɛ̀ gbɛɛ zìa, óò séĩ́ ma pĩ̀ã̀ ká.

¹² Wɔ̃́ e kília kɛɛ̀ lɛ kíli, ‘Kɛɛ ó o nyìɛ gbɛ̃̀á mɔ̀ mɛɛ káa, yékɛ̀ ó gɛ̃̀ yee ɓo, ɛ̃́ɛ̃́ kɛ ó o tóó dɔ̀á mɛɛ káa, yékɛ̀ ó yí ma. È kɛ̀á lɛ̀ɛ́ gbaa kɛ kília, wáá nìɛ̀ lèĩ o nu Wálà píé, é o kɛ-wɔ̃̀ yɔɔ ɓo o wũ mɔ̀.’ ”

Zízɛ̀ e pĩ̀ã̀ lɛ́ à gbɛ̃̀ɛ̃̀ lɛ pɛ-taa-mì mɔ̀ɔ yí ɓo

¹³ Lɛ̀ e kɛ kília, Zízɛ̀ e o wɛ̃́ĩ́-lɔ̀ɔ kɛ weeá kélɛ̀, “Pĩ̀ã̀ ma vɔ ɓɛ, kàá yí ma? Zi sùu kpɛɛ̀ zɛ̀ lɛ́ kà lo mɔṹ pĩ̀ã̀ nɔ́ɔ fé yí maà à ká?

¹⁴ Pɛ lɛ́ pɛ-taa-mìa a taa, lɛ́ e tɔ́ Wálà lé-wè.

¹⁵ À yé lɛ́ lɛ zi gbuò píéa, lɛ́ e kélɛ̀ mia lɛ́ Wálà lé-wè taà lɛ o yía. Kɛɛ yé waà wéé e kília maa, Sétɔ̃̀ lɛ́ɛ̀ nu nɔ́ zá le, tó e wéé lɛ́ à taà e kɛá o yía sí, áà lò à ká.

¹⁶ Zi nɔ́ doóa, lɛ́ laa ká à yé lɛ́ à taà e kɛá sɛ́lɛ́ lɛ́ gɛ̀lɛ̀ e kɛ à wìa káa. Yé míá o kéa waà Wálà lé-wè maa, óò à kũ géli ká zá le.

¹⁷ Kɛɛ à gáná gbɛ̃̀ɛ̃̀ wá o yí, ɛ̃́ɛ̃́ òó túó o dɔ̀lɔ̀ mɔ̀ fɛ̃̀ɛ̃̀. Kɛɛ yé wɔ̃́ nyɔ́ɔ̀ɔ wà sã̀-dɔ aà ɓɔ o là Wálà lé-wè mɔ́ɔ̀ wɔ̃̀ mɔ̀ɔ, láà kɛ̀ wáà kɔ̃̀ Wálà lé-wè mɔ̀ nɔ́ kpá le.

¹⁸ À dò bɛ̃̀ɛ̃ taà e kɛá lɛ̀ lɛ́ gɛ́nɛ́ e kɛ yía mɔ̀. O lɛ́ o kélɛ̀ mia lɛ́ ò Wálà lé-wè maa.

¹⁹ Kɛɛ óò o zò tàà kpóṹ là pɔ̀ɔ̀ wɛ̃́ĩ̀, ɛ̃́ɛ̃́ pɛ sɔ̀lɔ̀ ɓoò lɛ́ è o zò dàa. E bɛ̀i, wɔ̃́ gbɛɛ̀ gbɛɛ zì lɔ̀-kɛ̀á lɛ o yí. Wɔ̃́ sùu e kéa, lɛ́ɛ̀ dà o zò píé, tó Wálà lé-wè lɛ̀ɛ́ fàa, ɛ̃́ɛ̃́ áà kɔ̃̀ ɓaà mɔ̀.

²⁰ À yé à bɛ̃̀ɛ̃ à taà e kɛá sɛ́lɛ́ yiè yía, lɛ́ e kélɛ̀ mia lɛ́ ò Wálà lé-wè ma, wáà kũ̀ o zɔ̃̀ɔ̃̀ káa. Míá o kília, óò ɓa o ɓɛɛ ká. O dò ɓɛɛ lɛ nì ɓo vũ̀ yààka, vũ̀ sáláádo, ɛ̃́ɛ̃́ wũ doó.”

