WƆ̃́ LÀṸ YIÈ ZÍ MÁÀ E À BƐ̃̀Ɛ̃ À KÁA 15 - Wè-dɔ-wè Dɛɛ

Zízɛ̀ lɛ Pálɛ̀ wɛlɛ líé

¹ Lɛ̀ làapíé e kɛɛ, sálà-ɓò-Wálà-mɔ̀-mìà kpànazɛ̀, ɛ̃́ɛ̃́ mia dìè-dìè vɔ̀, e bɛ̀i Wálà kii-dɔ-mìà, ɛ̃́ɛ̃́ mɛ̀ĩ́-sà ɓo-mìà séĩ́ o ló wũ-dũ yí. O Zízɛ̀ yèlè, o ló à ká, wa nɔ Pálɛ̀ lɛ̀ɛ.

² Pálɛ̀ e Zízɛ̀ wɛ̃́ĩ́-lɔ̀ɔ kɛ, áà gèè, “Ƃi lɛ́ i Zúù-mìà líé-sí-mì káa?” Zízɛ̀ a gèe à lɛ̀ɛ, “Zí ɓa gèe à káa lɛ.”

³ Sálà-ɓò-Wálà-mɔ̀-mìà kpànazɛ̀ɛ, wa gèe kélɛ̀ Zízɛ̀ aà wɔ̃́ yɔɔ búnùzɛ̀ kɛ.

⁴ Pálɛ̀ e bɛ̀i a wɛ̃́ĩ́-lɔ̀ɔ kɛ zeĩ́ kélɛ̀, “Wɔ̃́ gbɛɛ wá i lé kɛ ɓá gèe? Wɔ̃́ yɔɔ sùu lɛ́ waà kpɔ́ i wĩĩ́a, ɓáà gɛ̃̀?”

⁵ Kɛɛ Zízɛ̀ lɛ̀ɛ́ gbaa wɔ̃́ gbɛɛ gèe à mɛ̀ĩ́. Yé e kɛ kília, Pálɛ̀ lé e pa gbaa.

Wa gèe Zízɛ̀ é ga

⁶ Dìè-mia-là Kpílì lúó nɔ́ɔ fé káa, Pálɛ̀ lɛ́ɛ̀ mia lɛ́ o kɛ bĩ́-kɛ̀ìa, doó-mì lɛ́ míáa ò zɔ̃̀ɔ̃̀ à lɛ̀ɛ ɓo bĩ́-kɛ̀ì.

⁷ Lúó lɛ́ e kília káa, gɔ̃ lɛ́ o kɛ à sípìà Bàlábàa, e kɛ mia lɛ́ ò gèlè gɔ̃ gòmɛ́nɛ̀ káa, bà bĩ́-kɛ̀ìa mɔ̀. Míá o kília, o mia zɛ, lɛ̀ lɛ́ o kɛ gèlè gɔ̃pìà gòmɛ́nɛ̀ káa ká.

⁸ Mia gbũ o nu Pálɛ̀ píé, o gbɛ̃̀ gbaa, wáà gèè à lɛ̀ɛ é wɔ̃́ lɛ́ à kɛ̀ kpá o lɛ̀ɛ Dìè-mia-là Kpílì lúó káa kɛ.

⁹ Pálɛ̀ e o wɛ̃́ĩ́-lɔ̀ɔ kɛ kélɛ̀, “Káà nàà ḿ kã́ Zúù-mìà líé-sí-mìa mɔ̀ ka lɛ̀ɛ?”

¹⁰ Pálɛ̀ a gèe kíli, ɓii wɔ̃́ lɛ́ sálà-ɓò-Wálà-mɔ̀-mìà kpànazɛ̀ wa mɔ́ɔ̀ Zízɛ̀ nɔ ɓo à lɛ̀ɛ, láà dɔ. Ye lɛ́ e tɔ́ dàa-gbe lɛ.

¹¹ Kɛɛ sálà-ɓò-Wálà-mɔ̀-mìà kpànazɛ̀ɛ, o kɛ mia gbũa fĩ̀ã̀, wáà gèè míáa lɛ̀ɛ, “Kà gèe Pálɛ̀ lɛ̀ɛ é Bàlábà ɓo bĩ́-kɛ̀ì ka lɛ̀ɛ, kɛɛ Zízɛ̀ é tó à dɔ̀lɔ̀ yí.”

¹² Pálɛ̀ a gèe zeĩ́ mia gbũa lɛ̀ɛ kélɛ̀, “Yé aà kɛ kília, mɛ́ m̀ lo à kɛɛ̀ mi lɛ́ kà si Zúù-mìà líé-sí-mìa ká mɔṹ?”

