Máfìù 7 - Wè-dɔ-wè Dɛɛ

Mɛ́ĩ́ yɔɔ ɓò mia gbĩ mɔ̀

¹ “Yékɛ̀ ká mɛ̀ĩ́‐sà káá mia wĩĩ́. Yé kaà gɔ̃́ à kɛɛ̀ kília, Wálà lɛ̀ɛ́ ló mɛ̀ĩ́‐sà káà ka wĩĩ́.

² Ƃii Wálà lɛ́ɛ̀ lo mɛ̀ĩ́‐sà káà ka wĩĩ́ zi nɔ́ kà mɛ̀ĩ́‐sà kàà ká mia wĩĩ́a ká. Zí kà pɛ gɔ̃á mia lɛ̀ɛ, Wálà lɛ́ɛ̀ lo ka zì gɔ̃́ɔ̃̀ à ká.

³ Mɛ́ e kɛ lɛ́ i yɛ́lɛ́ lɛ yílí‐séé lɛ́ e i lèe‐gé nyìɛɛ píé, lɛ́ i yɛ́lɛ́ nyɛɛ̀ lɛ yílí‐kpàla ké e i nyìɛɛ píé ɓɛ?

⁴ Zi sùu kpɛɛ̀ lɛ́ ì bɛ̀i à mɔ̀ ɓá gèeá i lèe‐gé lɛ̀ɛ, ‘Tó ḿ yílí‐séé e i nyìɛɛ ɓeí,’ yé yílí‐kpàla lɛ i nyìɛɛ ká?

⁵ Ƃí ì i dìè wɛlɛ li e ké ɓɛ. Ì yílí‐kpàla lɛ́ lɛ i nyìɛɛ ɓeí nɛ́. Yé aà kɛ kília, bɛ̀i lɛ́ɛ̀ lo kɛɛ̀ i mɔ̀ kɛ í lɛ̀ gɛ̃̀, kɛ í tĩã́ yílí‐séé lɛ́ e i lèe‐gé nyìɛɛ ɓeíì.

⁶ “Yékɛ̀ ká pɛ lɛ́ lɛ púlúa nɔ gbã́ lɛ̀ɛ. Ɛ́ɛ̃́ yékɛ̀ ká kà gɛ̀lɛ̀ sɔ̃̀ɔ̃́ gbùò zɛ̀ dùò ɓɔ̀ vɔ̀ fĩ̀ã̀. Yé kaà kɛ kília, táá lɛ́ nɔ́ ò lo à ɓoò o làa. Ɛ́ɛ̃́ óò lo nìɛ̀ o ka kṹ.

Kà pɛ pɛ̃́

⁷ “Kà pɛ pɛ̃́. Ká kɛ̀á kília, káà lo à sɔ̀lɔ̀ ɓoò. Kà pɛ naa. Káà lo pɛ gɛ̃̀ɛ̃̀ yé kaà kɛ kília ká. Kà ká lé mɛ̀. Ká kɛ̀á kília, à lé lɛ́ɛ̀ lo ɓoò ka lɛ̀ɛ.

⁸ Ƃii mi nɔ́ɔ fé lɛ́ è pɛ pɛ̃ɛ, lɛ́ɛ̀ lo pɛ sɔ̀lɔ̀ ɓoò. Ɛ́ɛ̃́ mí è pɛ nààa, lɛ́ɛ̀ lo pɛ gɛ̃̀ɛ̃̀. Ɛ́ɛ̃́ ká lé lɛ́ɛ̀ lo ɓoò mí à lé mɛ̀ɛ lɛ̀ɛ.

⁹ Mia lɛ́ ka nɛ́ dàa nì káa, ka dò lɛ́ɛ̀ lo gɛ̀lɛ̀ nɔɔ̀ là nɛ́ lɛ̀ɛ, yé là nɛ́ aà belè pɛ̃́ à mɔ̀ɔ ká?

¹⁰ Ɛ́ɛ̃́ lɛ́ɛ̀ lo mɛ̀nɛ nɔɔ̀ là nɛ́ lɛ̀ɛ, yé aà kpã̀ã́ pɛ̃́ɛ ká?