Nábò yé páni gbiniì lɛ à làa

²¹ Zízɛ̀ a gèe o lɛ̀ɛ, “Óò nu nábò dɔɔ̀ɔ zɛ̀ ká kpá, wáà sì, wáà páni gbìnì à là, ɛ̃́ɛ̃́ óò nu à ká kpá, wáà sì, wáà yà kpĩ̀ĩ̀ wì? Ḿ gɔ̃̀, óò si kpá, wáà yà nábò yàà-là-pɛ̀ là?

²² Pɛ nɔ́ɔ fé lɛ́ à bĩ̀ĩĩ̀ lɛɛ, lɛ́ɛ̀ lo dàà wáà-là, ɛ̃́ɛ̃́ pɛ nɔ́ɔ fé lɛ́ lɛ gbòo wìa, lɛ́ɛ̀ lo ɓɔɔ̀ pɛlɛí.

²³ Mi nɔ́ɔ fé lɛ́ à tóó è wɔ̃́ maa, è e tóó dɔ.”

²⁴ Ɛ́ɛ̃́ a gèe zeĩ́ o lɛ̀ɛ, “Kà ka tóó dɔ wɔ̃́ kà maa mɔ̀. Zí nɔ́ kà paa ká lɛ́ kà nɔá mia lɛ̀ɛ, zí nɔ́ doóa lɛ́ kà lo à gɛ̃̀ɛ̃̀ à káa. Ɛ́ɛ̃́ bɛ̃̀ɛ̃, káà lo à gɛ̃̀ɛ̃̀ tó ka mɛ̀ĩ́ kṹ.

²⁵ Ƃii mi lɛ́ pɛ laa kɛ̀lɛ̀ɛ, óò lo nɔ́ à dò nɔɔ̀ à lɛ̀ɛ tĩã́. Kɛɛ mi lɛ́ pɛ gbɛɛ wá à kɛ̀lɛ̀ɛ, é kɛ bɛ̃̀ɛ̃ à nyɔ̀nɔ́ lɛ́ e à kɛ̀lɛ̀ɛ káa, óò lo à kṹũ̀ à kɛ̀lɛ̀.”

Pĩ̀ã̀ lɛ́ à gbɛ̃̀ɛ̃̀ lɛ ɓu ɓɔɔ̀ɔ zɛ̀ mɔ̀ɔ

²⁶ Zízɛ̀ a gèe kélɛ̀, “Wálà là tò-mia-là lɛ kélɛ̀ gɔ̃ lɛ́ e ɓu taa e píé nyɛ́nɛ̀ĩ̀a lɛ́ ɓe.

²⁷ Lɛ́ɛ̀ yi zɛ bĩ́míà, áà wɛ̀lɛ̀ làapíé. Ƃúa kpù áà zɔ̃̀ɔ̃̀, áà ɓɔ̀. Kɛɛ zí è kɛ̀áa, gɔ̃́ɛɛ làá dɔ.

²⁸ Tã́ã̀a láà kɛ̀, tó pɛ́ɛ áà ɓɔ̀, ɛ̃́ɛ̃́ áà ɓà. Bèĩzɛ̀ɛ, à lɛ́ɛ́ lɛ́ɛ̀ ɓɔ. Tó à gbã̀ã̀ e ɓɔ à yí. Tó à gbã̀ã̀ bɛ̃̀ɛ̃ à wɛ́lɛ́ e ɓɔ à mɔ̀.

²⁹ Lɛ̀ ɓúa e gaa, gɔ̃́ɛɛ e là làà sí nɔ́, áà yɛɓo kɛ̀á, ɓii e kɛ ɓu kã́-lùò ká.”

Pĩ̀ã̀ lɛ́ à gbɛ̃̀ɛ̃̀ lɛ pɛ wɛ́lɛ́ mɔ̀ɔ

³⁰ Zízɛ̀ a gèe, “Pɛ sùu kpɛɛ̀ zɛ̀ lɛ́ kò bɛ̀i à mɔ̀ kó Wálà là tò-mia-là gɔ̃́ à mɔ̀? Pĩ̀ã̀ sùu kpɛɛ̀ zɛ̀ lɛ́ kò bɛ̀i à mɔ̀ kó vɔ à mɔ́ɔ̀ wɔ̃̀ mɔ̀?