¹³ O gbɛ́ɛ́ à là weeá kélɛ̀, “À pá nélè ká kɔ́lɔ́sì mɔ̀.”

¹⁴ Pálɛ̀ a gèe o lɛ̀ɛ, “Mɛɛ wɛ̃́ĩ̀? Mɛɛ wɔ̃̀ yɔɔ lɛ́ a kɛ?” O bɛ̀i, o gbɛ́ɛ́ zeĩ́ gágà, wáà gèè, “À pá nélè ká kɔ́lɔ́sì mɔ̀.”

¹⁵ Pálɛ̀ a naa é mia gbũ o kília zò-dà-wɔ̃̀ kɛ. À mɔ́ɔ̀ wɔ̃̀ mɔ̀ɔ, e Bàlábà ɓo bĩ́-kɛ̀ì o lɛ̀ɛ. Pálɛ̀ a kɛ gbaa, wáà Zízɛ̀ mɛ̀ píé gbàtò ká. Yé e kɛ kília, e Zízɛ̀ nɔ gbaa mia lɛ̀ɛ ó à pá nélè ká kɔ́lɔ́sì mɔ̀.

Sóyà vɔ̀ɔ o yéí sí Zízɛ̀ mɔ̀

¹⁶ Sóyà vɔ̀ɔ o wàà Zízɛ̀ ká dɔ-gàlàa yí. (Gàlà e kília lɛ́ e sɛ́lɛ́ wũ-là-mì yà-pìà káa.) E bɛ̀i, sóyà vɔ̀ɔ o o ɓɛ́ĩ̀ sóyà vɔ̀ súo kɛ.

¹⁷ Yé e kɛ kília, o sɔ zóló dà Zízɛ̀ mɔ̀. O ɓɛ̀lɛ̀-kálá gɛ́nɛ́ zɛ̀ kpɛ́nɛ́ e kíe ká, wa wàà à wũ mɔ̀.

¹⁸ O gbɛ̃̀ gbaa, wáà wèè à píé weeá kélɛ̀, “Zúù-mìà Líé-sí-mì, i yìì píé é kɛ gbèĩ.”

¹⁹ O kɛ à mɛ̀pìà e wĩĩ́ yílí ká, ɛ̃́ɛ̃́ wáà o lélií sùò à là, wáà kàà o kpuò là à gã̀ dṹɔ̃̀, lɛ̀ pɛ lɛ́ o à ɓɛ̀lɛyà pìà.

²⁰ Lɛ̀ o nyɛ yéí sì à mɔ̀ mɔ̀ɔ, o sɔ zólóa ɓo à mɔ̀, o à dìè-tĩ́ là sɔ sí, wa dà à mɔ̀. Wa gbɛ̃̀ pɛlɛí, wáà lò à páà nélè ká kɔ́lɔ́sì mɔ̀.

O Zízɛ̀ pá nélè ká kɔ́lɔ́sì mɔ̀

²¹ Sáímɔ̀, lɛ́ è go Sàlĩ́ĩ̀ ɓɛ, e kɛ nupìà pɛlɛí, áà gò sɛ́lɛ́ kélé kélé e tóa yí píé. Gɔ̃́ e kília e kɛ Ɛ́lèzánà wà Wúlúfà o dàa ká. Yé e kɛ diepìàa, sóyà vɔ̀ wa kṹ gana ká, é Zízɛ̀ là kɔ́lɔ́sì vũ.

²² O nu Zízɛ̀ ká lɛ̀ lɛ́ ò si Gɔ̀gɔ́tàa mɔ̀. Gɔ̀gɔ́tà yí lɛ́ e kélɛ̀ kpò-kòlò-wɛ́lɛ́ pà.

²³ O wã́ã́ĩ̀ lɛ́ wa bòo yílí-ɓɛ̀ɛ ò si mɛ́ɛ̀ɛ káa, nɔ Zízɛ̀ lɛ̀ɛ. Kɛɛ lɛ̀ɛ́ gbaa à mi.

²⁴ O à pá kɔ́lɔ́sì mɔ̀ nélè ká. O Zízɛ̀ mɔ̀-sɔ̀ yí gìnì o kíe mɔ̀. O kɛ gɔ̃-pɛ̀ gɔ̃pìà, kɛɛ ó sɔ yé ò lo lóò à ká píéa dɔ.

²⁵ E kɛ nyɛ́nɛ́-nɛ̀ɛ̀ mɛ́-kpálàa zɛ̀ ká lɛ̀ lɛ́ o Zízɛ̀ pá nélè ká kɔ́lɔ́sì mɔ̀ɔ ká.