¹¹ Lɛ̀ zí bɛ̃̀ɛ̃ ka kɛ‐pɛ̀ lɛ à ká yɔɔ, káà pɛ yiè nɔ̀ kà nɔ́ɔ̀ lɛ̀ɛ zì dɔ. Zi sùu kpɛɛ̀ lɛ́ ka Dàa lɛ́ e lɛ̀ía, è lo pɔɔ̀ yiè yiè nɔɔ̀ à ká mia lɛ́ ò o pɛ̃ à mɔ̀ɔ lɛ̀ɛ ké.

¹² “Kà wɔ̃́ kɛ mia ká lɛ̀ zí kà nàà ó wɔ̃́ kɛá ka káa lɛ́ ɓe. Ƃii Móózè là Lɔ́ɔ̀ɔ, wà wɔ̃́ lɛ́ dɔ̀‐Wálà‐lé‐là‐mìàa o à gèea, à yí lɛ́ ɓɛ.

Gàlà‐lé sɔ́ɔ́‐sɔ̀ɔ̀ zɛ̀

¹³ “Kà kpɔ́ gàlà‐lé sɔ́ɔ́‐sɔ̀ɔ̀ zɛ̀ɛ ká. Ƃii zi lɛ́ è lo mia yí‐sìè‐pìàa tàà‐à‐píé lɛ lɔ́ɔ́‐lɔ̀ɔ̀, ɛ̃́ɛ̃́ à mɔ́ɔ̀ gàlà‐lé lɛ gbùò. Ɛ́ɛ̃́ mia kù gbùò zɛ̀ óò to zí e kília píé.

¹⁴ Zi lɛ́ è lo lɛ̀ lɛ́ kɛ̀ɓe lɛ yía mɔ̀ɔ, tàà‐à‐píé lɛ gágà, ɛ̃́ɛ̃́ à mɔ́ɔ̀ gàlà‐lé lɛ sɔ́ɔ́‐sɔ̀ɔ̀. Ɛ́ɛ̃́ mia wɛ́lɛ́ ɓéĩ́ lɛ́ nɔ́ ò à gɛ̃̀ɛ.

Yílí wà e ɓɛɛ

¹⁵ “Kà ka yɛ́lɛ́ kɛ ka dìè píé mia lɛ́ ò o dìè si dɔ̀‐Wálà‐lé‐là‐mìà, lɛ́ o wá mɔṹ à káa wɛ̃́ĩ̀. Óò nu ka píé e kpɔ́lɔ́ṹ‐kpɔ̀lɔ̀ũ̀ ká lɛ̀ ɓáá lɛ́ ɓe. Kɛɛ o zò píé zàá yee, o yí lɛ̀ gɔ́ nyaàa lɛ́ ɓe.

¹⁶ Káà lo o dɔɔ̀ o zì wɔ̃́ kɛ‐kɔ̀ mɔ̀. Gɛ́nɛ́ yìlì lɛ̀ɛ́ ɓa pɛ ɓɛɛ lɛ́ ò kɛ̀ wã́ã́ĩ̀ káa ká. Ɛ́ɛ̃́ sùu gɛ́nɛ́ zɛ̀ lɛ̀ɛ́ ɓa féè ká.

¹⁷ Yílí yiè lɛ́ɛ̀ ɓa e ɓɛɛ yiè ká. Tó yílí yɔɔ bɛ̃̀ɛ̃ áà ɓà e ɓɛɛ yɔɔ ká.

¹⁸ Yílí yiè lɛ̀ɛ́ bɛ̀i ɓaà e ɓɛɛ yɔɔ ká. Ɛ́ɛ̃́ yílí yɔɔ bɛ̃̀ɛ̃ lɛ̀ɛ́ bɛ̀i ɓaà e ɓɛɛ yiè ká.

¹⁹ Yílí nɔ́ɔ fé lɛ́ lɛ̀ɛ́ ɓa e ɓɛɛ yiè káa, óò kã, tó wa dùò tíè.