³¹ Lɛ kélɛ̀ pɛ wɛ́lɛ́ lɛ́ è kɛ̀ lɛ̀ màà-yè-ŋèlè wɛ́lɛ́ɛ lɛ́ ɓe. Pɛ wɛ́lɛ́ e kília, lɛ kélé kélé pɛ wɛ́lɛ́ vɔ̀ séĩ́ o kpóṹ là zèea píé. Óò dà gìè.

³² Kɛɛ yé waà dà gìèa, lɛ́ɛ̀ ɓɔ. Tó e fàa e die taa-pɔ̀ɔ̀ séĩ́ là. Lɛ́ɛ̀ e kɔ̀ yí wɛ̃̀ĩ. Tó mɔ̀ɔ̀ vɔ̀ wáà o kéĩ́ dɔ̀ à kɔ̀ yí, tó à nìíì áà kɛ̀ o là.”

³³ Zízɛ̀ e Wálà lé-wè gèe o lɛ̀ɛ pĩ̀ã̀ sùu o kéa vɔɔ̀ ká búnùzɛ̀. A gèe o lɛ̀ɛ zí ò bɛ̀i à mɔ̀ ó yí maa káa ká.

³⁴ Lɛ̀ɛ́ gbaa wéé gèe o lɛ̀ɛ, yé lɛ̀ɛ́ pĩ̀ã̀ vɔ nɛ́ɛ ká. Kɛɛ lɛ̀ wà là tòà-píé-mìà o tó o doó káa, e wɔ̃́ nɔ́ɔ fé yí ɓo o lɛ̀ɛ.

Zízɛ̀ e fã̀ã̀ wà yíí o tèá

³⁵ Lúó doó e kília nyɛ́ŋɛ̀ĩpíé káa, Zízɛ̀ a gèe là tòà-píé-mìà lɛ̀ɛ, “Kɔ̀à lo yíía mɛ̀ĩ́.”

³⁶ O gó gbaa mia gbũa yí. Zízɛ̀ là tòà-píé-mìàa o yà gɔɔ lɛ́ Zízɛ̀ e kɛ à yía yí, o Zízɛ̀ sí gbaa, o ló à ká. Gɔɔ dò e kɛ yí kíli.

³⁷ Lɛ̀ e kɛ nɔ́ kília, fã̀ã̀ yí-gágà-zɛ̀ áà dìè, ɛ̃́ɛ̃́ yíí áà vɔ̀, áà kàà gɔ́ɔ́ɔ yí. Lɛ̀ e kɛ kília, gɔ́ɔ́ɔ e kɛ papìà gbaa yíí ká.

³⁸ Zízɛ̀ wũ-kèlè e kɛ kpɔ̀á wũ-dɔ̀à-là-pɛ̀ là, áà yi zɛ̀ gɔ́ɔ́ɔ zízàá-pìà. Wa vùò, wáà gèè à lɛ̀ɛ, “Tísɛ̀, ko kpàà wá i mɔ̀, lɛ́ kò ga ɓɛ?”

³⁹ Zízɛ̀ e vùò, e mɛ́ĩ́ ɓo fã̀ã̀a lɛ̀ɛ, áà gèè yíía lɛ̀ɛ, “Ì dɔ tã́ã̀ dĩĩ le. Ì tèá vĩ́ ɓoò ká.” Lɛ̀ e kɛ kília, fã̀ã̀a e tèá. Ɛ́ɛ̃́ yíía e dɔ tã́ã̀ gbaa dĩĩ le.

⁴⁰ Zízɛ̀ a gèe gbaa o lɛ̀ɛ, “Mɛ́ e kɛ lɛ́ kà tùò ké ɓe? Zò-dɔ̀à-mɔ̀ wá nɛ́ ka yí kɛ̀è?”

⁴¹ Kɛɛ túó e nu o là gbùò, wáà gèè o kíe nì lɛ̀ɛ, “Dé e gɔ̃́ e kéa ká, lɛ́ fã̀ã̀ wà yíí bɛ̃̀ɛ̃ ò à wè kɛ̀ ɓɛ?”