²⁶ Wɔ̃́ wa mɔ́ɔ̀ à zɛ ɓoa bɛ̃̀ɛ̃ɛ̃̀ e kɛá yi. Wɔ̃́ e kília yí lɛ́ e kélɛ̀, “Zúù-mìà Líé-sí-mì.”

²⁷ O bɛ̀i, o kã̀ã-mìà pèèlɛ wà Zízɛ̀ nì o pá nélè ká kɔ́lɔ́sì mɔ̀. Wa doó-mì dɔ Zízɛ̀ kɔ̀ yiè yí. Mi yé e tóa bɛ̃̀ɛ̃, wa dɔ à kɔ̀ gbiè yí. [

²⁸ Zí e kéa káa, wɔ̃́ lɛ́ à bɛ̃̀ɛ̃ɛ̃̀ lɛ Wálà kii yí, lɛ́ e kélɛ̀, “Wa dà kɛ-pɛ̀ yɔɔ kɛ-mìà bàa,” e kɛá wánà zɛ̀.]

²⁹ Mia yé o kɛ diepìàa, o o bè yɛ́ Zízɛ̀ ká, ɛ̃́ɛ̃́ o o wũ-kèlè zṹũ̀ zɛ, wáà gèè Zízɛ̀ lɛ̀ɛ, “Ɛ̀hɛ̃́ɛ̃̀, ɓí i kɛ lópìà sálà-ɓò-Wálà-lɛ̀ɛ-kà wíì tã́ã̀, ɓá dɔ lɛ̀-kpɛ̀i yààka píéa,

³⁰ gbɛ̃̀ tã́ã̀ í gó kɔ́lɔ́sìa mɔ̀, í i dìè la.”

³¹ Zi nɔ́ doóa káa, sálà-ɓò-Wálà-mɔ̀-mìà kpànazɛ̀, ɛ̃́ɛ̃́ Wálà kii-dɔ-mìàa, o kɛ yéí sípìà Zízɛ̀ mɔ̀, wáà gèè o kíe lɛ̀ɛ, “E kɛ mia gbɛɛ lapìà, kɛɛ lɛ̀ɛ́ bɛ̀i e dìè laà.

³² Kɛ́lɛ̀ì, lɛ́ e Éézɛ̀lɛ̀-mìà zì Líé-sí-mì káa, è gbɛ̃̀ tã́ã̀ gbaa, é gó kɔ́lɔ́sìa mɔ̀, kɛ kó à gɛ̃̀, ɛ̃́ɛ̃́ kɛ kó à mɔ́ɔ̀ wɔ̃̀ gɛ̃̀ wánà ká.” Mia lɛ́ o o pá nélè ká kɔ́lɔ́sì mɔ̀ à sɔ́nɔ́ɔ, o o wè sí nɔ́ Zízɛ̀ mɔ̀ kíli.

Zízɛ̀ ga-zì

³³ Lɛ̀ nyɛ́nɛ́-dɔ̀-mia-tùluù-zèí-lùò e ɓɔɔ, bĩ́ e dà sɛ́lɛ́ e kília yí lɛ̀ɛ tɛ̃̀ɛ̃́ɛ mɔ̀, é tóá kíli é ɓɔá nyɛ́nɛ́-tɛ̃́-nyɛ̀nɛ̀ mɔ̀.

³⁴ Lɛ̀ nyɛ́nɛ́ e tɛ̃́ɛ, Zízɛ̀ e gbɛ́ɛ́ dóo gágà, áà gèè, “Ílɔ́ì, ílɔ́ì lámà sàbákálènì.” Wéé e kília yí lɛ́ e kélɛ̀, “M̀ Wálà, m̀ Wálà, mɛ́ e kɛ lɛ́ i kã́ m mɔ̀ ɓe?”

³⁵ Míá o kɛ dɔ̀á yia dò wa ma, wáà gèè kélɛ̀, “Lɛ̀ gɛ̃̀. Gɔ̃́ɛɛ lɛ Ìláyà súo kɛpìà.”

³⁶ Míá o kília doó-mì, e ló bàlá, e pɛ vɔ́ɛ́-vɔ̀ɛ̀ dò wàà yɔ yíí kpɔ̀nɔɔ̀ɔ zɛ̀ dò bà, a dɔ yílí lé, áà nɔ̀ Zízɛ̀ lɛ̀ɛ á pɔ̀nɔ́. Gɔ̃́ e kília, áà gèè, “Kà dɔ, kɔ̀àa yɛ́lɛ́ yà, é kɛ̀á Ìláyà lɛ́ɛ̀ lo nuù é à ɓeí, é à gbɛ̃̀ tã́ã̀a, kɛ kɔ́á gɛ̃̀.”