²⁰ À mɔ́ɔ̀ wɔ̃̀ mɔ̀ɔ, káà lo míá o kília dɔɔ̀ o zì wɔ̃́ kɛ‐kɔ̀ mɔ̀.

M̀ḿ gbaa ka dɔ

²¹ “Mia lɛ́ ò m si ‘M Dàa‐mì, m Dàa‐mìa,’ o séĩ́ òó ló ɓɔɔ̀ lɛ̀ lɛ́ Wálà lɛ́ e lɛ̀ía, tóò lɛ mia là yia mɔ̀. Kɛɛ mia lɛ́ ò wɔ̃́ lɛ́ m Dàa lɛ́ e lɛ̀ía à nàà ó kɛɛ kɛ̀ɛ, lɛ́ nɔ́ ò lo ɓɔɔ̀ yia.

²² Yé Lúó e kília aà ɓɔɔ, mia búnùzɛ̀ óò lo à gèeè m lɛ̀ɛ, ‘Ko Dàa‐mì, ko Dàa‐mi, ḿ gɔ̃̀, ko Wálà lé‐wè gèe i tɔ́ yí, kɔ́áà pɛ yɔɔ búnùzɛ̀ ɓò mia píé i tɔ́ yí, ɛ̃́ɛ̃́ kɔ́áà wɔ̃́ kpàlézɛ̀ búnùzɛ̀ kɛ̀ i tɔ́ yí nɔ́ kíli.’

²³ Yé aà kɛ kília, ḿm̀ lo à gèeè o lɛ̀ɛ, ‘M̀ḿ gbaa ka dɔ gbɛɛ ɓo. Kɛ‐pɛ̀ yɔɔ kɛ‐mìà ka ké ɓɛ. Kà gó dɔ̀á m là.’

Ká dɔ‐mìà pèèlɛɛ

²⁴ “À mɔ́ɔ̀ wɔ̃̀ mɔ̀ɔ, mia séĩ́ lɛ́ ò o tóó dɔ m wéè mɔ̀, lɛ́ ò à kɛ̀ɛ, óò lo kɛɛ̀ lɛ̀ gɔ̃ gíkã́ã̀a zɛ̀ lɛ́ e là ká dɔ gɛ̀lɛ̀ làa lɛ́ ɓe.

²⁵ “Lɛ̀ɛ e bã, yíí e pa. Fã̀ã̀ e die áà zɔ̃̀ ká e kília mɔ̀. Kɛɛ lɛ̀ɛ́ gbaa wí, ɓii à dɔɔ̀ lɛ gɛ̀lɛ̀ làa mɔ́ɔ̀ wɔ̃̀ mɔ̀.

²⁶ “Ɛ́ɛ̃́ mia séĩ́ lɛ́ ò o tóó dɔ m wéè mɔ̀, lɛ́ òó à kɛɛ, óò lo kɛɛ̀ lɛ̀ gɔ̃ wúàa zɛ̀ lɛ́ e là ká dɔ nyìɛ́‐sɛ́lɛ́ làa lɛ́ ɓe.

²⁷ Lɛ̀ɛ e bã, yíí e pa. Fã̀ã̀ e die áà zɔ̃̀ ká e kília mɔ̀. Ká e kília e wí tã́ã̀. Wí a ɓo kília, e kɛ yɔɔ kpó‐kpó ɓo.”

Zízɛ̀ zì yíkɛ̀ gáàa

²⁸ Lɛ̀ Zízɛ̀ e nyɛ wɔ̃́ nì e kéa gèeè mɔ̀ɔ, mia kùa o lé e pa pɛ‐zɔ̃̀ɔ̃̀‐kɔ̀ lɛ́ Zízɛ̀ e kɛ à zɔ̃̀ɔ̃̀pìàa mɔ́ɔ̀ wɔ̃̀ ká.

²⁹ Lɛ̀ɛ́ gbaa zɔ̃̀ɔ̃̀ lɛ̀ zí Wálà kii‐dɔ‐mìà ò à zɔ̃̀ɔ̃̀ à káa lɛ́ ɓe. Kɛɛ a zɔ̃̀ɔ̃̀ yíkɛ̀ gágà ká.