³⁷ Zízɛ̀ e gbɛ́ɛ́ gbaa gágà, e e wúú líé-nyɛ-mɔ̀ káá gbaa, áà gà.

³⁸ Sɔ lɛ́ à dũũ̀ e kɛá sálà-ɓò-Wálà-lɛ̀ɛ-kàa wìa, e pɛ́ɛ́ gbaa. À pɛ̃́ɛ̃́ e kɛ pèèlɛ. E gbɛ̃̀ pɛ́ɛ́ ká lɛ̀í, áà nùá tã́ã̀.

³⁹ Sóyà vɔ̀ líé-sí-mì lɛ́ e kɛ dɔ̀á kɔ́lɔ́sìa wɛlɛ mɔ̀ɔ, e zi lɛ́ Zízɛ̀ e ga à káa gɛ̃̀. Lɛ̀ e kɛ kília, a gèe kélɛ̀, “Gɔ̃́ e kéa, lɛ dóo Wálà Gbe kpó-kpó ká.”

⁴⁰ Loà dò o kɛ yí kíli. O kɛ dɔ̀á gbèkèni, wáà lɛ̀ gɛ̃̀. Melé lɛ́ è go Mádɛ̀lɛ̀-pɛlɛíaò, ɛ̃́ɛ̃́ Melé lɛ́ e kɛ Zĩ́ĩ̀ nyɔ̀nɔ́-mì wà Zózɛ̀ o lèe káa, e bɛ̀i, Sàlómèò, o kɛ o bà.

⁴¹ Loà o kília, o kɛ tópìà Zízɛ̀ píé lɛ̀ e kɛ Gálàlíìa ká, wáà gbũ̀ à mɔ̀. Loà búnùzɛ̀ gbɛɛ̀ gbɛɛ, lɛ́ wà Zízɛ̀ nì o nuù e kɛ à ká Zùlúsàlɛ̀ɛ, o kɛ yí kíli.

Zízɛ̀ bĩ̀ĩ̀-kɔ̀

⁴² Nyɛ́ŋɛ̀ĩpíé e kɛ. E kɛ Kpílì Pɛ̀-kɛ-lùò ká. Lúóa lɛ́ e kélɛ̀ lúó lɛ́ e o fĩ́ĩ́-dɔ-lùò wɛlɛ mɔ̀ɔ káa.

⁴³ Zósɛ̀ lɛ́ è go Alèmàtíàa ye lɛ́ e kɛ mɛ̀ĩ́-sà ɓo-mìà bà, lɛ́ mia o kɛ à ɓɛ̀lɛyà pìàa. À bɛ̃̀ɛ̃, à nyìɛ e kɛ nɔ́ Wálà zì tò-mia-là nu-lùò gɛ̀nɛ̀ kíli. À kɛ̀ é kɛ Kpílì Pɛ̀-kɛ-lùò káa, e e zò dɔ gáàa, e ló Pálɛ̀ píé, áà Zízɛ̀ bílí pɛ̃̀ à mɔ̀.

⁴⁴ Pálɛ̀ lé e pa, kɛɛ á ma kélɛ̀ Zízɛ̀ aà ga gbaa. E mi vɔ é ló sóyà vɔ̀ líé-sí-mìa súo kɛɛ̀. Lɛ̀ e nua, Pálɛ̀ a wɛ̃́ĩ́-lɔ̀ɔ kɛ kélɛ̀, “Zízɛ̀ aà ga kɛ̀ɛ̀ pɛ́lɛ̀?”

⁴⁵ Lɛ̀ a ma gbaa sóyà vɔ̀ líé-sí-mìa lé kélɛ̀ Zízɛ̀ aà gaa, e Zízɛ̀ bílí nɔ gbaa Zósɛ̀ lɛ̀ɛ.

⁴⁶ Zósɛ̀ e sɔ púlú lɔ́, e Zízɛ̀ bílí ɓo lɛ̀í, a kpɛ́nɛ́ sɔ púlú e kília yí, e ló à ká, a wɔɔ bũ lɛ́ wa fòo gɛ̀lɛ̀ yía yí. E gɛ̀lɛ̀ gbùò dò gìni-gíní, a tɛ̃́ bṹ e kília lé.

⁴⁷ Melé lɛ́ è go Mádɛ̀lɛ̀-pɛlɛía, ɛ̃́ɛ̃́ Melé lɛ́ e kɛ Zózɛ̀ lèe káa, o lɛ̀ lɛ́ o Zízɛ̀ bĩ̀ĩ̀ yia gɛ̃̀.